Nte 26

Faulo ugitetea mughonjo usonge amwa Agirifa

1Agirifa agamukhanëa Faulo, “Veve warekewa urighëëtya gusoko ako mughonjo.” Uvii Faulo agaghoora mukhono wakwe na agagitetea:

2“Nene mughonjo ngughema mwino nahanga gësyu gëkuu utendeka në usonge ako, Mutemi Agirifa. Nene ngitetea mughonjo reo masitaaka oong'e në nene nasitaakiwe na Ayahudi, 3gusoko veve umanyie ija ntende yoong'e na wikungumi wa Ayahudi. Gwa uvii nene nguguromba veve untegheeye nene gwa ughimëëyi.

4“Ayahudi voong'e vaminyie mwino naduvie ufuma në arë në mubalanda. Veeso vamanyie ufuma mwandyo mwino natumëe uduvi wane woong'e mukhatëkhatë a ndughu ane mughonjo na kuuko uYerusalemu. 5Veeso vamanyie gwa itungo ririfu, nëmbesa veeso vëufenja usudangëa, mwino gwa uhonga ikhakho ritu ra dini nërëhongie seria ino ukëa angëja oong'e nene ngaduva mwino në Mufarisayo. 6Na itungwee nene nëmëkie hafai nëramwuwe gusoko a ighonje ra iraghano në Muungu waarafëye vakuku vitu. 7Ighonje ërëi unë mëango ikumi na ëvëë a vana va Isiraeli vëhuvëe vinjë ufikëa, mwino veeso vëumükürya Muungu gwa nkhoo yawe yoong'e utiku nanë mumwë. Na gusoko a ighonje ërëi Ayahudi vansitaakie nene, Veve mutemi. 8Asikë mukhatë anyu nëmughema mwino në gukaku kunë Muungu ufëtya akuyi?

9“Nene mughonjo arë nëhuvëe gwa ihaa rane roong'e mwino nënoneye utenda mantu maingë gwa urëfënga rina ramwa Yesu wa uNasareti. 10Na natendie uyi uYerusalemu. Gwa udaho nënafiwe ufuma gwa akumbëki në aküü, ntinavatunga gutufu ahuvëi vaingë mung'ë a jera, ëgweeso nanë veeso varamwëywa ukuya nene nëgayanjisiwa na uramwui wasuu. 11Na nene ngavakuurya veeso mëhënjo mingë mung'ë a masinagogi oong'e na ngaighëëya uvaumëya veeso vërighëëtye nkhani në mbë. Na ngavaonea veeso ikuwo mwë muhari, ngavakhasya veeso mbesa u miji a ung'ë në ng'enyi.

Faulo ugudona mwino watyoekie

12“Uvii nene ngaenda faka uDamesiki itambëëmwe na iraghëëyo ra akumbëki në aküü. 13Mumwëkhatë gëfaghato, Veve mutemi, nene ngaona munjëa weru ufumie girunde, weru üküü ukëa wa yuva, umwëkie umpimëye nene nanë avoo unë naa gwëmuhënjo umwedu ginao. 14Nanë aarë sese soong'e gwa fang'ë, nene ngategheeya ruri ugunkhanëa gwa ndëghëëtya a Gëëburania, ‘Sauli, Sauli, asikë në veve ugunkhasya nene? Ugivaarya veve mughonjo gwa ufanda mwanga wa mutojo?’ 15Na nene ngahanya, ‘Veve wë anyu, Müküü?’ Na Müküü agahanya, ‘Nene në Yesu unë veve ugunkhasya nene. 16Ëgweeso uka na ëmëka gwa mëghuu ako. Gusoko nene nagudwëëra veve gusoko a ndolyo ëyee, uguëka veve utendeke u mutumwa wane na masudanga wa mantu unë veve wayaghune kunë nene na gwa mantu ayoo unë nene ninjë giraghëëra kun'e veve. 17Nene ngugutyoa veve ufuma gwa antu va Isiraeli na ufuma gwa antu nëti Ayahudi unë nene ngugutuma kunë veeso. 18Veve winjë urughua miho awe, uvii veeso vëdahe ufentuka ufuma u kiti gwenda u weru na ufuma u nguu yamwa setani gwenda kunë Muungu. Gwa utenda uyi, veeso vëdahe ughenyifa irekewa ra mahutye na uhanga ikhondo mung'ë a avoo unë veeriywe gwa ung'uvëa nene.’

Faulo ugudona mwëëmo wakwe.

19“Gwa uvii, Veve Mutemi Agirifa, ntinafënga ndoti ufuma girunde. 20Ëgweeso nene mwandyo ngavatanantëya antu va uko uDamesiki, kangë antu va uko uYerusalemu nanë ng'ë oong'e a uYuda, nanë noo gwa antu nëti Ayahudi, uvii veeso vëufenjiwa vafee na umufetukea Muungu na utenda ntendo në inoneye ufei wao. 21Gusoko ëyëë Ayahudi vëgankwata nene mukhatë a hekalu na vëgaëghëëya umburagha nene. 22Faka itiku ërëi ra reo nene nahangie waarëyi ufuma kunë Muungu, na uvii nene nëmëkie hafai ngufunya usudanga gwa antu në anyui nanë aküü. Nene ntiurighëëtya intu mba rëmwë, ëgweeso asaa në anyagëdaghu nanë Musa vahanyiye ajie udwëëra. 23Mwino Kiristo unoneye ukhasiwa, na uvii gwa utenda wa mwandyo ufëtya ufuma gwakuyi, mweeso adahe utanantya weru gwa antu në Ayahudi nanë antu nëti Ayahudi.”

24Na uvii mwino mweeso wadaha gitetea wakwe, Fesito agarighëëtya gwa ruri në üküü, “Faulo, veve wë muhari. Isoma rako ragutendie veve wë muhari.” 25Ëgweeso Faulo agasucha, “Nene ntimuhari, munya ukuriwa Fesito, ëgweeso nene ngurighëëtya mantu a tutë na a ihaa. 26Gusoko mutemi umanyie mantu ayai, na usonge akwe nene ngurighëëtya gwa uhaghaaro. Gusoko nene ntina ntenga mwino mantu ayai amanyëkie kunë mweeso, gusoko ërëi rinatendeka u kiti. 27Mutemi Agirifa, veve uvahuvëe anyagëdaghuna? Nene nëmanyie mwino veve uhuvëe.” 28Na Agirifa agamusucha Faulo, “Gwa itungo rikufëi veve ugughema ugudaha untenda në Mukiristo!” 29Na Faulo agasucha, “Mbesa gwa itungo rikufëi mpa ririfu, nene ngumuromba Muungu mwino tiëse veve gutufu ëgweeso noo gwa voong'e në vantegheeye nene itiku ërëi vadahe utendeka mwino nëërë, ëgweeso ntiufenja nyenye mutendeke mwatungwa.”

30Uvii mutemi agaëmëka, nanë müküü wa mükoa nanë Berinike nanë avoo unë arë vikhee itambëëmwe na veeso. 31Nanë aarë veeso vahegha, vëgagikhanëa mu muntu na muuyakwe, “Muntu uyi ainatendaa intu nërenoneye ikuya mpa gëtungo.” 32Agirifa agamukhanëa Fesito, “Muntu uyi aja unoneye arughuërwe nëmbesa aja mweeso ainaromba ende utegheeywa na Kaisari.”

Currently Selected:

Nte 26: RNT

Highlight

Copy