Nte 22

1“Aruna ane na vatata, ntegheeyi nene unë ngitetea usonge anyu itungwee.”

2Nanë veeso vamutegheeya mwino mweeso ugurighëëtya gwa ndëghëëtya a Gëëbrurania, veeso vëgakia twë nanguu. Na mweeso agahanya.

3“Nene në Muyahudi, nëfafiwe uTariso u mukoa wa uKilikia, nanëriwe u muji urui wa uYerusalemu na musëyi wane arë Gamalieli. Ngasëywa gwa uhonga miiko a seria ya vakükü vitu, nene nëgatintaara gusoko a Muungu mwino nyenye nyoong'e itiku ërëi ra rëo. 4Nene ngavakhasya antu va Njëa ëyëë na mbesa uvauragha. Nene nëgavatunga na uvautëa ujera aghosya nanë akhema, 5mwino mukumbëki në müküü na ibarasa roong'e ra anyampaa vëunsudangëa nene. Veeso vëgampa keeti nëvatoere aruna, na ngaenda faka uDamesiki uvakwata vasaa noo unë arë vëkuuko na uvaeta vatungiwe na mënyororo faka uYerusalemu vaje ukuuriwa.”#22:5 Ukuuriwa: Utendeke intu ra guonja uvai.

Faulo ugurighëëtya mwino mweeso watyowe

6“Mwino arë natenda muhënjo wane na nahumbea fifë uDamesiki, mumwëkhatë gëfaghato weru uküü ino ufuma girunde ugansama ugamwëkëa nene ngandë yoong'e. 7Na nene ngagwa fangë na ngategheeya ruri ugunkhanëa nene ‘Sauli, Sauli, asikë në veve ugunkhasya nene?’ 8Na mweeso agansucha nene, ‘Nene në Yesu wa Nasareti unë veve ugunkhansya.’ 9Na vasaa naarë vëmuhënjo ginao voong'e vëgaona weru ëgweeso kamwe vinategheeya ruri wamwa wasuu në arë ugurighëëtya nanee. 10Na ngahanya, ‘Nene ntende urë Müküü?’ Na Müküü agankhanëa nene, ‘Ëmëka, na wende uDamesiki, na kuuko veve winjë ukhanëwa oong'e në afangiwe në veve unoneye uyatende.’ 11Nanë naremwa uona gusoko a weru wa weru wasuu, ngatungatwa mëkhono na vasaa në arë gitambëëmwe ginao, na nëgaingëa uDamesiki. 12Na muntu umwe Anania, muntu nëugumukuryaa Muungu tutë tuutë gwa uhonga na seria mwino ëhanyiywe, arë ugurighëëtiwa ija na Ayahudi voong'e nëvëgikhaa kuuko. 13Mweeso agaja kunë nene, na agaëmëka fifë na nene agambwëra, ‘Muuna ane, Sauli, uone kangë.’ Na gwa itungo ërëëro ngaona kangë na ngamuraava mweeso.

14“Na mweeso agahanya, ‘Muungu wa vatata vitu waguhwaniye veve umanye mafenji akwe na umwona uyuo Munyatutë na utegheeya ruri nëufumie u moomo wakwe. 15Gusoko veve winjë utenda wë masudanga gusoko akwe kunë antu voong'e gwa asaa në veve wayaune na uyategheeya. 16Na itungwee asikë në veve utinyiye? Ëmëka na ubadiswe, na uoyeywe mahutye ako, na urëëtaana rina rakwe.’”

Faulo ugutaanwa utanantya gwa Antu nëti Ayahudi

17“Naarë nene nasuka uYerusalemu na arë nguromba mung'ë a hekalu, nëgaraa na nëgaotëa ndoti, 18na nëgamwona Müküü na agankhanëa nene, ‘Angufa na hegha urë hafai uYerusalemu, gusoko antu va hafai vatiufenja ughenyifa usudanga wako nëungokee nee.’ 19Na nene ngahanya, ‘Müküü, veeso vamanyie aghonjo mwino muu sinagogi arë nguvatungaa, na uvakhua vasaa nëvaguhuvëë vee. 20Nanë saghami amwa Sitefano masudanga wako ahunuka, nene noo arë nëmëkie fifë na nëgayanja, na ngayaghoja masaa ao vasaa naarë vëumuragha mweeso.’ 21Na Müküü agankhanëa nene, ‘Hegha; gusoko nene ngugutuma veve kuengë gwa antu nëti Ayahudi.’”

22Veeso vëgamutegheeya mweeso faka ukhani urui; uvii veeso vëgahumbua nduri yao unto nanguu na vëgahanya, “Muheyi muntu mwino uyi ufuma mu urëmi. Gusoko atinoneye uduva.” 23Na Mwino veeso vakuriye mukindo na vëufutyafutya masaa ao, na vëukunkua mahau unto, 24müküü wa asikai agaraghëëya Faulo atowe na autëwe mung'ë a nkhambë ya asikee. Uvii müküü wasuu agaraghëëya Faulo awëywe gwa ukhuwa na makhanda, umanya gusokokë në antu vakuriye mukindo hiya na mweeso. 25Ëgweeso naarë veeso vadaha umutunga mweeso na mëkhua, Faulo agamukhanëa müküü wa asikai në munyui në arë wëmëkie fifë hafo, “Inoneyena kunë veve umukhua na mëanga muntu në Murumi, na këë ainaramwuwa?” 26Müküü wa asikai në munyui naarë wategheeya uyi, agaenda kunë müküü wa asikai na agamukhanëa, “Ugufenja utenda ntuni? Gusoko muntu uyi në Murumi.” 27Uvii müküü wa asikai agaenda na agamuwëya Faulo, “Nkhanëa nene veve wë Murumina?” Na Faulo agasucha “Hoo” 28Müküü wasuu agasucha, “Nene naghurie unyang'ë urui gwa hela nyingë.” Faulo agahanya, “Ëgweeso nene në Murumi wa ufafwa.” 29Uvii vasaa vëgahegha swee ufuma kunë mweeso; nanë müküü wa asikai noo agaoghofa, gusoko mweeso agamanya mwino Faulo arë Murumi na mwino mweeso wamutungie.

30Ëgweeso fadiu ayo, gwa ufenja umanya soko a tutë asikë në Ayahudi vamusitakie mweeso, müküü wa asikai agamutungwëra Faulo. Mweeso agaraghëëya akumbëki në aküü nane ibarasa roong'e vëtang'ane, na agamweta Faulo fang'ë na umwëka usonge awe.

Currently Selected:

Nte 22: RNT

Highlight

Copy