Nte 21

Muhënjo wamwa Faulo uenda uYerusalemu

1Nanë sese gwarekanuka ginao guganatëa meeri, gugaenda gughokie faka Kosi, na fadiu ayo gugafika uRodo, na ufuma faafo faka uFatara. 2Na gugahanga meeri naarë ëgutënania faka uFoinike, guganantëa, na gugaenda muhënjo gwa njëa a irambo. 3Naarë gwafika haafo fana na gudaha urëona itumbë ra uKipuro, gugamëreka nyeeso u mukhono wa gëmoho gugaenda faka uSiria, na gugasima u Tiro; gusoko haafo meeri arë injë usimia mëëgho ayo. 4Na gwa uvahanga asëywi, sese gugagikhaa haafo matiku mufungatë. Ukëërëa udaho wa Mwahu Mweru veeso vëgamukhanëa Faulo ataende uYerusalemu. 5Nanë matiku itu agikaa haafo ahia, gugatunguya na gugafwaghëëra na muhënjo witu. Na veeso voong'e, itambëëmwe na akhema vao nanë anao, vëgagutindëkëa faka në arë gwafika unji a muji. Haafo gugatungama fang'ë u mpeo a irambo gugaromba na gugagifa gwaheri mu muntu na muyakwe. 6Uvii sese guganatëa u meeri, na veeso vëgasuka ukhaya.

7Naarë sese gwamarëya muhënjo witu wa girambo, gugafika uTolemai. Haafo gugavaramucha ahuvëi na gugagikhaa itambëëmwa ginao itiku rëmwedu. 8Na fadiu ayo gugahegha na gugafika faka uKaisaria. Na gugaingëa u nyumba a mutanantii Filifo, unë umwedu wa avoo në vëmufungatë, na gugagikhaa itambëëmwe ginao. 9Na mweeso arë ukweti ancha vane nënaa vëtiroghowe unë arë vëurighëëtya Sayu a Muungu. 10Në arë sese gwikhaa kuuko matiku ëgëtunga, munyagëdaghu rina rakwe Agabo agaja ufuma uYudea. 11Na agaja kunë sese agahoa mukhua wamwa Faulo na agagitunga mëghuu akwe mughonjo nanë mëkhono, agahanya, “Uvii Mwahu Mweru uguhanya, ‘Uvii Ayahudi va uYerusalemu vinjë umutunga muntu në wina mukhua urui na vinjë umufunya u mëkhono a antu nëti Ayahudi.’” 12Naarë gwategheeya uyii, sese nanë antu në arë vë haafo gugamufefeheya Faulo ataende uYerusalemu. 13Uvii Faulo agasucha, “Ntuni ëyëë në nyenye mutenda, urëa na untamua nkhoo ane? Gusoko nene nighondanëye tiëse uutëwa gutufu ëgweeso na mbesa ukuya kuuko uYerusalemu gusoko a rina ra Müküü Yesu.” 14Naarë mweeso wahita usëyi witu, sese gugakiatwë na gugahanya, “Mafenji a Müküü atendekë.” 15Naarë matiku ayai akëa gugagining'anëya na gugaenda uYerusalemu. 16Na asëywi vëgëtunga ufuma uKaisaria gugaenda itambëëmwe ginao, vëgagutoa u nyumba amwa Munasoni në arë muntu wa uKipuro, musëywi wa matiku maingë, unë sese arë gwinjë gikhaa ukhaakwe.

17Naarë sese gwafika uYerusalemu, aruuna vitu në ahuvëi vëgagughenyifa gwa uyanjo üküü. 18Fadiu ayo Faulo agaenda itambëëmwe nasee kunë Yakobo; na anyampaa voong'e arë vërëfo haafo. 19Në arë gwavaramucha veeso, Faulo agavasanyëa sayu a intu rëmwerëmwe në Muungu watendiye mukhatë a antu nëti Ayahudi. 20Nanë veeso vategheeya uyii, vëgamukurya Muungu. Na veeso vëgamwëëra Faulo, “Veve muuna witu, uune mwino arëfo maghanajëka a njou mukhatë a Ayahudi avoo unë vahuvëe; na veeso voong'e vëna wiru gusoko a seria. 21Na vakhanëwe sayu yako mwino veve ugusëyaa Ayahudi voong'e nëvëgikhaa mukhatë a antu nëti Ayahudi vamuhitë Musa, uguvakhanëa vatatoe vana vao ihungu na vatahongee ntende ya Ayahudi. 22Uvii ntuni nëëgufenjiwa ëtendeke? Veeso vinjë umanya tutë mwino veve wajaa. 23Gwa uvii tenda vii mwino sese gugukhanëa veve. Gukweti antu vane unë valile gërafo. 24Vahoe antu avai na ugioye veve mughonjo itambëëmwe na veeso na urëfe ughuri wao, gusoko veeso vëdahe umwa mëtwe ao. Uvii voong'e vinjë umanya mwino asaa ti gëntu gwa asaa në veeso vadahie ukhanëwa nëëgughokee vee ëgweeso veve mughonjo këë uguduvaa ugining'ana na seria. 25Ëgweeso gusoko a antu nëti Ayahudi nëvahuvëe, sese gwavatoere keeti na uvakhanëa veeso mwino sese gwaramwue mwino veeso vatalie kamwe gëkaku ilëwa nërafunyiywe ikumbëko gwa arungu. Kangë veeso vineghe ufuma unywa saghami a imwana nërënyomiye na veeso aghonjo vineghe na uvë wa uramatwë. 26Uvii Faulo agavahoa aghosya vasaa, na itiku nërëhongie mweeso mughonjo agagioya itambëëmwe na veeso. Uvii mweeso againgëa mung'ë a hekalu umanya itungo në matiku a gioya injë ukhondekeka na ufunya dahwa gwa mu muntu wa antu vasaa.”

Faulo wautëwa mung'ë a hekalu

27Naarë matiku mufungatë ahumbea uhia, Ayahudi në arë vafumie u mukoa wa Asia, unë arë vamwona Faulo wë uhekalu, vëgavasoseya iburi roong'e ra antu na vëgamukwata mweeso gëfando. 28Veeso vëgakurya mukindo vëuhanya, “Aghosya va Isiraeli, gwarëëyi! Uyui u muntu nëugusëya antu ng'andë yoong'e hiya na antu va Isiraeli na seria na itumbë ërëë. Gunto a asaa mweeso noo wavaetie Ayunani mung'ë a hekalu, na mweeso warëkhombie itumbë ërëë në ryëru.” 29Gusoko veeso mwandyo arë vamuune Turofimo muntu wa Efeso, itambëëmwe inakwe u mujini, na veeso vëgaghema mwino urë Faulo wamutoe mweeso mung'ë a hekalu. 30Uvii muji woong'e uganing'nëa muhangënkhano, na antu vëgadua itambëëmwe. Veeso vëgamukwata Faulo na vëgamutuuta mweeso unji a hekalu, na gënyahaafo ndurii igautëwa. 31Na mwino veeso arë vëughema umuuragha mweeso, ukhani ugaja kunë müküü wa asikai mwino Yerusalemu aruëka muji woong'e. 32Genyahaafo mweeso agahoa aküü va asikai nanë asikai, na vëgatununta fang'ë veadurie vinjë gwanya ukurya mukindo. Naarë veeso vamwona müküü wa asikai, aküü va sikai nanë asikai vëgareka umukhua Faulo. 33Uvii müküü wa asikai agaja na agamukwata mweeso, na mweeso agaraghëëya Faulo atungwe na mënyororo ëvëë. Müküü wasuu agawëya mweeso unë anyu na watendie ntuni. 34Vangëja u mwirundo vëgakurya mukindo vëulaunga vëuhanya intu ërëi, na vangëja intu rëngëja. Na mwino mweeso arë atiudaha umanya mantu a tutë gusoko a mukindo, mweeso agaraghëëya Faulo atowe mung'ë a nkhambë ya asikee. 35Naarë Faulo wafika gunto a manatëëro a nyumba asëë gwa tutë mweeso arë wuuchiywe gentonto fanto gusoko a nguu ya mukindo wa antu. 36Gusoko iburi ra antu arë vamuhongete vëurëa gwa uvai vëuhanya, “Muuraghi.”

Faulo ugitëtëa mughonjo

37Mwino Faulo arë wë fife gweetwa mung'ë a nkhambë ya asikee vëutëwa nweesi agamwëëra müküü wa asikai, “Nene ngudaha ugukhanëa veve gëntuna?” Na müküü wasuu agamuwëya, “Veve umanyie urighëëtya Gëyunanina? 38Uvii, veve ti Mumisiri uyuo në matiku ayoo aijurijuuri waandiye yaghayagha na agavatongeera antu maghana a njou ane naarë vëutaanwa Auraghi gunji a umbughana?” 39Faulo agasucha, “Nene në Muyahudi, ufuma uTariso u muji wa uKilikia, mwikhai wa u muji nëumanyëkie ija. Nguguromba unyanjëye nërighëëtye na antu avai.” 40Nanë müküü wasuu wamuyanjëya, Faulo, në kunu wëmëkie unto a manatëëro, agavahumbwëëra antu mukhono wakwe. Nanë gënkie gakuua nanguu, mweeso agarighëëtya inao gwa ndëghëëtya a Gëeburania, uguhanya:

Currently Selected:

Nte 21: RNT

Highlight

Copy