Nte 20

Faulo woka kangë uMakedonia nanë uYunani

1Naarë mukindo wasuu wafoa, Faulo agatuma asëywi vaëtaanwe na naarë wavakhomia nkhoo agavareka veeso na agaenda uMakedonia. 2Naarë mweeso wenda ukëërëa matumbë ayaa, nanë wavafa veeso ufefeheyi üküü, mweeso agafika faka uYunani. 3Haafo mweeso agagikhaa mëëri ëtatu, nanë wamanya mwino mufango wafangwa na Ayahudi wa umuragha itungo në wëfifë unatëa meeri ende uSiria, agaramwua usuka ukëërëa uMakedonia. 4Sofatiro wa uBeroya, mwana wamwa Firiho, vagakhuvëa inakwe mu muhënjo. Antu vangëja nëvagagihonga inawe në Arisitariko nanë Sekundo antu va uTesalonika. Vangëja në Gayo wa Deribe nanë Timoteo. Vangëja në Tikiko nanë Turofimo antu va Asia. 5Avaa vëgatongeera na arë vëgwindëe sese uTuroa. 6Ëgweeso sese guganatëa meeri uFilifi naarë itungo ra Mëkate Nëtikhandughie changa, na gwa matiku atano sese gugavahanga veeso uTuroa. Haafo sese gugagikha gwa matiku mufungatë.

Faulo ugutaana na ahuvëi va uToroa muhenjo wa umpeo

7Itiku ra mwandyo ra ijuma, naarë sese gwëhangwëye itambëëmwe uvegha mukaate, Faulo agarighëëtya itambëëmwe inawe, gusoko arë usëghëte uhegha fadiu ayo. Na agafwaghëëra na matanantyo akwe faka utiku wa mukhatë. 8Haafo arë irëfo imwë ingë u nyumba asëë naarë ë unto u nyumba mbuya kunë sese arë gwëhangwëye. 9Na muhumba umwedu uguëtaanwaa Eutiko arë wikhee gidirisa.#20:9 Gidirisa: Iboyo ra nyumba ra ukërya mpefo. Tuo ëgamudidinkhania ino na Faulo arë ufwaghëëre na utanantya ukhani wa Muungu. Na agakhataywa na tuo, agagwa fang'ë ufuma unto a nyumba nëëunto a nyumba ingëja ivëë, na agahumbuwa unto na agahangwa wakuyaa. 10Ëgweeso Faulo agasima fang'ë na agamwinamëëra unto akwe, na agamükümbatëa na agahanya, “Mutaoghofee, gusoko ufanga wakwe këë wë mung'ë akwe.” 11Na Faulo naarë wanatëa unto na naarë waaghania mükaate na walia, mweeso agafwaghëëra agarighëëtya inao gwa itungo irifu, faka diu në nküü, na uvii agaenda kunë winjë. 12Na veeso vëgamuhoa muhumba wasuu mufanga ryu, na nkhoo yao igafefeheywa ino.

Muhënjo ufuma uTuroa uenda u Mileto

13Ëgweeso sese gugatongeera uenda umeeri gutambuke gwende Aso, gusëghëte umuhoreya Faulo u meeri haafo. Mweeso arë ufangie uyi, gusoko arë ughemete uenda kuuko gwa mëghuu. 14Nanë mweeso waguhanga sese hafo Aso, sese gugamuhoreeya mweeso u meeri na gugaenda faka uMitilene. 15Na gugaenda gwa meeri ufuma kuuko gugafika itiku ra gavëë gitumbë nëriraavie na Kio. Na fadiu ayo gugafika uSamo. Na itiku ra gatatu gugafika uMileto. 16Gusoko Faulo agaramwua ukëërëa Efeso gwa meeri, gusoko ataje utinya kuuko Asia. Gusoko mweeso arë wikhakhatie ufika uYerusalemu, itiku ra Fentekoste nëmbesa yudahëka.

Faulo uguvafa gwaheri anyampaa va Efeso

17Na ufuma uMileto Faulo agatuma antu vende Efeso na umwëtanëya mweeso anyampaa va kanisa. 18Nanë veeso vafika kunë mweeso, mweeso agavakhanëa: “Nyenye aghonjo mumanyie mwino nikhaire mukhatë anyu itungo roong'e ufuma itiku ra mwandyo naarë nafanangëa Asia. 19Nene ngamutumëkëa Müküü gwa winyumpii woong'e na gwa mihori na malwe nëangwëre nene ukëërëa lakuno a Ayahudi. 20Nene ntinaona mënyaa umutanantëya mu gëntu nëgëkweti sao, na umusëya nyenye uchanya na nyumba gwa nyumba, 21nguvasudangëa voong'e Ayahudi nanë Ayunani vamufetukëe Muungu na umuhuvëa Müküü witu Yesu Kiristo. 22Na itungwee, raavi, nene nëtungwëye ninjë uYerusalemu nëtungiwe na Mwahu, ntimanyie ninjë uhangwa na ntuni kuuko. 23Ëgweeso mwino Mwahu Mweru ugunsudangëa nene mu muji mwino gëtungo nanë makhasëko anyindëe nene. 24Ëgweeso nene ntivariye uduvi wane mughonjo në gëntu në gina sao nküü kunë nene, mbesa gutufu nene nëmarëye utumami wane nanë mwëëmo në nene nauhangie ufuma kunë Müküü Yesu, umësudangëa Sayu Njija a mboto a Muungu. 25Na itungwee, raavi, nene nëmanyie mwino nyenye nyoong'e mukhatë anyu unë nendie umutanantëya utemi wa Muungu gutie muntu nëudahëte uwuona usyu wane kangë. 26Gwa uvii nene ngumusudangëa nyenye itiku ërëë ra rëo mwino nene ntikweti ihutye u saghami a muntu nanë umwedu mukhatë anyu nyoong'e. 27Gusoko nene ntinasukaa unyuma umutanantëya nyenye mufango woong'e wa Muungu. 28Ighoji aghonjo nanë iburi roong'e, në Mwahu Mweru wamwëkie nyenye mutende mwë aghondanëyi, murëlësye kanisa ra Muungu në mweeso warëhangie gwa saghami a Mwana wakwe mughonjo. 29Nene nëmanyie mwino nënahegha mbughi në nkhai ijie mukhatë anyu, itiusaya iburi. 30Na ufuma mukhatë anyu nyenye aghonjo vëuhumbuka antu nëvëurighëëtya mantu a uregheghe, gusoko vavaute asëywi vavahonge veeso. 31Gwa uvii mutarae, ëse mukumbukiwe mwino gwa mëakha ëtatu ntina rekaa utiku nanë mumwë umukenea mu muntu gwa mihori. 32Na itungwee nene ngumwëka nyenye kunë Muungu nanë ukhani wa mboto akwe nëudahëte umujenga nyenye na umufa usai mukhatë avoo voong'e nëvaoyiywe. 33Nene ntina fenjaa hela a muntu woong'e mba sahabu mba masaa. 34Nyenye aghonjo mumanyie mwino gwa mëkhono anë ëyëë natendie mwëëmo gwa gihangëa mantu oong'e në arë nëyasëghete, itambëëmwe na voong'e vasaa naarë ginao. 35Mu mantu oong'e nene namuraghëëre nyenye mwino gwa utintara utenda mwëëmo inoneye muntu uvaarëya antu nëalegheku, ëse mukumbukiwe nkhani ya Müküü Yesu mwino mweeso wahanyiye, ‘Në guja ino ufunya ukëa ughenyifa.’”

36Nanë mweeso warighëëtya uyi, agatungama fang'ë na agaromba itambëëmwe inao voong'e. 37Na veeso voong'e vëgarëa na vëgamukumbatëa Faulo na vëgamutomya. 38Veeso vëgasimba ino nanguu gusoko a ukhani në mweeso waurighëëtiye, mwino veeso vëtinje goona usyu wakwe kangë. Na veeso vëgamutoa faka u meeri.

Currently Selected:

Nte 20: RNT

Highlight

Copy