Nte 19

Faulo Mung'ë a Efeso

1Itungo në Afolo arë uguKorinto Faulo arë ukëëre ung'ë gëntonto na agafika Efeso. Kuuko agahanga asëywi vëgëtungo. 2Agavawëya, “Nyenye mwahangie Mwahu Mweru naarë mwahuveana?” Na veeso vëgasucha, “Aa, sese gwinategheeya kamwe mba gwina Mwahu Mweru.” 3Na mweeso agavawëya, “Nyenye mwabadisiwe gwa ubadisokëhe?” Veeso vëgasucha, “Gwa ubadiso wamwa Yohana.” 4Na Faulo agavaëra, “Mahutye ugukhanëa antu vamuhuvëa wasuu unë ujie u nyuma akwe, na wasuu në, Yesu.” 5Naarë vategheeya uyi, veeso vëgabadiswa gwa rina ra Müküü Yesu. 6Na Faulo naarë wavaëkëa mëkhono akwe u mëtwe ao, Mwahu Mweru agavasimëa unto ao; na veeso vëgarighëëtya gwa ndëghëëtya në mpya na utanantya sayu a Muungu. 7Hafo voong'e arë antu ikumi na vavëë.

8Na Faulo againgëa mung'ë a sinagogi na gwa mëeri ëtatu agatanantya gwa nguu, na ugurighëëtya gwa nguu itambëëmwe inao na uvauta gwa nkhani ya utemi wa Muungu. 9Ëgweeso vangëja arë vëgakakufia nkhoo na vëgahita uhuvëa, vëumërighëëtya ivë Njëa a usonge a mwirundo. Mweeso agahegha ufuma kunë veeso, ugavahoa asëywi vende inao, na mwitiku agarighëëtya gwa nguu u nyumba a masëyo amwa Turano. 10Ntende ëyëë ëgafwaghëëra gwa mëakha ëvëë, faka antu voong'e va Asia vëgategheeya ukhani wa Müküü, Ayahudi nanë Ayunani.

Ana vamwa Sikewa Vëgaëghëëya Ujuncha Vinyonyinyonyi në Ivë

11Müküü agatenda makua a ukëanëya gwa mëkhono amwa Faulo, 12uvii masune nanë masaa ufuma u mwëërë wakwe ëgatowa gwa arue, na marue ëgavarekea veeso nanë inyonyinyonyi në ivë igavafuma. 13Ayahudi vëgëtunga naarë vëuenda kunu na kunu vëgasoya ujuncha inyonyinyonyi në ivë gwa urëhanya rina ra Müküü Yesu gwa vasaa naarë vakweti vëuhanya, “Nene ngugurafëya veve gwa rina ramwa Yesu në Faulo ugumutanantya.” 14Ana vëmufungatë va mukumbëki në müküü wa Gëyahudi ugwëtaanwaa Sikewa arë vëutendaa uyii. 15Ëgweeso, gënyonyinyonyi nëgëgavasucha, “Yesu nëmumanyie, na Faulo nëmumanyie; nyenye mwëvaanyanyuhe?” 16Na muntu wasuu unë arë ukweti gënyonyinyonyi në gëvë agavariimëa, agavakëya nguu voong'e na agavahuma veeso voong'e, uvii vëgafuma u nyumba asëë vadurie na vëgifuyu na kunu vë nkhomee. 17Na ukhani urui ugamanyëka gwa anyang'ë voong'e va Efeso, Ayahudi nanë Ayunani. Na wova ugavahanga voong'e; na rina ra Müküü Yesu rëgakuriwa ino. 18Vaingë noo mu vasaa naarë vatendeka ahuvëi, vëufea na uyiëka ntendo yawe uchanya. 19Na antu vaingë gu vasaa naarë vëutendaa ntendo ya uroghi vëgaeta itabu yao na uyirigha moto usonge a antu voong'e. Na veeso vëgatenda isabu ra ughuri wayo ugaghea hela maghana a njou makumi atano. 20Na uvii ukhani wa Müküü ugagiongeya na uhuma gwa nguu.

Mukindo Efeso

21Na mantu asaa naarë akëa Faulo agatongeerwa na Mwahu, agaramua ukëra uMakedonia nane Akaya na gwenda faka uYerusalemu, uguhanya, “Nene në nenda kuuko inoneye nende uRumi.” 22Na nënaa wavatuma uMakedonia vavëë va asëywi vakwe, Timoteo ina Erasito, mweeso mughonjo agasagha Asia gwa itungo rëkuëi.

23Itungo rasëë ugadwëëra mukindo kuuko Efeso tiunyui gusoko a Njëa. 24Gusoko muntu rina rakwe Demetirio, mutyani wa hela, unë agatenda vihekalu vya hela ya muungu wa gëkhema Aritemi, mwëëmo wakwe ugaeta sao nküü gwa mafundi? 25Mweeso agavahangwëya avaa itambëëmwe, na itambëëmwe na anyautenda mwëëmo në wikhwete, na agahanya, “Aghosya, nyenye mumanyie mwino ufuma u mwëëmo uruu sese gwahangie ughwarë witu. 26Na nyenye muune na mutegheeye mwino tiese Efeso gutufu ëgweeso nanë Asia oong'e mwino Faulo uyuu watendie. Mweeso wavafemie antu na wafentue ufundi wa antu nëunoneye, uguhanya mwino arungu nëvëtendiwe gwa mëkhono ti arungu. 27Na gwina holota a ufundi witu urui uhanga rina rivë. Na ti uyi gutufu ëgweeso noo hekalu ra muungu në müküü wa gëkhema Aritemi rëutendeka ti gëntu. Na uvii mweeso udahëte uheywa ufuma gu üküü wakwe, mweeso unë Asia oong'e nanë urëmi ugumukuryaa.”

28Naarë veeso vategheeya uyi vëgahumwa na makuwo, na vëgakurya mukindo, “Aritemi wa Efeso në Müküü.” 29Uvii muji woong'e ugijuwa na muhangënkhano. Na gwa itambëëmwe vëgadua dididi vëgavautuuta va Gayo ina Arisitariko, antu va uMakedonia naarë vëuenenda itambëëmwe ina Faulo na vëgavingëya unyumba a minisyo. 30Faulo agafenja ukëa mukhatë a iburi ra antu, ëgweeso asëywi vakwe vëgamughëëya. 31Aküü vëgëtunga va umukoa wa Asia, noo unë arë vambuyakwe vëgatuma antu kunë mweeso na umunena atasoye uenda mukhatë a nyumba a minisyo. 32Na vangëja arë vëkuriye mukindo gwa intu ërëë, na vangëja gwa intu ërëo. Gusoko mwirundo arë wajaa ulaghundukie na vaingë mukhatë ao vinamanyaa sokokë në vajaa ugirunda itambëëmwe. 33Antu vëgëtunga mung'ë a mwirundo vëgamwëëmwëcha Alekisanda, unë Ayahudi vëgamuvëka usonge. Na Alekisanda agahumbua mukhono, ugufenja giambëëra gwa antu. 34Ëgweeso naarë veeso vamanya mwino mweeso arë Muyahudi, gwa itungo nërëfifë na saa ëvëë veeso voong'e gwa ruri rumwedu vëgakurya mukindo, vëuhanya, “Aritemi wa Efeso në Müküü!” 35Na itungo naarë mwandëki wa muji wadaha uukiya mwirundo, mweeso agahanya, “Aghosya va Efeso, në muntu kë unë atimanyie mwino muji në üküü wa Efeso në mughoji wa hekalu ramwa Aritemi në müküü, na ra igwe në ryëru nërague ufuma girunde? 36Goona vii mwino mantu ayai gutie muntu nëudahëte ukhana, nyenye aja imunoneye mükie twë na mutatende faghafagha. 37Gusoko nyenye mwavaetaa antu avai hafai unë mbesa vinakhononta na uiva mantu aikuryo mba vinamutuka muungu witu nëwagëkhema. 38Gwa uvii nëmbesa Demetirio nanë atenda mwëëmo vauya itambëëmwe na mweeso vakweti masitaaka u muntu ungëja woong'e, barasa imwaryë mwitiku, na aramwui varëfo haafo. Reki veeso veete masitaka mu muntu na muuya. 39Ëgweeso nëmbesa nyenye mufenja mantu gëkaku rëngëja, rasëë rëuramwuwa na mwirundo wa antu voong'e. 40Gusoko sese gwë u holota a usitaakwa gusoko a mukindo wareo, gutie mbukambukëyo në sese gudaha gierya gusoko a mukindo urui.” 41Nanë mweeso warighëëtya uyi, agafaghatya mwirundo.

Currently Selected:

Nte 19: RNT

Highlight

Copy