2 Akorinto 6
6
1Utënda mwëmo itambëëmwe na mweeso, uvii sese gumunena nyenye gwa nguu mutaghenyifee mboto ya Muungu ndeende. 2Gusoko Muungu mweeso uguhanya,
“Gwa itungo nërënoneye nene
ngamusucha nyenye marombi anyu,
naarë itiku rafika ra nene umutyoa nyenye,
nene ngamwarëëya nyenye.”
Rarava, itungwee në itungo nërënoneye;
rarava, itungwee në itiku ra utyoi.
3Sese gutiufenja uvëka impënga u muntu mba umwe, gusoko ihutye rëtadahe udwëëra mung'ë a mwëmo witu. 4Ëgweeso mwino atumami va Muungu sese mwitiku gwendie uraghëëra aghongjo gwa njëa yoong'e ughiimu, mbesa sese gwendie uhanga malwe maküü, mantu mingë a uvarya na matungo nëmakaku. 5Veeso vëugukhuvaa sese, veeso vëugughumëa sese ujera. Veeso vëugutënda sese gwingëe ufitina. Veeso vëugutënda sese gutënde mwëmo nanguu, na sese gulaa nduvëngë mba guraa too nyughuu. 6Gwa nkhoo në njeru, gwa umanyi, gwa ughiimu, gwa gëhe, gwa Mwahu Mweru nëurëfo mukhatë itu, gwa uyanjo wa tutë, 7gwa ukhani wa tutë gwa udaho wa Muungu, gwa mafënë, mata, nanë mëkoha a tutë a umukhono wa gëlëlo na wa gëmoho. 8Matungo angëja antu vëugukurya sese na matungo angëja veeso vëuguvirya mënyaa. Mutungo angëja veeso vëugukuna sese na matungo angëja vëugukuta sese. Antu vëugutenda sese gwëvegheghe, ëgweeso mwitiku sese gurighëëtya tutë, 9mwino gutimanyëkie, na kë sese, gumanyëkie vija nanguu, mwino gukuya na rarava, kë sese guduva, mwino anyaukuuriwa, ëgweeso sese gutiukuya. 10Sese mwitiku gwina uyanjo, mbesa gwë mung'ë a matungo a uvavi. Mwino antu në atuki, kë sese guvatëndaa antu vingë vëghwefe. Mwino antu nëgutina intu, na kë sese gukwetë mantu oong'e.
11Sese gwendie urighëëtya daaji kunë nyee antu va uKorinto. Sese gumuyanjëtë nyee gwa nkhoo yitu yoong'e. 12Sese gutiughiiya uyanjo witu kunë nyenye, ëgweeso nyenye mughiiya uyanjo wanyu kunë sese. 13Gusoko sese kë gumuyanjëtë nyee, nene ngumuromba nyenye mufumbujëëre uyanjo wanyu kunë sese (nene ngurighëëtya na nyee itungwee gënya mwino nyenye mwë anane).
Nyenye Mwë Hekalu ra Tutë ra Muungu Nëuduvie Khae na Khae
14Mutakhuvëe itambëëmwe na antu nëvëtimuhuvëe Kiristo. Muntu nëwatutë na muntu nëti watutë vëtiudaha ukhuvëa itambëëmwe. Na weru utiudaha ukhuvëa itambëëmwe na kiti. Ti tutëna? 15Gutie witegheeyi mukhatë amwa Kiristo na Beliari. Na gutie intu nërikhwetë mukhatë a muntu nëumuhuvëe Kiristo nanë muntu nëatimuhuvëe Kiristo. 16Gutie ukhuvëi mukhatë a hekalu ra Muungu na hekalu ra arungu nëti arungu va tutë. Gusoko sese gwë hekalu ra Muungu nëuduvie khae na khae, mwino Muungu wahanyiye,
“Nene ninjë uduva mukhatë
awe nangwenenda mukhatëkhatë awe,
na nene ninjë utënda Muungu wawe,
na veeso vinjë utënda antu vane.”
17Gwa uvii Müküü noo uguhanya
“Dui ufuma mukhatë awe,
na ibaghui ufuma veeso,
na mutatënie gëntu në gevaya
gusoko a mahutye;
na nene ngumughenyifa nyenye.
18Na nene ngutënda në tata kunë nyenye,
na nyenye mutënda mwë anane
va gëghosya na va gëkhema,
uguhanya Müküü Muungu
unë wina udaho woong'e.”
Currently Selected:
2 Akorinto 6: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
