2 Akorinto 5
5
1Gusoko sese gumanyie mwino mëërë itu afaa mu urëmi ë mwino mahema. Na nësa mëeso aruvëka, sese gukweti nyumba ufuma kunë Muungu, nyumba nëinajengwa gwa mëkhono a anantu. Ëgweeso anjëngiwe na Muungu mughonjo, na ësëë ëgikhaa khae na khae gunto girunde. 2Mung'ë a mwëërë uruu në urëfo tutë sese gukutie, na uhunukwa mwino Muungu winjë ugufa khaya itu ëyëo nëëfumie girunde. 3Gusoko a urya mwëërë urui në wa girunde sese gutiudaha utenda gwë gëfuyu. 4Gusoko itungo në sese gwë mung'ë a mwëërë uru, sese gukutie gwa nkumbu; tiëse sese gutiufenja gwekeuriechwa, ëgweeso sese gufenja uriechwa, gusoko rasëë nërëukuya rëmirwe na ufanga. 5Mweeso në wadahie uning'anëya gusoko itu gëntu ëkëë në Muungu mughonjo wagufie. Mweeso [Muungu] wagufee sese Mwahu wakwe mwino dhamana.
6Gwa uvii sese mwitiku gukhomie gi gutiuhingëhëka. Matungo oong'e ne sese gwë mung'ë a mwëërë urui sese gufwaghëëra utënda gwëkurengë fana Müküü. 7Sese guduvie gwa uhuvëi, ti gwa goona. 8Sese gwina uhuvëi aküü, na sese gufenja bahu gureke mwëërë urui wa gëuntu gusoko gufike fana Müküü urë. 9Uvii mbesa sese gwë ukhaya mba gwëkurengi, ndolyo itu sese nëumuyanjisya mweeso. 10Tutë inoneye sese soong'e gwinjë udwëëra usonge a itumbë ra uramwui ramwa Kiristo, gusoko mu muntu adahe uhanga nanë maja nanë mavë, gwa uhonga na asaa në mweeso wayatendie mung'ë a mwëërë.
Muungu ugwantënda Antu vëtënde Anyambuya vakwe ukëërëa kunë Kiristo.
11Gwa uvii, umanya choghofi#5:11 Choghofi: Ikuryo ra tutë. ga Müküü Yesu Kiristo, sese guvafema antu voong'e. Ëgweeso mwino sese gurë Muungu umanyie, na nene nëhuvëe dhamiri yanyu imanyie ërëë. 12Sese gutigikumwua aghonjo kunë nyenye kangë ëgweeso gumufa nyenye soko a gitënda gusoko itu. Gwa utënda uwuu nyenye mudaha uhanga udaho wa uvasucha avoo unë vëgitëndaa aghonjo gwa mantu a gëmwëërë na në ti mantu në ankhoo yawe. 13Gusoko nesa sese gwahari, në gusoko a Muungu; nesa sese gwina ihaa rija, në gusoko anyu. 14Gusoko uyanjo wamwa Kiristo ugwibalëtë see, gusoko sese gwendie uramwua mwino muntu umwedu wakure gusoko a antu voong'e. Gwa uvii sese soong'e gwakure. 15Ëyëë në uhanya mwino mweeso wakure gusoko a antu voong'e. Wakure gusoko avoo unë vëuduva vëdahe uduva ti gusoko awe aghonjo. Ëgweeso gusoko a mweeso unë gusoko awe mweeso wakure na unë Muungu wamufëtëye ufuma gwakuyi.
16Gwa uvii, ufuma itungwee faka itungo nërëjie, sese gutiumughemaa muntu woong'e gwa ihaa ra gëuntu. Mbesa afoo mwandyo sese gwendie umughema Kiristo gwa magheme a gëuntu, itungwee gutiumuramwua gwa ngeero ya gëuntu. 17Gwa uvii, nesa muntu wë mung'ë amwa Kristo, mweeso në ntundo në mpya; mantu akheengë akëire, rarava, ntundo në mpya adahie ujaa. 18Në Muungu unë watëndie ayaa oong'e ukëërëa ikuya ramwa Kiristo. Mung'ë a ntendo ëyëë mweeso wendie ugukhanëkëya sese gutënde gwë anyambuya vakwe mughonjo. Na mweeso wendie ugufa mwëmo wa utënda majëghana mukhatë akwe na antu vangëja. 19Ëyëë në uhanya Muungu mung'ë amwa Kiristo waatëndie antu va mu urëmi vëtënde anyambuya vakwe, inaavariya mahutye awe. Na watendee kunë sese sayu ëyëë a ukhuvëi. 20Uvii sese gwatumiwe urighëëtya gusoko amwa Kiristo, Muungu ugwanena antu ukëërëa sese. Sese gurighëëtya gusoko amwa Kiristo na sese gumunena nyenye gusoko amwa Kiristo. 21Gusoko Muungu wamusachiye mweeso aingëe giburi ra anya mahutye mwi yoma ritu. Kiristo mweeso kamwe inatëndaa ihutye, gusoko gwa ukhuvëa itambëëmwe na mweeso Muungu wagutëndie sese gwingëe giburi ra antu nëvëghokie.
Currently Selected:
2 Akorinto 5: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
