Lúʼkáasʉ 7
7
Yěso ghʉ mənkhʉ̂ cǒ tə́-ndə̂ pəsóghəi nkʉ yi pye Lóma shwítə
(Mat 8.5-13; Jâŋ 4.46-54)
1Yěso myâghʼ lə̂ ndâʼ məno mêi mə́tsəm, ə́ nkə́u Kapérnawûm. 2Cǒ tə́-ndə̂-pəsóghəi nkʉ lə ghwo ngaŋə-faʼ ye yi a kǒŋ yé gháʼate. Mə́i a ghou mə́ tə ncʉ́ʼ ntə́ʉ pə́ lə̂ nkwʉ́. 3A zûʼ pə́ kʉ̂ʉ Yěso, a tə̂u pəcó pəkə̌m pəyúda ńgó gháp wó sʉ́ʉtə́ yé ńgó â tó ńgʉ́ ngaŋə-faʼ ye wêi shwítə́. 4Gháp lər tə nkə́u mbəʉ Yěso, ə́ sʉ́ʉtə́ yé pə́ lə́ cʉ́ŋə́ ńdǎʼ ngô: «A kuʼ ŋuu yi mboʼ o pfûtə yé. 5Ńté ńgó a koŋ lâʼ zághʼ, ə́ mbou mbə́ ŋuu yi a lə kə́r ndə̂ cûʼtə zaghʼ.» 6Gháp pə Yěso lər tə mə́ nkə̂u nzeʼ tə́-ndə̂ pəsóghəi nkʉ wêi, a tə̂u pəsə̌u pé ńgó gháp wó ndǎʼ lə́ zʉ́ ngô: «Ə́ Nde koo o pûʼ mbəʉ zô tə́sə́ʉ, kâa n nkûʼ ghâa ŋuu yi mboʼ o kə̂u ndə̂ zʉ́. 7Ə̂ zə̂u yi ə́ yǎa ngʉ̌ kâa n nkûʼ ghâa lə̂ ntó pə́ məŋ njwó ghô; lə́, lǎʼ tâʼ no môʼ ngaŋə-faʼ ghâa shwítə́! 8Məŋ ndaʼ yə́rə́ gháʼá ńté ńgó məŋ yi n nzûʼ mbó ŋuu njwǐ, n ngwô pəsóghəi nzəm məŋ. N ndə̌i ndâʼ lə̂ cǒ tâʼ ngô: “Lər!” a lər; n ndǎʼ lə̂ cǒ ngô: “Tô!” a tô. Ə́ mbóu ndǎʼ lə́ ngaŋə-faʼ ghâa ngô: “Ghʉ̌ ńgó kə́!” a ghʉ̂.» 9Yěso lə zûʼ mêi mətsâr, ə́ kəʼə yé, a shə́rə ńnáŋtə́ lâʼ yi ə́ pə́ nzəm zʉ́, ə́ ndǎʼ ngô: «Məŋ ndâʼ wéi: Tə mbaa pə́ cər ngoŋ Ísə́lahêl, n nkə́ jwó ghâa có pə̂i-ntə̂ʉ yi ə́ ghúʼ gháʼa.» 10Pəsə̌u pé pêi pəʉ tə nkə́u nzeʼ, ə́ njwó, mə́i ngaŋə-faʼ wə̂ yi a lə́ pə́ ngôu lə̂ shwitə́ mə́.
Yěso ghʉ môu mpfǒghʼ məngyě zʉ̂ʉ lə́ ləwʉ̂
11Yěso pou fú yʉʼ wó ndə́r lə́ có túsoŋ yi pə́ fûŋ ńgó Nayî; ngaŋə-jyêʼ-no yé gháp pə nou lâʼ naa mbə́ nzəm zʉ́. 12A lə tó tə ncʉ́ʼ lə̂ nkə́u túsoŋ wêi, ə́ njwó mə́i pə́ khwor mə́ pfû cǒ môu mbiŋə mə́ ngwô ntʉ́ŋ wó. A lə pə́ môu moʼ mbó mə́ ye, mə́ ye wêi pə̂ mpfǒghʼ məngyě; ə lâʼ pə̂ nzəm lə̂ ngwó ntʉ́ŋ. 13Nde jwô mpfǒghʼ wêi, məjʉ̂ŋ mé kô yé gháʼate, a cʉ̂ʼ ndâʼ lə́ zʉ́ ngô: «Koo kə̂ ndâa!» 14Ə́ ndǎʼ yə́rə́, ə́ ncʉ́ŋə́ nkə̂u kweʼ; pye pi gháp lə khwǒr tə̂ʉ. Yěso lâʼ ngô: «Môu ngwəsəu, məŋ ndaʼ lə́ gho ngô: Lêsê!» 15Mpfû wêi pə́ʼə mbəʉ ye ńnyáŋ ńnyáŋə́, ə́ njǐ lə̂ ntsár, Yěso paghʼə ye ńŋə́ lə́ mə́ ye. 16Ləpôghʼ ghou gháp pə́tsəm, gháp cʉ̂ʼ mə́ ngûʼtə Sê ńdâʼ ngô: «Ntsətə-nkəʉ Sê yi njwǐ kwar təcər paghʼə, Sê tô lə̂ mpfútə́ pye pé!» 17No yi Yěso ghʉ̌ sar lâʼ Yudêi tsəm gháp pə məlâʼ məpar mé.
Ngaŋə-jyêʼ-no Jâŋ Mbaptísʉ
(Mat 11.2-11)
18Ngaŋə-jyêʼ-no Jâŋ Mbaptísʉ pyêtə məno mêi ńdâʼ yé. Jâŋ Mbaptísʉ tsôʼ pi pə́pwô təcər páp, 19ə́ ntə́u gháp lə́ Nde ńgó gháp wó ntúŋú yé ngô: «Ô Nzaʼ-nkʉ yi a ghwǒ lə̂ ntó lə̂, kəʉ paghʼ kə́ ncí nzʉ́ʼtə́ pə̂ cǒ ŋuu ndeʼe?» 20Gháp lər tə ńkə́u mbəʉ Yěso, ə́ ndǎʼ lə́ zʉ́ ngô: «Jâŋ Mbaptísʉ tə̌u wághʼ ńgó paghʼ tó ńtúŋú ghô ngô: “Ô Nzaʼ-nkʉ yi a ghwǒ lə̂ ntó lə́ kəʉ pə kə́ mə́ nzʉ̂ʼtə zʉʼtə́?”» 21Yěso kə̂ ntə́ʉ pə́ mbi páp ə́ ngʉ́ pəghou tə nzáa shwítə, məlǒʼ máp mê, ə́ nzǔŋ məzəghʼə tə́poŋ lə́ pye, ə́ ngʉ̌ pəfwoghʼ-mə́nyôghʼ jwô yʉʼ. 22A pwôr lə́ ngaŋə-ntə̂u Jâŋ Mbaptísʉ ngô: «Pei wó mbyétə́ ńdáʼ Jâŋ Mbaptísʉ zə̂u yi pei jwǒ mbou nzúʼ: Pəfwoghʼ-mə́nyôghʼ pə́ njwô yʉʼ, pəkə́niʼí-ku pə̂ ŋə̂i shʉʼʉ, pəghaŋə tsóʼ-páp pə̂ shwítə́, pəkʉʉ-tû pə̂ nzûʼ yʉʼ, pəpfû pə̂ nzʉ́ʉ, pəpûŋ pə̂ nzûʼ Nkəʉ Shʉʼʉ.» 23Ndʉʉ-mboŋ, â ŋuu wə́ yi a láʼ kə́ côghʼ ntə̂ʉ yé pə́ lə́ məŋ tə́ kâa! 24Ngaŋə-ntə̂u Jâŋ Mbaptísʉ lə lər, Yěso cʉ̂ʼ mə́ ndâʼ no lə̂ lâʼ ńté Jâŋ Mbaptísʉ ngô: «Pei kə wo koŋə-məkwaʼá njwô hó? Tâʼ kəkaʼa yi kəfwor pə̌ ncʉʼtə́ áa? Ə́ ngə́! 25Tə pei kə wo pə́ njwô hó? Ə́ ŋuu yi a mǎʼ məndǐ nkâp áa? Lə́ pye pi gháp maʼ zêi mbə̂u məndǐ, ə́ mbou ncî gháp pə́ lə́ kətwor, wə́ pə́ məntôʼ pəfou. 26Tə pei kə wo pə́ njwô hó? Ə́ ntsətə-nkəʉ Sê áa? Ə̂ŋ məŋ ndâʼ wéi, tə mbə́i nděi tâʼ ntsətə-nkəʉ Sê. 27Ńté ńgó â ŋuu yi pə́ lə ŋwaʼá ńté yé ngô: “Jwô, n ngwo tə́u ngaŋə-ntə̂u ghâa mbi gho, a tsúŋú laŋə́-ndə̂u zô.»
28Məŋ ndaʼ wéi, ə́ wo lə̂ ngər-pye-mə́soŋ tsəm, káa ŋuu yi a ghǔʼ tə ndêi Jâŋ Mbaptísʉ pə̂ yé wó; lə́ ŋuu yi a khwǒghʼ cər Ləfou Sê ghǔʼ nděi yé. 29Pye pə́tsəm pi gháp lə zúʼ tsâr yé, gháp pə pəpfǔ-ntsəp laʼ ńgó Sê pə̌ nkoŋ ńgó paghʼə cwór, ə́ ndǎʼ yə́rə́, ə́ ngwo ńgʉ́ Jâŋ Mbaptísʉ ŋə̂ gháp nci. 30Lə́, pəfalísia gháp pə pəkeʼtə́-lə́pə́ʉ Mə̌usə̂i lə meʼ zə̂u yi Sê lə tsúŋtə́ ńté gháp, ńté ńgó gháp lə ləʼ lə́ pə́ yi mboʼ Jâŋ ŋə̂ gháp nci. 31Yěso kə̂ ncí ndáʼ ngô: «Tə n ngwo lǎghʼ parə́ pye pyé fəiʼ lə̂ ngər pye-mə́soŋ yi mpfu wo? Gháp gháʼa shwí pə wǒ?» 32Gháp shwî pə̂ ghəpə́ pi gháp nyáŋ ndəu tətáa, pəcó pə̂ ndâʼ lə́ pəcó ngô: «Paghʼ kə pə̂uʼ ləluŋú, káa pei pîŋ wéi. Paghʼ kə mâʼ nci ləwʉ̂, káa pei lâa wéi. 33Jâŋ Mbaptísʉ lə tô káa pə́ pfâr yé mbələ̂ghʼ, káa pə́ nô yé məluʼ, pei lâʼ ńgó kâa tû yé pə́ shʉʼʉ.» 34Môu Ŋuu kə tó, ə́ mə́ nzʉ̂ zə̂u, ə́ mə́ nô məluʼ, pei lâʼ ngô: «Â fou məzʉ̂ mbou mbə́ sə̌u pəpfǔ-ntsəp, tə mbaa yi pəghaŋə məfaa.» 35Lə́ pye pə́tsəm pi gháp pə́i no Sê, gháp jí ńgó jîno yé, ə̂ yi lə́nə́ʉ.
Yěso wô ndə̂ Síməu, a pə̂ ŋuu falísia
36Cǒ ŋuu falísia sʉ̂ʉtə Yěso ńgó gháp zʉ́ wó nzʉ́ zə̂u. Yěso tô ńkə́u ndə̂ ŋuu wêi, ńnyáŋ sê lə̂ ńzʉ́ zə̂u. 37Cǒ məngyě yi a kə pə́ túsoŋ wêi, ə́ ngwǒ cǐ tə́poŋ, zûʼ yé ńgó Yěso wə́ ndə̂ ŋuu falísia, ə́ ncóghʼ lamə́ndaa tə ndóghʼə́ tôʼ yi pə́ lə lǎghʼ cǒ mbə̂u ləghǒ yi pə́ fûŋ ńgó Alabâtərə ńtsúŋú ńdǎghʼ ńtó, 38ńkə́u ndə̂, ə́ ntə́ʉ nzəm Yěso mbəʉ məku mé, ə́ ntsə́rə́ tə ńdághʼ nci nyôghʼ mé ńtsə̌p məku Yěso, ə́ mbou ndághʼ mənyuŋu tû mé ńzâghʼ, ə́ shítə́ məku mé, ə́ ndǎghʼ lamə́ndaa zêi ńzóʼ. 39Ŋuu falísia yi a yǎa fúŋ Yěso ndə̂ zʉ́ jwô yə́rə́, ə́ nkwǎŋ ntə̂ʉ zʉ́ ngô: «Ŋuu wo tə̌i mbə́ ntsətə-nkəʉ Sê lə́nə́ʉ, mə́i a jî zə̂u yi məngyě wo yi a kəu yé lo pə̌ zěi, ńgó a ghwô cǐ tə́poŋ.» 40Yěso kə̂ ntóghʼ ndâʼ lə́ zʉ́ ngô: «Síməu, n ngwô có no yi ngwo laʼ ghô.» A lâʼ ngô: «Cícye lâʼ!» 41Yěso lâʼ ngô: «Cǒ ngaŋə-zə̂u lǎʼ mə́ nkə̂ nkâp ye mbó pye, yi nduŋ-mbi ŋuu pə̂ məpaghʼ nkâp nkʉ tâa, mi mbâatə pə̂ mə̂m-taa. 42Ghíʼ káa gháp lə ntʉ́ gháp nzǒ zâp lə̂, a lâghʼ zêi máʼ pou záp. Warə́ ŋuu lə́ páp pêi pə́pwô wo kǒŋ yé lěi warə́?» 43Síməu pwôr ngô: «N nkwaŋ zâa ńgó ə̂ ŋuu yi pə́ lə lǎghʼ nkâp nzǎa ḿmâʼ pou yé.» Yěso lâʼ ngô: «O kwâŋ shʉʼʉ.» 44Ə́ mbǒu shərə́ ńnáŋtə́ məngyě wêi, ə́ ndǎʼ lə́ Síməu ngô: «O pə̌ njwô məngyě wo? Tə fú ghíʼ nyǎa ńdáʼ ńkə́u ndə̂ gho, koo ŋə́ gho ghâa nci laghʼ sóghʼ məku; lə́ zʉ́ a laghʼ nci nyôghʼ mé sǒghʼ məku mâa, ə́ mbǒu ńdághʼ mənyuŋu tû mé ńzâghʼ. 45O kə́ shítə ghô ghâa, lə́ ə́ ngwǒ lə́ zʉ́, mə́i tə fú ghíʼ a tǒ yé ńkə́u ndə̂, a kə́ nyâŋ yé tə́ shitə́ məku mâa. 46O kə́ pə́i ndǎghʼ ghô məwə̂r ńzóʼ tû zâa, lə́ ə́ ngwǒ lə́ zʉ́, mə́i a laghʼ lamə́ndaa ńzóʼ məku mâa. 47Ə̂ zə̂u yi ə́ ghʉ̌, n ndâʼ ghô ńgó məngyě wo nyárə yo mbə̂u nkoŋə gháʼá ńté no pə́ lyəghʼə məfaa ye tsəm. Lə́ ŋuu yi pə́ lyəghʼə́ ye məfaa pə́ məyʉʼ, â ŋuu yi a kə̌ nyarə́ yé koŋə pə́ məyʉʼ.» 48Yěso pôu ndâʼ lə́ məngyě wêi ngô: «Pə́ lyəghʼə məfaa gho ntsəm.» 49Pye pi gháp pə pǎp lə pə́ ndə̂, jî lə̂ ndə̂mtə́ təcər páp ngô: «Ŋuu wo gháʼa mbə̂ yé pə̂ wǒ tə ndyə́ghʼə məfaa ŋuu?» 50Lə́ a lâʼ lə́ məngyě wêi ngô: «Pə̂i-ntə̂ʉ zô ghʉ o cwôr: Lər gho lə̂ mbwórə!»
Currently Selected:
Lúʼkáasʉ 7: NLA
Highlight
Share
Copy
Want to have your highlights saved across all your devices? Sign up or sign in
