Lúʼkáasʉ 22

Ngwôʼ Yěso pə̌ ngwo njǐ wó

(Mat 26.1-5,14-16; Mks 14.1-2,10-11; Jâŋ 11.47-53)

1Məleʼé lətsei mbələ̂ghʼ tə mvuŋ yi pə́ fûŋ ńgó Pásʉ́ka lə pə́ nkûʼ. 2pətə́-ndə̂ pənuŋú-poʼ-Sê gháp pə pəkeʼtə́-lə́pə́ʉ Mə̌usə̂i pə̂ ndôu məsʉ̂ lə̂ ndághʼ ńjwí Yěso, lə́ ə́ mə́ mbôghʼ lâʼ. 3Sə́tə kə̂u cər ntə̂ʉ Yúda yi pə́ fûŋ yé ńgó Yúda Isəkaryôtə, a pə̂ cǒ ŋuu lə́ ngaŋə-jyêʼ-no Yěso ntsap pwô lə̂ ləghə̂m. 4A cʉ̂ʼ nkə́ ngwó ńjwó pətə́-ndə̂ pənuŋú-poʼ-Sê gháp pə pətə̌ʉ-tú-mbi lə̂ mbáp ndə̂ Sê, gháp pə pǎp nyâŋ sê ńkwaŋtə́ ghíʼ a wo ghʉ̌ poŋə́ féi Yěso ńŋə́ lə́ páp. 5Ə́ fû mboŋə́ gháp tə gháp tsuŋtə təcər páp ńgó gháp wo ŋə́ nkâp lə́ zʉ́. 6A pə̂i, ə́ nkə́ ntóghʼ njí lə̂ ndôu məsʉ̂ ghíʼ a wo féi Yěso ńŋə́ lə́ páp tə lə́u lâʼ jí yé po.

Yěso tə̂u ngaŋə-jyêʼ-no yé lə̂ ngwó ńtʉ́ŋtə́ ghap lətsei Pásʉ́ka

(Mat 26.17-19; Mks 14.12-16)

7Leʼé yi pə́ lə pfâr mbələ̂ghʼ tə mvuŋ tô, ə́ mbə́ leʼé yi pə́ lə wâr pôu ndənzʉ lə̂ no lətsei. 8Yěso tə̂u Pyêh gháp Jâŋ, ə́ ndǎʼ lə́ páp ngô: «Pei wó ntsuŋu mághʼə məzʉ̂ *Pásʉ́ka ghíʼ paghʼə wo zʉ́.» 9Gháp túŋu yé ngô: «O koŋ ńgó paghʼ wó ghó ńtsuŋú měi?» 10A lâʼ lə́ páp ngô: «Pei tsúŋú ńzúʼ, pei wo lə̌r tə kə́u túsoŋ, ə́ pəutə́ ŋuu mbiŋə yi a pyěʼ twô nci, pei tsə́ʉ nzəm zʉ́ tə a kə́u ndə̂, pei kə̂u zéi lə́wó. 11Ə́ ndáʼ lə́ ngaŋə ndə̂ ngô: Cícye lâʼ ńgó pə túŋú ghó ńgó lûm ndə̂ yi gháp pə ngaŋə-jyêʼ-no yé wo zʉ́ məzʉ̂ lə̂ no lətsei Pásʉ́ka cər wó, â ghǒ? 12A wo nyarə́ wéi tə́koʼ lûm ndə̂ lə́ dêghʼ yi tʉ̌, mə́i pə́ tə́i mə́ ńtʉ́ŋtə́ shʉʼʉ, ə̂ pə́ yʉʼ yi pei wo tsuŋú mághʼə məzʉ̂ lətsei Pásʉ́ka wó.» 13Gháp lər ńkə́u wó, ə́ njwó zə̂u tsəm pə̂ pə́ ghíʼ Yěso yǎa ndǎʼ gháp. Gháp tsuŋu máp məzʉ̂ Pásʉ́ka yʉʼ wó.

Məzʉ̂ Ndêi-lěi

(Mat 26.26-29; Mks 14.22-25; 1Ko 11.23-25)

14Mpfu lə kuʼ, Yěso gháp pə ngaŋə-jyêʼ-no yé tó ńnyáŋ sê mə́ nzʉ̂ zə̂u. 15A lâʼ lə́ páp ngô: «N ntsâa mə́ gháʼate lə́ pə́ yi mboʼ paghʼə təmtə ńnyáŋ ńzʉ́ məzʉ̂ wo Pásʉ́ka m mboŋə́ jwó ngwôʼ. 16Məŋ ndâʼ gháʼá wéi ńgó n ndáʼ kə́ pǒu zʉ́ ghâa cǒ Pásʉ́ka po, tə láʼ kə́u mpfu yi no wêi wo lətsei pə̂utə́ mə́ cər Ləfou Sê.» 17A lə lâʼ lə́ páp yə́rə́, ə́ nkhwǒr tə́tóʼ məluʼ ńgwô, ə́ ŋə́ nkhwo mbó Sê, ə́ ngǐ cóghʼ mbó páp ńdǎʼ ngô: «Pei ko tə́tóʼ wo ńnó pei pə́tsəm. 18Pei jí ńgó məŋ, n ndáʼ kə́ pǒu nô ghâa məluʼ po tə kə́u mpfu yi Ləfou Sê tô.» 19A lə pou mbyé mbələ̂ghʼ, ə́ ŋə́ nkhwo mbó Sê, ə́ mbwóʼ wěi, ə́ ngí ńŋə́ lə́ ngaŋə-jyêʼ-no yé, ə́ ndǎʼ ngô: «Yo mbap mbəʉ zâa yi pə́ ŋə́ ńté tû zéi. Pei cʉ̂ʼ nyáŋ ńgʉ̂ gháʼá lə̂ ndághʼ mə́ nkʉ̂ʉtə ghâa.» 20Gháp lə zʉ̂ məzʉ̂ tə myâghʼ, Yěso khwôr tə́tóʼ məluʼ ə́ ngí pə́ côghʼ mbô páp, ə́ ndǎʼ ngô: «Tə́tóʼ məluʼ wo gháʼá mbə́ kaa shwî ə́ ndeitə́ lə̂ məci mâa mi ə́ wo ncwə́rə́ wó ńté tû zéi. 21Paghʼ ŋuu yi a fêi ghâa ńŋə́ pə́ ntəm zə̂u ńzʉ́. 22Ə̂ no lə́nə́ʉ, Môu Ŋuu wo kwʉ́ ghíʼ Sê lə láʼ ntághʼ, lə́ ndou wə́ tû ŋuu yi a fêi yé yé ńŋə́.» 23Gháp zûʼ yə́rə́, ə́ nǎa ndyár, ə́ shərə́ ńtúŋú təcər páp ńgó wǒ gháʼa ḿbə́ nou páp yi a wo ngʉ zêi mbə̂u no?

Ŋuu njwǐ wǒ ŋuu?

24Ngaŋə-jyêʼ-no Yěso pə̂ nzóŋə no lə̂ ndághʼ njwó ŋuu yi a wo pə́ təcər páp, ə́ pə́ ŋuu njwǐ. 25Yěso lâʼ lə́ páp ngô: «Pəfou pətəpə̌i-no Sê pə̂ sâʼ məlâʼ máp, ə́ nôʼtə pye noʼtə́, ə́ nkə́ nkôŋ záp pə́ ńgó pə fûŋ gháp ńgó pəghʉ̌ shʉʼʉ. 26Lə́, koo pei fəiʼi gháp. Tə ncʉ́ʼ yə́rə́, ŋuu yi a pə̌ ŋuu njwǐ təcər pei, â pə̂ pə́ ghíʼ môu lə́, ŋuu yi a pôu sâʼ wéi, â pə̂ pə́ ghíʼ ŋuu yi a faʼ mbó pei lə. 27Pei láʼ ghâa: Ŋuu njwǐ wǒ ŋuu? Â ŋuu yi a nyǎŋ sê mə́ nzʉ̂ zə̂u, kəʉ pə́ ŋuu yi a ghaptə? Tə kâa pə̂ pə́ ŋuu yi a nyǎŋ sê mə́ nzʉ́? Lə́ ə́ ngwǒ lə́ məŋ, mə́i m mbə̂ zâa təcər pei pə́ ghíʼ ŋuu yi a faʼ mbó pei lə̂. 28Pei gháʼá mbə́ pye pi pei kə́ nyáŋ mbəʉ məŋ mpfu yi n ndə pə́ cər nkwaʼtə. 29Ə̂ zə̂u yi ə́ ghʉ̌, n ngwô kə́ ŋə́ zei ləfou, ə́ ndʉŋ-ndʉŋ ghíʼ Tə́ ghâa lə ŋə́ ləfou lə́ məŋ lə̂. 30Ńjí ńgó ə́ leitə́ yə́rə́, pei nyâŋ ndə̂ məŋ cər ləfou zâa, ə́ nzʉ́ ə́ mbǒu nó, ə́ nyáŋtə́ lə̂ məlwoŋ ləfou, ə́ féʼ məcʉŋə-ndə̂ Ísə́lahêl ntsap pwô lə̂ ləghə̂m.»

Yěso shuŋtə lətuŋú Síməu Pyêh

(Mat 26.31-35; Mks 14.27-31; Jâŋ 13.36-38)

31Yěso fûŋ Síməu, ə́ ndǎʼ lə́ zʉ́ ngô: «Sə́tə gháʼá mə́i a yaa mə́ ndǎʼ ńgó pə nyér wéi lə́ zʉ́, â cʉ̂ʼ wéi ghíʼ pə́ cʉ̂ʼ pâa lə̂. 32Lə́, n sʉʉtə́ mə́ Sê ńté gho, ńgó koo pə̂i-ntə̂ʉ zô cwî. Lə́ o lə̌i ntáa mbə̂ʉ tə mbə́ nzəm məŋ, o côghʼ ntə̂ʉ pəfə̌r pô.» 33Pyêh lâʼ ngô: «Ə́ Nde, ə́ lə̌i mbə́ pə́ lə̂ nkə́u tsâŋ kəʉ pə́ lə̂ nkwʉ̂, mə́i poghʼo wo nǎa pə́.» 34Yěso lâʼ lə́ zʉ́ ngô: «Pyêh, n ntsúŋú ndǎʼ ghô: Mənkhwoʼ táa tóŋ yé lətwûʼ leʼé wo, tə́ ghó o muŋú mə́ ghâa mpfu tárə́ po.»

Yěso lâʼ ngaŋə-jyêʼ-no yé mbə̂u yi gháp wo lǎghʼ ńtsúŋtə́ məntə̂ʉ máp

35Yěso kə ncí ntúŋú ngaŋə-jyêʼ-no yé ngô: «N ndə tə́u wéi tə nkâp, tə məlaŋə́, tə paa gháʼá, pei lə kə́u mbûŋ có zə̂u mo?» Gháp pwor ngô: «Ə́ ngə́! Káa có zə̂u lə pûŋ yé wághʼ.» 36A pôu ndáʼ lə́ páp ngô: «Ə́ tə̂ʉ mpfu wo gháʼa, ə́ mbə́ yi ŋuu lə̌i ngwô nkâp ye, a pyê, tə mbaa paa. Ŋuu yi kâa ghwô ye nyǐ ntso, â fə̂i ndǐ ye ńdághʼ ńzə́u. 37Məŋ ndâʼ wéi ńgó no yi pə́ lə ŋwaʼá cər ŋwaʼa ńté ghâa ngô: Pə lə kwaʼ yé nou məfwôr. Ə́ pə́ mə́ ngwo mbə̂utə́ wó.» 38Ngaŋə-jyêʼ-no yé lâʼ lə́ zʉ́ ngô: «Ə́ Nde, mənyǐ ntso mwo sê mə́mbwô.» Yěso lâʼ ngô: «Ə́ kuʼ gháʼá lə́.»

Yěso wo ndəu ləkôr mətʉ̌ məwə̂r Olîvə lə̂ sʉ́ʉtə́ Sê

(Mat 26.36-45; Mks 14.32-41)

39Yěso lə lâʼ yə́rə́, ə́ kwǎr mə́ ndə́r lə̂ ləkôr mətʉ̌ məwə̂r Olîvə ghíʼ ə́ lə pə́ mar ye, ngaŋə-jyêʼ-no yé tsə̂ʉ nzəm zʉ́. 40Gháp lə lər tə nkə́u wó, a lâʼ lə́ páp ngô: «Pei sʉ̂ʉtə Sê, ə́ mbóghʼ lə̂ mpfúŋ cər nkwaʼtə.» 41Ə́ ndǎʼ yə́rə́, ə́ nyér gháp, ə́ ŋə̌i no tâʼ lǎp ləmǎʼ ləghǒ, ə́ shíʼ ńkʉ́ʼtə́ sê, ə́ sʉ́ʉtə́ Sê ńdâʼ ngô: 42«Tǎa, o lə̌i nkôŋ, o pfû yo ntə̂uʼ ngwôʼ mbó məŋ. Lə́, káa məŋ ndâʼ ńgó o ghʉ́ pə́ ghaa ləkoŋtə. Ghʉ̌ pə̂ gho.» 43[Ə́ ndáʼ yə́rə́, tâʼ cwôʼ Sê fû tʉ̌-lə́pû ńtó lə̂ ntóutə́ yé. 44Ləmoghʼ ghôu yé, a cʉ̂ʼ mə́ sʉ̂ʉtə Sê pə́ lə́ cʉ́ŋə́, jiʼi yé ghi pə́ kwǎr tsə̂ʉtə sê, ə́ cʉ́ʼ mbə̂ pə́ ghíʼ məkǎa məci lə̂.] 45A lə sʉ́ʉtə́ Sê yə́rə́ tə ə́ kûʼ, a lesê mbə̌ʉ nzəm ńcə́r ngaŋə-jyêʼ-no yé; ə́ ngǐ tó, mə́i gháp fʉ mə́ tə nkáa, ə́ ndétə gháp. 46A lâʼ lə́ páp ngô: «Pei lê ńté hó, pei létə sê ńsʉ́ʉtə́ Sê ḿbóghʼ lə̂ mpfúŋ cər nkwaʼtə.»

Pə ghou Yěso

(Mat 26.47-55; Mks 14.43-49; Jâŋ 18.2-11)

47Yěso lə pyêr mə́ ntsâr tsarə́, nou lâʼ tô, Yúda yi a lə pə́ cǒ tâʼ ŋuu lə̂ ngaŋə-jyêʼ-no yé ntsap pwô lə̂ ləghə̂m pfû mbi, ə́ ncʉ́ŋə́ mbáatə́ yé, ə́ mbáʼá yé. 48Yěso lâʼ lə́ zʉ́ ngô: «Yúda, o laghʼ pə̂ mbáʼá féi Môu Ŋuu ńŋə́ áa?» 49Ngaŋə-jyêʼ-no Yěso yi ə́ lə pə́ mbəʉ zʉ́ jwô zə̂u yi ə́ pə́ ngwo nděi wó, ə́ ntúŋu yé ngô: «Ə́ Nde, paghʼ lághʼ mənyǐ ntsô mághʼ ńdwóʼó?» 50Cǒ ŋuu lə́ páp kə̂ ntóghʼ ndághʼ nyǐ ntsô ye ńsə́u ngaŋə-faʼ tə́-ndə̂ pənuŋú-poʼ Sê, ə́ nzáʼ lətuŋú yé yi təʉ, ə́ pfûŋ sê. 51Lə́ Yěso lâʼ lə́ páp ngô: «Pei nyér, ə́ kuʼ gháʼá lə́.» Ə́ ncʉ́ʼ nkə́ nkə̂u lətuŋú ŋuu wêi, ə́ shwîtə. 52Yěso lâʼ lə́ pətə́-ndə̂ pənuŋú-poʼ Sê gháp pə pətə́-ndə̂ pəpáp ndə̂ Sê, ə́ ngʉ̌ pəkə̌m lâʼ pi gháp lə tó lə̂ ngôu yé ngô: «Pei laghʼ ghâa ńfúŋ pə́ cǒ ntsǒŋ tə mə́ ntô ńgǒu məŋ, ə́ ŋə́i ńgwô mənyǐ ntso gháp pə pəkə́shʉŋ mo? 53N ndə pə̂ leʼé tsəm, ə́ nkə́ mbə̂ pə́ təcər pei *ndə̂ Sê, káa pei ghôu wéi ghâa. Lə́, zêi mpfu yo, ə́ nkûʼ mə́, ə́ mbə́ mpfu yi nzə̌m wo nyarə mətəʉ mé.»

Pyêh muŋú Yěso

(Mat 26.57-58; Mks 14.53-54; Jâŋ 18.15-16)

54Ə́ pə̂ yə́rə́, gháp ghou yé mə́ ndághʼ yé ńdə̂r lə̂ nzeʼ tə́-ndə̂ pənuŋú-poʼ Sê, Pyêh tsə̂ʉ nzəm páp, lə́ mbə́ pə́ tə nzəm. 55Gháp kə́u wó, ə́ ntsuŋú mǒghʼ soŋ tətáa ńnyáŋtə́ sê mə́ ńzâghʼ. Pyêh tô yé ńnyáŋ təcər páp. 56Cǒ môu-məngyě yi a lə faʼ nzeʼ wêi nyâŋ tə mǒghʼ kêʼ yʉʼ, a lə̂i Pyêh, ə́ ndâʼ ngô: «Ŋuu wo gháp ŋuu yi pə́ tə́i ngǒu yé lə̂ yǎa mbə́.» 57Pyêh múŋu Yěso, ə́ ndâʼ ngô: «Mǎa, káa m mə́ ńjí ghâa yé!» 58Ə́ ghi pə́ mpfu pwô, cǒ ŋuu nâŋ yé yé lə́wó tə ndáʼ ngô: «Ô zô cǒ ŋuu gháp.» Pyêh pwor lə́ ngaŋ ngô: «Tǎa, kâa m mbə̂ ghâa cǒ.» 59Ə́ pou ngí lěi tâʼ mə́nəu, cǒ ŋuu lâʼ yé tə nkâa ngô: «Kwaʼ lə́nə́ʉ, gháp ŋuu wo yǎa mbə́, ńté ńgó a yaa mbə̌i mbə̂ yé ŋuu Galilêi lə́wó.» 60Pyêh pwôr ngô: «Kâa njî ghâa zə̂u yi o lou ńdáʼ zěi.» Pyêh ghi pə́ lâʼ yə́rə́, mənkhwoʼ kə̂ mə́ ntóŋ. 61Nde shə́rə, ə́ náŋtə́ Pyêh. A kʉ̂ʉtə no yi Nde tə̌i ndǎʼ lə́ zʉ́ ngô: «Mənkhwoʼ táa ghǐ tóŋ leʼé wo, mə́i o muŋu mə́ ghâa mpfu tárə́.» 62Pyêh kwâr tə nkə́u pěi, ə́ ngêʼtə́ gháʼate. 63Pye pi gháp lə pâp Yěso lə pə́ sə̂u yé, ə́ mə́ nzôutə yé. 64Gháp lə pôu sʉ̂ yé, ə́ mə́ sə́u yé, ə́ ndâʼ lə́ zʉ́ ngô: «Tóghʼ ŋuu yi a sə̌u ghô.» 65Gháp lə ghʉ yə́rə́, ə́ mə́ kʉ́ʼʉ́ ńdaʼ məno tə nzáa lə́ zʉ́ mi gháp laghʼ ńzôutə yé zoutə́.

Pə́ ji lə̂ féʼ Yěso

66Nzʉ̂ fôghʼ, pəkə̌m lâʼ, pətə́-ndə̂ pənuŋú-poʼ Sê gháp pə pəkeʼtə́-lə́pə́ʉ Mə̌usə̂i fûŋ cûʼtə záp, ə́ ngʉ̌ pə́ lághʼ Yěso ńtó lə̂ mbi páp. 67Gháp lâʼ lə́ zʉ́ ngô: «O lə̌i mbə́ Kəlísto, o lâʼ wághʼ.» Yěso pwôr lə́ páp ngô: «Məŋ ndə̌i ndáʼ wéi, mə́i pei wo pə̂i wéi po, 68ə́ mbǒu ńtúŋu wéi no, mə́i pei wo pwôr wéi po. 69Lə́, lə̂ fú mpfu wo, Môu Ŋuu wo cʉ̂ʼ nyâŋ pə́ lə̂ ndyəghʼə́ pô Tsə-pye yi təʉ.» 70Gháp pə́tsəm kəmə ńdâʼ ngô: «Ńjí ńgó ô Môu Sê áa?» Yěso pwôr ngô: «Ə́ kwar pə́ ntsʉ pei, mə̂ŋ wěi.» 71Gháp cʉ́ʼ shə́rə́ ńdǎʼ təcər páp ngô: «Tə ə́ lə̌i mbə́ gháʼa, paghʼə kə̂ mbóu ndou warə́ nzǔʼ-njwó? Paghʼə tsuŋu ńzúʼ no yi ə́ kwǎr ntsʉ zʉ́ pə́ paghʼə.»

Currently Selected:

Lúʼkáasʉ 22: NLA

Highlight

Copy