Lúʼkáasʉ 21
21
Njwô ngwôʼ mpfǒghʼ məngyě cǒghʼ shwoŋə Sê
(Mks 12.41-44)
1Yěso pə̂ ndə̂ Sê, ə́ mbəʼə́ nyôghʼ ə́ mə́ náŋ yʉʼ, ə́ njwó ghíʼ pəghaŋə-zə̂u pə́ ŋə̂ məzə̂u yʉʼ pə́ ŋə̂ məzə̂u wó ndə̂ Sê. 2Ə́ njwó cǒ njwô ngwôʼ mpfǒghʼ məngyě lə́wó, ghíʼ a pə̌ yʉʼ yi pə́ ŋə̂ məzə̂u wó ndə̂ Sê, ə́ mə́ ncôghʼ məpaghʼ nkâp mə́mbwô cər shoŋə Sê. 3Yěso lâʼ ngô: «Məŋ ndâʼ wéi, lə́nə́ʉ, njwô ngwôʼ mpfǒghʼ məngyě wo ŋə̌ ńděi ŋuu tsəm. 4Ńté ńgó pye pêi pwo pə́tsəm ghí ŋə́ záp, ə́ ntsóʼ pə́ lə̂ məzapə́ nkâp máp. Lə́ ə́ ngwǒ lə́ zʉ́, a tə̌ʉ ḿbə́ pə́ mbûŋ, lə́ a ŋə̂ yé zə̂u tsəm yi mboʼ a təi ńdághʼ ńtʉ́ŋtə́ məno mé.»
Yěso laʼ ngô pə́ táa vǒghʼ ndə̂ Sê
(Mat 24.1-8; Mks 13.1-8)
5Có ngaŋə-ku Yěso lə nâŋtə ndə̂ Sê tə mə́ fə́tə́ məghǒ gháp pə məzə̂u poʼ Sê mi pə́ lə lǎghʼ ńkwə̂i zêi, a lâʼ lə́ páp ngô: 6«Koo pei jwô pə́ ghíʼ ə́ poŋ lo, cǒ mpfu táa pə́, pə vǒghʼ zêi tə ləghǒ pyêr ńzápə́ yé ndəu có po.» 7Gháp ntúŋu yé ngô: «Cícye, yo no táa pə́ shʉ́ŋə́? Pə táa lâghʼ zarə́ ləiʼi jí ńgó zêi mpfu pə mə́ nkǔʼ?» 8A pwôr ngô: «Pei laghʼə́ tû zéi, ə́ mbáa ŋuu lə̂ fútə́ wéi. Ńté ńgó pye tə nzáa ghʉ̌ tághʼ ləjôghʼ zâa mbi, wǒwó lə́ páp pə́ ndâʼ ngô: “Mə̂ŋ Nzaʼ-nkʉ, ə mpfu kuʼ mə́”. Gháp lə̌i ntáa mə́ ndaʼ yə́rə́, koo pei pə̂i tə ntsə́ʉ nzəm páp. 9Pei lə̌i ntáa nyáŋ tə nzúʼ pə́ pə́ ndêʼtə tághʼə́ gháp məntso mi ə́ pə́ nkwatə cər məlâʼ, koo pei cwôʼ. Ńté ńgó mêi məzə̂u wo tsə̌mbi kwatə́, lə́ ə́ lághʼ ḿbə̂ yé pə́ ńgó ngoŋ wo lêi-lěi mě po.» 10Yěso kə̂ ncí ndáʼ lə́ páp ngô: «Tâʼ lâʼ táa lěsê lwóʼo có, fou tə̂u lesê ńdwoʼó cǒ. 11Ndesé táa cʉʼʉ́ gháʼate, wáʼ gháp pə məghou tə̌i wʉ̂ cər məcó məpaghʼə-ngoŋ. Mətəʉ məno táa kwatə́ ndəu ndesé, mələiʼi jwǐ kwátə́ lə́faŋ. 12Mwo məno táa ghǐ tó, ə́ pə tsəmbi ngóutə́ wéi, ə́ ŋə́ wéi ngwôʼ, ə́ féi wéi ńŋə́ məndə̂ cûʼtə pəyúda*, ə́ pə feʼ wéi, ə́ mǎʼ wéi məndə̂-tsâŋ. Pə táa fêʼ wéi mbi pəfou gháp pə pəgə́mnaa ńté ghâa. 13Lə́ ə́ pei lêitə́ mə́u, ə́ mbə́i pənzǔʼ-njwó pâa. 14Pə́ lə̌i ntáa ngôu wéi lə̂ ngwó fěʼ wéi, koo pei zâʼ nzʉ̂ fʉ̌ ńgó pei kə́u zǒŋ tû zéi gháʼá? 15Ńté ńgó məŋ lə̂ ntáa ŋə́ wéi jîno yi pei lǎghʼ pwǒr no tə pəghaŋə mbəu péi kə́ mbóu nzôŋ gháp po, ə́ nkə́ mbóu ńdâʼ gháp có no po. 16Kwaʼ pye pi ə́ táa zápə́ sôu tû pei, ə̂ pətə́ péi lə́ pəmə́ péi, tə mbaa pəfə̌r péi, gháp pə pye pi gháp cwíʼí lə́ pei, ə́ nkʉʼʉ́ pəsə̌u péi. Gháp táa lǎghʼ wéi wǒ pə fêʼ wéi, ə́ njwítə́ pye tə nzáa təcər pei. 17Pye pə́tsəm táa pǎa wéi ńté ghâa. 18Lə́, có lənyuŋu tû zéi cwî yé po. 19Ə́ ghʉ̌ lêitə pə́ lə̂ shəghʼ-ntə̂ʉ yi pei ghwǒ zěi, ə́ pei ghwó ləcwôr tə me.»
Ə zə̂u yi táa lěi ə́ Yelúsalêm
(Mat 24.15-21; Mks 13.14-19)
20«Pei lə̌i ngʉ́ njwó pəlwóʼó-ntso tó ńzə́mə́ Yelúsalêm tə mbóghʼó, pei jî ńgó mpfu yi pə́ wo vǒghʼ túsoŋ zêi pə mə́ nkǔʼ. 21Ə́ lə̌i ntáa mbə́ mpfu wéi, pye pi gháp pə́ Yudêi khʉ̂ ndǎghʼ ndə̂u yi məkôr ńgwo ndwô, pye pi gháp pə́ cər túsoŋ Yelúsalêm fú wó ńkwár, pye pi gháp yaa mə́ nkwǎr tə mbə́ pěi páa lə̂ mbə̂ʉ ńkə́u cər wó. 22Ə̂ pə́ yə́rə́, ə́ ndaghʼ ḿbə́ məleʼé mi Sê wo pʉ̌ŋ mbə̂u məno tə́poŋ pye Yelúsalêm. Ə̂ lághʼ ḿbəutə́ lə̂ məno mi pə́ lə ŋwaʼá cər ŋwaʼa Sê. 23Ngwôʼ nzǎa ghʉ̌ pə́ yi pəngyě shuŋú tə mbaa yi pəngyě pi gháp pə́ nóŋə ghəpə́. Ńté ńgó Sê táa nyarə́ zaŋə́ lóŋ ndəu pye lâʼ pwo. Pye pə́tsəm jwó kwaʼ ngwôʼ. 24Pə ghʉ̌ lǎghʼ mənyǐ ntso jwítə́ pye, ə́ ghǒu pəcó, ə́ ncaghʼə́ gháp ńŋə́ məlâʼ məlâʼ, gháp cʉ́ʼ mə́puʼ. Yo mbə̂u yi pye məlâʼ mi káa gháp pə̂ gháp pəyúda ghʉ̌ lǎghʼ ńŋəitə́ ndəu Yelúsalêm, ə́ ŋə́ pye ngwôʼ wó tə zap mpfu láʼ nkûʼ.»
Môu Ŋuu ghʉ̌ tó
(Mat 24.29-35; Mks 13.24-31)
25«Ə́ wo láʼ pə́ mpfu wêi, ə́ pə jwó mələiʼi kwátə́ lə́ mə́nəu, ə́ nkwátə́ lə́ mə́saŋ mbaa lə́ pəcwôʼ-saŋ. Mə̂i-nci cʉʼʉ́ tə pye pə́tsəm pi gháp pə́ ndəu ndesé wóghʼə, ə́ mbóghʼ gháʼate. 26Pye-mə́soŋ cí pə́ mbôghʼ zə̂u yi ə́ pə́ mə́ ndei ndəu ndesé, ə́ nkwʉ́tə́. Mətəʉ mə́tsəm mi ə́ pə́ ləfaŋ kə́mə́. 27Ə́ pə cʉ́ʼ njwó, Môu Ŋuu pə́ cər məlâm mə́ ntô lə̂ nkeʼ mbaa tə́koʼ mətəʉ. 28Mwo məno lə̌i ntáa njǐ lə̂ nkwátə́, pei pəʼə mətû méi ńnáŋ tʉ́, ńté no mpfu yi Sê wo nkwarə́ pei lə̂ puʼ pə mə́ nkǔʼ.» 29Yěso pou ndághʼ saghʼ-ləghaa ńdáʼ ngô: «Pei náŋ tʉ̌ məfúʼú gháp pə məcó mətʉ̌ ńjwó. 30Pei lə̌i njwó məfu měi kurə, pei jî ńgó ləu pə́ mə́ ntó. Ə́ mbǒu njwó měi jí lə̂ ntáp, pei ji ńgó cû pə́ mə́ nkwó. 31Ə́ kə̂ mbə́ yə́rə́, pei lə̌i ńdáʼ ńnyáŋ tə ńjwó mwo məno jí lə̂ ńkwátə́, pei jî ńgó Ləfou Sê páatə́ mə́. 32Məŋ ndâʼ wéi kwaʼ lə́nə́ʉ, pye pi gháp pə́ cər nzʉ̂ mpfu táa kwʉ́tə gháp tə mě tə́ ghó mwo məno mə́tsəm kwatə mə́ po. 33Lə́pû gháp ndesé ghʉ̌ mě, lə́ tsâr zâa yi tə́ láʼ mé. 34Pei laghʼə́ tû zéi lə̂ ncʉ́ʼ njóghʼ ḿpfár pə́ zə̂u, ə́ nô məluʼ ḿbʉ́ʉ, ə́ fʉ̂ məno mbə̂u lə̂ mbə̂u, ə́ mbóghʼ jîno zéi lə̂ ncwí tə leʼé lâʼ Môu Ŋuu táa ngí tó, ə́ ncʉ́ʼ fʉ́ŋə́ wéi fʉ́ŋə́, 35ghíʼ ləkei lə. Pei jí ńgó leʼé-mbî zei táa woghʼə́ woghʼə́ pfúŋ lə́ pye pə́tsəm ndəu ndesé. 36Pei páa lə̂ ndé, ə́ mə́ sʉ̂ʉtə Sê mpfu tsəm, a ŋə́ wéi mətəʉ lə̂ ndâghʼ ńdwǒghʼ məno mêi mi ə́ pə́ ńtó lêi, tə mbaa lə̂ ndâghʼ ńtə́ʉ mbi Môu Ŋuu.» 37Yěso lə jyêʼ pye zə̂u ndə̂ Sê ntə̌ʉ-nəu, ə́ mbə̂ mpfu-ngwʉ̂ ńdə́r ngwo ndê ləkôr mətʉ̌ məwə̂r Olîvə. 38Ə́ pə̂ nkôʼ-nzʉ̂, lâʼ tsəm tô lə̂ ndə̂ Sê ńzûʼ tsâr yé.
Currently Selected:
Lúʼkáasʉ 21: NLA
Highlight
Share
Copy
Want to have your highlights saved across all your devices? Sign up or sign in
