Lúʼkáasʉ 13
13
Ə́ poŋ ńgó maa ŋuu tsəm mêʼ cǐ tə́poŋ
1Ə́ lə pə́ mpfu wêi, pəcó pye tô mə́ ḿbyétə́ ńdâʼ Yěso ghíʼ Piláto lə ghʉ̌ pə́ jwítə pye Galilêi mpfu yi gháp lə pə́ ŋə̂ máp məzə̂u poʼ Sê. 2Yěso pwôr lə́ páp ngô: «Pei kwâŋ ńgó pye Galilêi pi pə́ kə jwítə́ gháp lêi lə lâghʼ ḿbə̂ ngaŋə-məfaa tə ndêi pfuʼ pəfə̌r páp mo? 3Ə́ ngə́, məŋ ndâʼ wéi; pei lə̌i ndə́iʼ kə́p cǐ zêi po, mə́i pei ghʉ̌ kə́ mê zêi pə́ ghíʼ páp. 4Tə mbaa pye tsap-ləfǎa lə̂ ləghə̂m pi ndə̂ yi pə́ póu ə sâghʼ ńgwó tʉ́ lə kəmə́ Silowê ńjwítə́ gháp lə̂, pei kwaŋ ńgó gháp lə fú mbə́ pəghaŋə məfaa tə ńdéi pye pə́tsəm túsoŋ Yelúsalêm mo? 5Ə́ ngə́, məŋ ndaʼ wéi; pei lə̌i ndə́iʼ kə́p cǐ zei po, pei ghʉ̂ nkə́ mê zéi pə́ ghíʼ páp.»
Ə no tʉ́ yi kâa pə́ nzə̂m yé
6Yěso pôu ndáʼ gháp wo saghʼ-ləghaa ngô: «Cǒ ŋuu lə pi mbə̂u tʉ̌ yi pə́ fûŋ ńgó “figyê” nkâʼ zʉ́. Ə́ ngʉ̌ nyáŋ tə ntó lə̂ ńkâp məntǎa měi, káa jwó yé có zə̂u. 7Ə́ cʉ́ʼ nkə́ ndáʼ lə́ ngaŋə-faʼ ye ngô: “Khwóʼ tʉ́ yo mêʼ, ńté ńgó ə́ pə́ mə́ mpfu wo nguʼ tárə́ ghíʼ n ntǒ lə̂ nkáp məntǎa měi, káa pə́ jwó ghâa có zə̂u. Ə́ gháʼa nzʉ̂ yo pǎp ndesé fefe ńté hó?” 8Ngaŋə-faʼ ye pwôr lə́ zʉ́ ngô: “Ə́ Nde, kə́ cí nyér zěi nguʼ wo, n ngwo tǎʼ ləcʉŋ zěi tə zə́mə́ poghʼó, ə́ ncóghʼ mətyʉŋə laghʼ ḿbwórə́ ndesé. 9Mbə̂ có, ə́ tâa ngí pə́ nguʼ gháʼa, ə́ nzə́m, ə́ kə́ ndə́iʼ zə́m ye po, o ghʉ̂ n nkhwôʼ mêʼ mpfu wêi.”»
Yěso ghʉ cǒ məngyě shwítə leʼé nji Pəyúda
10Ə́ lə pə́ có leʼé nji pəyúda, Yěso pə̂ ndə̂ cûʼtə mə́ njyêʼ pye no Sê. 11Cǒ məngyě pə̂ yé ndə̂ wêi, mə́i ə́ pə́ mə́ nguʼ ntsap ləfǎa lə̂ ləghə̂m ghíʼ có zəghʼə tə́poŋ lə kə́u lə́ zʉ́; ə́ ŋóʼó yé tə yé mbóu mbəʼə́ tə ntə́ʉ ndʉŋ-ndʉŋ kâa kə́ mbə̂ yé wó. 12Yěso jwô yé, ə́ fúŋ yé, ə́ ndǎʼ lə́ zʉ́ ngô: «Mǎa, lǒʼ zô me.» 13Ə́ nzápə́ mbô mé ndəu zʉ́, a lêi-lěi mbə́ʼə́ mbəʉ ye ńtə́ʉ ndʉŋ-ndʉŋ, ə́ cʉ́ʼ nkə́ mə́ ngûʼtə pə̂ Sê. 14Lə́ tə́-ndə̂ cûʼtə jwô yə́rə́, ə́ nzáŋə́ lóŋ, ńté no Yěso ghʉ ŋuu shwítə leʼé nji Pəyúda. Ə́ ncʉ́ʼ ndáʼ lə́ lâʼ ngô: «Məleʼé mi mboʼ pə́ faʼ pə̂ ntoghʼó, pei lághʼ məghou méi ńtó pə́ lə́ mêi məleʼé pə ghʉ́ pei shwítə́, koo pei kə̂ ndághʼ ńtó leʼé nji!» 15Lə́ Nde pwôr lə́ zʉ́ ngô: «Pəsap-ndwô-fʉ́ŋ lə́u ə́ lə̌i mbə̂ leʼé nji wǒwó kêʼ foŋ yé kəʉ pə́ njəkáasʉ ye ndaghʼ ńgwó, a nô nci péh? 16Tə məngyě wo yi a pə̌ môu ngər-ndə̂ Ábələhâm mə́i Sə́tə lə kə́r yé ngwô tə ə́ pə́ mə́ nguʼ ntsap ləfǎa lə̂ ləghə̂m lo, n təi lə́u kêʼ ghâa yé leʼé wo po ńté ńgó ə́ leʼé nji áa?» 17Yěso pə̂ ntsâr yə́rə́, ə sə̂ʉ ghi pə́ kô ngaŋə-mbəu yé pə́tsəm, ə lâʼ pə̂ tsêi ńté məno shʉʼʉ mi gháp jwó a ghʉ̂ měi.
Saghʼ-ləghaa lə̂ no Ləfou Sê
(Mat 13.31-33; Mks 4.30-32)
18Yěso kə̂ ncí ndâʼ ngô: «Ləfou Sê gháʼa shwí hó? Mboʼ n ndâghʼ hó fəiʼtə́? 19Ə́ pə́ ghíʼ mbyəghʼ có tʉ́ yi pə́ fûŋ ńgó *Mutâadə yi cǒ ŋuu lə mǎʼ nkâʼ zʉ́, ə́ ghʉ sáʼ, ə́ ngúʼ, pəshʉ̌ŋ tô ngí pə́ nyâŋtə mə́u, ə́ mə́ mbâʼ mənkaa máp lə̂ mbô měi.» 20Yěso pou nkə́ ncí ndâʼ ngô: «N ngwo kə́ cí lǎghʼ hó pyé fəiʼ lə̂ Ləfou Sê? 21Ə́ wə́ ghíʼ məyʉʼ mvuŋ yi məngyě laghʼ ḿbûʼ tâʼ paa faalə̂i tə ə́ kôʼ.»
Wǒ ŋuu táa kə́u cər Ləfou Sê?
22Yěso lə pə́ ndə̂r lə̂ Yelúsalêm, ə́ kə̂u cər mətúsoŋ gháp pə cər məlâʼ, ə́ njyêʼ pye no Sê. 23Ə́ ŋə̌i tə nkə̂u có yʉʼ, cǒ ŋuu túŋu yé ngô: «Ə́ Nde, ndaʼ ntâʼ pye lə́ táa cwór áa?» Yěso pwôr ngô: 24«Pei sáʼ təʉ, ə́ nděi lə̂ ntsʉ ndə̂ yi mə́ceʼé; ńté ńgó pye tə nzáa táa lǔ lə̂ nkə́u, lə́ ə́ kuʼ gháp nkə́u po. 25Ngaŋə ndə̂ táa lěi tə lěsê tsághʼə́ ntsʉ ndə̂ yé, pei tə́ʉ péi, ə́ njǐ lə̂ mbúʼtə́ ntsʉ ndə̂ ńdǎʼ ngô: Ə́ Nde, ə́ Nde tsóʼ ntsʉ ndə̂ ńŋə́ lə́ paghʼ. Â pwôr ngô: Káa m mə́ njî ghâa ləfǔ zéi! 26Pei cʉ́ʼ nkə́ njî lə̂ ndâʼ lə́ zʉ́ ńgó, lə́u paghʼə lə tə̂m zə̂u nzʉ́, ə́ mbǒu nó, o pôu ŋə̂i lə̂ məlaŋə́-ndə̂u túsoŋ paghʼ, ə́ njyêʼ pye zə̂u pô? 27Â kə̂ ncí ndâʼ lə́ pei ngô: káa m mə́ njí ghâa ləfǔ zéi. Pei fú ntsʉ ndə̂ məŋ ncʉ́ŋtə́, pei pə́tsəm pi pei ghʉ̂ məno tə́poŋ! 28Pei táa tsə́rə́, ə́ pǒu mpfár mə́soŋ méi ńté ghíʼ pei jwǒ Ábələhâm, Ísaghʼ, Yokôp gháp pə pətsətə́-nkəʉ Sê pə́tsəm pə̂ cər Ləfou Sê, ə́ pǒu ghǐ pə́, mə́i pə́ meʼ mə́ wéi péi. 29Pye táa fú sǎʼ-nəu gháp pə ntsǒ-nəu, ə́ fú tû gháp pə ncʉ̂ŋ, ə́ tó ńnyáŋtə́ sê ə́ zʉ́ zə̂u cər Ləfou Sê. 30Ə̂ pə̂ yə́rə́, pəcó pye pi gháp pə́ mpfu wo, ə́ mbə́ pəlyəghʼ-nzəm, gháp cʉ́ʼ pəluŋ-mbi. Pəcó pi pə́ mpfu wo ə́ mbə́ pəluŋ-mbi, gháp cʉ́ʼ pəlyəghʼ-nzəm.»
Yěso nâŋ Yelúsalêm məjʉ̂ŋ mé kô yé
31Pəcó pəfalísia cʉ́ŋə mbáatə́ Yěso pə̂ mpfu wêi mpfu wêi, ə́ ndǎʼ lə́ zʉ́ ngô: «Fû ghô yaʼa gháʼá ndə́r, ńté ńgó Elôdə pə̌ ndou ńgʉ́ pə́ jwî ghô.» 32Yěso lâʼ lə́ páp ngô: «Pei wó ndǎʼ lə́ káʼ wêi ńgó n ngwó zǔŋ məzəghʼə tə́poŋ, ə́ pǒu ghʉ̌ pye shwítə́ leʼé wo gháp zou, ə̂ pə́ lə̂ mbâatə leʼé tárə́, m myâghʼ faʼ zâa.» 33Ə́ poŋ ńgó n ntsə́ʉ laŋə́ leʼé wo, ə́ ngʉ̌ zou tə mbaa leʼé yi ə́ nkə́ mbə́ pə́ laŋə́. Ə́ pə́ ntúŋu ńgó n ndə́r tə nkə́u Yelúsalêm, ńté ńgó ntsətə-nkəʉ-Sê ghwo lə̂ nkə́ nkwʉ́ pə́ Yelúsalêm. 34Pye Yelúsalêm, pye Yelúsalêm, pei pi pei laghʼ məghǒ ńtə̂m pye pi Sê tə̌u lə́ pei ńjwítə́, ə̂ mpfu sə́ʼə́ ghíʼ n nkoŋ mə́ lə̂ nkə́itə́ wéi mbəʉ məŋ, ghíʼ məngə̂p pâatə pôu pé, lə́ pei kə̂ ndə̂ʼ wéi ləʼə́? 35Ə́ tə̂ʉ mpfu wo, pə́ wo měʼ ndə̂ zei lə́ pei. Məŋ ndaʼ wéi ńgó pei táa kə́ pǒu jwô wéi ghâa po tə kə́u ghíʼ leʼé táa kǔʼ, pei lâʼ ngô: «Mbwórə wə́ lə́ ŋuu yi a tô lə̂ ləjôghʼ Nde!»
Currently Selected:
Lúʼkáasʉ 13: NLA
Highlight
Share
Copy
Want to have your highlights saved across all your devices? Sign up or sign in
