Lúʼkáasʉ 12
12
Yěso lâʼ lə́ pye pé ńgó gháp páa pəfalísia
(Mat 10.19-20; 10.28-33)
1Yěso pə̂ ntsâr yə́rə́, lâʼ pə̂ nkʉ́ʼʉ́ ńkóʼ ńtô lə̂ mbəʉ zʉ́, yʉʼ fû fárə́ tə pye pə̂ nyʉ̂ŋtə məku pəcó. A ghi pə́ lâʼ no lə́ lâʼ, ə́ tsə̌mbi ndáʼ lə̂ ngaŋə-jyêʼ-no yé ngô: «Pei laghʼə́ tû zéi, ə́ mbáa mvuŋ pəfalísia. Koo pei cʉ̂ʼ ngaŋə-koŋə-mənyôghʼ ghíʼ páp.» 2Ə zə̂u yi ə́ lwǒ táa kwǎr sʉ̂ lâʼ. No tsəm yi pə́ lóʼo cər ntsəm, pə táa njí. 3Ə̂ zə̂u yi ə́ ghʉ̌, no tsəm yi pei lə lǎʼ cər nzə̌m, pə táa zúʼ ntə̌ʉ-nəu, no tsəm yi pei pǒu ntsághʼə́ pəlûm ndə̂, ə́ nyáŋ cər wó ńtsə́mtə́ mətuŋú pye, pə táa tə́ʉ məntsoʼ ndə̂ tsətə́.
Ŋuu yi pə́ ghwǒ lə̂ mbóghʼ yé
4Məŋ ndaʼ gháʼá wéi pei pəsə̌u pâa ńgó koo pei pôghʼ wéi pye pi gháp jwî záp pə̂ mbap mbəʉ, lə́ káa pǒu kuʼ gháp ngʉ̂ có zə̂u tə ndyéʼ zêi zə̂. 5N ngwo nyarə́ wéi ŋuu yi pei ghwǒ lə̂ mbóghʼ yé. Pei póghʼ pə́ ndaʼ Sê, ńté no mboʼ a jwî ŋuu, mbou nkûʼ lə̂ maʼ yé mǒghʼ. 6Pə́ pə́ fəi məpuŋu. Lə́ tə pə́ lə̌i nkə́itə́ pi pə́taa ə́ fə̂i pə́ pfû kwaʼ mboŋə́ hó mə́u? Lə́ Sê kâa pə́ ndyə́ghʼə yé cǒ ghap. 7Tə mbaa mənyuŋu tû méi mə́tsəm, ə̂ mi kwaʼá. Koo pei nyâŋ mbôghʼ wéi có zə̂u. Lətəi-ndwuŋ wei lei yi mbuŋu məpuŋu! 8Məŋ ndaʼ gháʼa wéi, ŋuu lə̌i ntə́ʉ mbi lâʼ, ə́ mbə́i ńgó â ngaŋə-jyêʼ-no ghâa, mə́i Môu Ŋuu ghʉ̌ tə̂ʉ yé mbi pəcwôʼ Sê, ə́ kə́ pə̂i yé ńgó â ŋuu ye lə́wó. 9Lə́ ŋuu póu ntə́ʉ mbi lâʼ, ə́ muŋú ghâa, mə́i Môu Ŋuu láʼ kə́ tə̂ʉ yé mbi pəcwôʼ Sê ə́ muŋú yé yé lə́wó. 10Ŋuu lə̌i ntsár tə́poŋ ńté Môu Ŋuu, mə́i mboʼ Sê lyəghʼə ńŋə́ lə́ zʉ́, lə́ ŋuu póu nzǒutə́ Zəghʼə Ndêi-lěi, mə́i Sê táa lyəghʼə yé ńŋə́ lə́ zʉ́ po. 11Pə́ lə̌i ntáa mə́ ndâghʼ wéi ńdə́r lə̂ ńgwó fěʼ wéi məndə̂ cûʼtə pəyúda, ə́ mbi pəfou kəʉ pə́ mbi pəsǎʼ lâʼ, koo pei tsôʼtə wéi lə̂ mbə̂u yi pei kə́u wó lǎghʼ zǒŋ tû zéi tə mbaa pə́ lə̂ no yi pei kə́u wó lǎʼ, 12ńté ńgó Zəghʼə Ndêi-lěi táa pə́ mpfu wêi, ə́ jyéʼ wéi no yi pei wo lǎʼ.
Saghʼ-ləghaa ngaŋə-zə̂u yi ghəghəʉ
13Cǒ ŋuu fû nou lâʼ ə́ ndǎʼ lə́ Yěso ngô: «Cícye lǎʼ lə́ fə̌r ghâa ńgó a gháptə́ məzə̂u mi tə́ waghʼ zʉ́ lə nyér, ə́ ŋə̂ mâa.» 14Yěso pwôr lə́ zʉ́ ngô: «Ə sə̌u, wǒ tsǒʼ ghâa lə̂ fêʼ məno méi, kəʉ pə́ lə̂ ngâp məzə̂u méi ńŋə́ lə́ pei?» 15Ə mbou ndáʼ lə́ ŋuu tsəm ngô: «Pei laghʼə́ tû zéi lə̂ nkə́ nyáŋ ntsâa pə̂ ngwô zə̂u, ńté ńgó káa ŋuu cî yé mbî ńté pə̂ məzə̂u mi a ghwǒ měi, tə mbaa ghíʼ a lə̌i mbə́i ngwǒ tə nkə́u pə́ ghó.» 16Ə́ ndǎʼ yə́rə́ tə ə́ kuʼ, a lâghʼ wo saghʼ-ləghaa ńdáʼ lə́ páp ngô: «Cǒ ngaŋə-zə̂u lǎʼ mbə́ wó, ə́ ntáa nyáŋ cǒ mpfu tə məzə̂u zə̂m nkâʼ zʉ́ gháʼate. 17A jî lə̂ nkwáŋə́ tû yé ngô: Tə n ngwo ghʉ̌ gháʼá lə̂ məzə̂u mâa? Kâa n ngwô ghâa yʉʼ yi mboʼ m mbyê měi núŋú wó. 18Ə́ ncʉ́ʼ ndâʼ ngô: M mə̌ njî ghíʼ n ngwo ghʉ̌ mpfu wo. N ngwo kə̌m mənkəi mâa mə́tsəm, ə́ cʉ́ʼ kə́r pə́ mi jwǐ, ə́ cóghʼ ngəsâŋ-ncʉ̂ŋ zâa gháp pə məcó məzə̂u mâa cər wó. 19Ə́ cʉ́ʼ pwórə́ nyâŋ ghâa kwáa ku zâa, ə́ lǎʼ lə̂ tû-mbəʉ zâa ngô: Ə sə̌u, o fǔ ngwǒ məzə̂u mi ə́ wo cí mənguʼ mənguʼ, pwórə́ nzətə ghô, ə́ nzʉ́ mbou nó, ə́ ntsěi ləcǐ-mbî gho! 20Lə́ Sê lâʼ lə́ zʉ́ ngô: Ghəghəʉ yo, o wo kwʉ́ pə̂ lətwûʼ wo. Tə ndwuŋ məzə̂u mi o kəitə́ lo, ə́ wo cʉ́ʼ mi wó? 21Ə́ gháʼá ndaghʼ ńnyárə ghíʼ ŋuu yi a tsâp məzə̂u ntê pə̂ tû-mbəʉ yé, lə́ mbou mbə́ mbi Sê, káa ghwo yé có zə̂u pə̌.»
Ə́ poŋ lə̂ ntághʼ pə̂ Sê mbi lə̂ zə̂u tsəm
(Mat 6.25-34)
22Yěso kə̂ ncí ndâʼ lə̂ ngaŋə-jyêʼ-no ye ngô: «Ə̂ zə̂u yi ə́ ghʉ̌, m mə̂ ndâʼ wéi ńgó koo pei jwôghʼ nzʉ́ŋ ńté ləcǐ-mbî wei, ńté no zə̂u pei wo zʉ́, mbaa no ndǐ yi pei mǎʼ lǎghʼ pǒu mbəʉ zéi. 23Ńté ńgó ləcǐ-mbî lêi məzʉ̂, mbəʉ pôu ndêi ndǐ. 24Pei náŋ məngə́ŋâa ńjwó: Káa gháp pə̂ mbî gháp zə̂u, káa kə́ pǒu pə́ pyê gháp ŋə̂ ndə̂, káa ghwo gháp ntaŋ, káa kə́ ghwo gháp nkəi; lə́ Sê pôu mə́ nzághʼə gháp. Pei jí ńgó pei ghwo lətəi-ndwuŋ ndêi pəshʉ̌ŋ. 25Tə mboʼ wǒ ŋuu lə́ pei cî ndə̂ nzʉ̌ŋ wó, ə́ kʉʼʉ́ məlǎp lə̂ ləcǐ-mbî ye? 26Tə mə́ceʼé zə̂u lə̌i ngáʼ wéi, pei pôu mbûʼ mbəʉ zéi lə̂ pfuʼ məzə̂u ńté hó? 27Pei náŋtə́ tə́toŋə́ lə̂ ləghěi nkâʼ ńjwó mbə̂u yi a lǎghʼ séi. Ləghěi wêi tə̌ʉ nkâʼ káa pə́ fâʼ yé, káa pǒu kə́ pə́ pâʼ yé ndǐ. Fou Salə́məu lə pə́ ngaŋə-zə̂u, lə́ káa láʼ ghwo yé ndǐ tə ə́ poŋ ghíʼ tə́toŋə́ wêi. 28Tə mboʼ Sê mâʼ məndǐ shʉʼʉ gháʼa lə́ ləghěi yi a jwôghʼ ntə̂ʉ nkâʼ leʼé wo, ə nzʉ̂ pôu fóghʼ pə́ soʼ mâʼ mǒghʼ, mə́i a cʉ́ʼ tó lə́ pei mǎʼ zarə́ mbə̂u ndǐ? Yêe pə̂i-ntə̂ʉ zéi khwôghʼ ée! 29Koo pei kə̂ njwóghʼ mbûʼ mbəʉ zéi ntê zə̂u yi pei wo zʉ́ tə mbaa pə́ yi pei wo nó. 30Pətəpə̌i no Sê cər nzʉ̂ yo lə́ gháʼá ntáŋə tə́ kâa lə̂ ngwô məzə̂u mêi mə́tsəm. Lə́ ngwǒ lə́ pei, mə́i pei ghwo tâʼ Tə́ yi a pə̌ njî zə̂u tsəm yi ə́ pə́ tsə wéi. 31Pei lôu pə́ ndaʼ Ləfou Sê, ńjí ńgó Sê cʉ̌ʼ ŋə́ pfuʼ məzə̂u mei lə́ pei.»
Məzə̂u lətəi-ndwuŋ ə́ tʉ̌-lə́pû
32Pye pâa, pei khwôghʼ lə́ koo pei pôghʼ wéi! Ńté ńgó Tə́ wei lə koŋ yé koŋə́, ə́ ŋə́ ləfou lə́ pei. 33Pei fə̂i məzə̂u méi ńŋə́ nkâp zěi lə́ pəpûŋ. Pei tsúŋú pôu-paa pi tə láʼ ncóŋtə́ ńdaghʼ ńdóʼó nkâp zei, ə́ kəitə́ məfuʼ méi tʉ̌-lə́pû, ə́ yʉʼ yi mboʼ měi lâʼ mê yé wó leʼé có po, pətsǒŋ kuʼ gháp lə̂ njú po, lə́u saa kə̂ kûʼ yé lə̂ nzʉ́ po. 34Ńté ńgó yʉʼ yi məfuʼ méi pə́ wó, ntə̂ʉ wéi wo kə́ pə̂ yé pə́ yʉʼ wó lə́wó.
Pei pə́ mənâŋ
35«Pei tsuŋú mbəʉ zéi lə̂ faʼ, koo pei pə̂ghʼ pəlâm péi! 36Pei pə́ ghíʼ pəghaŋə-faʼ pi gháp lê tə́ lê, ə́ mə́ nzʉ́ʼtə tə́-faʼ gháp yi a lə̌r lə̂ yʉʼ lətsei nzóʼ ghíʼ a wo kwó púʼtə́ ntsʉ ndə̂, gháp tóghʼ ntsóʼ. 37Pəndʉʉ-mboŋ, ə̂ pəghaŋə-faʼ pi tə́-faʼ gháp ghǐ kwó, mə́i gháp kə́ lê gháp. Kwaʼ lə́nə́ʉ, məŋ ndaʼ wéi ńgó a wo tsuŋú mbəʉ ye, ə́ ghʉ̌ gháp nyáŋə́ sê lə̂ nzʉ́ zə̂u, â lî gháp. 38A lə̌i mbə̂ʉ ntəʉ-twûʼ kəʉ pə́ nkôʼ-nzʉ̂, ə́ ntó ńjwó gháp pyér pə́ tə lê, mə́i gháp pəndʉʉ-mboŋ. 39Pei tsúŋú nzúʼ: Ə́ tə́i ḿbə́ yi mboʼ ngaŋə ndə̂ jî mpfu yi ntsǒŋ wo tó túŋ ndə̂ ye, mə́i mboʼ a nyêr yé, a tô ḿbwóʼ ndə̂ ye po. 40Pei zéi, pei tsúŋtə́ mbəʉ zéi ḿbáp, ńté ńgó Môu Ŋuu ghʉ̌ tó pə̂ mpfu yi káa pei yáa mə́ nzʉ̂ʼtə wéi yé.»
Ŋuu yi a fâʼ faʼ yi tə́-faʼ ye pə̌ nkǒŋ
41Pyêh túŋu yé ngô: «Ə́ Nde, o pyêtə wo saghʼ-ləghaa gháʼa ńdâʼ pə́ lə́ paghʼ kəʉ pə́ lə́ ŋuu ntsəm?» 42Nde pwôr lə́ zʉ́ ngô: «Ngaŋə-faʼ yi a zǔʼ ntsʉ tə́-faʼ ye mbóu njí no gháʼa mbə́ warə́? Yo cǒ tâʼ yi tə́-faʼ yé ghí lə̌r, ə́ ŋə́ faʼ lə́ zʉ́ ńgó â cʉ́ʼ mə́ mbâp nzeʼ, mbóu mə́ náŋtə pəcó pəghaŋə-faʼ, ə́ ŋə̂ gháp məzʉ̂ mpfu yi ə́ pə́ ntúŋú. 43Tə́-faʼ wêi lə̌i ndáʼ ngí pə̌ʉ nzəm, ə́ njwó a pə́ fâʼ faʼ zêi shʉʼʉ, mə́i â ndʉʉ-mboŋ. 44Məŋ ndaʼ wéi kwaʼ lə́nə́ʉ, tə́-faʼ wêi wo ghʉ̌ zʉ́ lə̂ cʉ̂ʼ mə́ nâŋtə zə̂u pé tsəm. 45Lə́ ngaŋə-faʼ ye wêi lə̌i ncʉ́ʼ nzəm nkwâŋ ngô: Tə́-faʼ ghâa wo tóghʼ kwô yé po, ə́ ncʉ́ʼ nkə́ ndêi-lěi njí lə̂ sə́u pəcó pəghaŋə-faʼ tə́ cwǐ ŋuu, ə́ nzʉ́ zə̂u, ə́ nó məluʼ ḿbʉ́ʉ, 46mə́i tə́-faʼ yé wêi wo woghʼə́ woghʼə́ nkwó leʼé yi kâa a yáa mə́ nzʉ́ʼtə yé yé, ə́ mpfu yi káa a yáa mə́ njî yé ńgó mboʼ a tô, ə́ zǔŋ yé a lə́r ńgwo ńjwó ngwôʼ ghíʼ pətəpə̌i no Sê. 47Ngaŋə-faʼ yi a pə̌ njî faʼ yi tə́-faʼ ye pə̌ nkoŋ ńgó â fâʼ, lə́ káa faʼ yé, â yi pə́ táa sə̂u yé gháʼate. 48Lə́ ngaŋə-faʼ yi kâa pə́ njî yé faʼ yi tə́-faʼ ye pə̌ nkoŋ ńgó â fâʼ, ə́ ngʉ̌ zə̂u yi mboʼ pə́ lêitə mə́u nsə́u yé gháʼate, â yi pə́ táa sə́u yé pə́ məyʉʼ. Pə́ lə̌i ŋə́ zə̂u lə́ ŋuu ə́ záa, mə́i pə́ táa kə́ túŋú yé ə̂ záa, pə́ póu nyér zə̂u zǎa lə́ ŋuu ńgó a pə́ náŋtə́, mə́i pə́ táa túŋú yé ə̂ záa ndêi yə́rə́.»
Yěso laghʼ ghaptə ńtó təcər pye-mə́soŋ
49«Yěso pôu ndâʼ lə́ ngaŋə-ntə̂u yé ngô: N ndə tó lə̂ mâʼ mǒghʼ ndəu ndesé. M mbou mə́ ntsâa ńgó wěi fátə́ nkʉ́. 50Pə́ pə́ ngwo nyǔʼ məŋ cər ngwôʼ. M mbou mə́ ntsâa ńgó zêi leʼé fátə́ ntó. 51Koo pei kwaŋ ńgó n nkə lâghʼ mbwórə ńtó ndəu ndesé, n nkə laghʼ pə̂ ghaptə ńtó. 52Lə̂ fú mpfu wo, ghaptə wo pə́ təcər pye pə́taa pi gháp pə́ cər tâʼ ndə̂. Pi pə́tárə́ ghí pə́ paa pi pə́pwô, pi pə́pwô kə́ mə́ mbâa záp pi pə́tárə́ lə́wó. 53Tə́ môu ghí pə́ lə̂ʼ lə̂ nzúʼ no môu ye yi mbiŋə, môu mbiŋə pə́ ndə̂ʼ lə̂ nzúʼ no tə́ ye. Maa-môu ghí pə́ ləʼ lə̂ nzúʼ no môu ye yi məngyě, môu-məngyě pə́ ndə̂ʼ lə̂ nzúʼ no mə́ ye, ngwě môu ghí pə́ lə̂ʼ lə̂ nzúʼ no mə́ ndə̂u yé, mə́ ndə̂u pə́ ndə̂ʼ lə̂ nzúʼ no ngwě môu.»
Ə́ poŋ ńgó ŋuu jî ye mbə̂u yi a lǎghʼ pə́ nzəm Sê
54Yěso kə̂ ncí ndáʼ lə́ lâʼ ngô: «Pei lei tə njwó məlâm kôʼ ntsǒ-nəu, pei lâʼ ńgó mbʉŋ wo ló, ə kə̂ ndó, 55ə́ mbou njwó kəfwor shə́rə́ tə ncʉ́ʼ fû pə́ lə̂ sʉ̂ yi ncʉ̂ŋ ə́ ncʉ̂ʼ yʉʼ, pei lâʼ ńgó yʉʼ pə́ ngwo ntǒu wó, ə́ kə̂ ntôu. 56Pəsap-ndwô-fʉ́ŋ, pei nâŋ ləfaŋ gháp ndesé ńjî zə̂u yi ə́ pə́ ngwo nděi wó, ńté hó pei pou njwó məno mi ə́ pə́ kwatə mpfu wo, káa kə́ kûʼ wéi njí no yi ə́ laghʼ ńdáʼ? 57Ńté hó káa pei jí lə̂ njwó zə̂u yi ə́ pǒŋ ńgó mboʼ pə́ ghʉ zěi? 58Pei ŋuu lə̌i ngwô nzǒ, a pə́ ndaghʼ ghô ńdər lə̂ mbi fou kôr, pei zʉ́ pyér pə́ laŋə́-ndə̂u, o sʉ̂ʉtə yé pei zʉ́ lyəghʼ pə́ laŋə́ ə́ tsuŋtə́, ə́ me. Tə ndə́iʼ yə́rə́ po mə́i a lǎghʼ gho lə̌r tə kə́u mbi fou kôr, â féʼ ghô, ə́ ŋə́ ghó lə́ pəpáp-pəghaŋə-tsâŋ, gháp cóghʼ ghô tsâŋ. 59N ntsuŋu ndâʼ ghô ńgó o táa kwar ghô ndə̂-tsâŋ wêi tə́ ghó o tʉ̂ nzǒ yi a yǎa mə́ nkə̂ ghô lei po.»
Currently Selected:
Lúʼkáasʉ 12: NLA
Highlight
Share
Copy
Want to have your highlights saved across all your devices? Sign up or sign in
