Jâŋ 9
9
Yěso ghʉ̂ ŋuu yi pə́ lə ghí jí yé a pə̂ fwoghʼ-mə́nyôghʼ shwítə
1Yěso ghʉ̂ mə́ ndêi có yʉʼ, ə́ njwô cǒ ŋuu yi pə́ lə́ ghí jí yé a pə̂ pə́ fwoghʼ-mə́nyôghʼ. 2Ngaŋə-jyêʼ-no yé túŋu yé ngô: «Cícye wo ŋuu lə ghí kwǎr ləpəm, ə́ mbə́ pə́ fwoghʼ-mə́nyôghʼ gháʼa ńté pə̂ məfaa yé kəʉ pə́ yi tə́ ye kəʉ pə́ yi mə́ ye?» 3Yěso pwôr ngô: «Kâa pə̂ yé ńgó tû-mbəʉ yé kəʉ pə́ pye pi gháp lə jí yé lə fâa có no, lə́ fwoghʼ yé pə́ pə́ ńgó Sê wo lěi lə̂ zə̂u yi a wo ghʉ̌ lə́ zʉ́, ə́ nyarə́ məfaʼ mé. 4Ə́ pə́ ntúŋu ńgó nzʉ̂ pyér mə́ fwó gháʼa, paghʼə fáʼ məfaʼ ŋuu yi a lə tə́u ghâa. Ə twûʼ pə́ mə́ ngwo shʉ́ŋ wó, ŋuu kə́ mbou kuʼ yé lə̂ ngʉ̂ có zə̂u po. 5Mpfu yi m mbyěr ndəu nzʉ̂, m mbə̂ nkeʼ nzʉ̂.» 6Yěso laʼ yə́rə́, ə́ ntyə̌ghʼ mətê sê, ə́ ndaghʼ ńtáptə́ ndesé, ə́ ndǎghʼ ndesé zêi ńzótə́ mənyôghʼ fwoghʼ-mə́nyôghʼ wei, 7ə́ ndǎʼ lə́ zʉ́ ngô: «Wo sǒghʼ sʉ̂ gho cər ghəm-nci Silowê» (Silowê wêi laghʼ ńdâʼ ńgó «Ntə̂u»). Fwoghʼ-mə́nyôghʼ wei wô wó sǒghʼ sʉ̂ yé, ə́ ngǐ pə̌ʉ lə̂ nzeʼ zʉ́, ə́ ŋə̌i mə́ njwô yʉʼ. 8Pəghaŋə ləpar nzeʼ pé gháp pə pye pi gháp lə nyâŋ njwô ghíʼ a lôu ndôu jwô yé mpfu wo, ə́ ndâʼ ngô: «Kâa yo pə́ ŋuu yi a lə ŋâa ndôu yʉʼ nyâŋ wó ə́ ndôu-ndôu lə̂?» 9Pəcó pye pə̂ ndâʼ ngô: «Â zʉ́.» Pəcó pə̂ ndâʼ záp ngô: «Ə ngə́, a shwǐ yé shwí.» Fwoghʼ-mə́nyôghʼ wei lâʼ ngô: «Ə̂ kwaʼ məŋ.» 10Gháp túŋu yé ngô: «Nyôghʼ mô ghʉ gháʼá mboŋə́ ŋéʼé?» 11A pwôr lə́ páp ngô: «Ŋuu yi pə́ fûŋ yé ńgó Yěso tâptə ndesé ə́ ndǎghʼ ńzóʼtə́ mənyôghʼ mâa, ə́ ndǎʼ lə́ məŋ ńgó n ngwó Silowê, ə́ sǒghʼ sʉ̂ ghâa, n nkə ngwô wó ə́ sóghʼ sʉ̂ ghâa, ə́ njwó yʉʼ.» 12Gháp túŋu yé ngô: «Ŋuu wêi ghǒ?» A lâʼ ngô: «Kâa mə́ njî ghâa.»
Pəfalísia pə́ ntúŋu ŋuu yi a lə pə́ fwoghʼ-mə́nyôghʼ no
13Pə́ laghʼ ŋuu yi a lə pə́ fwoghʼ-mə́nyôghʼ lêi ńdə́r lə̂ mbi pəfalísia. 14Ə́ ghi pə́ mə́i Yěso kə laghʼ mətê ńtáptə́ ndesé, ə́ ndághʼ ńzóʼtə́ nyôghʼ ŋuu yi a lə pə́ fwoghʼ-mə́nyôghʼ lêi gháʼá leʼé nji pəyúda. 15Pəfalísia túŋu záp yé ghíʼ ə́ kə lěi a poŋə́ pə́ jwô yʉʼ. A pwôr lə́ páp ngô: «Ŋuu wêi kə lâghʼ mətê ńtáptə́ ndesé, ə́ ndaghʼ ńzóʼtə́ nyôghʼ mâa, n ngwô sóghʼ sʉ̂ ghâa; m mbə̂ mpfu wo ə́ mə́ njwô yʉʼ.» 16Pəcó pəfalísia pə̂ ndâʼ ngô: «Ŋuu yi a ghʉ̌ no yo káa a fû yé mbó Sê, ńté ńgó káa a pə́ njî yé leʼé nji.» Pəcó pə̂ ndâʼ záp ngô: «Mboʼ tâʼ ngaŋə-məfaa ghʉ̂ gháʼá tə ngʉ́ yo mbə̂u mənkəʼə-məno?» Ə́ lei yə́rə́, ə ghaptə kə̂u təcər páp. 17Pəfalísia kə̂ ncí túŋú ŋuu wêi ngô: «O lâʼ zô ńgó hó ńté ŋuu yi a kə ghʉ̌ o jwô yʉʼ lêi?» A pwôr lə́ páp ngô: «Â tâʼ ntsətə-nkəʉ Sê.»
18Káa pəkə̌m lâʼ pəyúda pə̂i gháp ńgó ŋuu wêi kə pə́ fwoghʼ-mə́nyôghʼ mboŋə́ shwítə́. Ə́ fúŋ mə́ ye gháp tə́ ye. 19Ə́ ntúŋú gháp ngô: «Yo kwaʼ môu wei yi pei laʼ ńgó pei lə jí yé, a pə̂ pə̂ fwoghʼ-mə́nyôghʼ lə̂, ə́ lei gháʼá a poŋə́ pə́ jwô yʉʼ mpfu wo?» 20Gháp pwôr ngô: «Â kwaʼ môu waghʼ, paghʼ tsuŋu mə́ njî ńgó a lə ghí kwǎr ləpəm, ə́ mbə̂ yé pə̂ fwoghʼ-mə́nyôghʼ. 21Lə́, ə́ ngwǒ lə́ no ghíʼ a pə̌ njwô yʉʼ mpfu wo, mə́i káa paghʼ jî wághʼ no mə́u. Kəʉ wǒ ŋuu ghʉ̌ a jwô yʉʼ, mə́i káa paghʼ pə́ njî wághʼ. Pei túŋú pə́ yé, káa a pyér yé pə́ môu lə̂ ndáʼ no yi ə́ pə́ lə́ zʉ́.» 22Mə́ ye gháp tə́ ye lâʼ yə́rə́, ńté no gháp lə pə́ mbôghʼ pəkə̌m lâʼ pəyúda; ńté ghíʼ gháp lə tághʼ mə́ ńgó ŋuu lə̌i mbə́i ńgó Yěso Nzaʼ-nkʉ, mə́i pə́ wo zǔŋ yé ndə̂ cûʼtə pəyúda. 23Ə̂ zə̂u yi ə́ lə ghʉ̌, mə́ ye gháp tə́ ye lâʼ ngô: «Pei túŋú pə́ yé, ńté no káa a pyêr yé pə́ môu.»
24Pəfalísia kə̂ ncí fúŋ ŋuu yi a lə pə́ fwoghʼ-mə́nyôghʼ lêi, ə́ ndǎʼ lə́ zʉ́ ngô: «Lǎʼ no lə́nə́ʉ zô mbi Sê, paghʼ pə̌ ntsuŋú njî ńgó ŋuu wêi ngaŋə-məfaa.» 25A pwôr lə́ páp ngô: «Káa məŋ mə́ njî ghâa ńgó kəʉ â ngaŋə-məfaa kəʉ pə́ ŋuu shʉʉ lo, m mə̌ njî zâa pə́ ńgó n nkə́ pə́ fwoghʼ-mə́nyôghʼ, m mbou mbə́ mpfu wo, ə́ mə́ njwô yʉʼ.» 26Gháp túŋu yé ngô: «A kə ghʉ hó lə́ gho? A kə ghʉ gháʼá nyôghʼ mô poŋə́ ŋéʼé?» 27A pwôr lə́ páp ngô: «N nyaa mə́ ndáʼ ndéʼtə́ wéi, káa pei zûʼ wêi. Pei lou ńgó m mbyə́ghʼə́ ńdâʼ ńté hó? Pei pə̌ nkoŋ lə̂ mbə̂ zéi ngaŋə-jyêʼ-no yé mo?» 28Pəfalísia zûʼ yə́rə́, ə́ njǐ lə̂ nzóutə́ yé, ə́ ndǎʼ ngô: «Gho lə̂ pə̌ ngaŋə-jyêʼ-no ŋuu wêi! Paghʼ pə̂ zághʼ pə̂ ngaŋə-jyêʼ-no Mə̌usə̂i. 29Paghʼ pə̌ njî ńgó Sê lə lâʼ no lə́ Mə̌usə̂i, lə́ ə́ ngwǒ lə́ ŋuu wêi, mə́i káa paghʼ pə́ njî wághʼ ləfǔ yé!» 30Ŋuu yi a lə pə́ fwoghʼ-mə́nyôghʼ lêi lâʼ lə́ páp ngô: «Pei laʼ ńgó káa pei pə́ njî ləfǔ yé gháʼa, ə́ kəʼə ghâa gháʼate; lə́ mə́i a kə ghʉ nyôghʼ mâa ŋéʼe! 31Paghʼə pə́tsəm pə́ njî ńgó káa Sê pə́ nzûʼ yé nji ngaŋə-məfaa. Lə́ ə́ mbə́ yi ŋuu lə̌i ncóghʼ ntə̂ʉ yé lə̂ Sê, ə́ mbou ngʉ́ zə̂u yi a pə̌ nkǒŋ; mə́i a wo zúʼ sʉ̂ʉtə yé. 32Pə́ laa kə́ jwó ŋuu yi a ghʉ̌ ŋuu yi pə́ ghí jí yé a pə̂ pə́ fwoghʼ-mə́nyôghʼ jwô yʉʼ. 33Ŋuu wêi tə̌i ndə̌iʼ pə́ ŋuu yi a fǔ mbó Sê po mə́i káa a kə kûʼ yé lə̂ ngʉ́ có zə̂u.» 34Gháp lâʼ lə́ zʉ́ ngô: «Pə́ kə jí ghô cər məfaa, o wo njyéʼ paghʼ zə̂u áa!» Ə́ ncʉ́ʼ fú ndə̂ cûʼtə, ə́ nzǔŋ yé.
Kwaʼ pəfwoghʼ-mə́nyôghʼ
35Yěso ghʉ nzúʼ ńgó pə́ fú ndə̂ cûʼtə ńzúŋ yé, ə́ ngwo ntúŋú yé ngô: «O pə̂i no Môu Ŋuu?» 36A pwôr ngô: «Ə́ Nde Môu Ŋuu wêi wǒ, ńjí ńgó m mbə̂i no yé?» 37Yěso lâʼ lə́ zʉ́ ngô: «O pə̌ njwô yé, â zʉ́ yi a laʼ no lə́ gho mpfu wo lo.» 38A lâʼ ngô: «M mbə̌i no zô Nde.» Ə́ ndǎʼ yə́rə́, ə́ shíʼ ńkʉ́ʼtə́ sê mbi Yěso. 39A lâʼ lə́ zʉ́ ngô: «N nkə tó ndəu nzʉ̂ yo lə̂ fêʼ kôr pye-mə́soŋ, ńjí ńgó pəfwoghʼ-mə́nyôghʼ ghí pə́ jwô yʉʼ, pye pi pə́ njwô yʉʼ cʉ̂ʼ pəfwoghʼ-mə́nyôghʼ.» 40Pəcó pəfalísia pi gháp lə pə́ yʉʼ wó zûʼ mətsâr mêi, ə́ ntúŋú yé ngô: «Paghʼ laʼ laʼá ńgó mboʼ o fûŋ pəfwoghʼ-mə́nyôghʼ gháʼá tə ncôghʼ wághʼ nou mo?» 41Yěso pwôr lə́ páp ngô: «Pei tə̌i mbə́ ghíʼi, ə́ mbə́ pəfwoghʼ-mə́nyôghʼ, mə́i káa pei ghwô wéi cǒ məfaa. Lə́ ghíʼ pei pǒu ndǎʼ ngô: “Paghʼ pə̌ njwô yʉʼ lə̂”, məfaa wei tə́i ndəu pei.»
Currently Selected:
Jâŋ 9: NLA
Highlight
Share
Copy
Want to have your highlights saved across all your devices? Sign up or sign in
