Jâŋ 10
10
Saghʼ-ləghaa lə́ ŋuu yi a pâp mənye
1Yěso kə̂ ncí ndâʼ ngô: «Kwaʼ lə́nə́ʉ məŋ ndâʼ wéi ńgó ŋuu lə̌i ndə́iʼ fú pə́ ntsʉ nkâʼ kə́u cər nkâʼ mənye po, ə́ nzéʼ pə́ lə́ tâa-nkâʼ mboŋə́ kə́u, mə́i ngaŋ ntsǒŋ, ə́ mbə́ fwôr. 2Lə́, ə́ mbə́ ŋuu yi a pâp mbî, a fû pə́ ntsʉ nkâʼ ńkə́u. 3Ŋuu yi a pâp ntsʉ nkâʼ tsôʼ, a kə̂u nkâʼ, mbî yé zûʼ nji mbapə mbî, a fûŋ warə́ warə́ məmbî lə̂ ləjôghʼ yé, ə́ ndǎghʼ gháp ńkwár. 4Ə́ ndéi tə fú nkâʼ nkwárə́ gháp pə́tsəm, ə́ mbə́ mbi, gháp pə̂ nzəm; ńté no gháp lə̂i nji yé. 5Mboʼ gháp tsə̂ʉ gháp nzəm ngəʉ po, gháp wo khʉ̌ yé khʉ̌, ńté no káa gháp pə́ ndə̂i gháp nji ye.» 6Yěso lâʼ gháp wo saghʼ-ləghaa, lə́ káa gháp zûʼ gháp no yi a laghʼ ńdáʼ.
Yěso mbapə mbî yi shʉʼʉ
7Yěso kə̂ ncí ndáʼ lə́ páp ngô: «Məŋ ndaʼ wéi kwaʼ lə́nə́ʉ, mə̂ŋ ntsʉ nkâʼ mbî. 8Ŋuu ntsəm yi a kə tsə̌mbi ntó m mboŋə́ tó pə̌ pə̂ ntsǒŋ, ə́ mbə́ fwôr; lə́ mbî káa kə zʉ̂ʼtə gháp mənji máp. 9Mə̂ŋ lə̂ mbə̌ ntsʉ nkâʼ, ŋuu lə̌i ndéi lə́ məŋ ńkə́u nkâʼ a ghʉ̂ ncwór; mə́i a wo kə́u, ə́ pǒu nkwǎr ghíʼ a pə̌ nkǒŋ, ə́ ŋáa lǒu zə̂u yi mboʼ a zʉ̂. 10Ə ntsǒŋ tô yé pə́ lə̂ njú, pə́ lə̂ njwí, pə́ lə̂ mbə́ghʼ ngər; lə́ məŋ, n nkə tô zâa pə́ lə̂ ngʉ́ pye-mə́soŋ pə́tsəm ghwo lənyâŋ shʉʼʉ, ə́ kwaʼ wěi pə̂ ntsəm. 11Mə̂ŋ mbapə mbî yi shʉʼʉ, mbapə mbî yi shʉʼʉ ŋə̂ tû yé ńté mbî yé. 12Ŋuu yi a faʼ yé ńdôu pə̂ nkâp, káa a pə̂ yé mbapə mbî yi shʉʼʉ, kâa mbî pə̂ yé pé. A lei tə njwó nye-njwi tô, a mêʼ mbî ńkhʉ̂ yé. Nye-njwi ghôu cǒ, pfuʼ zěi sêi. 13Wêi ŋuu mêʼ mbî ńkhʉ̂ yé gháʼá ńté no a kə tô pə́ ndou nkâp, káa jî yé mvûŋ mbî zêi. 14Mə̂ŋ mbapə mbî yi shʉʼʉ, m mə̌ njî mbî zâa, gháp pou mə́ njî ghâa; 15ə́ ndʉŋ-ndʉŋ ghíʼ Tə́ ghâa pə̌ njî ghâa, n nkə̂ mə́ njî zâa Tə́ lə́wó. M mbou ŋə̂ tû zâa ńté mbî zâa. 16N nkə̌ ncí ngwô có mbî zâa pi káa gháp pə̂ gháp cər nkâʼ yaʼa. Ə́ pə́ ntúŋu ńgó n ngwó ńdǎghʼ gháp ńtó; gháp záp zúʼ nji zâa, ə̂ lêi yə́rə́ nou mbî cʉ́ʼ mbə́ tâʼ, mbapə mbî kə̂ mbə̂ yé pə́ tâʼ. 17Tə́ ghâa koŋ ghâa, ńté ńgó n ŋə̂ tû zâa ghíʼ n ngʉ̌ pǒu pfú. 18Káa cǒ ŋuu kûʼ yé lə̂ njwí ghâa, lə́ n nkoŋ pə́ məŋ ə́ ŋə́ tû zâa. N ngwo mətəʉ lə̂ ndághʼ ńŋə́, ə́ ngwǒ mətəʉ lə̂ ndághʼ ḿpfú. Ə́ pə̂ zə̂u yi Tə́ ghâa lə lǎʼ ńgó məŋ ngʉ̂ zěi.»
19Pəyúda zûʼ mətsâr mêi mwo, ə ghaptə kə̂ ncí nkwár təcər páp. 20Lələʉ pye təcər páp pə̂ ndâʼ ngô: «Zəghʼə tə́poŋ pə́ lə́ zʉ́, â pə! A lâʼ hó tə pei zʉ̂ʼtə?» 21Pəcó pə̂ ndâʼ ngô: «Káa zə̂ pə́ mətsâr ŋuu yi zəghʼə tə́poŋ pə́ lə́ zʉ́. Mboʼ zəghʼə tə́poŋ ghʉ̂ pəfwoghʼ-mə́nyôghʼ jwô yʉʼ?»
Pəyúda ləʼ no Yěso
22Ə́ lə pə́ mpfu məghǎa, pə́ pə̂ Yelúsalêm mə́ nzʉ̂ lətsei laghʼ ńkʉ́ʉtə́ ghíʼ pə́ lə sǒghʼ lǒʼ lə̂ ndə̂ Sê yi pə́ lə cǒŋ. 23Yěso pə̂ tətáa ndə̂ Sê mə́ ŋáa ŋə̂itə mbəʉ tə́koʼ ntsʉ nkâʼ yi pə́ lə fûŋ ńgó yi Salə́məu. 24Pəyúda zə́mə Yěso ńŋə́ təcər, ə́ ntúŋú yé ngô: «Paghʼ wo zʉ́ʼtə́ tə kə́u pə́ shʉ́ŋə́ o poŋə́ lǎʼ wághʼ ŋuu yi o pə̌ zʉ́? Ə́ lə̌i mbə́ yi ô Nzaʼ-nkʉ, o sâa-sǎa ndâʼ wághʼ.» 25Yěso lâʼ lə́ páp ngô: «N ndə láʼ mə́ ndâʼ wéi lə́ káa pei pə̂i wéi; məfaʼ mi n ndaghʼ ləjôghʼ Tə́ ghâa ńgʉ́, pə́ nyárə ŋuu yi m mbə̌ wěi. 26Lə́ káa pei pə́ mbə̂i wéi ńté ńgó káa pei pə̂ wéi lə̂ nou mbî zâa. 27Mbî zâa zûʼ nji zâa ə́ ndə̌i, m mə̂ njî gháp, gháp pə̂ ŋə̂i nzəm məŋ. 28M mə̂ ŋə̂ gháp ləcwôr tə me, gháp láʼ nkə́ nkwʉ̂tə gháp po, ŋuu kə́ mbóu kuʼ yé lə̂ fú mbô məŋ mpfú gháp po. 29Tə́ ghâa lə ŋə́ gháp lə́ məŋ, a ghwô mətəʉ ndêi ŋuu ntsəm, mboʼ cǒ ŋuu kuʼ yé lə̂ fú mbô zʉ́ ntsôghʼ có zə̂u po. 30Paghʼ Tə́ ghâa pə́ pə́ tâʼ ŋuu.»
31Pəyúda kə̂ ncí ndâghʼ məghǒ, ə́ ndou lə̂ ńdághʼ ńtə́m Yěso njwí. 32Yěso kə̂ ncí ńdâʼ lə́ páp ngô: «N ndə ghʉ pei jwô məfaʼ shʉʼʉ tə nzáa mi Tə́ ghâa lə ŋə́ ghâa mətəʉ lə̂ ndághʼ ńgʉ̌, pei laghʼtə məghǒ lə̂ ndághʼ ńtə́m ghâa njwí gháʼa ńté zarə́?» 33Gháp pwor lə́ zʉ́ ngô: «Káa paghʼ pə́ ndôu lə̂ ndághʼ məghǒ ńtə́m gho ńjwí ńté pə̂ có no shʉʼʉ, paghʼ lou ńtə́m gho ńjwí ńté ńgó o zoutə Sê. Gho yi o pə̌ ŋuu-məsoŋ, o cʉ̌ʼ mə́ ndâʼ ńgó ô Sê.» 34Yěso lâʼ lə́ páp ngô: «Pə́ lə ŋwáʼá cər ŋwaʼa ləpə̌ʉ Mə̌usə̂i ńgó Sê lə laʼ ngô: “Pêi məsê.” 35Paghʼə pə́tsəm pə́ njî ńgó mboʼ pə́ kə́p yé zə̂u yi ŋwaʼá Sê lǎʼ po. Lə́ a pou ndǎʼ ńgó pye pi a fûŋ gháp ńgó məsê, ə̂ pye pi a lâʼ no lə́ páp. 36Ə́ ngwǒ lə́ məŋ yi Sê lə tsóʼ ghâa ntə́u cər nzʉ̂ yo, ńté hó n ndâʼ ńgó mə̂ŋ Môu ye pei lâʼ ńgó n nzoutə́ yé? 37N ndə̌i ndə́iʼ fǎʼ məfaʼ Tə́ ghâa po, koo pei pə̂i wéi no zâa. 38Lə́ n ndə̌i fâʼ məfaʼ mêi, pei lə́iʼ kǒŋ lə̂ mbə́i no zâa po, pei pə̂i məfaʼ mêi ńjí ńgó, ə́ lei yə́rə́ pei jî ńgó Tə́ pə́ ndəu məŋ, m mbə̂ zâa ndəu zʉ́.» 39Yěso lâʼ yə́rə́, gháp kə̂ ncí mə́ ndôu məsʉ̂ lə̂ ndághʼ ńgǒu yé, a tə̂u mbó páp ə́ ndər yé. 40Yěso kə̂ ncí mbə̂ʉ, ə́ ntə́u nci Yuudêŋ, ə́ ndə́r lə̂ cǒ njʉŋə́, ə́ yʉʼ yi Jâŋ lə ŋə́ pye nci wó, ə́ nyáŋ wó. 41Pye tə nzáa tô ńcə́r yé, ə́ mə́ ndâʼ təcər páp ngô: «Jâŋ, káa lə ghʉ yé cǒ nkəʼə-no, lə́ no tsəm yi a lə lǎʼ ńté ŋuu wo lə pə́ no lə́nə́ʉ.» 42Pye tə nzáa lə́ pye pi gháp lə pə́ yʉʼ wó cʉ̂ʼ nkə́ mbə́i no Yěso.
Currently Selected:
Jâŋ 10: NLA
Highlight
Share
Copy
Want to have your highlights saved across all your devices? Sign up or sign in
