Magə 11
11
Yeso a Kwúnə á Jɛlusalɛm Ándó Əfo
(Mat 21.1-11; Luk 19.28-40; Jɔn 12.12-19)
1Ndzaŋ pó nə ńtə́ nə́ ḿbáatə Jɛlusalɛm lə́, ńkoʼə̂ Bɛlfasə pó Bɛtani á ndú Nkwəənə Olifə, Yeso a tú ngaŋə́zoŋə́ndzəm əjí zɛ́n pɛ̌ 2ə́sóŋ nə́ pó ńgə́, “Ghɛn nə́ á mə́mə aláʼ wə̂ á mbi pəənə́. Ndzaŋ nə́ yǐ nə tə́ kwúnə ə́wɨ́ lə́, nə́ yǐ zə́ənə mɔ́ njakasə pə́ təŋnə̂ ə́wɨ́ páʼ ŋwu tsə̌ a kě nə́ á ndu ə́wɨ́ kə́ kɔ́ʼə pô. Kyag nə́ áwɨ́d ńgyǐ nə́ wə́ələ́ aliʼə́ nə́. 3Mbɔʼ ŋwu tsə̌ a pítə áwɨ́ ńgə́, ‘lɛ̌ akə̂ anu nə̈ ghɛd nə́?’ Nə́ fiʼtə̂ á mbô yí ńgə́, ‘Mmaʼmbîə a loonə̂ áwɨ́d tsɔʼə ngǎ pɛ̌ a pɨ ḿbɨnkə̂ áwə́ələ́.’ ”
4Pó tíʼ ńgɛn ńdzə́ənə mɔ́ njakasə pə́ təŋnə̂ nə́ á ntsǒndɛ̂ á nkaŋə́ alaŋə́. Ndzaŋ pó nə ńtə́ nə́ ńkyagə̂ áwɨ́d lə́, 5pɨ pətsə́ pə́ nə ńtɨ́ nə́ aliʼ yi wɨ́ pó pítə ághɔ́b ńgə́, “Nə́ ghɛlə̂ lə́ ə́lɛ́ ńkyagə̂ mɔ́ njakasə wə̂?”
6Pó kwěe ndzaŋ Yeso a pěʼ nə́ ə́sóŋ nə́ pó lə̂, pɨ pi wɨ́ pə́ tíʼ ḿmɛdtə̂ ághɔ́b pó ghɛnə̂. 7Pó yǐ nə́ mɔ́ njakasə wə̂ á mbô Yeso, ńtsɔ́ʼ ətsəʼ əpɔ́b ńnoŋkə̂ á ndu əwɨ́ Yeso a tíʼ ńkɔ́ʼə á ndu ə́wə́. 8Pɨ pi nɨ́ nə́ pə́ maʼ ətsəʼ əpóobə́ á alaŋə́, pɨ pətsə́ pə́ maʼə̂ kə́yé məfag mə́ atǐ mimə féŋtə nə́ pó pěʼ nə́ ə́fagtə̂ á mə́m məŋnkáʼə. 9Pɨ pə́ nə ńchî nə́ á mbi, pópə pi pə́ nə̈ ńdzoŋ nə́ á ndzəm pó tíʼə ə́sóŋə ńgə́, “Osana! Mbwɔ́dnə ə́ chîə á mbô yí páʼə a yǐ nə́ nə́ əlɛ́n Mmaʼmbîə! 10Mbwɔ́dnə ə́ chîə á mə́mə Anuə Nəfoonə tǎ əwəg Debid páʼə á yǐ nə́ yǐəə. Osana á mbô Əsê páʼə a ŋáŋnə nə́ ńtsɛɛlə̂ ajúmə atsəmə!”
11Yeso a kwúnə Jɛlusalɛm ńgɛnə̂ á Tə́kɔʼndɛ̂sê ńnáŋə ajúmə atsəm ńdíblə. Ndzaŋə ándó ndɛd nə ḿbɛ́d nə́ tə ńdaŋ lə́, pópə ngaŋə́zoŋə́ndzəm əjí zə̂ ntsɔb pɛ̌ ə́ fɛ́d ńgɛnə̂ Bɛtaniə.
Yeso a Néŋ Ndɔ nə́ Atǐə Figə
(Mat 21.18, 19)
12Mbî ə́ nə ə́fóg pó tə́ ə́fɛ́lə Bɛtani lə́ nji ə́ tə́ ńdzáŋə Yeso. 13A tə́əmə á ndi yi sɛ ḿmaʼ əmə́g mí ńdzə́ənə atǐə figə á pə́ tsɔʼə məfǔ məfǔə. A tíʼ ńgɛnə̂ á nətɛ́n ə́wə́ á mə́ náŋ nə́ ńgə́ á lɛ ńdzə́mə. Ndzaŋə a nə ńgyǐ nə́ tə ńkoʼə̂ á nətɛ́n wɨ́ lə́, ńdzə́ənə pə́ məfǔ ńté ńgə́ lə́ nə ńkě ndɛd páʼ pəfig pə́ zə́m nə́ pô. 14Yeso a tíʼ ə́sóŋə á mbô atǐə fig zə̂ ńgə́, “Ŋwu tsə̌ a láʼ kě mənta mô pɨ jî pô.”
Ngaŋə́zoŋə́ndzəm əjí ə́ zóʼ ndzaŋə a sóŋ nə́.
Yeso a Ghɛnə̂ á Tə́kɔʼndɛ̂sê
(Mat 21.12-17; Luk 19.45-48; Jɔn 2.13-22)
15Ndzaŋ pó nə ńkoʼ nə́ á Jɛlusalɛm lə́, Yeso a kwúnə Tə́kɔʼndɛ̂sê, ńchúʼə á mə́ kəm nə́ pɨ pó nə̈ ńjú nə́ ńkə́ fi əpú ə́wə́. Ńchǐ pətəpɛlə pə́ ngaŋə́kwúblə́nkéebə pópə əkɔʼ ngaŋə́finə́lúʼə ḿmaʼə̂ á əsê. 16Ńkě pí ńgə́ ŋwu tsə̌ a peʼə̂ ajûtsə́ ńkwú ńdaŋ nə́ zə́ələ́ á Tə́kɔʼndɛ̂sê pô. 17Ndzaŋə a nə ńtə́ nə́ ńdzéʼkə ághɔ́b lə́, ə́sóŋ nə́ pó ńgə́, “Pə́ ŋwaʼlə̂ ńgə́, ‘Pə́ yǒ fóŋ ndɛ̂ mə lə́ nə́ ndɛ̂ achaʼtə́sê á mə́m ətú ətsəmə.’ Nə́ pɛn ńtíʼ ńdɔg ńgɛlə̂ pə́ nəlyaŋnə́ nə́ pəzə̌ ə́wə́!”
18Pətə́kɔʼ pə́ ngaŋə́pêsê pópə ngaŋə́zéʼkə pənoŋkə ə́ zóʼə atsáb jɨ́d jɨ ńtíʼə ńdɔ ndúmə á mə́ jwítə nə́ yí, lə́ ḿbə́ ḿbɔ́gə yí ńté ńgə́ ndzeʼkə́ əjǐ ə́ nə ńkɨʼnə̂ ŋwu məsɔŋ ntsəmə.
19Ndɛd nkwanə́ ə́ yǐ ńkoʼ, Yeso pópə ngaŋə́zoŋə́ndzəm əjí ə́ fɛ́lə Jɛlusalɛmə.
Anu Páʼ pə́ Zéʼ nə́ Ńté Atǐə Fig zə̂
(Mat 21.20-22)
20A yǒ ḿbə́ məsânə, pó tə́ ńdaŋə̂ ńdzə́ənə atǐə fig zə̂ á júm tə ńtsó əfɛ̂ nə́ məŋaŋə́. 21Pita a kwúmtə anu páʼə á nə ńdaŋ nə́ ńtíʼ ə́sóŋ nə́ Yeso ńgə́, “Ndzéʼkə, náŋə! Atǐə fig zə̂ páʼ gho nə ńdɔʼ nə́ lə́ á júmə!” 22Yeso a kwěe ńgə́, “Túg nə́ mbimə́ nə́ Əsê. 23Mäŋ fiʼtə̂ áwɨ́ nə́ ndə̌ŋdəŋ ńgə́ mbɔʼ ŋwunə a sóŋ nə́ nkwəənə ghɛn ńgə́, Ghɛn ḿmaʼ mbɨ əzo á mə́m nə́ənə, atûə ajíə á chî koʼlə̂ pô, a túg mbimə́ ńgə́ anu páʼə ä sóŋ nə́ lə́ á yǐ lɔgə̂ aliʼ, pə́ faʼə̂ zə́ələ́ á mbô yə́. 24Ńdaŋ ə́lɨ́d maŋ fiʼtə̂ áwɨ́ ńgə́ anuə atsəm páʼ gho pítə nə́ á mə́mə achaʼtə́sê, túg mbimə́ ńgə́ gho pɛ́dtə ńtúgə zə́ələ́, á yǐ pə́ azô. 25Mbɔʼ gho kə́ ńtɨ́ ńtə́ ńchaʼtə́sê ńtúgə anu yətsə́ á ntɨ́ gho ńté ŋwu tsə̌, gho ləgnə̂ fankə əyǐ, ńjî ńgə́ Tǎ gho á nəpóolə a yǐ ńkə́ ńdəgnə̂ pəpô pətəpɔŋə.” #11.25Pətsə́ əŋwaʼlə ə́ kě nkaŋ 26 túg pô ńgə́ “Təmbɔʼ gho chî pəfankə pə́ pɨ pətsə́ ləgnə̂ pô, tə ḿbə́ Tǎ gho páʼ a chî nə́ nəpóolə a kě pə pô yǐ kə́ ləgnə̂ pô.”
Pə́ Pítə Yeso nə́ Aliʼ Páʼə ä Lɔg nə́ Mətɨ Ə́wə́
(Mat 21.23-27; Luk 20.1-8)
27Pó pɨ ńkə́ ḿbəənə̂ á Jɛlusalɛm, ndzaŋə ándó Yeso a ńtə́ nə́ ńnyinə̂ á mə́m Tə́kɔʼndɛ̂sê lə́, pətə́kɔʼ pə́ ngaŋə́pêsê pópə ngaŋə́zéʼkə pənoŋkə ḿbá mətû mə́ aláʼ mə́ yǐəə á mbô yí 28ḿbítə yí ńgə́, “Ghö lɔgə̂ mətɨ lə́ ə́fó ə́faʼə̂ mənu mɨ ə́wə́? Mətɨ mimə wə́ á mbô gho lə́ ə́fɛ̂ əwə ńgə́ gho faʼ mənu mimə wɨ́ ə́wə́?”
29Yeso a kwěe ńgə́, “Maŋ yǐ pítə áwɨ́ tsɔʼə nə́ táʼə apítə, mbɔʼ nə́ kwěe mə, tə ḿbə́ maŋ yǐ kə́ ə́fiʼtə̂ áwɨ́ nə́ aliʼ mäŋ lɔg nə́ mətɨ ə́wɨ́ ə́faʼə̂ mənu məənə́. 30Fiʼtə̂ nə́ mə, Akwáalə́nkǐə Jɔnə á kə́ lǒo lə́ á nəpó kəənə á mbô ŋwu mbîə?”
31Pó tíʼ ńtsəmnə̂ á tətɨ pó ə́sóŋ ńgə́, “Mbɔʼ pɛn sóŋ ńgə́ á kə́ fɛ́d lə́ á nəpó tə ḿbə́ a yǐ pítə áwɛ́n ńgə́, akə̂ á nə́ ḿbə́ ńgɛd pɛn kě anu páʼə a nə̈ ə́sóŋ nə́ pímə?” 32Kɨ mbɔʼ pɛn sóŋə pə́ ńgə́, “á lǒo lə́ á mbô ŋwu mbî?” (Pó nə ńtə́ ḿbɔ́gə pəənə, ńté ńgə́ ŋwu ntsəmə a nə ńdɔg ńgə́ Jɔnə a nə ḿbyádnə ḿbə́ lə́ Ntûsê.) 33Pó tíʼ ńkwěe Yeso ńgə́, “Pəg kě jî pô.”
Yeso a tíʼ ə́sóŋ ńgə́, “Maŋ kě áwɨ́ yǐ kə́ fiʼtə̂ nə́ aliʼ mäŋ lɔg nə́ mətɨ ə́wɨ́ ə́faʼə̂ mənu mɨ ə́wɨ́ pô.”
Currently Selected:
Magə 11: azo
Highlight
Share
Copy
Want to have your highlights saved across all your devices? Sign up or sign in
