Magə 12

Atséebə́nə́múʼ ńté Ngaŋə́shíʼnə Nkáʼ Mətǐ mə́ Məloʼə

(Mat 21.33-46; Luk 20.9-19)

1Yeso a tíʼ ńchúʼə á mə́ tsáb nə́ nə́ pó nə́ ətsábnə́múʼ ə́sóŋ ńgə́, “Ŋwu tsə̌ a nə ńtúgə nkáʼ yí ńtíʼ ńtsoŋkə̂ nkáʼ yi wə̂, ḿbǐ mətǐ mə́ məloʼ páʼ mə́ fɛ̂ nə́ mənta pə̈ fóŋə nə́ glebə. Ńtíʼ ńkwúd nkáʼ ńdíblə áwə́ələ́, ńtóŋə apɛ́lə atsoŋkəmə́loʼə, ḿbóomə tə́sɛ ndɛ̂ á atǐ páʼ pə́ pyáb nə́ pəzə̌ ə́wɨ́, ńtíʼ ńnéŋ pɨ ə́wɨ́ ńgə́ pó tə́ ə́faʼə̂ á mbô yə́, ńtíʼ ńgɛnə̂ yə́ á atú yi ndaʼə. 2Əghâ ándó ndɛlə akyɛmə̂nta mə́ atǐ mə̂ ə́ nə ńkoʼ nə́, a túmə táʼ ngaŋəfaʼ əyǐ ńgə́ a ghɛn ńkwá əyǐ gleb páʼ pə́ kyɛ̂ nə́ á nkáʼ yí wə̂. 3Lə́ pó pə́ ńdzǎ yí, ə́shúmə yí, ńkəmə̂ yí mbô kətaŋə. 4A pɨ ńkə́ ńtíʼ ńtúmə yitsə̌ ngaŋəfaʼə á mbô pó; pó póʼə atûə ŋwu wɨ́d ghɛn, ńgɛd nə́ yí tə mələ́ŋ mə́ chî ə́wə́. 5A pɨ ńkə́ ḿbɛ́d ńtúmə yitsə̌, po jwítə áwɨ́d wə̂; A pɨ ńkə́ ńtúmə pətsə́ tə pə́ nə́ənə, pó póʼə pətsə́, ńjwítə pətsə́.

6Ndaʼ ŋwu páʼ a nə ḿbɛ́d nə́ təmbɔʼ a tú lə́ nə ḿbə́ mɔ́ əyǐ páʼə a nə ḿbyádnə nə́ ńkɔŋə̂. A yǐ ńdwegtə̂ ńtúmə yí ə́sóŋ ńgə́, Pó yǐ ghóʼkə móonə mə. 7Lə́, ngaŋə́ləŋə́tɔʼ zə̂ ə́ pə́ ə́sóŋə á tətɨ pó ńgə́, Lɛ̌ njîndɛ̂ əyǐə, yǐ nə́ pɛn jwítə yí ńdɔgə̂ apeʼə ajíə. 8Pó tíʼ ńdɔgə̂ yí ńjwítə yí ḿmaʼə̂ akwûə ajíə á ndzəm nkáʼə.”

9Nə kwaŋ ńgə́ ngaŋnkáʼə a yǐ tíʼ ghɛd ə́lɛ́? A yǐ jwítə ngaŋə́shíʼnə nkáʼ zə̂ ə́ tíʼ ə́fɛ̂ nkáʼ gleb əyə́ á mbô pɨ pə́ ndaʼə. 10Nə kě aliʼə́ aŋwaʼlə Əsê jɨ kə̈ fóŋə ńgə́,

“Ngɔʼ páʼ ngaŋə́póomə məláʼ ə́ ḿmyaʼ nə́ ńgə́ ə́ kě pɔŋ pô,

ə́ nə ńtíʼ ḿbə́ pə́ ngɔʼ nəlwî nə́ ndɛ̂ ə́ wam nə́ ndɛ̂ ńtsɛ məngɔʼ mətsəmə.

11Mmaʼmbîə a ghɛd nə́;

lɛ̌ pə́ anu yə yɛ́d nə́ á əmə́g pɛnə̂!”

12Mətû mə́ Pəjusə mə́ tíʼə ńdɔ ndúmə á mə́ wam nə́ Yeso ńté ńgə́ pó nə ńjî ńgə́ a nə̈ ńtséebə atséebə́nə́múʼ zə̂ ə́fɛ̂ lə́ nə́ pó. Lə́ pó nə ńtə́ ḿbɔ́gə ŋwu məsɔŋ ńtíʼ ḿmɛdtə̂ yí ńgɛnə̂ ághóobə́.

Apítə Ńté mə́ Tû nə́ Nchubə Aláʼə

(Mat 22.15-22; Luk 20.20-26)

13Pə́ nə ńtú Pəfalasi pətsə́ pópə ngǎŋndzəm Ɛlɔd ńgə́ pó ghɛn ńgwaamə̂ Yeso nə́ ətsáb píə. 14Pó yǐəə á mbô yí ńtíʼ ḿbítə yí ńgə́, “Ndzéʼkə, pəg jî ńgə́ gho lə́ ŋwu ńtsáb ndə̌ŋdəŋ ńkě gho ndɛd túg nə́ mənu pɨ pə̈ kwaŋ nə́ pô. Gho kě gho aliʼə́ ngaŋəlɔʼ nə́ anu yətsə́ lɔgə̂ pô, ḿbə́ ńdzéʼkə ndə̌ŋdəŋ ńté ndú páʼ Əsê ä lɔ nə́ ńgə́ ŋwu ntsəmə a zoŋə̂. Fiʼtə̂ áwə́g ńgə́ á koʼnə̂ á mə́ tû nə́ nchubə aláʼə á mbô Kasa kɨ ngá? 15Mbɔʼ pəg tû kɨ mbɔʼ pəg kě tû pô?”

Lə́ Yeso a pə́ ńjî ngɔ́b pó tə́m nə́ ńtíʼ ḿbítə ághɔ́b ńgə́, “Nə́ loonə̂ á mə́ tá nə ətəənə́ mə ńgə́ akə̂? Yǐ nə́ nə́ nkéebə atəənə́ maŋ zə́ənə.”

16Pó yǐ nə́ nkéebə atəənə́ yi wɨ́ a tíʼ ḿbítə ághɔ́b ńgə́, “Lɛ̌ əshî ə́wə́ pó əlɛ́n ə́wə́ ə́ ghɛnə́?”

Pó kwěe yí ńgə́, “Lə́ yí Kasa.”

17Yeso a tíʼ ə́sóŋə á mbô pó ńgə́, “Fɛ̂ nə́ ajúmə Kasa á mbô Kasa ə́fɛ̂ yə Əsê á mbô Əsê.” Pó náŋə Yeso a tíʼ ńkɨʼnə̂ ághóobə́.

Apítə ńté Mə júmnə nə́ á Nəwûə

(Mat 22.23-33; Luk 20.27-40)

18Pəsadusi pətsə́ páʼ pö sóŋ nə́ ńgə́ pɨ pə́ yǒ kě nəwû júmnə pô, pó yǐəə á mbô Yeso nə́ apítə atsáb ńgə́, 19“Ndzéʼkə, Mosisə a nə ŋwaʼlə̂ á mbô pəg ńgə́ mbɔʼ mɔ́mɛ́ ŋwunə a kwû tə atû ḿmyaʼə̂ ngwě əyǐ, ŋwu wɨ́d wə̂ a shib ńdɔgə̂ nkog mɔ́mɛ́ əyǐ wə̂ ḿbî pɔ́ ə́wə́ á mbô yə́. 20Pɔ́pə́mɛ́ pətsə́ ə́ nə ḿbɛn ńdáʼ ńchî ə́wɨ́ pɛ́n asaambɛ̂. Ntsɛɛmbiə a zɔ́ʼ ńkwûə yí tə atûə. 21Azoŋə ajíə a zɔ́ʼə nkog əyǐə, lə́ ḿbə́ ńkwûə ají tə atûə. Á nə ńkə́ ḿbə́ tsɔʼə ə́lɨ́d nə́ azoŋə́zoŋə ajíə. 22Tsɔʼə ə́lɨ́d tə ḿməgə̂ ághɔ́b pətsəmə: Pó pətsəm pɛ́n asaambɛ̂ zɔ́ʼə məngyě yi wɨ́ ńkə́ ńkwúkə ághɔ́b tə pîə. Məngyě wə̂ a lwigtə̂ ńkə́ ńkwûə ajíə. 23Əghâ nə́, a yǒ pə́ alě pəkwû pə́ júmnə nə́ á nəwû lə́ məngyě yi wə́ a tíʼ ḿbə́ ngwě əwə á mə́m pó pɛ́n asaambɛ̂ ndzaŋ pó pətsəm nə ńdzɔ́ʼ nə́ yí lə̂?”

24Yeso a kwěe ághɔ́b ńgə́, “Nə́ fankə̂! Lə́ pə́ ńgɛlə̂ akə̂? Lə́ ńté ńgə́ nə́ kě atséebə Əsê kɨ mətɨ mí jî pô. 25Ńté ńgə́ pəkwû pə́ yǒ júmnə lə́ ə́ kě zɔ́ʼ pô, pə́ kě ághóobə́ á ndzɔʼə́ kə́ ə́fɛ̂ pô. Ńté ńgə́ pó yǒ chîə ándó pətseŋpə́ndɛ́pə́sê á nəpóolə. 26Əghâ nə́, nə́ anu ńté pəkwû pə́ yǒ nə́ ə́ júmnə á nəwû: Nə́ kě kə́ fóŋə aliʼə́ aŋwaʼlə Mosisə páʼə ä sóŋ nə́ anu ńté akoobə́ ä kɛ́d nə́? Ndzaŋ Əsê a nə́ sóŋ nə́ nə́ yí ńgə́, ‘Maŋ lə́ Əsê Ablaamə, ḿbə́ Əsê Azig, ńkə́ ḿbə́ Əsê Jekɔbə.’ 27Lə́ələ́ pə́ ńgə́ lə́ Əsê pɨ pə́ chî nə́ á mbîə. Lə́ kě Əsê pəkwû pô. Nə́ pyádnə fankə̂!”

Chigə Tə́kɔʼ Ntəgə́

(Mat 22.34-40; Luk 10.25-28)

28Táʼ ndzéʼkə pənoŋkə yitsə̌ a kə́ yǐ ńdzóʼə atséebə azóobə́. Ndzaŋə ándó a kə́ jɨ́ nə́ ńgə́ Yeso a kə fɛ̂ akwe yə əshîʼnə á mbô pó lə́, ńtíʼ ḿbítə yí ńgə́, “Á mə́m məntəgə́ tsɔʼə mətsəm, chigə yi ngweŋ lə́ zə́ənə́?”

29Yeso a kwěe yí ńgə́, “Chigə yi ngweŋə́ á mə́m wɨ́ lə́ ńgə́, ‘Jwə́ʼtə nə́, pɔ́ pə́ Islɛl, Mmaʼmbî páʼə a pə́ nə́ Əsê əzɛn lə́ ndaʼ yí təjiʼə. 30Kɔŋə̂ Mmaʼmbî páʼə a pə́ nə́ Əsê əzo nə́ ntɨ́ əghô ətsəmə, nə́ ajwiə azô atsəmə, nə́ akwaŋə anuə azô atsəm ḿbɨ́ ḿbə́ nə́ mətɨ mô mətsəmə.’ 31Yi páʼ á zoŋkə̂ nə́ lə́ ńgə́, ‘Kɔŋə̂ ngaŋnəpad əgho ándó mbɨ əzo.’ Ntəgə́ yitsə̌ ə́ kě ə́wɨ́ pɨ ńchî páʼ ə́ tsɛ nə́ mɨ́d mɨ mə́ mbɛ̌ pô.”

32Ŋwu wə̂ a kwěe ńgə́, “Gho koʼnə̂ ḿbə́ Ndzéʼkə. Gho koʼnə̂ á mə́ sóŋ nə́ ńgə́ Əsê lə́ táʼ tə yi ndaʼ ə́ kě ə́wɨ́ pɨ ńchî tə ńdéʼtə yí pô. 33Mə kɔŋ nə́ yí nə́ ntɨ́ əghô ətsəm, ḿbɨ ḿbə́ nə́ akwaŋə anuə azô atsəm, nə́ mətɨ mô mətsəm, ḿbɨ́ ḿbə́ nə́ mə kɔŋ nə́ ngaŋnəpad əgho ándó mbɨ əzo mə́ pɔŋ ńtsɛ na páʼ gho tɔ nə́ ńgóʼkə Əsê ə́wɨ́ kəənə ajúmə atsəm páʼ ghö lɔg nə́ ə́fyaʼə́nu ə́wə́.”

34Yeso a jɨ́ ńgə́ ŋwu wə̂ a kwěe nə́ ajíənuə ńtíʼ ə́sóŋə á mbô yí ńgə́, “Anuə Nəfoonə Əsê a kě chî ndi sagə̂ á mbô gho pô,” ə́fɛ́d ə́lɨ́d ŋwu tsə̌ a kě pɨ fiʼə̂ á mə́ pítə nə́ yí nə́ apítə atsáb yətsə́ pô.

Apítə ńté Yi Páʼ Əsê a Tsəʼ nə́

(Mat 22.41-46; Luk 20.41-44)

35Ndzaŋə ándó Yeso a nə ńtə́ nə́ ńdzéʼkə á mə́m Tə́kɔʼndɛ̂sê lə́, ḿbítə apítə atsáb jɨ ńgə́, “Lə́ ghɛlə̂ akə̂ ngaŋə́zéʼkə pənoŋkə ə̈ sóŋə ńgə́ Yi páʼ Əsê a tsəʼ nə́ lə́ mɔ́ Debilə? 36Ajwǐəsê a nə ńgɛd Debid nə́ nkɔ̌ʼmbɨ yə́ a sóŋ ńgə́:

Mmaʼmbîə a sóŋə á mbô Mmaʼmbîə mə

ńgə́, Náanə á əlá apô maŋ yə təənə

Tə ńkoʼ nə́ ndɛd maŋ yǒ nə́ néŋ ngaŋkə́pa əzô á nətɛ́n nə́ məko gho. 37Təmbɔʼ Debid nə́ nkɔ̌ʼmbɨ yə́ a tíʼ ə́fóŋə yí ńgə́ ‘Mmaʼmbî,’ a pɨ ńtíʼ ḿbə́ mɔ́ əyǐ lə́ ə́lɛ́?”

Yeso a Kwantə̂ Ngaŋə́zoŋə́ndzəm Əjí Ńté Ngaŋə́zéʼkə Pənoŋkə

(Mat 23.1-36; Luk 20.45-47)

Mboŋ ŋwu məsɔŋ zə̂ ə́ jwə́ʼtə á mbô Yeso nə́ akɔŋtə. 38Ndzaŋə a nə ńdzéʼkə nə́ ághɔ́b lə́ ə́sóŋ ńgə́, “Lɔg nə́ ndɛd nə́ ngaŋə́zéʼkə pənoŋkə. Pó kɔŋə̂ á mə́ maʼ nə́ pətə́sɛ pə́ ətsəʼ ə́ kéelə nyinə̂ pə chaʼtə̂ ághóobə́ á ndu məteenə́, 39ńkə́ ńkɔŋə̂ á mə́ náanə nə́ nə́ əkɔʼ chigə pəənə á ndɛ̂sê Pəjusə, pópə əliʼ pi weŋə́ aliʼə́ akɔŋtə 40Pó jîə ape nə́ pəkog ńkwáalə məngyaʼə́ mɔ́b ńtíʼə ńdɔgə̂ tə́sɛ achaʼtə́sê ḿbóŋkə ə́wə́. Əzɔb ngə́ʼ ə́ yǒ chaanə̂!”

Akáŋə́sê Nkog Məngyě yitsə̌

(Luk 21.1-4)

41Ndzaŋə ándó Yeso a nə náanə nə́ ḿbáatə aliʼə́ maʼə̂ akáŋə́sê lə́, ńnáŋ ndzaŋ pɨ pə́ maʼ nə́ nkáb əzoobə́. Ngǎŋnkáb yi nɨ́ nə́ ə́ maʼ pətə́kɔʼ pə́ nkéebə. 42Lə́ nkog məngyě yitsə̌ páʼə a nə ḿbə́ nə́ mbóŋ á pə́ ńgyǐəə ají ńnéŋ pɔ́ pə́ nkáb pə́ atəənə́ pətsə́ pɛ́n pə́ pɛ̌ páʼ pə́ nə ńkoʼ nə́ tsɔʼə ándó ndɔ́la pɛ̌. 43A tíʼ ə́fóŋ ngaŋə́zoŋə́ndzəm əjí ə́sóŋ nə́ pó ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́ nkog məngyě nə́ páʼə a pə́ nə́ mbóŋ lə́, a maʼə̂ akáŋə́sê ńtsɛɛlə̂ ŋwu ntsəmə. 44Ŋwu ntsəmə ä ŋɔʼtə̂ lə́ á mɔ́ ajúmə á mə́mə afoʼə ají ə́fɛ̂, lə́ nkog məngyě nə́ a pǎtə ḿbə́ mbóŋ lə́, ḿbə́ ńkɔdtə̂ lə́ əpa əpí ə́fɛ̂ tə ajûtsə́ á kě pɨ ḿbɛ́d təmbɔʼ a pɨ ńjî pô.”

Currently Selected:

Magə 12: azo

Highlight

Copy