Magə 10
10
Yeso a Zéʼkə Anu ńté mə́ Shamkə̂ nə́ Ndzɔʼə́
(Mat 19.1-12; Luk 16.18)
1Yeso a tíʼ ə́fɛ́lə á aliʼ wɨ́d wə̂ ńgɛnə̂ á mboʼ Judya á ndzɛnə́ nkǐ Jodanə. Mboŋ pɨ ə́ kə́ ḿbɨ ńgyǐəə á mbi yə́, a zéʼkə ághɔ́b ndzaŋə a nə̈ ńdzá nə́ ńgɛlə̂.
2Pəfalasi pətsə́ pə́ yǐəə á mbô yí ńtíʼə ḿmoomə̂ yí ḿbítə ńgə́, “Noŋkə á nɨd ńgə́ mbɔʼ ŋwunə a shamkə̂ ndzɔʼə́ əghɔ́b ngwě əyǐ?”
3Yeso a kwěe ághɔ́b ńgə́, “Ntəgə́ páʼ Mosisə a nə fɛ̂ nə́ á mbô pɨ ə́ nə sóŋ lə́ ńgə́ akə̂?”
4Pó kwěe ńgə́, “Mosisə a nə ḿbí ńgə́ mbɔʼ ŋwunə a ŋwaʼlə̂ aŋwaʼlə ashamkə́ndzɔ́ʼə́ ə́fɛ̂ nə́ ngwě əyǐ ńkəmə̂ yə́.”
5Yeso a sóŋə á mbô pó ńgə́, “Mosisə a nə ŋwaʼlə̂ ntəgə́ jɨ́d jɨ ə́fɛ̂ á mbô pɨ lə́ ńté ńgə́ məntɨ́ mɨ́ mə́ nə ńtyantə̂. 6Lə́, á nə ḿbə́ á nəfɛdnə́, nə́ ndɛd páʼ Əsê a kə tsoŋkə̂ nə́ mbî, ‘Əsê a tsoŋkə̂ ághóobə́, ŋwu mbyâŋnə pó məngyě.’ 7Ńdaŋ ə́lɨ́d ŋwu mbyâŋnə a yǒ mɛdtə̂ tǎ əyǐ pó mǎ əyǐ ə́ tíʼ tsɛntə̂ pó ngwě əyǐ, 8pó pə́ pɛ̌ ə́ tíʼ táʼ na mbəəmə. Lə́ələ́ pə́ ńgə́ pó kě pɛ́d ḿbə́ lə́ pɨ pə́ pɛ̌ pô. Pó tíʼ ḿbə́ lə́ táʼə. 9Lə́ələ́ pə́ ńgə́ ajú páʼ Əsê a tsɛntə̂ nə́ aliʼə́ mɔʼə́, kɔ ŋwunə a ghabnə̂.”
10Əghâ ándó pó nə ḿbɨ nə́ ḿbəənə̂ á ndɛ̂ lə́, ngaŋə́zoŋə́ndzəm Yeso ə́ pítə yí nə́ anu ńté anu jɨ́d zəənə́. 11Yeso a kwěe ághɔ́b ńgə́, “Ŋwu ntsəm páʼə a fóg nə́ ngwě əyǐə á ndɛ̂ yí ḿbɨ ńdzɔ́ʼə yi ndaʼ, a jî lə́ mə̂ghabə pó yí páʼ a pɨ nə́ ńdzɔ́ʼ lə́, ńtíʼ fankə̂ anuə á mbô ngwě əyǐə. 12Mbɔʼ məngyě a kə́ ə́fɛ́lə á ndɛ̂ ndú əyǐ ńdzɔ́ʼə ŋwu mbyâŋnə yi ndaʼ, a jî lə́ mə̂ghabə.”
Yeso a Néŋ Mbwɔ́dnə á Mbɨ Kə́yé Pɔ̂ŋkə̂
(Mat 19.13-15; Luk 18.15-17)
13Pɨ pətsə́ pə́ nə ńgyǐ nə́ pɔ̂nkə̂ á mbô Yeso ńgə́ a kwumə̂ ághóobə́, lə́ ngaŋə́zoŋə́ndzəm əjí ə́ pə́ ə́sáʼə ághóobə́. 14Ndzaŋə ándó Yeso a nə ńjɨ́ nə́ anu yə wɨ́ lə́, ndě əyí ə́ záŋə, a tíʼ ə́sóŋ nə́ ngaŋə́zoŋə́ndzəm əjí ńgə́, “Mɛdtə̂ nə́ kə́yé pɔ̂nkə̂ a yǐəə á mbô maŋə, kɔ nə́ zɔŋ nə́ pó ńté ńgə́ Anuə Nəfoonə Əsê a chî lə́ á mbô pəənə ándó ndzaŋ zəənə́. 15Mäŋ fiʼtə̂ áwɨ́ nə́ ndə̌ŋdəŋ ńgə́ ŋwu ntsəm páʼə a kě nə́ Anuə Nəfoonə Əsê ándó mɔ́ lɔg pô a yǒ kě ə́wɨ́ kwú pô.” 16A sóŋ ə́lɨ́d lə́ ńtíʼ ńtwá pɔ́ pə́ ńtúg, ńnoŋkə̂ mbô míə atû pó, ńnéŋ mbwɔ́dnə nə́ pó.
Əfoʼ Yitsə̌
(Mat 19.16-30; Luk 18.18-30)
17Ndzaŋə ándó Yeso a nə ńkə́ nə́ ḿbɨ ńtə́əmə alaŋə́ ńtə́ ńgɛnə̂ lə́, ŋwu tsə̌ a kə ndə̌ ńgyǐ ńkwə́ʼtə á məko yí ḿbítə yí ńgə́, “Ndzéʼkə yi əshîʼnə, mbɔʼ maŋ shib ńgɛd ə́lɛ́ ḿbɔŋə̂ jî nchîntɨ páʼ ə́ mɛdnə̂ nə́ ngǎ mɔʼə́?”
18Yeso a kwěe yí ńgə́, “Lə́ ghɛlə̂ akə̂ gho fóŋə mə ńgə́ ŋwu yi əshîʼnə?” Ŋwu tsə̌ a kě pɔŋ pô, tə ńdéʼtə Əsê yí təjiʼə. 19“Gho jî məntəgə́ mə́ Əsê: ‘Kɔ gho jwítə; kɔ gho jîə mə̂ghabə; kɔ gho zəələ̂; kɔ gho tsɨd ntsəələ; kɔ gho fɨgə̂ ŋwunə; ghóʼkə tǎ əgho pó mǎ əgho.’ ”
20Ŋwu wə̂ a kwěe ńgə́, “Ndzéʼkə, maŋ lɔʼkə̂ məntəgə́ mɨ tsɔʼə mətsəm ə́fɛ́d páʼ maŋ nə ḿbə́ nə́ Mɔ̂nkə̂ nkaŋŋwunə.”
21Yeso a náŋə yí ńkɔŋə̂ yí ńtíʼ sóŋ nə́ yí ńgə́, “Gho pɛ́d ḿbóŋə táʼə anuə. Ghɛn ə́finə̂ ajúmə atsəm páʼ gho túg nə́ ə́fɛ̂ nkáb yi wɨ́ nə́ pəpóŋ ńjî ńgə́ afoʼə azô á chîə á nəpóolə, ńtíʼ ńgyǐ ńdzoŋə̂ mə.” 22Ŋwu wə̂ a nə ńdzóʼə atsáb jɨ lə́, mbɨ əjǐ ə́ póolə, a tíʼ ńgɛn nə́ afɨnə, ńté ńgə́ apeʼə ajíə á nə ńnə́ənə.
23Yeso a tíʼ ńnáŋ əliʼ ə́sóŋə á mbô ngaŋə́zoŋə́ndzəm əjí ńgə́, “Á chígə́ ńtyantə̂ á mbô ngǎŋnkéebə á mə́ kwú nə́ á mə́mə Anuə Nəfoonə Əsê!”
24Aliʼə́ atsáb zəənə́ á nə ńkɨʼnə̂ ngaŋə́zoŋə́ndzəm əjíə. Yeso a pə́ ńgɛn nə́ mbiə á mə́ sóŋ nə́ ńgə́, “Póonə mə! Á lánə ńtyantə̂ á mə́ kwú nə́ á mə́mə Anuə Nəfoonə Əsê! 25A pwɔ́dnə á mbô anjwa á mə́ kwú nə́ á mə́m ngɔ́d əsáʼ ńtsɛɛlə̂ á mbô ngaŋnkéebə á mə́ kwú nə́ á mə́mə Anuə Nəfoonə Əsê.”
26Anu yəwə́ á pɨ ḿbyádnə ńkɨʼnə̂ ngaŋə́zoŋə́ndzəm əjí pó tíʼ ə́sóŋə á tətɨ pó ńgə́, “Mbɔʼ əwə a pə́ ńtíʼ ńchwáalə?”
27Yeso a tə́g əmə́g nə́ pó ńtíʼ ə́sóŋ ńgə́, “Á tyantə̂ á mbô ŋwunə, ḿbə́ ńkě á mbô Əsê tyantə̂ pô. Mbɔʼ Əsê a faʼ mənu mətsəmə.”
28Pita a sóŋə á mbô yí ńgə́, “Pəg mɛdtə̂ ajúmə atsəm ńdzoŋə̂ gho!”
29Yeso a kwěe yí ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́, ŋwu ntsəm páʼə a mɛdtə̂ nə́ nchîndɛ̂ əjǐ kɨ pɔ́pə́mɛ́ pí pi pə́ mbyâŋnə kɨ pi pə́ pəngyě, kəənə mǎ əyǐ, kəənə tǎ əyǐ, kɨ pɔ́ pí, kəənə afoonə ají ńté mə pópə Anǔəsê, 30a yǐ ə́ kwá chigə ntsɔ́ʼəfaʼ əghâ nə́. A yǐ kwá ntsɔ́ʼəfaʼ əjǐ ngǎ nkɛd nə́ məláʼ, pópə pɔ́pə́mɛ́ pí pi pə́ mbyâŋnə, nə́ pi pə́ pəngyě, nə́ pəmǎ, nə́ pɔ́, nə́ əliʼ ndəsê, ḿbá nə́ mə tsaŋkə̂ nə́. Nə́ ndɛd yitsə̌ á mə́ yǐ nə́ a kə́ ńjî nchîntɨ páʼ ə́ mɛdnə̂ nə́ ngǎ mɔʼə́. 31Lə́ pɨ pi nɨ́ nə́ páʼ pó pə́ nə́ mbi əghâ nə́ pó yǒ tíʼ pə́ ndzəmə, pɨ pi nɨ́ nə́ páʼ pó pə́ nə́ ndzəm əghâ nə́ pó yǒ tíʼ pə́ mbiə.”
Yeso a kə́ Ḿbɨ Ə́sóŋə Anu ńté Nəwû Əyǐ Ngǎ Yitsə̌
(Mat 20.17-19; Luk 18.31-34)
32Yeso a nə ńkwá mbi əzɔb pó po tə́ ńkɔ́ʼə ńgɛnə̂ Jɛlusalɛmə. Á kɨʼnə̂ ngaŋə́zoŋə́ndzəm Yeso; pɨ pə́ nə ńtə́ nə́ ńdzoŋə̂ a ndzəm pə́ kə́ ḿbɔ́gə. Yeso a kə́ ḿbɨ ńdɔg ngaŋə́zoŋə́ndzəm əjí zə̂ ntsɔb pɛ̌ a ndzəmə ndzəm ə́fiʼtə̂ ághɔ́b nə́ mənu mə́ yǐ nə́ laŋə̂ á mbɨ yə́. 33Ə́sóŋ nə́ pó ńgə́, “Jɨ́ nə́. Pɛn kɔ́ʼə ńgɛnə̂ lɛ Jɛlusalɛm páʼ pə́ yǐ nə́ fɛ̂ Mɔ́ Ŋwunə á mbô pətə́kɔʼ pə́ ngaŋə́pêsê pópə ngaŋə́zéʼkə Pənoŋkə. Pə́ yǐ sáʼ əsáʼ əyí ə́lə́g ńgə́ pə́ jwítə yí ə́ tíʼ fɛ̂ yə́ á mbô Pətəjǐsê. 34Pó yǒ tíʼ ńnyegnə̂ yí, ə́ twǐ mətwê nə́ yí, ə́shúmə yí ə́ tíʼ ńjwítə yə́. Lə́, əlě teelə́ ə́ laŋ a pɨ ńjúmnə nəwûə.”
Anu páʼ Jɛmsə pó Jɔn ə́ nə Ḿbítə nə́ á Mbô Yeso
(Mat 20.20-28)
35Jɛmsə pó Jɔn, pɔ́ pə́ Zebedi pó tíʼ ńgyǐəə á mbô Yeso ə́sóŋ ńgə́, “Ndzéʼkə, anu yətsə́ á chî ə́wɨ́ páʼ pəg lɔ nə́ ńgə́ gho faʼə̂ á mbô pəgə́.”
36Yeso a pítə ághɔ́b ńgə́, “Nə́ loonə̂ lə́ ńgə́ maŋ ghɛd ə́lɛ́ á mbô pəənə́?”
37Pó kwěe ńgə́, “Ghɛd táʼ ŋwu əwəg yitsə̌ a náanə apô gho yə təənə, táʼ yitsə̌ a náanə apô yə kwaabə á əghâ ándó gho yǐ nə́ ńkwúnə á mə́mə anuə nəfoonə azô.”
38Yeso a sóŋə á mbô pó ńgə́, “Nə́ kě jîə anu nə́ pítə nə́ lə́ pô. Təmbɔʼ nə́ nô ndɔ́ŋ páʼ mäŋ nô nə́? Kɨ mbɔʼ nə́ kwá nkǐ páʼ mäŋ kwá nə́?”
39Pó kwěe ńgə́, “Mbɔʼ pəg ghɛlə̂.”
Yeso a tíʼ ə́sóŋ nə́ pó ńgə́, “Nə́ yǐ nô ndɔ́ŋ mäŋ nô nə́, ə́ kwá nkǐ maŋ kwá nə́. 40Lə́, mə náanə nə́ á əlá apô maŋ yi tɨ kɨ yə kwab lə́ kě maŋ yǐ tsɔ́ʼ pô. Əliʼ pɨ́d pɨ ə́ chî lə́ á mbô pɨ pə́ nə ḿbɛ́d nə́ tə ńtsoŋkə̂ pɨ́d ńté ághóobə́.”
41Ndzaŋ pətsə́ ngaŋə́zoŋə́ndzəm Yeso zə̂ nəghə́m ə́ nə ńdzóʼ nə́ anu jɨ lə́, ndě əghɔ́b ə́ záŋ ńté Jɛmsə pó Jɔnə. 42Yeso a tíʼ ə́fóŋə ághɔ́b pətsəmə aliʼə́ mɔʼə́ ə́sóŋ nə́ pó ńgə́, “Nə́ jî ńgə́ pɨ pə́ lɔg nə́ ńgə́ pó sáʼə məsáʼ mə́ Pətəjǐsê pó kɔ́ʼə ńnáanə lə́ á ndu pó ə́sáʼə ághóobə́. Mətû mɔ́b mə́ kə́ ńtúg mətɨ mətsəmə á ndu pó. 43Lɛ̌ pə́ ńkě ndzaŋə á chî nə́ á mə́ chî nə́ á tətɨ pɨ pô. Ŋwu ntsəm páʼə ä lɔ nə́ á mə́ pə́ nə́ tə́kɔʼ ŋwunə á mə́m pəənə́ a shib ḿbə́ ngaŋəfaʼə əwəənə́, 44mbɔʼ ŋwu əwɨ yitsə̌ a tə́ ńdoonə̂ á mə́ pə́ nə́ nkwâmbi, a shib ḿbə́ apoʼə ŋwu ntsəmə. 45A lǒo Mɔ́ Ŋwu, a nə ńkě yǐ lə́ ńgə́ pə faʼə̂ á mbô yí pô, ə́ ḿbə́ ńgyǐ lə́ á mə́ faʼ nə́ á mbô pəənə́, ə́ tû ə́fɛ̂ nchîmbî əjǐ á mə́ tsóʼ nə́ atûə pɨ pi nɨ́ nə́ ə́wə́.”
Yeso a Tsóʼə Əfə̌gmə́g Batimusə
(Mat 20.29-34; Luk 18.35-43)
46Pó yǐ ńkwúnə Jɛliko. Ndzaŋ páʼ Yeso pópə ngaŋə́zoŋə́ndzəm əjí, nə́ mboŋ pɨ ə́ nə ńtə́ nə́ ə́fɛ́lə lə́, əfə̌gmə́g yitsə̌ pə́ nə̈ fóŋ nə́ nə́ Batimusə páʼə a nə ḿbə́ nə́ mɔ́ Timusə a náanə á nkaŋə́ alaŋə́ ńtə́ ńdɔ́nə. 47Ndzaŋə a nə ńdzóʼ nə́ ńgə́ lə́ Yeso Mɔ́ Nazalɛd lə́, ńchúʼə á mə́ tɔ́ŋnə nə́ ə́sóŋə ńgə́, “Yeso! Mɔ́ Debid, kó mələ́ŋə mə.”
48Pɨ pi nɨ́ nə́ pə́ sáʼə yí ə́sóŋ nə́ yí ńgə́ a pɔ́ʼnə ńnaʼə̂. Lə́, a pə́ ḿbɨ ńgyɛ́ɛlə yɛ́ɛlə nə́ ə́sóŋə ńgə́, “Mɔ́ Debid kó mələ́ŋə mə!”
49Yeso a tɨ́ ńtíʼ ə́sóŋ ńgə́, “Fóŋ nə́ yə́.”
Pó tíʼ ə́fóŋə əfəg wə̂ ə́sóŋ nə́ yí ńgə́, “Wam mbɨ əzo! Lǒo á əsê, a tə́ ə́fóŋə gho.”
50A myaʼə̂ atsəʼə́ ají yə wáatə nə́, ə́sad ńdǒo á əsê ńgyǐəə á mbô Yeso.
51Yeso a pítə yí ńgə́, “Gho loonə̂ lə́ ńgə́ maŋ ghɛd ə́lɛ́ nə́ gho?”
Əfəg wə̂ a kwěe ńgə́, “Ndzéʼkə, maŋ loonə̂ lə́ á mə́ jɨ́ nə́ əliʼə́.”
52Yeso a sóŋ nə́ yí ńgə́, “Ghɛnə̂, mbimə́ əzo ə́ ghɛd gho yáŋə.”
Tsɔʼə əghâ yi wɨ́ ŋwu wə̂ a jɨ́ əliʼ, ńtíʼ ńdzoŋə̂ Yeso á alaŋə́ ndúmə.
Currently Selected:
Magə 10: azo
Highlight
Share
Copy
Want to have your highlights saved across all your devices? Sign up or sign in
