Jɔnə 19
19
Ndzaŋə Ándó pə́ nə Ńdə́g nə́ Əsáʼ Yeso Ńgə́ pə́ Jwítə Yə́
1Payilɛlə a tíʼ ńdɔgə̂ Yeso fɛ̂ yí pə́ shúmə. 2Ngaŋə́maʼə́ntso tíʼ ḿbáʼ nkɛd kɨ́koobə́ ándó lɛ pəfo lə́ ńgwê atû yə́, pó tíʼ ḿmaʼə̂ paŋpaŋə apagə atsəʼə́ a mbɨ yə́, 3ńtíʼə ńgyǐəə a mbi yí ə́sóŋə ńgə́, “Sə̂ə, Əfo Pəjus!” Ńkə́ ńdəbə̂ a yí nə́ mbô móobə́.
4Payilɛlə a kɨ ḿbɨ ə́fɛ́lə apeŋ ə́sóŋə á mbô pó ńgə́, “Jɨ́ nə́, mäŋ fɛ́lə nə́ yə́ apeŋ á mə́ fɛ̂ nə́ á mbô pɨ lə́ ńgə́ nə́ jî ńgə́ maŋ kě awǔənuə ají jɨ́ pô.” 5Lə́ Yeso a tíʼ fɛ́lə apeŋ, ńgwê lɛ páʼ pə́ nə ḿbáʼ nə́ nə́ kɨ́kɔb á chîə ándó lɛ pəfo lə́ atû yí pó paŋpaŋ apagə atsəʼ wə́. Payilɛlə a tíʼ sóŋə á mbô pó ńgə́, “Náŋ nə́, ŋwu wə̂ a ghɛnə̂!”
6Əghâ ándó pətə́kɔʼ pə́ ngaŋə́pêsê pópə ngaŋə́pyáabə á tə́kɔʼndɛ̂sê nə ńdzɨ́ nə́ a yí lə́, ńtíʼ ńtsáb nə́ pətə́kɔʼ pə́ ngye ə́sóŋ ńgə́, “Kwumtə̂ yə́! Kwumtə̂ yə́!”
Payilɛlə a sóŋə á mbô pó ńgə́, “Lɔg nə́ yí ńkwumtə̂ yí tsɔʼə á ngǎ pəənə́, ńté ńgə́ maŋ kě zə́ənə awǔənuə ají pô.”
7Pəjus pó kwěe a yí ńgə́, “Pəg túgə á noŋkə, lə́ ńdzoŋə̂ á noŋkə yi ə́wɨ́ a chîə mə́ kwû nə́, ńté ńgə́ a sóŋ ńgə́ yí lə́ Mɔ́ Əsê.”
8Ndzaŋə ándó Payilɛlə a nə ńdzóʼ nə́ ətsáb pɨ lə́, ḿbɨ ḿbyádnə ḿbɔ́gə. 9A pɨ ńkwú ńgɛnə̂ á mə́m ntɔ́ʼ ngǎ yitsə̌ ḿbítə a Yeso ńgə́, “Gho fɛ́d lə́ ə́fó?” Lə́ Yeso a nə ńkě akwe yə ndaʼ fɛ̂ pô. 10Payilɛlə a tíʼ sóŋə á mbô yí ńgə́, “Gho kě yǐ tséebə á mbô maŋ? Gho kě jî ńgə́ maŋ túg mətɨ təmbɔʼ maŋ mɛdtə̂ gho, ńkə́ ńtúg mətɨ təmbɔʼ maŋ kwumtə̂ gho?”
11Yeso a kwěe a yí ńgə́, “Gho kě mətɨ mətsə́ á ndu maŋ túg pô tə ńdéʼtə lə́ fɛ̂ Əsê ə́fɛ̂ mə́ələ́ á mbô gho. Lə́ pə́ ńgə́ ŋwu páʼ a fɛ̂ nə́ mə á mbô gho a túgə tə́kɔʼ təpɔŋə.”
12Ndzaŋə ándó Payilɛlə a nə ńdzóʼ nə́ atsáb jɨ lə́, ńdɔ ndú ətsəmə á mə́ mɛdtə̂ nə́ a Yeso. Lə́ Pəjus pó tsáb nə́ pətə́kɔʼ pə́ ngye ə́sóŋ ńgə́, “Təmbɔʼ gho mɛdtə̂ a ŋwu nə́ a ghɛn tə ḿbə́ gho kě lə́ ngaŋəko Kasa pô. Ŋwu ntsəm páʼ a sóŋ nə́ ńgə́ yí lə́ əfo, a kě lə́ ngaŋəko Kasa pô.”
13Ndzaŋə ándó Payilɛlə a nə ńdzóʼ nə́ ətsáb pɨ lə́, ńtíʼ ńdɔgə̂ a Yeso fɛ́d nə́ yí, ńtíʼ ńnáanə á ndumə aləŋə́ asáʼə́məsáʼ ají aliʼ páʼ pə́ nə ḿbɔ́ nə́ nə́ ngɔʼ pə́ fóŋə nə́ Azéenə, páʼ pə́ fóŋ nə́ nə́ atséebə Iblu ńgə́ Gabata. 14Lə́ nə ḿbə́ alě Atyáŋtə́púmə Akɔŋtə Ndzáʼkə, ándó ntɨ̌mə́numə. Payilɛlə a sóŋə á mbô Pəjusə ńgə́, “Zɨ́ nə, lɛ̌ əfo əwəənə́!”
15Pó tsáb nə́ pətə́kɔʼ pə́ ngye ə́sóŋ ńgə́, “Jwítə nə́ yə́! Jwítə nə́ yə́! Kwumtə̂ nə́ yə́ atǐə apagləpaglə.”
Payilɛlə a pítə ághɔ́b ńgə́, “Nə́ loonə̂ ńgə́ maŋ kwumtə̂ a əfo əwɨ?”
Pətə́kɔʼ pə́ ngaŋə́pêsê pó kwěe ńgə́, “Pəg kě əfo yitsə̌ túg tə ńdéʼtə Kasa pô.”
16Payilɛlə a tíʼ fɛ̂ yə́ á mbô pó ńgə́ pó ghɛn ńkwumtə̂ yə́.
Pə́ Kwumtə̂ Yeso Atǐə Apagləpaglə
(Mat 27.32-44; Mag 15.21-32; Luk 23.26-43)
Ngaŋə́maʼə́ntso tíʼ ńdɔgə̂ a Yeso fɛ́d nə́ yə́. 17Pə́ fɛ́d nə́ yə́ apeŋ páʼ a pěʼ nə́ atǐə apagləpaglə ajíə, ńgɛn ńkwúnə aliʼ pə́ fóŋ nə́ ńgə́ Akəghə́ʼlə́ atû, (páʼ pə́ fóŋ nə́ nə́ atséebə Iblu ńgə́ Gɔlgɔta). 18Á aliʼ yi ə́wɨ́ pó kwumtə̂ yə́, pó nə ńkwumtə̂ yí lə́ pópə pətsə́ pɨ pɛ́n pɛ̌ á nəpɛnə́ yə́. Táʼə á əlá apô yə kwaabə, táʼə á əlá apô yə təənə, nə́ Yeso tətɨ pó. 19Payilɛlə a kə́ ńtíʼ ŋ́ŋwaʼlə̂ aŋwaʼlə ḿbanə̂ atǐə apagləpaglə Yeso, páʼ aŋwaʼlə yə ə́wə́ á sóŋ nə́ lə́ ńgə́, “Yeso Mɔ́ Nazalɛd, Əfo Pəjusə.” 20Pəjus pi nɨ́ nə́ pó nə fóŋə aŋwaʼlə zəənə́, ńté ńgə́ aliʼ pə́ nə ńkwumtə̂ nə́ Yeso wə́ a nə ńchî ḿbáatə a tɔ́ŋə, pə́ nə ńkə́ ŋwaʼlə̂ aŋwaʼlə zɨ lə́ nə́ atséebə Iblu, Pó yə́ Latin nə́ yə Glikə.
21Pətə́kɔʼ pə́ ngaŋə́pêsê pə́ Pəjus pó sóŋə á mbô Payilɛd ńgə́, “Kɔ gho ŋwaʼlə̂ pə́ ńgə́ ‘Əfo Pəjus, ŋwaʼlə̂ pə́ ńgə́ ŋwu nə́ a sóŋ ńgə́, Yí lə́ Əfo Pəjusə.’ ”
22Payilɛlə a kwěe ńgə́, “Anu páʼ maŋ ŋwaʼlə̂ nə́, lə́ zɨ́d maŋ ŋwaʼlə̂ nə́.”
23Əghâ ándó ngaŋə́maʼə́ntso nə ńkwumtə̂ nə́ Yeso lə́, ńgabtə̂ ətsəʼ pí nə́ əpag pɛn nəkwa, ngaŋə́maʼə́ntso ətsəm pó lɔgə̂ táʼ táʼə apagə. Pó nə ńkə́ ńdɔgə̂ tə́sɛ atsəʼ əyǐ páʼ wə́ələ́ a nə fɛ́d nə́ nətsɛ̂ ńtsó ńkwúnə á nətɛ́n təghə́ pə́ sɛɛlə̂ aliʼ yətsə̌ ə́wə́. 24Pó tíʼ sóŋə tətɨ pó ńgə́, “Kɔ pɛn sɛɛlə̂ áwə́ələ́, pɛn tə́m pilə́ á ndu ə́wɨ́ ńdzə́ənə a ŋwu páʼ a yǐ nə lɔgə̂ zə́ələ́.”
Zəənə́ á nə ńdɔgə̂ aliʼ lə́ á mə́ lwɛ́nkə nə́ anu páʼ aŋwaʼlə Əsê a nə sóŋ nə́ ńgə́,
“Pó nə ńgabtə̂ ətsəʼə́ mə á tətɨ pó,
ńtíʼ ńdɔgə̂ tə́sɛ atsəʼə́ mə ńtə́m pid ə́wə́.”
Lɛ̌ anu ngaŋə́maʼə́ntso nə ńtíʼ nə́ ńgɛlə̂.
25Pɨ pó nə ńtɨ́ nə́ ḿbáatə atǐə apagləpaglə a Yeso, lə́ nə ḿbə́ Mǎ əyǐə, nə́ mɔ́mɛ́ mǎ əyǐ yǐ məngyě, nə́ Mɛɛlə ngwě Klusfas ḿbéenə Mɛɛlə Madalɛnə. 26Əghâ ándó Yeso a nə ńdzɨ́ nə́ a mǎ əyǐ, pó táʼ ndzoŋdzəm əyǐ páʼ a nə ńdánə ńkɔŋə̂, pó tɨ́ ḿbáatə yí lə́, a tíʼ ə́sóŋ nə́ mǎ əyǐ ńgə́, “Mǎ, lə́ mɔ́ əgho a wə̂,” 27Yeso a tíʼ ə́sóŋə á mbô táʼ ndzoŋdzəm əyǐ wə̂ ńgə́, “Lə́ mǎ əgho a wə̂” Ə́fɛ́d nə ndɛd zɨ́d zə̂ táʼ ndzoŋdzəm Yeso wə̂ a tíʼ ńdɔgə̂ mǎpə Yeso ńgɛn nə́ yí pó yí tíʼə ńchîə.
Ndzaŋə Ándó Yeso a nə Kwû nə́
(Mat 27.45-56; Mag 15.33-41; Luk 23.44-49)
28Yeso a jî ńgə́ nə́ pə́ əghâ nə́ lə́, anuə atsəmə á měe, á mə́ tíʼ nə́ ghɛlə̂ anuə atsəm pə́ ŋwaʼlə̂ nə́ á mə́mə aŋwaʼlə Əsê á pə́ ndə̌ŋdəŋ, Yeso a sóŋ ńgə́, “Nji nkǐ tə́ ńdzáŋə mə.”
29Ambáŋə́ á nə́ ńtə́əmə aliʼ yə ə́wə́ ńdwɛ́nkə nə məloʼ mimə́ tsə́g nə́, pó tíʼ ńchibə̂ á kwunchá á mə́m məloʼ mimə́ ə́wə́, ńtóŋ nə́ akəmə akəkaʼ ńkɔ́ʼkə ńnéŋə á ntso Yeso. 30Əghâ ándó Yeso a nə ńjwə́ʼ nə́ məloʼ mimə tsə́g nə́ mə́ lə́, ńtíʼ sóŋ ńgə́, “A měe!”
Ńtíʼ ńtsəŋkə̂ atûə ají, ńkwûə yə́.
Pə́ Sɔb Əlá Ngyéŋ Yeso
31Əghâ yí ə́wɨ́ Pəjus pətsə́ pó yǐəə á mbô Payilɛlə, mboʼ mbô nə́ yí ńgə́ a mɛdtə̂ pó ghɛn ḿbə́ʼtə məko mə pɨ pə̂, pə́ pěʼ nə ńkwumtə̂ ághɔ́b lə́ ńjî ńgə́ pə́ tsóokə əkwû póobə́ atǐə apagləpaglə. Pó nə ḿbítə əkwû pɔ́b lə́ ńté ńgə́ lə́ nə ḿbə́ alě Atyáŋtə́pú mbî fóg ḿbə́ Alěláʼə́sê. Pó nə ńkě kɔŋ ńgə́ əkwû pi wɨ́ ə́ pɛ́lə atǐə apagləpaglə á Alěláʼsê pô, ńté ńgə́ Alěláʼə́sê yi wə́ a nə ḿbə́ lə́ chigə tə́kɔʼ alěmbîə. 32Ngaŋə́maʼə́ntso tíʼ ńgyǐ ḿbə́ʼtə məko mə́ ntsɛɛmbi ŋwunə, ńkə́ ḿbɨ ḿbə́ʼtə mimə́ yitsə̌ ŋwu pə́ kə kwumtə̂ ághɔ́b pə Yeso lə́. 33Lə́ əghâ pó nə ńkoʼ nə nə́ Yeso lə́, ńdzɨ́ ńgə́ a pɛ́dtə ńkwû, ńkě məko mí pə́ʼtə pô. 34Lə́ táʼ mmaʼntso yitsə̌ a lɔg nəkɔŋ ə́sɔb əlá ngyéŋ Yeso wə̂, achǐə pó nkǐ tíʼ ńkóŋ fɛ́d wə̂. 35(Ŋwu páʼ a nə ńdzɨ́ nə́ anu zəənə́ a lɔgə̂ aliʼ lə́, a kə tsáb ńté ázə́ələ́, ńjî ńgə́ təmbɔʼ nə́ kə́ ḿbímə. Anu páʼ a kə sóŋ nə́ lə́ ndə̌ŋdəŋə́, ńkə́ ńjî ńgə́ á tséebə lə́ ndə̌ŋdəŋə́.) 36Anu zəənə́ á nə́ ńdɔgə̂ aliʼ lə́ á mə́ lwɛ́nkə nə́ anu aŋwaʼlə Əsê á sóŋ nə́ ńgə́, “Tsɔʼə táʼə akwəŋə́ ají yitsə̌ pə́ yǒ kě pə́ʼ pô.” 37Yətsə̌ aliʼə́ aŋwaʼlə Əsê á kə́ ḿbɨ́ sóŋ ńgə́, “Pɨ pə́ yǒ zə́ənə yí páʼ pə́ kə sɔb nə́ lə́.”
Ndzaŋə Ándó pə́ nə Ńtwə́ŋ nə́ Yeso
(Mat 27.57-61; Mag 15.42-47; Luk 23.50-56)
38Ndzaŋə ándó anu zəənə́ á nə ńdaŋ nə́ lə́, Jɔsɛfə a nə ḿbə́ nə́ ŋwu Alimatya, a nə ńkə́ ḿbə́ lə́ táʼ ndzoŋdzəm Yeso yitsə̌ a nəlyaŋnə́, ńté ńgə́ a nə ńtə́ ḿbɔ́gə Pəjusə. A yǐəə a mbi Payilɛd ḿbítə yí nə́ akwûə Yeso. Payilɛlə a fɛ̂ zə́ələ́ á mbô yə́, a tíʼ ńdɔgə̂ zɨ́d ńgɛn nə́ zə́ələ́. 39Nikodemɔs páʼ a nə ḿbeg nə́ ńgɛnə̂ á mbô Yeso a nətúʼ lə́, a tíʼ ńdzoŋə̂ a Jɔsɛfə. A nə ńtə́ ńgɛnə̂ lə́ ńtúg məghɔ́d mə́ azagə́ páʼ pə́ nə ńgwɛd nə́ mɨ́d nə́ ajú tsə́ pə́ fóŋə nə́ mɛlə pó yətsə́ pə́ fóŋə nə́ aloyis, məghɔ́d mimə́ wɨ́ mə́ nə ńchî təmbɔʼ mə́ pə́ pəkilo məghə́m mɛ́n teelə́. 40Mbyâŋnə zɨ zɛ́n pɛ̌ pó nə ńdɔgə̂ akwûə Yesö ńdə́mtə nə́ fufu apagə atsəʼ ńnéŋə mɨ́d wɨ̈ ńdzoŋə̂ noŋkə Pəjus ndzaŋ pó twə́ŋ nə́ a ŋwunə. 41Nkáʼ məjî yitsə̌ nə ńchîə aliʼ pə́ nə ńkwumtə̂ nə́ Yeso ə́wɨ́ lə́, ḿbáatə nkáʼ wə̂ nəse yi nətsə́ nə́ chî ə́wɨ́ páʼ pə́ nə ńkě nə́ ŋwu tsə̌ ə́wɨ́ kə́ twə́ŋə pô. 42Ndzaŋə a kə pə́ nə́ alě, mbî yǐ nə́ fóg a pə́ alěláʼə́sê Pəjus lə́, nəse nə́ kə́ ńchî ḿbáatə lə́, pó tíʼ ńtwə́ŋə Yeso ə́wə́.
Currently Selected:
Jɔnə 19: azo
Highlight
Share
Copy
Want to have your highlights saved across all your devices? Sign up or sign in
