Jɔnə 20

Yeso á Júmnə Nəwûə

(Mat 28.1-8; Mag 16.1-8; Luk 24.1-12)

1Chigə mɛ́ məsânə á Sɔnde ándó əliʼ nə ńtə́ nə́ ḿbɛ́lə sɛ́nə, Mɛɛlə Madalɛnə a ghɛnə̂ á nəse, ńdzɨ́ ńgə́ pə́ pěʼ ŋáʼ ngɔʼ zə̂ á ntso nəse. 2A tíʼ ńkə ndə̌ ńgɛn ńdzə́ənə a Saamun Pita pó ndzoŋdzəm Yeso wə̂ páʼ Yeso nə ḿbyádnə nə́ ńkɔŋə̂ yí lə́, ə́sóŋə á mbô pó ńgə́, “Pə́ fógə Mmaʼmbîə á mə́m nəse pəg pə́ ńkě jîə aliʼ pə́ noŋkə̂ nə́ yí ə́wɨ́ pô.”

3Pita pó yitsə̌ ndzoŋdzəm Yeso wə̂ tíʼ fɛ́d ńgɛnə̂ á nəse. 4Pó pətsəm chúʼə á mə́ kə nə́ ndə̌, lə́ yitsə̌ ndzoŋdzəm Yeso wə̂ a kə ḿmyaʼə̂ Pita, ńkwá mbi ḿbegə̂ nəse. 5Ńtsóokə atûə ají ńnáŋ mə́m nəse, ńdzə́ənə fufu apagə atsəʼ wə̂, ḿbə́ ńkě á mə́m nəse kwú pô. 6Saamun Pita a zoŋə̂ á ndzəm yə́, ńgyǐ ńdaŋ ńkwúnə á mə́m nəse. Ndzaŋə a nə ńkwú nə́ á mə́m nəse lə́ ńdzə́ənə fufu apagə atsəʼ wə̂ á noŋnə̂ wə̂, 7pó apagə atsəʼ pə́ nə ńdə́mtə nə atûə Yeso ə́wə́. Apagə atsəʼ zə̂ á nə ńkě pó fufu apagə atsəʼ wə̂ táʼə aliʼ noŋnə̂ pô, ḿbə́ ńkádtə mbɨ əjǐ ńnoŋnə̂ á ngǎ yə. 8Yitsə̌ ndzoŋdzəm Yeso páʼ a nə ńkwá nə́ mbi ḿbegə̂ á nəse lə́, a kə́ ńdzoŋə̂ ají ńkwúnə á nəse, ńdzə́ənə anu páʼ a laŋ nə́ ńkə́ ḿbímə. 9(Lə́ nə ndɛd zɨ́d zə̂ atûə azóobə́ a pə́ ńkě lá nə anu páʼ aŋwaʼlə Əsê á sóŋ nə́ ńgə́, “A yǒ shib júmnə nəwûə.”) 10Lə́ ngaŋə́zoŋə́ndzəm əjí tíʼ ńkwə̂ ághóobə́ məláʼ pó.

Ndzaŋə Ándó Yeso a nə Nɨd nə́ Mbɨ Əjǐə á Mbô Mɛɛlə Madalɛnə

(Mat 28.9, 10; Mag 16.9-11)

11Mɛɛlə a tɨ́ ńtíʼə ńkyéŋə á ntso nəse. Ndzaŋə ándó a nə ńtə́ nə́ ḿbɛ́lə ńkyéŋə lə́, ńdzəŋkə̂ atûə ají ńnáŋ mə́m nəse, 12ńdzɨ́ pətseŋpə́ndɛ́pə́sê pɛ́n pɛ̌ pó wê pəfúfú pə́ ətsəʼ ńnáanə aliʼ pə́ nə noŋkə̂ nə́ akwûə Yeso wɨ́ lə́, táʼə a náanə aliʼ páʼ atûə a yə́ a nə noŋnə̂ nə́ ə́wə́, yitsə̌ a náanə aliʼ məko mí mə́ kə noŋnə̂ wə́. 13Pó pítə Mɛɛlə ńgə́, “Ghö kyéŋə lə́ akə̂ məngyě nə́?”

A kwěe á mbô pó ńgə́, “Mäŋ kyéŋə lə́ ńté ńgə́ pə́ lɔgə̂ Mmaʼmbîə mə ńgɛn nə́ wə́ələ́, maŋ kě kə́ ńjîə aliʼ pə́ noŋkə̂ nə́ a yí ə́wɨ́ pô.”

14Ndzaŋə ándó a nə məgtə̂ nə́ á mə́ tsáb nə́ pó po lə́, ə́sɛdnə̂ ńdzə́ənə Yeso a tə́əmə, lə́ a pə́ ńkě jî ńgə́ lə́ Yeso pô. 15Yeso a sóŋə á mbô yí ńgə́, “Məngyě nə́, gho kyéŋə lə́ akə̂? Gho náŋə lə́ ə́wə́?”

Mɛɛlə a tíʼ ńkwaŋ ńgə́ lə́ ndîʼpúmə, ńtíʼ ə́sóŋə á mbô yí ńgə́ Tǎ, “Təmbɔʼ a pə́ ńgə́ lə́ twá gho ńtwáamə yí ńgɛn nə́ wɨ́d, gho fiʼtə̂ mə nə́ aliʼ páʼ gho noŋkə̂ nə́ yí ə́wə́, ńjî ńgə́ maŋ ghɛn ńdɔgə̂ yí ńgɛn nə́ wə́ələ́.”

16Yeso a fóŋə yí ńgə́, “Mɛɛlə.”

Mɛɛlə a sɛdnə̂ ə́sóŋ á mbô yí nə́ atséebə Iblu ńgə́, “Labboni!” (páʼ ä sóŋ nə́ lə́ ńgə́ Ndzéʼkə).

17Yeso a sóŋə á mbô yí ńgə́, “Kɔ gho kwumə̂ mə, ńté ńgə́ maŋ kě kə́ kɔ́ʼə ghɛnə̂ á mbô Tǎ pô. Lə́, ghɛnə̂ á mbô pəlimə́ mə fiʼtə̂ ághɔ́b ńgə́, ‘Maŋ tə́ ńkɔ́ʼə ńgɛnə̂ á mbô yí páʼ a pə́ nə́ Tǎ mə ńkə́ ḿbə́ Tǎ əwəənə́, ḿbə́ Əsê mə ńkə́ ḿbə́ Əsê zəənə́.’ ”

18Mɛɛlə Madalɛnə a tíʼ ńgɛn ə́sóŋə á mbô ngaŋə́zoŋə́ndzəm Yeso ńgə́, “Maŋ zə́ənə Mmaʼmbîə” Ńkə́ ḿbɨ ə́fiʼtə̂ ághɔ́b nə́ ndɛn mənu páʼ a sóŋ nə́ á mbô yə́.

Yeso a Jáʼə á Mbi Ngaŋə́zoŋə́ndzəm Əjíə

(Mat 28.16-20; Mag 16.14-18; Luk 24.36-49)

19Ndɛd nə ńgɛnə̂ á əghâ nkwanə́ á Sɔnde wɨ́d wə̂, ngaŋə́zoŋə́ndzəm əjí tsɛntə̂ á mə́m ndɛ̂ ḿbə́ fwɔn ntsǒndɛ̂ ńté ńgə́ pó nə ńtə́ ḿbɔ́gə mətû mə́ Pəjusə. Yeso a yǐ ńtə́əmə tətɨ pó ńtíʼ ə́sóŋə á mbô ńgə́, “Mbwɔ́dnə ə́ chîə á tətɨ pəənə́.” 20Ndzaŋə a nə ńtsáb nə́ á mbô pó lə́, ńtíʼ ńnɨd mbô mí pópə əlá ngyéŋ yə́ á mbô pó. Ngaŋə́zoŋə́ndzəm əjí nə ńdwɛ́nkə nə́ akɔŋtə ndzaŋə ándó pó zɨ́ nə́ Mmaʼmbîə. 21Yeso a pɨ ńkə́ ə́sóŋə á mbô pó ńgə́, “Mbwɔ́dnə ə́ chîə tətɨ pəənə́.” Ndzaŋə ándó Tǎ ä tú nə́ mə lə́, lə́ kə́ ḿbə́ ndzaŋ mäŋ tú nə́ áwə́ənə́. 22Əghâ ándó a nə sóŋ nə́ anu zɨ lə́, ńtíʼ ńjwǐəə á ndu pó ə́sóŋ nə́ pó ńgə́, “Kwá nə́ Ajwǐəsê.” 23Təmbɔʼ nə́ ləgnə̂ pətəpɔŋ pə́ pɨ tə ḿbə́ pə́ yǐ kə́ ləgnə̂ pəpə́ənə́; təmbɔʼ nə́ kǐə á mə́ ləgnə̂ nə́ pətəpɔŋ pə́ pɨ, tə ḿbə́ Əsê a yǐ kə́ kǐə á mə́ ləgnə̂ nə́ pəpə́ənə́.

Yeso pó Tɔməsə

24Á nə́ ḿbə́ əghâ páʼ Yeso a nə ńgyǐ nə́ á mə́ nɨd nə́ mbɨ əjǐə á mbô ngaŋə́zoŋə́ndzəm jí zə̂ ntsɔb pɛ̌ lə́, Tɔməsə páʼ pə́ nə ńkə́ nə ə́fóŋə yí nə́ (Mɔ́ Nəfág lə́) a nə ńkě á ndɛ̂ chî pô. 25Yitsə̌ ndzoŋdzəm Yeso tíʼ fiʼtə̂ yí ńgə́, “Pəg zə́ənə a Mmaʼmbîə!”

Lə́ Tɔməsə a kwěe ághɔ́b ńgə́, “Tə ńdéʼtə maŋ zɨ́ əliʼ məmbá pə́ nə ńkwúmtə nə́ yí wə́ á mbô yə́, ńkə́ ńnéŋ mbô mə nə́ məngɔ́d mə́ məmbá mimə́ wə́, ńkə́ ḿbɨ ńnéŋə apô mə əlá ngyéŋ yə́, tə ḿbə́ maŋ kě yǐ pí pô.”

26Əlěmbî pɛ́n nəfeemə́ ə́ laŋ, ngaŋə́zoŋə́ndzəm Yeso ə́ chîə á mə́m ndɛ̂ pópə Tɔməsə. Pó nə fwɔn ntsǒndɛ̂, lə́ Yeso a yǐ ńtə́əmə á tətɨ pó ə́sóŋ ńgə́, “Mbwɔ́dnə chîə á tətɨ pəənə́.” 27Ńtíʼ ə́sóŋə á mbô Tɔməsə ńgə́, “Néŋə afîə pô əgho aliʼə́ nə́, ńkə́ ńnáŋ mbô mə, ńtíʼ shǐəə apô azô ńnéŋə á ngyéŋ maŋə, kɔ atûə azô á tə́ ńkoʼlə̂, pímə.”

28Tɔməsə a tíʼ ə́sóŋə á mbô yí ńgə́, “Mmaʼmbîə mə, ńkə́ ḿbə́ Əsê mə!”

29Yeso a sóŋə á mbô yí ńgə́, “Gho pí lɛ̌ ńté ńgə́ gho zə́ənə mə. Mbɔŋə́ lə́ yə pɨ páʼ pó kě nə́ zɨ́ pô ḿbə́ ḿbímə.”

30Yeso a kə chî pópə ngaŋə́zoŋə́ndzəm əjí lə́ ńgɛd əkyeʼmə́nu pi nɨ́ nə́ pətsə́ á mbi pó páʼ pə́ nə ńkě nə́ pə́ələ́ á mə́mə aŋwaʼlə zɨ ŋwaʼlə̂ pô. 31Lə́ pə nə ŋ́ŋwaʼlə̂ mɨ lə́ ńgə́ təmbɔʼ nə pí ńgə́ Yeso lə́ Klisto, ḿbə́ Mɔ́ Əsê, ńjî ńgə́ təmbɔʼ nə pí nə́ yí ńtúg nchîmbî nə́ əlɛ́n əyə́.

Currently Selected:

Jɔnə 20: azo

Highlight

Copy