Məfaʼə 20
20
Pɔlə a Nyinə̂ á Mə́m Mboʼ Masedonya pó Glikə
1Ndzaŋə ándó ajwaʼlə zə̂ á Ɛfesusə á nə ńdaŋ nə́ lə́, Pɔlə a fóŋ ngaŋə́zoŋə́ndzəm Yeso ńtséebə á mbô pó á mə́ néŋ nə́ ntɨ́ əghɔ́b ə́ tyantə̂, ńtíʼ ḿbookə̂ ághɔ́b, ə́fɛ́d ńchúʼə á mə́ ghɛn nə́ á mboʼ Masedonya. 2Ndzaŋə a nə̈ nyi nə́ ńdaŋ əliʼə́ á mə́m Masedonya lə́, ńnéŋə məntɨ́ mə́ ngaŋə́zoŋə́ndzəm Yeso á mə́m pətɔ̂ŋ nə́ ətsáb ntəgə́. Ńgɛn ńkwúnə á mə́m Glik, 3ńchî ə́wɨ́ sáŋ zɛ́n teelə́. A nə ńtə́ ńdoonə̂ á mə́ nyi nə́ á mə́m nkǐ ə́ ghɛnə̂ á mboʼ Sylya lə́ ḿbə́ ńdzóʼ ńgə́ mətû mə́ Pəjus pó nə ńtyáŋtə á mə́ jwítə nə́ yə́ á ndú nkǐ á Sylya. A tíʼ ńkwúblə ntɨ́ yí ḿbəənə̂ á Masedonya á mə́ tíʼ nə́ ghɛnə̂ Sylya. 4Pɨ pətsə́ pó nə ńdzoŋə̂ Pɔlə á nənyi wɨ́d wə̂, pó nə ḿbə́ lə́, Sopata mɔ́ Pilus páʼ a pə́ nə ŋwu Belya, Alistakus ḿbɨ́ ḿbə́ nə́ Sɛkondus páʼ pó nə ə́fɛ́d nə́ Tɛsalonika, Gayɔs páʼ a nə ə́fɛ́d nə́ Debə, Tikikɔs po Təlofimusə á mə́m mboʼ Esya, ḿbɨ́ ḿbə́ nə́ Timoti. 5Pó nə ńkwá mbi ńgɛn ḿbyáabə áwə́gə́ á Təlowasə. 6Pəg laŋə̂ á mə́m nkǐ ńdǒ á Filipi tsɔʼə páʼə alě akɔŋtə páʼ pə́ kɔ́d nə́ apéenə məkálə́ tə mbê a kə́ laŋ nə́, əlě mbî tâ laŋ pəg tégə ághóobə́ Təlowasə, pə̌gpo chî ə́wɨ́ əlě mbî asaambɛ̂.
Pɔlə a Júmkə Ŋwu Páʼ a Kwû nə́
7A nə ḿbə́ nə́ ntsɛɛmbiə alě á mə́m ngab mbî lə́, pəg kyeetə̂ pə̂gpə ngaŋə́zoŋə́ndzəm Yeso á mə́ jî nə́ ntéelə. Pɔlə a tsáb pó po nə tə́sɛ ndɛd tə ńkoʼə̂ á ntɨ̌túʼ ńté ńgə́ a kə chîə á mə́ lê nə́ ghɛnə̂ yə́ á məsânə. 8Pə lam pipə nɨ́ nə́ pə́ kə tə́ ńkɛ́lə á mə́m ndɛ̂ ajábtə aliʼ pə́ nə ńkyeetə̂ nə́ ə́wə́. 9Mɔ́ mbyâŋnə yitsə̌ páʼ əlɛ́n yí nə ḿbə́ nə́ Utikɔsə á nə ńnáanə a ntsoolə ajweekə. Ndzaŋə atséebə Pɔlə a kə sag nə́ lə́, a wǔəə mə́m ntɨ pəlê, ńtíʼ ńgwǔ ə́fɛ́lə á ndumə ajábtə ndɛ̂ teelə́ pə́ yǐ ńtə́ ńtwáamə yə́ a pɛ́dtə ńkwûə. 10Pɔlə a tsóolə əsê ŋ́ŋwúʼnə á ndu yí, ńgwaamə̂ ghaŋ yí ńtíʼ ə́sóŋ ńgə́, “Kɔ nə́ pɔ́gə, nchîmbî əjǐ ə́ pɛ́lə á mə́m yə́” 11Ndzaŋə ándó Pɔlə po kə pɨ nə́ ńkɔ́ʼə á mə́m ndɛ̂ ajábtə lə́, ńtíʼ ńjî ntéelə. Pɔlə a pɨ ńkə́ ńtsáb pó po nə tə́sɛ ndɛd tə mbî ə́ fógə. A tíʼ mɛdtə̂ ághɔ́b ńgɛnə̂ yə́. 12Pó tíʼ ńdɔgə̂ mɔ́ mbyâŋnə yí wɨ́ ńgɛn nə́ yí páʼ a pɛ́d nə́ mbî nə tə́kɔʼ akɔŋtə.
Pɔlə a Fɛ́lə Təlowasə á mə́ Ghɛn nə Miletus
13Pəg kwá mbi ńdaŋə̂ á mə́mə aŋkənúʼə́ ńgɛnə̂ á Asos á mə́ pyáb nə Pɔlə ə́wə́, ńté ńgə́ a kə sóŋ ńgə́ pəg lɔgə̂ yí ə́wə́. A kə pɨ ńtə́ ńdoonə̂ ajíə á mə́ ńnyi nə́ lə́ á məko ə́fɛ́lə Təlowasə ə́ ghɛnə̂ Asosə, a kə jɨ́ ńgə́ mbɔʼ a nyinə̂ məko ńgɛn wə́. 14Ndzaŋə a kə téekə nə áwə́gə́ Asos lə́, pəg tíʼ ńdɔgə̂ yí nə́ aŋkənúʼə́ pə̌gpo tíʼ ńgɛn ńkwúnə Mitilɛnə. 15Mbî pɨ ə́fóg pəg tíʼ ńnyinə̂ á nkǐ ə́fɛ́lə á Mitilɛn ńgɛn ḿbáatə Kayus, yitsə̌ mbî ə́fóg pəg ghɛnə̂ Samos, yitsə̌ mbî pɨ ə́fóg pəg ghɛnə̂ Miletus. 16Pɔlə a nə jɨ́ ńgə́ mbɔʼ a nyinə̂ á mə́m nkǐ ńdaŋə̂ Ɛfesus ńté ńgə́ a kə kě kɔŋə̂ á mə́ laŋkə̂ nə́ ndɛd yitsə̌ á mboʼ Esya pô. A kə tə́ ńgə́glə ńgə́ mbɔʼ á kwúnə á Jɛlusalɛm záʼ alě akɔŋtə Pɛntekɔs á pɔŋə̂ koʼə̂.
Atsáb Páʼ Pɔlə kə Fiʼtə̂ nə́ Mətû mə́ Nkyeetə Pɔ́ pə́ Əsê á Ɛfesus Záʼ Ḿbɔŋə̂ Mɛdtə̂ Ághóobə́
17Əghâ ándó pəg nə ńkoʼ nə á Militɔs lə́, Pɔlə a tú nkəənə á Ɛfesus ńgə́ mətû mə́ nkyeetə mə́ téekə yə́. 18Ndzaŋ pó nə ńgyǐ nə́ lə́, a chúʼə á mə́ sóŋ nə́ nə́ pó ńgə́, “Pɨ pətsəm nə́ jî ndzaŋ páʼ maŋ chî nə́ á tətɨ pɨ ə́fɛ́d nə́ ndɛd maŋ kə tə́g nə́ məkoolə mə á Esya. 19Maŋ nə̈ faʼə̂ á mbô Mmaʼmbî Yeso lə́ nə atsóokə́mbəəmə atsəm nə́ nəkyéŋə á əmə́g maŋ ḿbɨ ḿbə́ nə́ əkwaʼlə páʼ ə́ nə̈ ńgyǐ nə́ á mbô maŋ ndzaŋə ándó pɨ pə́ Islɛl pó nə̈ ńdɔ nə á mə́ néŋ nə mə á mə́m ngə́ʼə. 20Nə kə̂ ńjî ńgə́ maŋ nə ńkě chîə tə ghə́ maŋ fiʼtə̂ áwɨ́ nə́ anu mbɔʼ á kwáalə áwɨ́ pô, ńkə́ ńdzéʼkə áwɨ́ nə́ anǔəsê á əshîsaŋ pópə ntso məláʼə. 21Nə jî ndzaŋ maŋ nə̈ ńkwantə̂ pɨ pə́ Islɛl po pə Pətəjǐsê ńgə́ pó kwúblə á mə́m təpɔŋ əghɔb ńgyǐəə á mbô Əsê ńkə́ ńtúg mbimə́ a mə́m Mmaʼmbî əwɛn Yeso Klisto. 22Əghâ nə maŋ ghɛnə̂ lɛ̌ á Jɛlusalɛmə á mə́ zóʼ nə́ anu páʼ Ajwǐəsê a sóŋ nə́ ńgə́ maŋ ghɛlə̂, ḿbə́ ńkě jîə anu maŋ yǐ nə́ ghɛn wə́ á laŋə̂ á mbɨ maŋ pô. 23Ndaʼə anu maŋ jî nə́ lə́ ńgə́ Ajwǐəsê ä sóŋ nə maŋ ńgə́ á mə́m tə́kɔʼ tɔ̂ŋ ntsəm pə́ yǐ ńnéŋə mə atsáŋə ə́ kə́ ghɛd maŋ zɨ́ ngə́ʼə. 24Maŋ pə́ ńkě nchîmbîə mə ándó ajûtsə́ lɔg pô, tsɔʼə ńgə́ anu yəwə́ á mɛdtə̂ maŋ məgtə̂ ndə̌ mə ḿbɨ́ ḿbə́ nə́ afaʼ páʼ Mmaʼmbî Yeso Klisto a nə ə́fɛ̂ nə́ ńgə́ maŋ faʼə̂. Afaʼ yə́ wɨ́ lə́ mə fiʼtə̂ nə́ pɨ nə́ nkɨ yi əshîʼnə ńté ndzaŋ páʼ Əsê a nɨd nə́ apɔŋə́ntə́əmə ajíə á ndu pəənə.”
25“Əghâ nə́, nə́ jwə́ʼtə, maŋ jî ńgə́ pɨ pətsəm páʼ maŋ yǐ nə́ á mbô pɨ ńnáŋkə nkəənə anuə nəfoonə Əsê, nə yǒ kě mə pɨ jɨ́ pô.” 26Maŋ tíʼ ə́sóŋə á mbô pɨ ə́sɛ̂n ńgə́, mbɔʼ ŋwu əwɨ yətsə́ a kwû tsɔʼə tə néŋ ntɨ́ əyí nə́ Yeso, apô mə á kě nə nəwû əyí chî pô. 27Maŋ sóŋ lɛ̌ ńté lə́ ńgə́ maŋ kě chîə tə ghə́ maŋ fiʼtə̂ áwɨ́ nə́ anuə atsəm páʼ Əsê a lɔ́btə nə́ ńté áwɨ́ pô. 28Lɔg nə́ ndɛd nə́ məmbɨ mɨ́ ńkə́ ńdɔg ndɛd nə́ pɨ pətsəm páʼ Ajwǐəsê a mɛdtə̂ nə́ á mbô pəənə́ ándó mətûə, ńjî ńgə́ pó lɔg ndɛd nə́ nkyeetə pɔ́ pə́ Əsê páʼ Əsê nə ńjú nə́ nə́ achǐə mɔ́ əyǐ Yeso Klisto. 29Maŋ jî ńgə́ əghâ maŋ yǐ nə́ ghɛnə̂ mə əfunə́ təpɔŋ ə́ yǐ kwúnə á tətɨ pɨ ə́ kě wɨ́ pɔ́ pə́ Əsê ḿmɛdtə̂ pô. 30Ndɛd tə́ ńkoʼə̂ páʼ pɨ pətsə́ pó yǐ nə́ ə́fɛ́lə á tətɨ pɨ páʼ pó yǒ nə́ kwúblə á ndə̌ŋdəŋ ńté atséebə Əsê, ə́ chúʼə á mə́ zéʼkə nə́ mənu mimə ndaʼ páʼ mə́ yǐ nə́ jwaʼlə̂ pɨ ə́ tíʼ soŋə̂ ághɔ́b pó zoŋə̂ ághóobə́. 31Lə́ələ́ pə́ ńgə́ nə lɔg ndɛlə́. Kwúmtə nə́ ńgə́ nə́ ngoʼ teelə́, “Maŋ tə́gtə áwɨ́ tsɔʼə tə jwitə̂ á nətúʼ pópə nənumnə nə́ nəkyéŋə á əmə́g maŋ.”
32“Əghâ nə́ mäŋ néŋə áwə́ənə́ á mə́m atéelə pô Əsê ńkə́ ə́sóŋə nə́ pɨ ńgə́ nə kwúmtə atsáb ńté apɔŋə́ntə́əmə Əsê páʼ a túg nə́ á ndu pɛnə̂. Atséebə Əsê jɨ́d zə̂ á chî təmbɔʼ á ghɛd nə́ tɨ́ ńtyantə̂ á mə́m mbimə́ ńkə́ ə́fɛ̂ ajú páʼ Əsê a nə ńdaʼnə̂ nə á mbô ŋwu ntsəm páʼ a tsɔʼ nə́ ńgə́ lə́ ŋwu əyǐə. 33Əghâ maŋ nə ńchî nə́ pɛn lə́, maŋ nə ńkě kə́ láʼə pítə ŋwu əwɨ yitsə̌ nə́ gôlə, kɨ sɛləba kɨ ətsəʼ pô. 34Tsɔʼə pɨ pətsəm jî ńgə́ maŋ nə̈ faʼə̂ lə́ nə mbô mə á mə́ túg nə ajúmə atsəm páʼ pə̂gpə ngaŋmə́koolə mə lɔ nə́. 35Maŋ nəələ̂ áwɨ́ ńgə́, á mə́m anuə atsəm á pɔŋə̂ mə́ pyádnə nə́ ə́faʼə̂ á mə́ kwá nə pɨ páʼ pó pwɔ́d nə́. Pɛn kwúmtə atséebə Mmaʼmbî Yeso páʼ a sóŋ nə ńgə́, Afoʼə á chî nə́ mbô páʼ mə́ fɛ̈ nə ńtsɛ mi páʼ mə́ kwá nə́.”
36Əghâ ándó Pɔlə a nə məgtə̂ nə́ á mə́ tsáb nə́ lə́, ńtíʼ ńkwə́ʼtə ndəsê pó po pətsəm chaʼtə́sê. 37Ńtíʼ ńnɔd ńkyéŋ ńgwaamə̂ yí ḿbáʼnə nə́ yí ńtíʼ ńchwegə̂ yə́, ə́fɛ̂ á mbǒ nə́ yə́. 38Pó nə fɨnə̂ tə́shú ńté atsáb páʼ a nə sóŋ nə́ nə́ pó ńgə́ pó láʼ kě yí pɨ jɨ́ pô lə́, ńtíʼ ńgɛn ńchaakə̂ yə́ á mə́mə apáŋə́nkǐə.
Currently Selected:
Məfaʼə 20: azo
Highlight
Share
Copy
Want to have your highlights saved across all your devices? Sign up or sign in
