Məfaʼə 21
21
Pɔlə a Ghɛnə̂ á Jɛlusalɛmə
1Pəg kə fɛ̂ mbǒ nə́ pó lə́ ńkwúnə á tə́kɔʼə aŋkənúʼə́ ńgɛn ndə̌ŋdəŋə́ á Kɔsə. Mbî fóg pəg ghɛn ńkwúnə á Ludɛs ə́fɛ́d ə́wɨ́ ńgɛnə̂ a Patala. 2Pəg zə́ənə tə́kɔʼ aŋkənúʼə́ ə́wɨ́ páʼ á ghɛn nə́ Fonisya, ńkwúnə zɨ́d ńtíʼə ńgɛnə̂. 3Əghâ ándó pəg nə ńkwú nə́ aliʼ mbɔʼ pəg zɨ́ ndzɛnə́ Sayiplus lə́, ḿmɛdtə̂ Sayiplus á apô yə kwab ńtíʼ ńgɛn ndə̌ŋdəŋ ńkwúnə Sylya, ńtə́əmə aliʼ yitsə̌ pə́ fóŋə nə́ Tayile, aliʼə́ ándó apáŋə́nkǐə a kə chî nə́ mə́ fóg nə́ apeʼ wə́. 4Pəg nə ńkoʼə̂ á Tayil ńdjɨ́ ngaŋə́zoŋə́ndzəm Yeso ə́wɨ́, ńtíʼ ńchî pə̌gpo nə́ əlě mbîə asaambɛ̂. Ajwǐəsê a ghɛd pó jîə anu páʼ a yǐ nə́ laŋ nə́ Pɔlə á Jɛlusalɛm, pó tíʼ sóŋ nə́ Pɔl ńgə́, kɔ á ghɛnə̂ a yí ə́wə́. 5Ndɛd əzəgə́ á mə́ chî nə́ pə̌gpo ə́ kə měe, pəg fɛ́d ə́wə́ ńgɛn nə́ mbi nə́ nənyi əwəgə́, pó pətsəm ḿbá pəngyě nə́ pɔ́, pó tíʼ ńdzoŋə̂ áwə́g ə́fɛ́lə á mə́m aláʼ ńgɛn ńkoʼə̂ á ntsǒnkǐə aliʼ páʼ pəg nə ńchî nə́ á mə́ lɔg nə́ tə́kɔʼə aŋkənúʼə́ ə́wə́. Pəg kwə́ʼtə əsê ńtíʼ ńchaʼtə́sê ḿbookə̂ ághɔ́b ə́sóŋ ńgə́ ŋwu ntsəmə a chî əshîʼnə. 6Pə̌gpo pookə̂ məmbɨ mə́g pǒ, pəg tíʼ ńkwúnə á tə́kɔʼə aŋkənúʼə́ ńtə́ ńgɛnə̂ pó tíʼ ḿbəənə̂ á məláʼ pó.
7Pəg ghɛn nə́ mbi nə́ nənyi əwəg, ə́fɛ́lə á Tayile ńtíʼ ńtə́əmə á Tolɛma. Pəg fɛ́lə á mə́m tə́kɔʼə aŋkənúʼə́ ńtíʼ ńkɔ́ʼ ńgɛnə̂ á mə́m tɔ̂ŋ ńchaʼtə̂ ngaŋə́zoŋə́ndzəm Yeso ńtíʼ ńchî pə̌gpo nə́ táʼ alěmbîə. 8Mbî fóg, pəg mɛdtə̂ á Tolɛma ńtíʼ ńnyinə̂ á mə́mə aŋkənúʼə́ ńkɔ́ʼ ńkwúnə á Sisalya, əwɨ́ pəg tíʼ ńgɛnə̂ á ndɛ̂ Filipə ŋwu páʼ a kə̈ nyi nə́ ə́sóŋə anuə Əsê, ńtíʼ ńchî pəg po. Filipə a nə ḿbə́ lə́ táʼ ŋwunə á mə́m pɨ pə̂ asaambɛ̂ páʼ pə́ nə ńtsɔ́ʼ nə ághóobə́ á Jɛlusalɛm ńgə́ pó tə́ ńkwáatə ngaŋə́zoŋə́ndzəm Yeso zə́ ntsɔb pɛ̌ lə́. 9Filibə a nə ńtúg pɔ́ pə́ pəngyě pɛ́n nəkwa á ndɛ̂ yí páʼ pó nə ńkě nə́ kə́ zɔ́ʼə pô. Pó kə chî mbɔʼ pó sóŋə anu páʼ á chî nə́ mə́ yǐ nə́ pɔŋə̂ laŋə̂. 10Əghâ ándó pəg nə ńchî nə́ ə́wɨ́ nə́ əlěmbî pətsə́ lə́, táʼ ntûsê yitsə̌ páʼ əlɛ́n yí nə ḿbə́ nə́ Agabus a fɛ́lə á mboʼ Judya ńtsó ńgyǐ ə́wə́. 11A tíʼ ńgyǐəə á mə́ ghá nə́ áwə́gə́, ńkwáalə atwíŋə Pɔl ńdɔg ńkwúd məko mí (mimə́ Agabus) pópə mbô mí əwɨ́ ńtíʼ sóŋ ńgə́, “Ajwǐəsê a sóŋ nə́ maŋ ńgə́, Lɛ̌ ndzaŋ Pəjus pó chî nə́ á Jɛlusalɛm pó yǒ nə́ kwúlə a ŋwu páʼ a túg nə́ atwíŋ zəənə́, ə́ tíʼ ə́fɛ̂ yə́ á mbô Pətəjǐsê.”
12Əghâ pəg nə ńdzóʼ nə́ anu jɨ pə̂gpə pətsə́ ngaŋə́zoŋə́ndzəm Yeso ə́ nə ńchî nə́ aliʼ wə́ póʼmbô nə́ Pɔl ńgə́ kɔ a ghɛnə̂ á Jɛlusalɛmə. 13A kwěe áwə́g ńgə́, “Nə́ ghɛlə̂ lə́ akə̂ lɛ̌? Nə́ kyéŋ lə́ akə̈ ḿbə́ʼtə mbô mə leenə́? Maŋ pí ńgə́ pə́ kě mə lə́ tsɔʼə atsáŋə á Jɛlusalɛm yǐ néŋ pô, pə́ kɔŋ pə́ kə́ ńtû ńjwítə mə ńté Mmaʼmbî Yeso klisto.” 14Ndzaŋə ándó pəg nə ńdzɨ́ nə́ ńgə́ mbɔʼ pəg kě ghɛd Pɔlə a kwúblə ntɨ́ yí pô lə́, ḿmɛdtə̂ ńtíʼ ə́sóŋ ńgə́, “Á chî ndzaŋ páʼ Əsê lɔ nə́.”
15Ndzaŋə ándó əlěmbî əpə́g nə měe nə́ á mə́ chî nə́ Sisalya lə́, pəg tyáŋtə əpú əpə́gə́ á mə́ mɛdtə̂ nə́ ghɛnə̂ á Jɛlusalɛmə. 16Ngaŋə́zoŋə́ndzəm Yeso yitsə̌ á Sisalya ə́ghɛn pə̌gpo á Jɛlusalɛm ńtíʼ ńdɔgə̂ áwə́g ńgɛnə̂ á ndɛ̂ Mnasɔn, aliʼ páʼ pəg nə ńchî nə́ á mə́ chî nə́ ə́wə́. Mnasɔn a nə ḿbə́ lə́ ŋwu Sayiplus páʼ a nə néŋ nə́ ntɨ́ nə́ Yeso ə́fɛ́lə á ngoʼ pəchə́.
Pɔlə a Ghɛnə̂ á mə́ Ghá nə́ Jɛmsə
17Əghâ pəg nə ńkoʼ nə́ á Jɛlusalɛm lə́, pɨ pó néŋ nə́ ntɨ́ nə́ Yeso pó chî nə́ ə́wɨ́ pó lɔgə̂ áwə́g nə́ akɔŋtə. 18Mbî ə́ fóg Pɔlə a ghɛn pə̌gpo á mə́ ghá nə́ Jɛmsə, mətû mə́ nkyeetə tsɔʼə mətsəm mə́ nə́ ńchî ə́wə́. 19Pɔlə a chaʼtə̂ ághɔ́b ńtíʼ ə́fiʼtə̂ anuə atsəm páʼ Əsê a nə faʼ nə́ á mə́m Pətəjǐsê ńdaŋ nə afaʼə ajíə. 20Əghâ ándó mətû mə́ nkyeetə mə́ nə ńdzóʼ nə́ atséebə ándó Pɔlə a tsáb nə́ lə́, pó ghóʼkə Əsê ńtíʼ ə́sóŋ nə́ yí ńgə́, “Ndim əwəg Pɔl, jwə́ʼtə, Pəjus pó chî ə́wɨ́ tə ńkoʼ pətɔsə páʼ pó néŋ nə́ məntɨ́ mɔ́b nə́ Yeso Klisto, ńkə́ ńtə́gə atûə á mə́ zoŋ nə́ məntəgə́ mə́ Mosisə. 21Lə́, pə́ fiʼtə̂ ághɔ́b ńgə́ gho tə́ ńdzéʼkə Pəjus páʼ pó chî nə́ á ndzɔʼ pətəjǐsê, ńdzéʼkə ághɔ́b ńgə́ kɔ pó pɨ ńdzoŋ pənoŋkə pə́ Mosisə, ńkə́ ə́fiʼtə̂ ághɔ́b ńgə́ kɔ pó póʼ pɔ́ póobə́, ńgə́ kɔ pó pɨ ńdzoŋə̂ á mbɔ́ Pəjusə. 22Pɛn yǐ tíʼ ghɛd ə́lɛ́ əghâ nə́, pɨ pə́ pó yǐ shib zóʼ ńgə́ gho yǐəə. 23Lɛ̌ anu pəg lɔ̈ nə́ ńgə́ gho faʼ əghâ nə́. Pɨ pɛ́n nəkwa pó chî ə́wɨ́ páʼ pó wad nə́ əkeenə. 24Tíʼ ńgɛn pɨ̌pə pɨ pəənə́ á tə́kɔʼndɛ̂sê ńtéekə ághɔ́b pɨ po kyeetə̂ ə́sog mbɨ əzɨ ŋ́ŋwaʼə̂ á mbi Əsê, ńtíʼ ńtû ndɛn əpú páʼ pó yǐ nə́ lɔg ə́fyaʼə́nu ə́wə́ á mbô pó, ńjî ńgə́ pó kɔ́ ətû póobə́. Á yǐ ghɛd ŋwu ntsəm a jî ńgə́ mənu pə́ zóʼ nə́ ńté gho lə́ ntsəələ, pó kə́ ńjî ńgə́ gho tə́ ńdzoŋə̂ pənoŋkə pə́ Mosisə. 25Nə́ anu ńté Pətəjǐsê, páʼ pó néŋ nə́ ntɨ́ nə́ Yeso pəg ŋwaʼlə̂ aŋwaʼlə ńtúmə á mbô pó ə́fiʼtə̂ ághɔ́b ńgə́ kɔ pó jî məjî páʼ pə́ lɔg nə́ ə́fyaʼ məsê mə́ məfɨgə ə́wə́, ńgə́ kɔ pó jîə achǐə, kɨ na ntsəm páʼ pə́ kě nə́ ndě əyí sə́ pô ńgə́ kɔ pó tə́ ńdzɔ́ʼnə mbǒʼḿbóʼə́.”
26Pɔlə a tíʼ ńdɔg pɨ pə̂ nəkwa, mbî ə́ fóg pó po ghɛn ə́faʼə̂ anu pə́ nə náŋkə nə́ á mbô pó á mə́ sog nə́ mbɨ əzɔb ə́ ŋwaʼ lə́. A tíʼ ńgɛnə̂ á Tə́kɔʼndɛ̂sê á mə́ ghɛd nə́ ngaŋə́pêsê ə́ jîə alě ándó məsog nə́ məmbɨ mɔ́b mə́ yǐ nə́ měe. Pó tíʼ ńgɛlə̂ afyaʼə́nu ńté ŋwu ntsəm á mə́m pó.
Pə́ Waamə̂ Pɔlə á Tə́kɔʼndɛ̂sê
27Ndzaŋə ándó əlěmbî asaambɛ̂ nə́ ndɛlə́ asogə́mbɨ əzɔb ə́ nə́ ńtíʼ nə́ měe lə́, Pəjus pətsə́ á mboʼ Esya zə́ənə Pɔlə á Tə́kɔʼndɛ̂sê, ńtíʼ ńtóotə mboŋ pɨ ə́ nə ńchî nə́ aliʼ yi wɨ́ pó waamə̂ Pɔlə, 28ńtíʼ ńkyéŋ nə́ pətə́kɔʼ pə́ ngye ə́sóŋ ńgə́, “Pɨ pə́ Islɛl, kwá nə́ áwə́gə́! Lɛ̌ ŋwu páʼ ä zéʼkə nə́ pəənə aliʼə́ atsəm nə́ mənu mə́ təpɔŋ ńté pɨ pɛnə̂, mənu mə́ təpɔŋ ńté pənoŋkə ńkə́ ńté Tə́kɔʼndɛ̂sê! A ghɛd lɛ tə ńtíʼ ńdɔg pɨ pə́ Glik ńgyǐ nə́ pó á Tə́kɔʼndɛ̂sê pó yǐ ńtadkə̂ aliʼ yə́ ŋwaʼ nə́ zəənə́!” 29(Pó sóŋ ə́lɨ́d lə́ ńté ńgə́ pó nə ńdzə́ənə Təlofimus ŋwu Ɛfesus pó Pɔl á mə́m tə́kɔʼ tɔ̂ŋ ńkə́ ńtíʼ ńkwaŋ ńgə́ Pɔlə a nə ńdɔgə̂ yí ńkwúnə á Tə́kɔʼndɛ̂sê).
30Pə́ nə ńgɛlə̂ aláʼə atsəmə a záŋ ndě ńté Pɔl, ńtíʼ ə́fɛ́d ńtsɛntə̂ táʼə aliʼ ńgwaamə̂ Pɔl ńtíʼ ə́soŋə̂ yí ə́fógə á mə́m Tə́kɔʼndɛ̂sê. Tsɔʼə əghâ yi ə́wɨ́ məntso məndɛ̂ á Tə́kɔʼndɛ̂sê pə́ wuʼtə̂ mə́ələ́. 31Pɨ pə̂ pó tə́ ńdoonə̂ á mə́ jwítə nə́ Pɔlə, lə́ pə́ nə ńtú nkəənə á mbô nətû nə́ ngaŋə́maʼə́ntsoolə á Lom ńgə́ pɨ pə́ Jɛlusalɛm tsɔʼə pətsəm pó chîə á mə́mə ajwaʼlə. 32Tsɔʼə əghâ yi wɨ́ nətû nə́ ngaŋə́maʼə́ntso nə́ lɔg ngaŋə́maʼə́ntso yitsə̌ pópə mətû mɔ́b ńtíʼ ńkə ńgɛnə̂ aliʼə́ ándó ajwaʼlə nə ńchî nə ə́wɨ́ lə́. Əghâ ándó pɨ pə́ pó nə ńdzɨ́ nə́ yí pópə ngaŋə́maʼə́ntso lə́, ḿmɛdtə̂ á mə́ póʼ nə́ Pɔlə. 33Lə́ nətû zɔ́b nə́ ghɛn ńgwaamə̂ a Pɔlə ńtíʼ sóŋ ńgə́ pə kwúlə yí nə́ məŋkɛd mə́ atəənə́ mɛ́n mbɛ̌. Nətû zə́ nə́ tíʼ ḿbítə ńgə́, ŋwu ghɛn lə́ əwə, anuə təpɔŋ ándó páʼ a ghɛd nə́ lə akə̂? 34Pɨ pətsə́ á mə́m apoŋə pɨ zə̂ á yɛ́ɛlə ə́sóŋə táʼ anuə, pətsə́ pə́ kə́ ńgyɛ́ɛlə azɔ́b ə́sóŋə á yə ndaʼə. Əliʼ jwaʼlə̂ lɛ tə nətû nə́ ngaŋə́maʼə́ntso nə́ kě chî tə mbɔʼ nə́ jîə anu páʼ á laŋ nə́ pô, ńtíʼ ńgɛd ngaŋə́maʼə́ntso lɔgə̂ yí ńgɛnə̂ aliʼ páʼ ngaŋə́maʼə́ntso nə ńchî nə́ ə́wə́. 35Əghâ ándó pó nə ńkoʼ nə́ aliʼ páʼ pə́ pɔ́ nə́ ńkɔ́ʼə ə́wɨ́ ḿbɔŋə̂ kwúnə á ngyaʼə́ ngaŋə́maʼə́ntso lə́, pó twáamə Pɔl ńté ńgə́ pɨ pə́ nə ńtə́ ńdoonə̂ á mə́ kwá nə́ yə́ á mbô pó nə́ mətəənə. 36Apoŋə pɨ zə̂ nə ńtə́ ńdzoŋə̂ Pɔlə ńjwáglə ə́sóŋə ńgə́, “Pə́ jwítə yə́, pə́ jwítə yə́!”
Ndzaŋə Ándó Pɔlə a nə Ńtsáb nə́ á mə́ Kwá nə́ Atûə Ajíə
37Ndzaŋə ándó ngaŋə́maʼə́ntso nə ńtə́ nə́ ńdoonə̂ á mə́ kwúnkə nə́ Pɔlə á ngyaʼə́ pó lə́, a sóŋə á mbô nətû zɔ́b nə́ atséebə Glik ńgə́ “Mbɔʼ maŋ sóŋə anu yətsə́ á mbô gho?”
Nətû zɔ́b nə́ pítə yí ńgə́, “Lə́ pə́ ńgə́ gho tséebə atséebə Glik?” 38Lə́ pə́ ńgə́ gho kě lə́ ŋwu Ijib wə̂, páʼ a nə ḿbə́ á ndɛd yitsə̌, gho fɛ̂ ngə́ʼ, tə ńtíʼ ńdɔg pəməkizâ tɔsə nəkwa pó pěʼ əpú ntso gho lɔgə̂ ághɔ́b ńgɛnə̂ a kɔŋ məŋkwâʼlə̌ lə?
39Pɔlə a kwěe yí ńgə́, “Maŋ lə́ ŋwu Jusə, pə́ pî mə lə́ á tɔ̂ŋ Tasusə á mə́m mboʼ Silisya. Maŋ lə́ ŋwunə aláʼə nə́, ə́fɛ́lə á mə́m chigə tɔ́ŋə. Maŋ póʼmbô, tíʼ maŋ tséebə á mbô pɨ pəənə́.”
40Nətû nə́ ngaŋə́maʼə́ntso nə́ ghɛd ńgə́ Pɔlə a tséebə, Pɔlə á tíʼ ńtə́əmə á ntsǒndɛ̂ ńdɔgə̂ apô əjí ńgɛd ńgə́ ŋwu ntsəmə a naʼə̂. Ndzaŋ pó nə́ naʼ nə́ lə́, a atséebə á mbô pó nə atséebə pɨ pə́ Islɛl.
Currently Selected:
Məfaʼə 21: azo
Highlight
Share
Copy
Want to have your highlights saved across all your devices? Sign up or sign in
