Məfaʼə 19
19
Pɔlə a Náŋkə Nkɨ yi Əshîʼnə Ńté Yeso á Ɛfesusə
1Ndzaŋə ándó Apolosə a nə ńchî nə́ Kolin lə́, Pɔlə á laŋ ńtóokə mboʼ məkɔʼnə́ ńgɛnə̂ Ɛfesus ńjɨ́ ngaŋə́zoŋə́ndzəm Yeso yitsə̌ wɨ́ 2ḿbítə ághɔ́b ńgə́, “Əghâ pɨ kə néŋ nə́ ntɨ́ nə́ Əsê lə́, pɨ kə kwáalə Ajwǐəsě?”
Pó kwěe yí ńgə́, “Ngá, pəg kě kə̂ láʼə zóʼə ńgə́ Ajwǐəsê a chî ə́wɨ́ pô.”
3A pɨ ḿbítə ághɔ́b ńgə́, Lə́ kə pə́ zə́ənə́ mbô akwáalə́nkǐ pɨ kə kwá nə́?
Pó kwěe yí ńgə́, “Lə́ kə pə́ akwáalə́nkǐə Jɔnə?”
4Pɔlə á sóŋ ńgə́, “Akwáalə́nkǐə Jɔnə á kə chî lə́ á mbô pɨ páʼ pó kwúblə nə́ ə́fɛ́lə á mə́m pətəpɔŋ póobə̈; ə́fiʼtə̂ pɨ pə́ Islɛlə ńgə́ pó néŋ ntɨ́ əghɔ́b nə́ ŋwu páʼ á yǐ nə́ yǐəə á ndzəm yə́ á pə́ nə́ Yeso.” 5Əghâ ándó pó nə ńdzóʼ nə́ atsáb páʼ Pɔlə a tsáb nə́ lə́, ńtíʼ ńkwá nkǐ nə́ əlɛ́n Mmaʼmbî Yeso. 6Pɔlə á tíʼ noŋkə̂ mbô míə atû pó, Ajwǐəsê a yǐəə á mbɨ pó, pó tíʼ ńchúʼə á mə́ tsáb nə́ ətsáb pəfîə̈, ńnáŋkə nkɨ Əsê páʼ pó zóʼ nə́. 7Pó pətsəm kə pə́ lə́ ándó ntsɔb pɛ̌.
8Pɔlə a nə ńdɔg sáŋ zɛ́n teelə̈ ńgɛnə̂ á ndɛ̂sê Pəjus ńtséebə tsɔʼə tə pɔ́gə ŋwu tsə̌, ńkəʼlə̂ atsáb pó po ńdegtə̂ ághɔ́b ə́fiʼtə̂ anu ńté anuə nəfoonə Əsê; 9lə́ ndzaŋə ándó pɨ pətsɨ́ pó kə tyantə̂ nə́ atû ńkǐə ághóobə́ á mə néŋ nə́ ntɨ́ nə́ atsáb zɨ lə́, ḿbɨ́ ńtséebə pə́ ətsáb təpɔŋə á ndzɔʼ nkyeetə ntsəm ńté Alaŋə́ ndúmə Mmaʼmbî#19.9 Ntê nchîmbî páʼ Mmaʼmbîə á lɔ nə́. lə́, Pɔlə á lɔg ngaŋə́zoŋə́ndzəm Yeso pó po fɛ́lə ághóobə́ á ndzɔʼ pó, ńtíʼə ńkəʼlə̂ atsáb əlětsəmə á mə́m ndɛ̂ ndzeʼkə́ Tayilanusə. 10Zəənə́ á kə ghɛn nə́ mbi tə ńkoʼ ngoʼ pɛ̌, tə pɨ pətsəm pə́ chî nə́ Esya, Pəjus pópə Pətəjǐsê pó zóʼə atséebə Mmaʼmbîə.
Pɔ́ pə́ Seba Pipə́ Mbyâŋnə
11Ńdaŋə̂ á ndzəm Pɔl Əsê á ghɛd əkɨʼnəmə́nu páʼ ŋwunə a kě nə́ kə zə́ənə pô, 12tsɔʼə əpú ətsəʼ Pɔlə ä shíg nə́ alɛ̌dnə wɨ́ pópə ətsəʼə́ afaʼ pí, pɨ pə́ lɔg ńgɛn ńtéekə pəghɔ pɔ́b ə́wɨ́, məghɔ mɔ́b mə́ féŋtə, əjwi təpɔŋ kə́ ə́fɛ́dkə á mbɨ pó. 13Pɨ pə́ Jusə pətsə́ pó nə ńchî ə́wɨ́ páʼ pó nyi nə́ əliʼ əliʼ ə́fóg əjwi təpɔŋə, pó nə ńkə́ ńtə́ moomə̂ á mə́ lɔg nə́ əlɛ́n Mmaʼmbî Yeso ə́fógə pɨ́d wə́. Ńtíʼə ə́sóŋə nə́ əjwi təpɔŋ pəwɨ́ ńgə́, “Maŋ sóŋə á mbô pɨ nə́ əlɛ́n Yeso páʼ Pɔlə á náŋkə nə́ nkɨ yí lə́, ńgə́ nə́ fɛ́lə.” 14Pɔ́pə́mɛ́ pipə́ mbyâŋnə pətsɨ́ pɛ́nə asaambɛ̂, pó kə pə́ nə́ pɔ́ pə́ ŋwu Jusə yitsə́, á kə pə́ nə́ ají Mbêsê yi Ngweŋ pə́ fóŋə yí nə́ Seba, pó nə ńkə́ faʼə̂ ə́lə́ələ́. 15Ajwiə təpɔŋ zə̂ á kwěe ághɔ́b ńgə́, “Maŋ jîə Yeso ńkə́ ńjîə Pɔlə, pəənə́ azɨ́ lə́ ḿbə́ akə̂?” 16Ŋwu páʼ ajwiə təpɔŋ zə̂ á nə ńchî nə́ á mbɨ yí lə́ á wǔəə á ndu pó ńchúʼə ághɔ́b nə́ məlaʼ, ḿbóʼə ághɔ́b pətsəm, pó kə ə́fɛ́dkə ndɛ̂ wə́ ntə̌blə nə́ məfəŋə́ á mbɨ pó. 17Ŋwu ntsəmə a kə chî nə́ á Efesusə, Pəjus pópə Pətəjǐsê pó kə zóʼə anu zəənə́, ŋwu ntsəmə a tíʼ ńdwɛ́nkə nə́ apɔ́gə, pɨ pə́ tíʼ fɛ̂ tə́kɔʼ ngóʼkə nə́ Mmaʼmbî Yeso. 18Pɨ pipə nɨ́ nə́ páʼ pó kə néŋ nə́ ntɨ́ nə́ Əsê, pó fɛ́lə əshîsaŋ ḿbímə ńkə́ ə́fiʼtə̂ pətəpɔŋ póobə́. 19Pɨ pipə nɨ́ nə́ páʼ pó nə ḿbə́ nə́ ngaŋnə́kaŋ, pó kə tsɛntə̂ əŋwaʼlə nəkaŋ pɔ́b ətsəm táʼə aliʼ ńtoonə̂ á əshîsaŋə. Əŋwaʼlə pə́ kə tɔ nə́ mbɔʼ pə́ kə tsɛntə̂ pɨ́d ə́fi pɨ́d pə́ nkéebə atəənə́ Sɛləba tɔsə məghə́m mɛ́n tênə.#19.19 Táʼ nkéebə atəənə́ Sɛləba mɔʼə́ kə pə́ lə́ nkáb táʼə alěmbîə afaʼə. 20Ńdaŋ ə́lɨ́d atséebə Mmaʼmbîə á ghɛn nə́ mbiə á mə́ nyi nə́ ə́ kə́ kwéŋ tyantə̂.
Məlaʼə́ á Mə́m Ɛfesusə
21Ndzaŋə ándó mənu mɨ mə́ kə laŋ nə́ lə́, Ajwǐəsê á néŋə akwaŋə á ntɨ́ Pɔlə ńgə́ á laŋə̂ á mə́m Masedonya pó Akaya ńtíʼ ńkoʼə̂ á Jɛlusalɛmə. Pɔlə a tíʼ ə́sóŋ ńgə́, “Əghâ páʼ maŋ yǐ nə́ ghɛn kwú wɨ́ lə́, ə́shib ghɛn ghéenə á Lomə.” 22A tíʼ ńtúmə Timoti pó Ɛlastusə, pó pɛ́n pɛ̌ pó kə kwá nə́ yí lə́ ńgə́ pó ghɛnə̂ Masedonya, ḿbɨ́ ńtíʼ nyáʼ ńchîə á Esya nə́ akəmə ndɛd yitsə̌. 23Nə́ ndɛd zɨ́d zɨ tə́kɔʼ ngə́ʼə á nə́ ńchîə aláʼə Ɛfesus ńté alaŋə́ ndúmə Mmaʼmbîə. 24Ŋwu tsə̌ a nə ńchî ə́wɨ́ páʼ əlɛ́n yí nə ḿbə́ nə́ Demetəlosə, á pə́ ntwîəleemə. A kə lɔgə̂ atəənə́ Sɛləba ńtwî məndɛ̂ mə́ əsêməngyě yitsə̌ wɨ́ pə́ fóŋə yí nə́ Atemisə. Afaʼə ajíə á nə ḿbyádnə ə́fɛ̂ ape á mbô pɨ pó po kə faʼ nə́. 25Demetəlosə a tíʼ ə́fóŋə ághɔ́b táʼə aliʼ ńdzoŋ ḿbá pətsɨ́ pɨ pó kə faʼ nə́ afaʼ yə wɨ́, ńtíʼ ə́sóŋ nə́ pó ńgə́, “Pəshu, nə́ jî ńgə́ pɛn kə pyádnə ńkwá nkáb nə́ atûə afaʼ zəənə́. 26Pɨ pɛn ńdzɨ́ ńkə́ ńdzóʼə anu páʼ ŋwu ghɛn pə́ fóŋ nə́ nə́ Pɔlə lə́ á ghɛd nə́. A sɛdkə̂ məntɨ́ mə́ ŋwu ntsəm ə́sóŋ ńgə́, Məsê páʼ lə́ tsoŋkə̂ nə́ ŋwu lə́ kě məsê mətsə́ pô, a sɛdkə̂ pɨ pipə nɨ́ pó pí ńdzoŋ ndzəm əjǐə á mə́mə aláʼə Ɛfesusə. A kě lɛ lə́ tsɔʼə Ɛfesus faʼ pô a kə́ faʼə̂ Esya tsɔʼə ntsəmə. 27Mbɔʼ pɛn chî ndɛd lɔg pó məta əwɛn ghɛnə́ á yǐ ńkwá əlɛ́n təpɔŋə. Lə́ kě tsɔʼə ə́lɨ́d pô, lə́ kə́ ḿbə́ ńgə́ mbɔʼ ndɛ̂ tə́kɔʼ əsêməngyě Atemis yǐ ńkě atûə anu yitsə̌ pɨ ńchî pô, nəfɔ jí nə́ kə́ měe yə́. Lə́ pə́ ḿbə́ əsê páʼ ŋwu ntsəmə á ghóʼkə nə́ á mə́m Esya ńdzoŋ ḿbá mbî ntsəm wə́.”
28Ndzaŋə ándó apoŋə pɨ zə̂ á kə zóʼ nə́ atsáb zɨ lə́, məntɨ́ mɔ́b mə́ lum pó chúʼə á mə́ tsáb nə́ məngye mɔ́b mə́ kɔ́ʼə atǐə̈, ə́sóŋə ńgə́, “Atemis páʼə á chî nə́ á mə́m Ɛfesusə á gháʼ ńgɛn nə́ mbiə!” 29Ajwaʼlə yəwə́ á kə nyinə̂ á mə́m tɔ̂ŋ Ɛfesus tsɔʼə ntsəmə. Apoŋə pɨ yəwə́ á waamə̂ Gayɔs pó Alistakus, pɨ pə́ Masedonya pɛ́n pɛ̌ páʼ pópə Pɔ̈l nyi nə́ ńdɔgə̂ ághɔ́b ńkə́ ńgɛn nə́ pó aliʼ páʼ pɨ pə́ tɔ̂ŋ pó kyeetə̂ nə́ ə́wə́. 30Pɔlə nə́ nkɔ̌ʼmbɨ əyə́ a kə tə́ ńdoonə̂ á mə́ ghɛn nə́ á mbiə apoŋə pɨ zəənə́, lə́ ngaŋə́zoŋə́ndzəm Yeso pə́ ńkě pí ńgə́ á ghɛn ə́wɨ́ pô; 31Tsɔʼə mətsɨ́ mətû mə́ aláʼ páʼ pó kə pə́ nə́ ngaŋə́ko Pɔl, pó kə́ ńtú nkɨ ḿbóʼmbô ə́sóŋ nə́ yí ńgə́ kɔ á fiʼə̂ á mə́ ghɛn nə́. 32Ndzaŋ pó kə kyeetə̂ nə́ táʼə aliʼ lə́ ńchîə á mə́mə ajwaʼlə, pətsɨ́ pɨ pó tə ńjwáglə ə́sóŋə azóobə́ anu pətsɨ́ pə́ kə́ ńtə́ ńjwáglə ə́sóŋə azóobə́, ńté ńgə́ pó pipə nɨ́ nə́ kə kě jîə pə́ anu pə́ kə kyeetə̂ nə́ ághɔ́b ńté pô. 33Pətsɨ́ pɨ pó kə kwaŋə̂ azɔ́b ńgə́ lə́ jî Alezanda ńjîə anu pə́ tsɛntə̂ nə́ ághɔ́b ńté, ńté ńgə́ Pəjus pó kə tsɛɛkə̂ yə́ á mbi ńgə́ a fiʼtə̂ anu pə́ tsɛntə̂ nə́ ńté. Alezanda á tíʼ ńjíʼtə ághɔ́b nə́ apô ají ńgə́ pó naʼə̂, ńtíʼ ńdoonə̂ á mə́ twágtə nə́ anu yəwə́ á mbô pó. 34Əghâ ándó pó kə leŋ nə́ ńgə́ lə́ ŋwu Jusə lə́, ńtíʼ ńchúʼə á mə́ tsáb nə́ ngye əzɔb kɔ́ʼə atǐ nə́ əkəmtə pəmə́nu zɛ́n pɛ̌ ḿbégnə táʼə anu ə́sóŋə ńgə́: “Atɛmisə páʼə á chî nə́ Ɛfesus lə́ tə́kɔʼ əsê!”
35Tə əŋwaʼlə aŋwaʼlə tɔ̂ŋ yi wə́ a yǐ ńgɛd ŋwu ntsəmə á naʼə̂, a tíʼ ə́sóŋ ńgə́, “Pɨ pə́ Ɛfesus, lə́ əwə a kě nə́ jî ńgə́ lə́ tɔ̂ŋ pɨ pə́ Ɛfesus páʼ á lɔʼkə̂ nə́ ndɛ̂ tə́kɔʼ əsê Atemisə ḿbɨ́ ḿbə́ nə́ mɔ́ pəkɔ́ ngɔʼ páʼ á kə lǒo nə́ nəpó ńgwǔ lə́? 36Mbɔʼ ŋwu tsə̌ á kě mənu mɨ kǐ pô. Lə́ pə́ ńgə́ nə́ tsóokə məntɨ́ mɨ́, ńkɔ ghɛlə̂ akəkógə́ anu yitsə̌. 37Pɨ wam nə́ pɨ pɨ ńgyǐ nə́ pó aliʼ ghɛnə́, páʼ pó pǎ nə́ tə ńkě ajûtsə́ á mə́m məndɛ̂ mə́ Əsê zɔ pô, ńkě atséebə təpɔŋ yitsə̌ kə́ ńtsáb ńté əsê məngyě əzɛn pô. 38Mbɔʼ Dɛmətiosə pópə ngaŋə́faʼ əjí túgə azɔŋ pópə pɨ pətsɨ́, ḿbə́ aliʼə́sáʼə́məsáʼə á chî ə́wə́, ngaŋə́sáʼə́məsáʼə kə́ ńchî ə́wə́, mbɔʼ pó lɔgə̂ ághɔ́b ə́wə́. 39Lə́ mbɔʼ anuə ndaʼ yitsə̌ á pɨ ńchî ə́wɨ́ pə́ yǐ ńnáŋə zə́ələ́ á nkyeetə pə̈ náanə nə́ ə́wɨ́ ńnáŋə mənuə, 40ńté ńgə́ mbɔʼ pɨ pə́ filə̂ áwɛ̂n ńgə́ pɛ̈n tə́ ńgyǐəə nə́ ajwaʼlə ńdzoŋ nə́ anu páʼ á laŋ nə́ ə́sɛ̂n lə́. Anu yitsə̌ á kě wɨ́ chî mbɔʼ pɛn lɔg ńtɔ́mtə atséebə azɛ̂n wɨ́ nə́ ajwaʼlə zɨ pɛn maʼ nə́ lɛ̌ pô, ńkě kə́ ńchî mbɔʼ pɛn fiʼtə̂ chigə nətɛ́n nə́ anu yi nə́ wɨ́ pô.” 41A sóŋ ə́lɨ́d lə́, ńtíʼ ə́shamkə̂ nkyeetə zə̂.
Currently Selected:
Məfaʼə 19: azo
Highlight
Share
Copy
Want to have your highlights saved across all your devices? Sign up or sign in
