Məfaʼə 18

Pɔlə a Sóŋə Anǔəsê á Kɔlinə

1Pɔlə a fɛ́lə Atɛns ńtíʼ ńgɛnə̂ á Kɔlinə. 2A kə zə́ənə ŋwu Jus yitsə̌ ə́wɨ́ pə́ fóŋə yí nə́ Akwila, pə́ pî nə yə́ á Pontusə. Akwila a kə lǒo lə́ Itali pó ngwě əyǐ Plisila ńgyǐəə á mə́m əlě pi wə́, ńté ńgə́ Klodiɔsə á pə́ nə́ Əfo Loman lə́ a kə sóŋ ńgə́ pɨ pə́ Jus pətsəm po fɛ́lə aláʼə Lomə. Pɔlə a tíʼ ńgɛnə̂ á mə́ zɨ́ nə́ ághóobə́. 3Apô afaʼə azóobə́ kə pə́ lə́ táʼə, ḿbə́ mə tsoŋkə̂ nə́ əpǎgtsəʼ pə́ ghɛd nə́ məntaŋ wə́, a tíʼ ńchî pó po ńkyeetə̂ ə́faʼə̂. 4Pɔlə a kə kəʼlə̂ atséebə á ndɛ̂sê Pəjus á mə́m əlěláʼsê ətsəm pópə Pəjus ḿbɨ́ ḿbə́ nə́ Pətəjǐsê. Pɔlə a kə ghɛd pó néŋ ntɨ́ nə́ atséebə ajíə.

5Əghâ ándó Silas pó Timoti kə lǒo nə́ Masedonya ḿbɨ́ lə́, Pɔlə á mɛdtə̂ anuə atsəm ńtíʼ ə́fɛ̂ ndɛd əji nə́ afaʼə mə́ sóŋ nə́ anuə Əsë, ńtyáatə ńnəələ̂ Pəjus ńgə́ Yeso lə́ Yi Ńtsəʼ nə́ wə́. 6Ndzaŋ Pəjus pó nə ńkǐ nə́ anu páʼ Pɔlə a sóŋ nə́ ńtíʼ ńdzɔmtə̂ yí lə́, a kɔdtə̂ akəpóglə́ á atsəʼ yí ə́sóŋ nə́ pó ńgə́, “Achǐə azə́ənə́ á tə́əmə atû pəənə́, maŋ kě anu yitsə̌ jî pô. Ə́fɛ́d nə́ pə́ əghâ nə́, maŋ yǐ ghɛn ə́sóŋə anǔəsê lə́ á mbô Pətəjǐsê.” 7Pɔlə a ə́fɛ́d ńgɛnə̂ á ndɛ̂ ŋwu tsə́ pə́ nə fóŋ nə́ ńgə́ Titiyus Justus; páʼ á kə̈ ghóʼkə nə́ Əsê, a kə chî ḿbáatə ndɛ̂sê Pəjusə. 8Ŋwu páʼ pə́ nə fóŋ nə́ nə Kəlipus lə́ a nə ḿbə́ lə́ nətû nə́ ndɛ̂sê Pəjusə, a nə ńnéŋ ntɨ́ yí nə́ Mmaʼmbî ńdzoŋ ḿbá ngwud əjǐ ntsəmə. Pɨ pə́ Kolintyan pipə nɨ́ nə́ pó nə́ ńdzóʼə atséebə Pɔlə lə́, ńnéŋ ntɨ́ əghɔb nə́ atséebə ají pə́ tíʼ əfɛ̂ nkǐ nə́ pó.

9Táʼ nətúʼ yitsə̌ Mmaʼmbîə á sóŋə á mbô Pɔlə á mə́m ndzəəmə atəəmə́tɨ́ ńgə́, “Kɔ gho pɔ́gə anu yətsə́, ghɛn nə́ nə́ mbiə á mə́ fiʼtə̂ nə́ pɨ nə́ atsáb ńté mə, kɔ gho naʼ nə́ ntso gho. 10Maŋ chî pɔ̌, mbɔʼ ŋwu tsə̌ á kě anu nə́ gho ghɛd pô. Maŋ túg pɨ pipə nɨ́ nə́ á mə́m tə́kɔʼ tɔ̂ŋ ghɛn páʼ pó pə́ nə́ pəənə mə.” 11Pɔlə a tíʼ ńchîə á Kolin nə́ táʼ ngoʼ nə́ akəmə̈, ńdzéʼkə anuə Əsê á mə́m pó.

12Əghâ ándó Galio a kə pə́ nə́ nətû nə́ Akaya lə́, mətû mə́ Pəjus mətsə́ mə́ tíʼ nkyeetə ńkéelə Pɔl ńdɔgə̂ yí ńgɛnə̂ á mbi ngaŋə́sáʼə́məsáʼ ə́sóŋ ńgə́, 13“Ŋwu nə́ a tə́ ńdzéʼkə pɨ ńgə́ pó ghóʼkə Əsê nə́ ndú páʼ noŋkə əwɛ̂nə á kě nə́ pí pô.” 14Əghâ ándó Pɔlə a nə ńtə́ nə́ ńdoonə̂ á mə́ tsáb nə́ lə́, Galio a sóŋ nə́ Pəjusə ńgə́, “Jwə́ʼtə nə́, mbɔʼ ŋwu nə́ a pěʼ ńgɛlə̂ anuə təpɔŋ kɨ ńgwǔ chigə mɛ́ anuə, tə ḿbə́ maŋ pěʼ ńjwə́ʼtə anu pɨ sóŋ nə́. 15Lə́ ndzaŋ nə́ zɔŋ nə́ ńté tsɔʼə atsáb pópə məlɛ́n ńkə́ ḿbá mənu mə́ chî nə́ ńté pənoŋkə pɨ́ Pəjusə lə́, sáʼ nə́ əsáʼ əyí ə́wə́ á ngǎ pəənə́. Maŋ kǐə á mə́ sáʼ nə́ mbô əsáʼ ghɛnə́.” 16Ndzaŋ Galio a nə sóŋ nə́ ə́lɨ́d lə́, ńtíʼ ńkəmə̂ ághóobə́ aliʼə́sáʼə́məsáʼə. 17Pó tíʼ ńgwaamə̂ Sostenes páʼ a pə́ nə́ nətû nə́ ndɛ̂sê Pəjus ńtíʼ ə́shúmə yə́ á mbi aliʼə́sáʼə́məsáʼə. Galio a nə ńkě ndɛd túg nə́ anu pó faʼ nə́ pô.

Pɔlə á Pəənə̂ Antiokə

18Ndzaŋə ándó Pɔlə a nə́ ńchî nə́ nə́ əlě pətsə́ pópə pəlimə́ á mə́m Yeso páʼ pó chî nə́ Kolin lə́, Pɔlə a tíʼ ḿbookə̂ ághɔ́b ńnyinə̂ á mə́m nkǐ ńgɛnə̂ Siliya pópə Akwila nə́ Plisila. Pɔlə a kə tə́ ńdoonə̂ mə́ fɛ́d nə́ lə́ ńkóomə atûə ajíə Senklea ńté ńgə́ a kə ghɛlə̂ atyǎntə ndaʼnə á mbô Əsê. 19Əghâ páʼ pó nə ńgyǐ nə́ ńkwúnə Ɛfesus lə́ á tíʼ ḿmɛdtə̂ Plisila pó Akwila wə́, ńtíʼ ńgɛn ńkwúnə á ndɛ̂sê Pəjus pópə Pəjus tíʼə ńkəʼlə̂ atséebə. 20Pó tíʼ ə́sóŋə á mbô Pɔlə ńgə́ a nyáʼ ńchî pó po, a pə́ ńkǐəə yə́. 21A kə pookə̂ ághɔ́b lə́ ə́sóŋ ńgə́, “Maŋ yǐ pɨ pəənə̂, páʼ mbɔʼ Əsê á pímə,” Ńtíʼ ḿmɛdtə̂ ághɔ́b ńnyinə̂ á mə́m nkǐ ńgɛnə̂ yə́ á Ɛfesusə. 22Əghâ ándó a nə ńkoʼ nə́ á Kasalya lə́, ńgɛn ńchaʼtə̂ nkyeetə pɔ́ pə́ Əsê, ńtíʼ ńtsó ńgɛnə̂ á Antiokə.

23A kə chîə á Antiok nə́ akəmə ndɛd yitsə̌ lə́, ə́fɛ́d ńgɛn ńgá əliʼ pipə nɨ́ nə́ á mə́m Galatya pó Flagya. A nə ńkwá ngaŋə́zoŋə́ndzəm Yeso á mə́m əliʼ pə wɨ̈ ńgɛlə̂ ńgə́ pó tyantə̂ á mə́m mbimə́ əzoobə́.

Apolosə á Chîə á Efesusə

24Nə́ ndɛd zɨ́d zə̂, ŋwu Jusə yitsə̌ páʼ əlɛ́n yí nə ḿbə́ nə́ Apolos, páʼ a kə fɛ́d nə́ Alekzanda a yǐəə Efesusə. A nə ḿbə́ lə́ ŋwu ḿbyádnə ńjîə atsáb ńkə́ ńjîə anǔəsê əshîʼnə. 25Pə́ kə kwíŋkə yə́ á mə́mə alaŋə́ndúmə Mmaʼmbîə, á kə́ ńtyantə̂ á mə́mə anu yəwə́. A kə tɔnə̂ á ntɨ́ yí lə́ ándó mógə́. A kə pǎtə ńjîə yí tsɔʼə mənu páʼ Jɔnə a kə zéʼkə nə́ ńté akwáalə́nkǐ lə́, ḿbə̈ ńdzéʼkə pɨ nə́ mənu ńté Yeso nə́ ndú páʼ wɨ́d koʼnə̂ nə́. 26Apolosə á chúʼə á mə́ tsáb nə́ á ndɛ̂sê Pəjusə tsɔʼə tə pɔ́gə ŋwu tsə̌. Lə́ əghâ ándó Plisila pó Akwila kə zóʼ nə́ ndzaŋ páʼ ä tsáb nə́ lə́, ńdɔgə̂ yí ńgɛnə̂ á ngyaʼə́ pó ḿbɨ ḿbyádnə ńdzéʼkə yí nə́ anu ńté alaŋə́ndúmə Əsê.

27A nə ḿbə́ ndɛd páʼ Apolosə á kə tə́ nə́ ńdoonə̂ mə́ ghɛn nə́ Akaya lə́, ngaŋə́zoŋə́ndzəm Yeso páʼ pó kə chî nə́ Ɛfesus pó ŋwaʼlə̂ aŋwaʼlə ə́fɛ̂ á mbô pǐə ándó pó chî nə́ Akayä ə́fiʼtə̂ ághɔ́b ńgə́ pó túgə Apolosə əshîʼnə. Ndzaŋə Apolosə a kə ghɛn nə́ tə ńkoʼ lə́ ḿbyádnə ńkwáalə ŋwu ntsəmə ándó a kə néŋ nə́ ntɨ́ əyí nə́ Mmaʼmbî Yeso ńdaŋə̂ á mə́mə apɔŋə́ntə́əmə Əsê a kə fɛ̂ nə́ nə́ pɛn kətaŋə. 28Pópə Pəjus kə chîə á mə́m tə́kɔʼ azɔŋə, a lɔgə̂ aŋwaʼlə Əsê ńtyáatə ə́fiʼtə̂ ághóobə́ á əshîsaŋ ńgə́ Yeso lə́ yi páʼ Əsê a kə Tsəʼ nə́ lə́.

Currently Selected:

Məfaʼə 18: azo

Highlight

Copy