Məfaʼə 14
14
Pɔl pó Banabasə Aláʼə Ikonumə
1Anuə á kə lɔg nə́ aliʼə́ á Antiok lə́ zə́ələ́ á kə kə́ nə́ ńdɔgə̂ aliʼə́ Ikonumə: Pɔl pó Banabas kə ghɛnə̂ á ndɛ̂sê Pəjus ńtsáb nə́ əsêndú páʼ Pəjus pópə Pətəjǐsê pipə nɨ́ nə́ pó kə néŋ nə́ ntɨ́ əghɔ́b nə́ Əsê. 2Lə́ Pəjus páʼ pó nə́ ńkě nə́ ntɨ́ əghɔ́b nə́ Əsê néŋ pô pó nə ńtóotə Pətəjǐsê ńgə́ ndě əghɔb záŋ ńté pəlimə́ á mə́m Yeso. 3Pɔl pó Banabasə kə pyádnə ńchî ə́wɨ́, ə́sóŋə anu ntê Mmaʼmbî tə ńkě ŋwu tsə̌ pɔ́gə pô. Mmaʼmbîə a kə nɨd ńgə́ atsáb ntê apɔŋə́ntə́əmə Əsê lə́ ndə̌ŋdəŋə́. A kə fɛ̂ mətəənə a mbô pó ńgə́ pó lɔg ńgɛd əkyeʼmə́nu wɨ́ pópə mənu mə́ yɛ́d nə́ yɛ́d nə́. 4Pɨ pó kə chî nə́ á mə́m tə́kɔʼ tɔ̂ŋ ghɛn pó kə ghabnə̂, pətsə́ pó tə́ ńdzoŋə̂ Pəjus pətsə́ pə́ tə́ ńdzoŋə̂ Pɔl pó Banabasə.
5Lə́ Pətəjǐsê pópə Pəjus pətsə́ ńdzoŋ ḿbá mətû mɔ́b wɨ́, pó tyáŋə mənaŋə́ á mə́ nɨd nə́ məntú mə́ Yeso mə́ nə́ ngə́ʼ pɨ kə́ tə́mtə ághɔ́b nə́ məngɔʼə. 6Məntú mə́ Yeso mə́ mə́ kə zóʼə anu yə wɨ́ lə́ ńtíʼ ńkə ńgɛnə̂ ághóobə́ á mə́m pətə́kɔʼ pə́ tɔ̂ŋ pətsə́ páʼ pə́ kə chî nə́ Layikonya pə́ fóŋə nə́ Listəla pó Debə, ḿbɨ́ ńdzoŋ ḿbá əláʼ pətsə́ wɨ́ páʼ ə́ kə chî nə́ ḿbáatə, 7ńtíʼə ńnáŋkə nkɨ yi əshîʼnə wə́ ə́wə́.
Á Mə́mə Aláʼə Listəla pó Debə
8Á mə́mə aláʼə Listəla ŋwu tsə̌ a nə ńchî wɨ́ páʼ a kə pə́ nə́ kɔ́ŋə́sê, ə́fɛ́lə ándó pə́ kə pî nə́ yí a kə̂ ńnáanə lə́ tsɔʼə náanə nə́. 9A náanə ḿbyádnə ńjwə́ʼtə atséebə Pɔlə. Pɔl a náŋ ńjɨ́ ńgə́ a néŋ ntɨ́ yí wɨ́ ńkə́ ńtúg mbimə́ mbɔʼ pə́ tsóʼə yə́, ńtíʼ ńtə́g əmə́g nə́ yí ńnáŋə yí, 10ə́sóŋ nə́ tə́kɔʼ ngye ńgə́, “Lǒo əsê ńtɨ́ ndə̌ŋdəŋ nə́ məko mô!” Ŋwu yi wə́ á lî ńkɔ́ʼə atǐ ńtíʼ ńchúʼə mə́ nyintə̂ nə́. 11Əghâ ándó mboŋ pɨ zə́ nə ńjɨ́ nə́ anu páʼ Pɔlə a faʼ nə́ lə́, ńtíʼ ńchúʼə mə́ tsáb nə́ məngye mɔ́b mə́ kɔ́ʼə atǐ nə́ atséebə Layikonya, páʼə á pə́ nə́ atséebə azɔ́b ə́sóŋə ńgə́, “Məsê mə́ sɛdnə̂ ńchîə ándó pəənə, ńtíʼ ńtsó ńchîə á mə́m pɛnə̂!” 12Pó kə fɛ̂ əlɛ́nə á mbô Banabas ńgə́ lə́ Zus, ḿbɨ́ fɛ̂ yi Pɔl ńgə́ lə́ Emes ńté ńgə́ lə́ ŋwu páʼ a kə tɨ́ nə́ mbiə. 13Lə́ mbêsê Zus páʼ nəpá jí nə́ nə ńchî nə́ tsɔʼə á nəpɛnə́ tə́kɔʼ tɔ̂ŋ lə́, ə́ lɔg pəlú pə́ na pópə pəfəlawa ńgyǐəə á ntsǒnkáʼ ńjî ńgə́ pópə apoŋə pɨ páʼ á kə chî nə́ aliʼ yə wɨ́ ghɛlə̂ afyaʼə́nuə á mbô Pɔl pó Banabasə.
14Lə́ əghâ ándó Pɔl pó Banabas nə ńdzóʼ nə́ anu pó lɔ nə́ mə́ faʼ nə́ lə́, ə́sɛɛtə̂ ətsəʼ əpɔ́b ńtíʼ ńkə ńkwúnə á mə́mə apoŋə pɨ zə́ ńtíʼə ńtɔ́ŋnə ə́sóŋə ńgə́, 15“Pɨ ghɛlə̂ zəənə́ anu lə́ ńté akə̂? Pəg kə́ ḿbə́ azə́g lə́ tsɔʼə pəənə ándó pəənə́! pəg yǐ lə́ mə́ náŋkə nə́ nkɨ yi əshîʼnə, á mə́ fóg nə́ áwə́ənə́ á mə́m ənukə́taŋ pəənə́, pɨ zoŋ Əsê páʼ ə́ chî nə́ mbîə, páʼ a kə tsoŋkə̂ nə́ nəpó pó ndəsê nə́ nə́ənə, ndzoŋ ḿbá əpú ətsəm ə́ chî nə́ á mə́m wə́. 16A nə ḿbə́ ntsɛɛmbi lə́ a mɛdtə̂ ətú mbî ətsəm ńgə́ pó faʼ mənu mɔ́b ndzaŋ pó kɔŋ nə́. 17Lə́ ńdaŋə̂ á mə́m mənu mimə́ əshîʼnə páʼ a faʼ nə́ pɛn jî ńgə́ a chîə mbîə; a ə́fɛ̂ mbəŋə á mbô pɨ ḿbəənə̂ ńgɛlə̂ məjî mə́ kɔ́ʼə nə́ chigə ndɛd əyǐə, ḿbəənə̂ ə́fɛ̂ məjîə á mbô pɨ ńkə́ ńgɛlə̂ nə́ chîə mə́mə akɔŋtə.” 18Pó nə ḿbǎtə ńtsáb ndɛn mənu ghɛn lə́, atsáb yəwə́ pə́ ńkě ághɔ́b kɨ́ʼ ńgə́ kɔ pó fyaʼə́nuə á mbô pó pô.
19Lə́ Pəjusə pətsə́ pó ə́fɛ́lə Antiok pó Ikonum ńgyǐ ə́wɨ́ ə́sɛdkə̂ məntɨ́ mɔ́b ńtíʼ ńgɛd pó tə́mtə Pɔl nə́ məngɔʼ ńtíʼ ə́soŋə̂ yí ə́fógə á mə́m tɔ́ŋə, ńkwaŋə̂ azɔ́b ńgə́ a kwûə. 20Lə́ əghâ ándó pɨ pó néŋ nə́ ntɨ́ nə́ Yeso pó kə tɨ́ nə́ ńdíblə yí lə́, á lǒo á ndəsê ḿbəənə̂ yə́ á mə́m tə́kɔʼ tɔ́ŋə. Mbî ə́ fóg pó Banabasə ghɛnə̂ ághɔ́b yə́ Debə.
Pó Pəənə̂ Antiok Páʼə á Chî nə́ Mə́m Sylya
21Pɔl pó Banabas kə náŋkə nkɨ yi əshîʼnə á Debə, pɨ pipə nɨ́ nə́ pó sɛdnə̂ ńtíʼ ngaŋə́zoŋə́ndzəm Yeso. Pó tíʼ ḿbəənə̂ Listəla, ńdǒo wɨ́ ńkwúnə Ikonum, ḿbɨ́ ə́fɛ́lə Ikonum ńgɛnə̂ Antiok páʼə á chî nə́ Pisidya lə́. 22Ńtíʼə ńnéŋə məntɨ́ mə́ ngaŋə́zoŋə́ndzəm Yeso ḿbóʼtə́mbô á mbô pó ńgə́ pó mɛdnə̂ á mə́m mbimə́. Ḿbəənə̂ ə́sóŋə ńgə́, “Pɛn yǐ shib laŋə̂ á mə́m məngə́ʼ mimə nɨ́ nə́ záʼ pɔŋə̂ ə́ kwúnə á mə́mə Anuə Nəfoonə Əsê.” 23Á mə́m nkyeetə pɔ́ pə́ əsê ətsəm pó tsɔ́ʼtə mətûə, ńchî nə́ nji ńchaʼtə́sê ə́fɛ̂ ághóobə́ á mbô Mmaʼmbîə, ŋwu páʼ pó néŋ nə́ məntɨ́ mɔ́b nə́ yə́.
24Pó tíʼ ńdaŋə̂ á mə́mə aláʼə Pisidya ńtíʼ ńgyǐ ńkwúnə á Pamfilya. 25Əghâ ándó pó nə ə́sóŋ nə́ anǔəsê á Pega lə́ ńtíʼ ńtsó ńgɛnə̂ Atalya, 26ə́fɛ́d ə́wɨ́ ńtíʼ ńnyinə̂ á mə́m nkǐ ńgɛnə̂ Antiok, aliʼ páʼ pə́ nə ə́fɛ̂ nə́ ághɔ́b ńgə́ Əsê á túg nə́ apɔŋə́ntə́əmə ají ńté afaʼə ándó pó kə məgtə̂ nə́. 27Əghâ ándó pó nə ńkwú nə́ Antiok lə́ ńtíʼ ńtsɛntə̂ pəənə ándó pó chî nə́ á mə́m nkyeetə pɔ́ pə́ əsê ə́fiʼtə̂ anuə atsəm páʼ Əsê a faʼ nə́ á mbô pó, ńkə́ ḿbɨ́ ḿbə́ nə́ ndzaŋə ándó a ŋáʼkə nə́ ndúmə á mbô Pətəjǐsê pó néŋ ntɨ́ əghɔ́b nə́ yə́. 28Pó kə pyádnə ńchîə aliʼ yə wɨ́ pópə ngaŋə́zoŋə́ndzəm Yeso tə ndi sagə̂.
Currently Selected:
Məfaʼə 14: azo
Highlight
Share
Copy
Want to have your highlights saved across all your devices? Sign up or sign in
