Məfaʼə 15

Məntú mə́ Yeso pópə Mətû mə́ Mənkyeetə mə́ Pɔ́ pə́ Əsê Pó Jwánə á Jɛlusalɛmə

1Pɨ pətsə́ pó fɛ́lə á Judya ńgyǐəə Antiok ńtíʼə ńdzéʼkə pəlim á ndɛ̂sê ńgə́, “Tə́ ńdéʼtə pə́ póʼə gho ndzaŋ noŋkə Mosisə a nə nɨd nə́, tə ḿbə́ mbɔʼ gho kě chwád pô.” 2Atsáb zəənə́ á nə ńgɛd Pɔl pó Banabasə tíʼ ńchîə á mə́mə azɔŋ pó po, ḿbəənə̂ ńtíʼə soŋ nkɛd pó po ńkǐə ághóobə́ anu yəwə́. Pə́ tíʼ ńtsɔ́ʼə Pɔl pó Banabas ńdzoŋ ḿbá pətsə́ pɨ pə́ wə́ á Antiok ńgə́ pó po ghɛnə̂ Jɛlusalɛm ńjɨ́ məntú mə́ Yeso pópə mətû wɨ́ ńté anu zəənə́. 3Ndzaŋə ándó nkyeetə pɔ́ pə́ Əsê ə́ nə ńtú nə́ ághɔ́b pó tə́ ńgɛnə̂ lə́, ńdaŋə̂ á mə́m aláʼə Fonisya pó Samalya, ə́fiʼtə̂ ndzaŋə ándó Pətəjǐsê pó kwúblə nə́ ndzoŋ Əsê. Nkɨ yi wɨ́ nə́ ńgɛd pəlim á ndɛ̂sê pó chîə á mə́mə akɔŋtə. 4Əghâ ándó pó nə́ ńgyǐ nə́ á Jɛlusalɛm lə́, nkyeetə pɔ́ pə́ Əsê pópə məntú mə́ Yeso ḿbɨ ḿbə́ nə́ mətû mə́ mənkyeetə mə́ pɔ́ pə́ Əsê, pó nə́ ńkɔŋtə̂ á mə́ zɨ́ nə́ ághóobə́, pó tíʼ fiʼtə̂ anu atsəm páʼ Əsê á kə faʼ nə́ ńdaŋə̂ mə́m pó. 5Lə́ pəlim pətsə́ páʼ pó néŋ nə́ ntɨ́ əghɔ́b nə́ Əsê, páʼ pö zoŋ nə́ pə́ ndzəm Pəfalasi pó tíʼ ńdǒo əsê sóŋ ńgə́, “Pə́ chîə mə́ póʼ nə́ ághóobə́, pó kə́ ńdzóʼnə pənoŋkə pə́ Mosisə.”

6Məntú mə́ Yeso pópə mətû mə́ mənkyeetə mə́ pɔ́ pə́ Əsê tíʼ ńkyeetə̂ táʼ aliʼə́ á mə́ náŋ nə́ anu yə ə́wə́. 7Ndzaŋə ándó pó kə twiʼ nə́ mə́ kəʼlə̂ nə́ atsáb zɨ lə́, Pita a tíʼ ńdǒo əsê ə́sóŋə á mbô pó ńgə́, “Pəlim, nə́ jî ńgə́ ndi sag əghâ nə́ páʼ Əsê a kə tsɔ́ʼ nə́ mə á tətɨ pɨ ńgə́ maŋ ghɛn fiʼtə̂ nkɨ yi əshîʼnə á mbô Pətəjǐsê ńjî ńgə́ pó zóʼ ńkə́ néŋ məntɨ́ mɔ́b nə́ yə́. 8Əsê páʼ a jî nə́ ntɨ́ ŋwu ntsəmə, a nɨd ńgə́ á pímə ághɔ́b ńdaŋ nə́ Ajwǐəsê páʼə á fɛ̂ nə́ nə́ pó, tsɔʼə ndzaŋ páʼ a nə fɛ̂ nə́ nə́ pɛn lə́. 9A nə ńkě nɨd ńgə́ yə́ kɔŋə̂ ŋwu tsə̌ ńtsɛɛlə̂ yitsə̌ a tətɨ pɛ̌npo pô, ńtíʼ ńdəgnə̂ pətəpɔŋ pɔ́b ńté ńgə́ pó nə néŋ ntɨ́ əghɔ́b nə́ yə́. 10Əghâ nə́, lə́ ghɛlə̂ akə̂ nə́ loonə̂ á mə́ jwə́ʼ nə́ Əsê, ńtíʼə ńtə́gə apeʼə á ndu pɨ pó néŋ nə́ ntɨ́ əghɔ́b nə́ Əsê? apeʼ páʼ mbɔʼ pətǎ pə́ pətǎ pɛn kɨ tsɔʼə pɛn kě twá pô? 11Lə́ pəg pə́ néŋ ntɨ́ ńgə́ pəg yǒ chwád ə́laŋ lə́ nə́ apɔŋə́ntə́əmə Mmaʼmbî Yeso, tsɔʼə ndzaŋ pó yǒ nə́ kə́ chwáalə azóobə́.”

12Ŋwu ntsəmə á mə́m nkyeetə a naʼ ńgə́ ńtóʼ, ńtíʼə ńjwə́ʼtə ándó Banabasə pó Pɔl fiʼtə̂ nə́ mbô əkyeʼmə́nu pópə mənu mimə yɛ́d nə́ yɛ́d nə́ páʼ Əsê á kə faʼ nə́ á mbô Pətəjǐsê ńdaŋə̂ á mə́m pó. 13Əghâ ándó pó nə ḿməgtə̂ nə́ á mə́ tsáb nə́ lə́, Jɛmsə a kwěe ńgə́, “Pəlimə́ mə, jwə́ʼtə nə́ á mbô maŋ! 14Saamun a pěʼ fiʼtə̂ áwɛ̂n ndzaŋ páʼ Əsê a nə ḿbeg nə́ nəələ̂ akɔŋnə ajíə á mbô Pətəjǐsê, ńté ńgə́ a kə ghɛn lə́ á mə́m pó ə́fóg pɨ wɨ́ ńdɔg ńgɛd pəpí wə́.” 15Anu páʼ a nə sóŋ nə́ a nə ńjwánə pópə yi páʼ məntúmə́sê mə́ nə́ ŋ́ŋwaʼlə̂ nə́ á mə́mə aŋwaʼlə Əsê ńgə́:

16Mmaʼmbîə á sóŋ ńgə́, “Mbɔʼ zəənə́ á yǒ ńdaŋ maŋ pɨ ńdookə̂ ndɛ̂ Debid páʼ ə́ kə kɔ́ʼ nə́ yə́ afəmə́.

Maŋ yǐ pɨ kwúd məndɛ̂ ándó mə́ kə shaʼkə̂ nə́, pɨ ghɛd ndɛ̂ yi wɨ́ ə́ pɨ ńtɨ́ ńtyantə̂ nga yitsə̌.

17Ńdaŋ ə́lɨ́d ngwud mɔ́ ŋwu məsɔŋ yǐ zoŋə̂ Mmaʼmbîə.

Ḿbá Pətəjǐsê tsɔʼə pətsəm páʼ maŋ fóŋ nə́ ńgə́ pó lə́ pəpéemə. 18Lɛ̌ sóŋ Mmaʼmbî páʼ a nə ńgɛd nə́ pə́ jí mənu mɨ ə́fɛ́lə ngoʼ pəchə́.”

19Jɛmsə a ghɛn nə́ mbiə á mə́ sóŋ nə́ ńgə́, nə́ azéemə akwaŋ “Kɔ pɛn pɨ ńkə́ ńtə́ ńjwaʼə̂ Pətəjǐsê páʼ pó tə́ nə́ ńgyǐəə á mbô Əsê. 20Pɛn chî lə́ á pə́ mə́ ŋwaʼlə̂ nə́ aŋwaʼlə fɛ̂ á mbô pó ńgə́ kɔ pó jî məjî páʼ mɨ́d mə́ kě nə́ á mbi Əsê ŋwaʼ pô, ńté ńgə́ pə́ fyaʼə́nu ə́wə́ á mbô məsê mə́ məfɨgə; ə́ pɨ kə́ fiʼtə̂ ághɔ́b ńgə́ kɔ pó zɔ́ʼnə mbǒʼḿbóʼə́, ńkɔ kə́ ńkɔ́d na páʼ pə́ kě nə́ ndě sə́ pô, kɨ ńjîə achǐə. 21Ńté ńgə́, ə́fɛ́lə á ngoʼ pəchə́ pə́ kə̈ ə́fóŋə pənoŋkə pə́ Mosisə á mə́m məndɛ̂ mə́ Əsê mə́ Pəjus á mə́m əlě əláʼ əsê ətsəmə, ḿbɨ ńkə́ fiʼtə̂ atséebə ajíə á mə́m pətɔ̂ŋ pətsəmə.”

Pə́ Ŋwaʼlə̂ Aŋwaʼlə Ə́fɛ̂ á Mbô Pətəjǐsê Páʼ pó Néŋ nə́ Ntɨ́ Əghɔ́b nə́ Əsê.

22Məntú mə́ Yeso mə̂ pópə mətû, ḿbeg nkyeetə pɔ́ pə́ Əsê tsɔʼə ntsəm, Pó tíʼ ńkwaŋ ńgə́ mbɔʼ pó tsɔ́ʼ pɨ pətsə́ á mə́m pó ńdzoŋ ḿbéenə Banabasə pó Pɔlə wɨ́ ńtíʼ ńtúmə ághóobə́ Antiokə. Pó kə tsɔ́ʼ lə́ pɨ pɛ́n pɛ̌ páʼ pó pə́ nə́ mətûə á mə́m pɨ pətsəm páʼ pó néŋ nə́ ntɨ́ əghɔ́b nə́ Əsê, ḿbə́ Judas, páʼ pə́ kə fóŋ nə́ yí nə́ Basabas lə́, ḿbɨ́ ḿbə́ nə́ Sayilasə. 23Pə́ túmə ághɔ́b nə́ aŋwaʼlə páʼ á sóŋ nə́ ńgə́:

“Pəg məntú mə́ Yeso ḿbá mətû mə́ nkyeetə á mə́m Yeso túmə achaʼtə á mbô Pəlim pəg páʼ pó fɛ́d nə́ nə́ əla Pətəjǐsë, ńchîə Antiok, Siliya pó Silisya. 24Pəg zóʼ ńgə́ pɨ pətsə́ páʼ pó fɛ́d nə́ á mə́m pə̌gpo yǐəə á mbô pɨ nə́ əzɔb ntê ndzeʼkə̈, ńtíʼə ńjwaʼə̂ áwɨ́ ńtûə ńjwaʼlə̂ məntɨ́ mɨ́ páʼ lə́ kě nə́ pəg tú ńtúmə ághɔ́b nə́ atsáb zɨ́d zə́ pô. 25Ńdaŋ ə́lɨ́d pəg tíʼ ńkyeetə̂ táʼə aliʼ ḿbímnə pəg pətsəm ńgə́ pə́ tsɔ́ʼ məntú mətsə́ ńtúmə á mbô pəənə́. Pó yǐ yǐ lə́ pópə pəlim pɛn páʼ pɛn kɔŋ nə́, Banabas pó Pɔlə. 26Pó pímə nəwûə á mə́ faʼ nə́ á mbô Mmaʼmbî əwɛ̂n Yeso Klisto. 27Pə̈g tíʼə ńtúmə Judas pó Sayilasə á mbô pɨ, ńjî ńgə́ pó yǐ nə́ nkɔ̌ʼmbɨ əghɔ́b ə́fiʼtə̂ áwɨ́ nə́ mənu páʼ pəg ŋ́ŋwaʼlə̂ nə́. 28Pəg pímnə pəg pə́ Ajwǐəsê ńgə́ kɔ pəg pɨ ńtə́gə apeʼ yətsə́ atû pɨ tə ńdéʼtə ńgə́ pɨ zoŋ pənoŋkə pəənə́: 29Pənoŋkə pipə wɨ́ lə́ ńgə́ kɔ nə́ jîə áwə́ənə́ ajú páʼ pə́ lɔg nə́ ə́fyaʼ məsê mə́ məfɨgə ə́wə́, kɔ nə́ jîə achǐə neemə, kɔ nə́ kɔ́d na páʼ pə́ kě nə́ ndě sə́ pô, kɔ nə́ kə́ ńdzɔ́ʼnə mbǒʼḿbóʼə́. Mbɔʼ nə́ lɔg ndɛlə́ á mə́ kě nə́ ndɛn mənu ghɛn faʼ pô, pɨ yǐ ńdzóʼ əshîʼnə. Chî nə́ əshîʼnə ḿbə́.”

30Pə́ tíʼ ńtú pɨ pə̂ pó tsó ńgɛnə̂ Antiok ńkyeetə̂ ŋwu ntsəm a nə néŋ nə́ ntɨ́ əyí nə́ Əsê ńtíʼ ə́fɛ̂ aŋwaʼlə yi wə́ á mbô pó. 31Əghâ ándó pó nə́ fóŋ nə́ zɨ́d lə́, ḿbyádnə ńkɔŋtə̂ ńté ńgə́ atséebə á kə chî nə́ á mə́m wə́ á kə néŋ məntɨ́ móobə́. 32Judas pó Sayilas páʼ pó nə ńkə́ nə́ ḿbə́ məntúmə́sê lə́, pó nə ńdɔg ndɛd ńtséebə á mbô pəlim pə̈, ńnéŋə məntɨ́ mɔ́b ḿbɨ́ ńkə́ ńgɛlə̂ ńgə́ pó tɨ́ ńtyantə̂. 33Pó nə ńchî pó po nə́ akəmə ndɛd yitsə̌ lə́, pəlim póobə́ á mə́m Pətəjǐsê pó pɨ ḿbɨnkə̂ ághɔ́b nə́ mbwɔ́dnə ńgə́ pó pəənə̂ á mbô pəənə ándó pó kə tú nə́ ághɔ́b lə́. 34#15.34 Pətsɨ́ pətə́kɔʼ pə́ əŋwaʼlə ngoʼ pəchə́ peg nkaŋ 34, páʼ ə́ sóŋ nə́ ńgə́: Sayilasə á kə jɨ́ ńgə́ á koʼnə̂ á mbô yi á ghɔ́ŋə yí wə́. 35Lə́ Pɔl pó Banabasə tíʼ ḿbɛ́lə Antiok tə ńkoʼ ndɛd yitsə̌, ńdzoŋ ḿbə́ nə́ pətsɨ́ pɨ tə nɨ́ ńtíʼə ńdzéʼkə ńkə́ náŋkə nkɨ Mmaʼmbîə.

Pɔl Pó Banabasə Zɔŋə̂

36Əlěmbî pətsɨ́ kə laŋ lə́ Pɔlə a sóŋə á mbô Banabasə ńgə́, “Pɛn pɨ ḿbəənə̂ á mə́m pətə́kɔʼ pə́ tɔ̂ŋ pətsəm pɛn kə náŋkə nə́ nkɨ Mmaʼmbî wɨ́ ńgá pəlim pɛn wɨ́ ńjɨ́ ńgə́ pó lɛ ḿbə́ ə́léenə́?” 37Banabasə a pə́ ńtə́ ńdoonə̂ á mə́ lɔg nə́ Jɔn páʼ pə́ kə fóŋ nə́ yí ńgə́ Mag lə́, pó po ghɛnə̂, 38lə́ Pɔlə a pə́ ńkě kwaŋ ńgə́ á koʼnə̂ ńgə́ pó lɔgə̂ Jɔn Mag pó po ghɛn pô, ńté ńgə́ yí Jɔn Mag a kə koʼə̂ á Pamfilya lə́ mbɨ ḿbəənə̂ yə́, ńkě ghɛn pó po tə ḿməgtə̂ afaʼə azɔ́b pô. 39Chigə tə́kɔʼə azɔŋə á nə ńchîə á tətɨ pó tə pó shamnə̂, ŋwunə ghɛn nə́ əyí ndú ŋwunə a ghɛn nə́ əyí ndúmə. Banabasə a lɔgə̂ Jɔn Mag pó yí nyinə̂ á mə́m nkǐ ńgɛnə̂ á Sayiplusə, 40Lə́ Pɔlə á tsɔ́ʼə Sayilasə pó yí ghɛnə̂, pɨ pó néŋ nə́ ntɨ́ əghɔ́b nə́ Əsê pó tíʼ fɛ̂ Pɔl pó Sayilasə ńgə́ Mmaʼmbîə túg nə́ apɔŋə́ntə́əmə ajíə. 41Á tíʼ ńgɛn ńdaŋə̂ á Siliya pó Silisyä, ńgɛlə̂ ńgə́ mənkyeetə mə́ pɔ́ pə́ Əsê mə́ tɨ́ ńtyantə̂.

Currently Selected:

Məfaʼə 15: azo

Highlight

Copy