Mika 4

Kot a nemeni läng me fanüfan fän kinamwe

4.1-5

1Iwe, lon ewe fansoun epwe feito,

ewe chuk ia a nom ie imwen ewe Samol mi Lapalap

epwe fefeitä o nükünük,

epwe pwal tekia seni chuk meinisin,

nge chon ekewe mwü won fanüfan repwe mwicheto ren.

2Iwe, chomong aramas seni ekewe mwü repwe feito o apasa,

“Ousipwe feitä won chukun ewe Samol mi Lapalap

ren imwen än Jakop we Kot.

I epwe aiti ngenikich mine sipwe föri,

pwe sipwe tongeni föri letipan.

Pun ewe allük epwe towu seni Sion,

nge än ewe Samol mi Lapalap kapas epwe towu seni Jerusalem.”

3Ewe Samol mi Lapalap epwe eäni apwüng lefilen chomong aramas

o aükätiu fitikoko lefilen mwü mi pöchökül, ekewe mi arapoto me toau.

Iwe, repwe amani nöür ketilas o awiliir ngeni pisekin tu pwül,

nge wokur siles repwe awiliir ngeni näifen otot.

Mwü kana resap chüen maunfengen,

resap pwal chüen kaiö maun. #Sow 3.10

4Iwe, eman me eman epwe nom lon an tanipin wain

me fän an irä fiik fän kinamwe,

nge esap wor eman epwe eniuokusu,

pun ewe Samol mi Unusen Manaman a pwonei. #Sek 3.10

5Iwe, chon ekewe mwü meinisin ra fel o aleasochis ngeni ar kewe kot, nge kich sipwe fel o aleasochis ngeni ewe Samol mi Lapalap ach we Kot tori feilfeilachök.

Chon Israel repwe ngasala seni ar oola

4.6–5.1

6Iei alon ewe Samol mi Lapalap, “Epwe war ewe fansoun, pwe üpwe amwichafengeni chokewe mi pechemä o achufengeni chokewe mi oola, pwal chokewe üa ariaföüür. 7Ra pechemä o toau seni lenier, nge ngang üpwe föri seni chokewe mi chüen manau eu mwichen aramas, repwe wiliti eu mwü mi pöchökül. Iwe, üpwe nemeniir seni won ewe chuk Sion seni ena fansoun tori feilfeilachök.”

8Nge en, Jerusalem, epwe liwinsefälituk ewe nemenem ka piin eäni me lom, en ewe leni ia Kot a mamasa nöün aramas ie usun eman chon masen sip. 9Pwota ka leüömong le puchör? Ifa usun, esap wor eman king a nom reöm? Ifa usun, ra mäla noum kewe chon öüröür, iei popun cheuch a cheruk usun cheuchen fam a cheri eman fefin? 10Ämi chon Jerusalem, oupwe asokopelakemi o ngüngü usun eman fefin mi cheri an cheuchen fam. Pun iei oupwe towu seni ewe telinimw o imweimw lon eu fanü mi amassawa. Oupwe oola Papilon, nge ewe Samol mi Lapalap epwe amanauakemi o angasakemi seni lepöün chon oputakemi me ikenan. 11Nge iei chomong mwü ra mwichefengen pwe repwe maun ngenikemi. Ra apasa, “Jerusalem epwe fokun tala. Mesach epwe pwapwa le katol tatakisin Sion.” 12Nge resap silei än ewe Samol mi Lapalap ekiek, resap pwal wewe ren an akot. Resap mefi pwe a achufengeniir pwe epwe apwüngüür usun eman a achufengeni pilükün wiich ngeni ewe lenien wichiwich umwun wiich pwe epwe wichiir.

13Ewe Samol mi Lapalap a apasa, “Ämi chon Jerusalem, oupwe feila o apwüngü chon oputemi. Üpwe apöchökülakemi pwe oupwe pöchökül usun eman ätemwänin kow mi wor mächän seni mächä, a pwal wor pachapachan seni piras. Oupwe atatakisi chomong mwü, nge wöür kewe ir ra angei fän pöchökül oupwe fangala ngeniei, Ngang ewe Samolun unusen fanüfan.”

Currently Selected:

Mika 4: CHK

Highlight

Copy