Matayo 9

Eata Yeso nkitoria napalikinyie ng'ok

(Marko 2:1–12; Luka 5:17–26)

1Nejing Yeso meli achuko tenebo o looiteng'eni lenyena, nelang mpaso nebaki lkerenket omanya.#9:1 Kore lkerenket omanya naa keji Kapernaum. Ng'ura sii Matayo 4:13. 2Etii apa inia kata ltung'ana oonapita ltung'ani otigilgile aayaki Yeso. Nenapu eperito to lchoni. Kore payie edol ꞉Yeso nkurukoto enche, nejoki ilo otigilgile, <<Ntogolo ltau nkerai ai, amu kepalikino ng'ok inono.>> 3Nchoo laiteng'enak loo nkitanapat, neing'amng'am maate aajokino, <<Ketedia ꞉ele tung'ani Nkai!>> 4Kake kore amu keyielo Yeso mparrunot enche, nejoki ninche, <<Aanyo paa mbaa torrok iparraa taa ltauja linchi? 5Aa kaa nalelek, teneji, <Kepalikino ng'ok inono,> anaa <Inyuo chomo!>? 6Kake kore payie iyielouu aajo keata Nkerai e Ltung'ani nkitoria to nkop napalikinyie ng'ok>> - nejoki taa ilo tung'ani otigilgile - <<Inyuo ntacho tarrapu lchoni lino, chomo nkang.>> 7Neinyuototo ninye, nelo nkang. 8Kore payie edol ꞉lturrurri ana, neguretu, neisis Nkai naichoo ltung'ana nkitoria natiu nejia.

Kecham ꞉Yeso lolo oaanyi

(Marko 2:13–17; Luka 5:27–32)

9Kore einyuototo Yeso alo teinie, nedol ltung'ani oji nkarna enye Matayo ewuon to ng'oji nelakieki kodi. Nejoki, <<Rukurukoreeki nanu!>> Neinyuototo Matayo, neirukurukore ninye.

10 # Luka 15:1,2 Kore aitoki, enyeita Yeso ndaa ta nkaji enye, nepuonu laitalakunok kumo le kodi o loo ng'ok aanya ndaa tenebo o Yeso o looiteng'eni lenyena. 11Kore payie edol ꞉Lparisayo ana, neipar looiteng'eni lenyena aajoki, <<Aanyo payie enya laiteng'enani linchi ndaa tenebo o laitalakunok le kodi o loopeny ng'ok?>> 12Kore payie ening ꞉Yeso inia, nejoki ninche, <<Mara lolo lememoyiaa ooyieu labaani kake lolo oomoyiaa ooyieu. 13#Mat 12:7, Osea 6:6Kake enchom enteng'enare kipirte e ele rerei le Nkai:

<<Amu eitu alotu nanu aipot loosipat, kake loopeny ng'ok.>>

Eyewua ꞉Yeso nkiteng'ena ng'ejuk

(Marko 2:18–22; Luka 5:33–39)

14Nepuonu tesiedi inia ꞉looiteng'eni le Yoana neipar ninye aajoki, <<Aanyo chiaake payie kien iyioo o Lparisayo nkutukie, nemeen ꞉looiteng'eni linono?>> 15Nejoki ꞉Yeso, <<Amaa sa, aji eiko lomon lo ltung'ani oyemicho teneisinanio ewuon eboitiere ninche? Kake kebau mperot naayae loyemicho aaitung'aa ninche, neyen taa nkutukie. 16Meatae ltung'ani oripaki rache e nkila ng'ejuk nkila musana, amu keng'erari inia rache te inia kila musana, nerroyo nkijata oleng. 17Nemeatae sii ltung'ani opik naichuo e lmusabibu ng'ejuk lbenia musan, amu tenepik, nekija lolo benia musan, neibukori inia aicho, nerroyo lolo benia. Kake kore naichuo ng'ejuk naa lbenia ng'ejuko epiki.>>

Eitipiwua ꞉Yeso ntito natua, neichiunyie nkitok namuai

(Marko 5:21–43; Luka 8:40–56)

18Kore elikita ꞉Yeso ninche kuna baa, nchoo lkitok le Sinagogi, nelotu, negilaki kung, nejoki, <<Etepero ake taata ntito ai, kake wou, nteleki ninye nkaina ino, naa keitoki apiu.>>

19Neinyuototo Yeso o looiteng'eni lenyena, neirukurukore. 20Nchoo aitoki, nelotu nkitok namuai, naturukie lodo too larin tomon o oare aimu tooriong Yeso, neiseyie sarkudai le nkila enye. 21Amu kejo ta ltau lenye, <<Kore ake tanaiseyie sarkudai le nkila enye, naa kaichiu.>> 22Neiwuatuwuata Yeso, nedol ninye, nejoki, <<Ntogolo ltau lino, ntito ai, amu /ikinchiunyie ꞉nkurukoto ino.>> Kore ang'asu te inia kata, neichiu.

23Kore payie ebaki Yeso nkaji e laduo kitok le Sinagogi, nedol lolo ookut ndulen, eng'or nukaroto e lmeneng'ai o lturrur eichirita. 24Nejo, <<Ewuang'a, amu eitu eye ntito, kake keilura ake.>> Nekueniyie ninye. 25Kore payie eipung'ieki ilo turrur boo, nejing Yeso nkaji, neibung inia tito nkaina, neinyuototo ninye. 26Neibulaa kulo omon inia kop pooki.

Eichiunyie ꞉Yeso lmodook o ltung'ani lemeidim airoro

27Kore eloito Yeso aing'uaa inie, neirukurukore ꞉ltung'ana oare modook, ebuakita aajo, <<Ng'erru iyioo, Layieni le Daudi!>>

28Kore payie ebaki nkaji namanya, nepuonu lolo modook oare neti, neipar ajoki, <<Irukruk ntae aajo kaidim ataasa inia duo niyieuu?>> Newoliki aajo, <<Ee Laitoriani.>>

29Neiseyie nkonyek enche, nejo, <<Enchoo easai taa ntae ana ake niruko.>> 30Nebolo nkonyek enche te inia kata. Neitemioki ꞉Yeso ninche ajoki, <<Entodol, emincho hoo eyielou ltung'ani obo ana nataase.>>

31Kake neipung ninche, neitarasaa lomon lenyena te inia luboto pooki.

32Kore eipung'uto ninche teinie, neyakini aitoki Yeso ltung'ani oata lairirua nemeidim sii airoro. 33Kore payie eitupukuni lairirua taatua ilo tung'ani, neng'asu ninye airo. Neing'asia lturrurri ejo, <<Eitu aikata edoli mbae natuwuana ana taatua Isirael.>>

34 # Mat 10:25, 12:24; Mrk 3:22; Luka 11:15 Kake kore Lparisayo, nejo, <<To ngolon e lkitok laa lairiruani eipung'unyie ꞉ninye lairiruani.>>

Keikitok ndung'ore kake keikuni laasak le siaai

35 # Mat 4:23; Mrk 1:39; Luka 4:44 Neimaa Yeso lkerenketi o nkang'ite pooki, eiteng'enicho tee Sinagogini, nelikoo Lomon Supati le nkitoria e chumata, neichiunyie pooki keeya o moyian. 36#Nki 27:17; 1Lki 22:17; 2Ng'a 18:16; Ese 34:5; Mrk 6:34Kore payie edol lturrurri, neduaaki lng'er tankaraki naitanyamalaki, nemeata reto, tana nkerra nemeata lchekut. 37#Luka 10:2Nejoki looiteng'eni lenyena, <<Keikitok ndung'ore e lchampa kake keikuni laasak le siaai. 38Naaku entoomon Lopeny ndung'ore metereu laasak le siaai atua ndung'ore enye.>>

Currently Selected:

Matayo 9: saq

Highlight

Copy