Matayo 8
8
Eichiunyie ꞉Yeso ltung'ani oata nkeeya ee lbolot
(Marko 1:40–45; Luka 5:12–16)
1Kore payie edou Yeso to lowua, neirukurukore ꞉lturrurri kutuaa. 2Nelotu inia kata ltung'ani oata nkeeya ee lbolot netii, negil kung tekue ninye, nejo, <<Laitoriani, tanaa iyieu, naa ikindim aichiunyie matusupata.>> 3Neitusunyaa Yeso nkaina enye, neiseyie ilo tung'ani, nejoki, <<Kayieu! Inchiu!>> Neichiunyieki inia kata nkeeya ee lbolot.
4 #
Lal 14:1–32
Neitoki Yeso ajoki ninye, <<Nchoo metaa meata ltung'ani liliki ana. Kake chomo, ntoduaa koon laitainoni la lasar, nincho nkichooroto e lasar napa naitanapichie Musa, metaa limunoto naitisipu nkichiunoto ino tee ninche.>>
Nkurukoto e lkitok loo sikarini loo Rroman
(Luka 7:1–10)
5Kore ejing'ita Yeso lkerenket le Kapernaum, nelotu lkitok loo Rroman oitacheki sikarini oonyikaa ip nabo netii, nesai 6ajoki, <<Laitoriani, keperito laisiaayiani lai ta nkang etigiligile, nemeito oleng.>>
7Nejoki ꞉Yeso ninye, <<Naaku, nanu iyieu nalotu aichiunyie?>> 8Newoliki ꞉ilo kitok ajoki, <<Laitoriani meichiaakino eji tanaaku iyie likincho nkanyit nawuenyi alotu ajing'u nkaji ai. Kake tejo ake rerei obo, naa keichiu laisiaayiani lai. 9Amu kore sii nanu, naa kara ltung'ani otii taabori nkitoria, naata sii sikarini laatii taabori nanu. Kore payie ajoki ele, <Chomo!> nelo, najoki elde, <Wou!> nelotu, najoki laisiaayiani lai, <Taasa ana!> neas.>> 10Kore payie ening ꞉Yeso inia, neing'asia, nejoki lolo ooirikurukore ninye, <<Kedede kajoki ntae, eitu hoo adol ltung'ani te Isirael oata nkurukoto kitok nawuana ana. 11#Luka 13:29Kake kajoki ntae, kepuonu lkumo eing'uaa neiliepunyie o nedoyierie ndama, newueni tenebo o Abraam o Isaka o Yakobo te nkitoria e chumata. 12#Mat 22:13, 25:30; Luka 13:28Kake kore naapa kera e nkitoria, nenang'ari aulo atua naimin, ng'oji neichirieki, neonyeki lala te mion.>>
13Nejoki ꞉Yeso ilo kitok loo sikarini, <<Chomo! Metaasai te iyie inia, ana niruko.>> Neichiunyieki laisiaayiani lenye inia kata.
Eichiunyie ꞉Yeso ltung'ana kumo
(Marko 1:29–34; Luka 4:38–41)
14Kore payie ejing Yeso atua nkaji e Petero, nedol nkautani naiu ntomononi e Petero eper to rruat eibisiong, eata nkirewua. 15Neiseyie ꞉Yeso nkaina enye, neing'uaa ninye ꞉nkirewua, neinyuototo, neng'asu aichoo ninye ndaa.
16Kore payie eaku kuarie, neyakini ninye ltung'ana kumo oaata lairiruani, nearaa lairiruani te rerei lenye, neichiunyie ltamoyia pooki. 17#Isa 53:4Naa ketaase ana, payie ebaya inia apa natejo Nkai aimu loiboni lenye Isaya, ejo,
<<Ninye koon owa nchalan ang, nenap moyianitin ang.>>
Neikoni teneirukurukoreki Yeso
(Luka 9:57–62)
18Kore payie edol ꞉Yeso lturrur kitok emanita ninye, neitanap looiteng'eni lenyena metalang'aki likae kokun le mpaso. 19Nelotu laiteng'enani obo loo nkitanapat, nejoki, <<Laiteng'enani, kaairukurukore iyie ng'oji pooki nilo.>> 20Newoliki ꞉Yeso ajoki, <<Keata mbariak udot, neata nkueeny e ai nkajijik enche, kake kore Nkerai e Ltung'ani meata neitepetaa nkue enye.>> 21Nejoki ꞉lobo loo looiteng'eni lenyena, <<Laitoriani, nchooki ang'as machomo anukaa papa lai!>> 22Nejoki ꞉Yeso ninye, <<Rukurukoreeki nanu! Nchoo lmeneng'a enukaa lmeneng'a lenche.>>
Eitacheyie ꞉Yeso lkutati le nkare
(Marko 4:36–41; Luka 8:22–25)
23Nedir ꞉Yeso meli, neirukurukore ꞉looiteng'eni lenyena, nepuo. 24Neinyuototo inia kata lkutati sapuk taatua mpaso, metaa kore inia meli, eyiata eimilie ꞉laing'ok le nkare, kake kore ꞉Yeso naa keilura. 25Nepuo looiteng'eni lenyena netii, neinyoyie aajoki, <<Laitoriani, ntejeu iyioo amu etaa kindaaya!>> 26Nejoki ninche, <<Aanyo payie iuriechiochio? Oi ntae oaata nkurukoto kini!>> Neinyuototo inia kata, nebuaaki ilo kutati o mpaso. Kore duo ilo kutati oinyuo ta mpaso, neitirring'a katukul.
27Neing'asia ꞉ninche, neipara aajo, <<Amaa, aa pukunoto e ltung'ani ana? Kening ninye abaki ꞉lkutati o mpaso!>>
Eichiunyie ꞉Yeso ltung'ana oare oaata lairirua
(Marko 5:1–20; Luka 8:26–39)
28Kore payie elang ꞉Yeso alo ildo kokun, nebaya nkop ee Lgadara.#8:28 Kore Lgadara naa ltung'ana lemeiruk Nkai e Isirael, oaamanya nkalo mpaso e Galilaya. Neipung'oki ꞉ltung'ana oare oaata lairirua eing'uaa nkuraren. Kore ninche naa ltung'ana ooricho oleng, naaku meatae hoo ltung'ani oitieu aima inia oitiei. 29Nebuaaki ꞉ninche Yeso, nejoki, <<Nkerai e Nkai, nyo dei irum iyioo? Iyewuo dei ene aitam iyioo sina ewuon eng'or ng'amata ang?>>
30Kore te inie, netii mboo kitok ee mbitiro naadaa elakuaniki ninche. 31Nelej ꞉lairiruani Yeso aajoki, <<Kore tanaa imiraa iyioo aipung'ie, terewa iyioo matijing idia boo ee mbitiro.>>
32Nejoki ninche, <<Enchom!>>
Neipung'u ninche, nepuo aajing nenia bitiro, nejo dii inia boo pooki aaitutokino atua mpaso. Neidaaya ninche pooki taatua nkare.
33Kore payie edol lchekuti otii kuna bitiro nataase, neisig aapuo lkerenket. Nelikoo mbaa pooki naataasate naaipirita mboo ee nenia bitiro o naaipirita lolo tung'ana oaata apa lairirua. 34Neinyuototo inia kata lkerenket pooki aipung atumore Yeso. Kore payie edol ninye, neomon metung'ai nkop enche.
Currently Selected:
Matayo 8: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
