Matayo 10

Eipaayie ꞉Yeso lkipaareta tomon o oare

(Marko 3:13–19; Luka 6:12–16)

1Neipot ꞉Yeso looiteng'eni lenyena pukura tomon o oare meotu netii, neicho nkitoria meitoria lairiruani, payie earaa ninche, neichiunyie pooki keeya o moyian. 2Naa kuna nkarn ee lkipaareta tomon o oare: kore lekue naa,

Simon oji Petero o Andirea lalache lenye,

o Yakobo layieni le Sebedayo o Yoana lalache lenye,

3o Pilipo o Batolomayo,

o Tomas o Matayo laitalakunoni le kodi,

o Yakobo, layieni le Alpayo, o Todayo,

4o Simon ilo oji Kananayo#10:4 Kore Kananayo naa keutu mbaa are. Kore nekue naa ltung'ani oibung nkurukoto enye oleng. Kore ne aare naa oyieu nelakuni Isirael te nkitoria ee Rroman. o Yudas Isikariot otilikoyie Yeso meibung'i.

5Kulo tomon o oare eipaayie Yeso neitanap ajoki, <<Emiim ake nkoitiei nalo netii loreren, nimijingjing lkerenket hoo obo loo Samaria, 6kake enchom ake netii nkerra naaiminaitie e locho le Isirael. 7Kore ipuoitoto, entilikoi ijoijo inji, <Etinyikua nkitoria e chumata.> 8Enchiunyie ltamoyia, entipiu lootuata, enchiunyie metusupata lolo oaata nkeeya ee lbolot, niaraa lairiruani. Itang'amaitie ntae pecheu, naa enchooi sii ntae pecheu. 9Eminap ropiyiani e saabu anaa ne nkocholai anaa sii ne surutiai tee mbenia ee nkimeenteni inchi. 10#1Lkor 9:14; 1Tim 5:18Eminap lbenia anaa nankan are e atua anaa namuka anaa sobua tinipuopuo, amu keichiaakino laasani le siaai ndaa nanya. 11Kore lkerenket o nkang nijing'jing, enteyiai ltung'ani oichiaakino, niwuenienie nkaji enye ana metabau ng'amata nipuopuo. 12Naa tinijing'ijing inia aji, eroroki lootii. 13Kore tanaa keichiaakino inia ang seriani inchi, meeu naa seriani inchi inia ang, naa tenemeichiaakino, nechukokino ntae seriani inchi. 14#Asat 13:51Naa teneatae ltung'ani lemeitoomon ntae, nemening lomon linchi, kore tinimpung'pung te inia ang anaa te ilo kerenket, empiripiroi nterit ee nkejek inchi.#10:14 Kore empiripiroi nterit ee nkejek inchi too Lyiaudi, naa inji etuwuana echi tee Sampur tenenang'akini ltung'ani nkaik. 15#Mat 11:24, Ng'as 19:24–28#Luka 10:4–12Kajoki ntae sipata nadede, kore kenya te inia parri e nkiguana, keikachieki nkop e Sodom o Gomora#10:15 Kore Sodom o Gomora naa lkerenketi kulo ooidakie apa Nkai tankaraki ng'ok enche. aaitalang ilo kerenket.

Nyamali o sinaitin naatum lkipaareta le Yeso

(Marko 13:9–13; Luka 21:12–17)

16 # Luka 10:3 <<Entaparru aajo, kaipaaya ntae tana nkerra taatua suyiani. Naaku enteng'enioto ana lasuria, niakuku lemeata ntioto ana nkutukurruki. 17#Mrk 13:9–11; Luka 12:11,12, 21:12–15Entirrip ate too ltung'ana, amu keya ntae nkiguanaitin enche, neidong ntae tee Sinagogini enche. 18Kore tankaraki nanu, keyae ntae tekue laitoriak o lkinkii payie itumtum aaitai limunoto ee nenia naaipirita nanu tekue ninche, o tekue Loreren. 19Kake teneibung'i ntae aaichooyo, eming'aing'ai ninkoko tiniwolwol anaa inia nijoijo, amu keichori ntae te inia kata nijoijo. 20Amu mara ntae ooiro, kake Ltau le Papa linchi oiro taatua ntae. 21#Mrk 13:12; Luka 21:16Keichooyo ꞉lalache likae alache metari metua, neichooyo ꞉menye nkerai, neiwuatuwuatakino ꞉nkera ntoiwuo to ngoro, neichooyo ninche metari metuata. 22#Mat 24:9; Mrk 13:13; Luka 21:17, Mat 24:13; Mrk 13:13Naa keibai ntae ltung'ana tankaraki nkarna ai. Kake kore long'iri metabaki nkiting'oto, neitejeuni. 23Naa teneitam ntae sina te le kerenket tankaraki nkurukoto inchi, eisigaki likae. Amu, nadede ajoki ntae, mindipdip aaimai lkerenketi pooki le Isirael ewuon eitu elotu Nkerai e Ltung'ani. 24#Luka 6:40, Yoa 13:16, 15:20Melang ꞉loiteng'eni laiteng'enani lenye, nemelang sii ꞉laisiaayiani lkitok lenye. 25#Mat 9:34, 12:24; Mrk 3:22; Luka 11:15Keitiemu loiteng'eni tenetuwuanai laiteng'enani lenye, neitiemu sii laisiaayiani tenetuwuanai lkitok lenye. Amaa tanaa keipoto lopeny nkaji aajo Beelsebul, aa taa lkitok loo lairiruani, kebaa sa ejo lolo le nkaji enye?

26 # Mrk 4:22; Luka 8:17 <<Emiuriei naa ninche, amu meatae ntoki naisiaparo nemeibalieki, anaa naisudoro nemeyielouni. 27Kore pooki najoki ntae ta naimin entilikoi to wong'an, naa kore nining'ining too nkurrat, entilikoi aaitadaraa. 28Emiurie lolo oaar sesen nemeidim aatar nkichui, kake enturia ilo oidim aidakie nkichui o sesen to lmoti le nkima. 29Amaa, mara keitami ntiitiini#10:29 Kore ntiitiini naa nkueeny kunini oleng, naanya apa ꞉ltung'ana. are sintii obo? Naa meata hooyia nabo nasulakino nkop meyielo Papa linchi. 30Kake kore lpapit loo nkuechi inchi naa keikena pooki. 31Naaku, emiurieicho amu irara ntae le tipat aalang ntiitiini kumo. 32Naa kore pooki ng'ae laaibalie nanu tekue ltung'ana, naibalie sii ꞉nanu ninye tekue Papa lai oti chumata. 33#2Tim 2:12Kake kore pooki ng'ae laamiki nanu tekue ltung'ana, namiki sii nanu ninye tekue Papa lai oti chumata.

34<<Emijo kayewuo ayau sotua nkop. Eitu alotu ayau sotua kake mpere#10:34 Kore mpere naa lalem too Lgirriki. ayewua. 35#Mika 7:6Amu kayewuo airriki layieni metarare menye, nerare ꞉ntito ng'otonye, nerare ꞉ntomononi nkautani enye. 36Naa kore lmang'ati lo ltung'ani naa lolo le nkaji enye. 37Kore loacham menye anaa ng'otonye aitalang nanu, naa maaichiaakino ꞉ninye. Naa kore loacham nkerai enye, aa layieni anaa ntito aitalang nanu, naa maaichiaakino. 38#Mat 16:24; Mrk 8:34; Luka 9:23Naa kore pooki lemenap lmusalaba#10:38 Kore apa ltung'ana oaanap lmusalaba naa ketudung'okaki nkiguana e lkiye. Naaku kore naipirita inia nayieu Yeso payie enap ꞉ltung'ani lmusalaba lenye naa keyieu payie erretena metama sina ana metari metua. lenye naairukurukore, namaaichiaakino nanu. 39#Mat 16:25; Mrk 8:35; Luka 9:24, 17:33; Yoa 12:25Kore ilo otum nkichon enye naa keiminie, kake kore ilo oiminie nkichon enye tankaraki nanu naa ninye otum.

40 # Luka 10:16; Yoa 13:20, Mrk 9:37; Luka 9:48 <<Kore long'amaa ntae, naa nanu etang'amayie, naa kore laang'amaa nanu, naa ilo laairriwua etang'amayie. 41Kore pooki ng'ae ong'amaa loiboni le Nkai ajo kera loiboni naa ketum laata e loiboni le Nkai, naa kore long'amaa ltung'ani loosipat ajo kera ltung'ani loosipat, naa ketum laata e ltung'ani loosipat. 42Naa kore pooki ng'ae oicho lobo loo kulo oodoli etuwuana meitoki nkare nairobi tankaraki nara ake loiteng'eni lai, kedede kajoki ntae, meimin hoo laata enye.>>

Currently Selected:

Matayo 10: saq

Highlight

Copy