Luka 6

Nkipara naipirita Sabato

(Matayo 12:1–8; Marko 2:23–28)

1 # Nkit 23:25 Kore apa mparri nabo e Sabato eimita Yeso nkiji ee lchampai le nkano, negilu ꞉looiteng'eni lenyena lperes le nkano nepupu taa nkaik, nenya. 2Neiparichiere lkulie Parisayo aajoki, <<Aanyo payie iasias nemeichiaakino ta mparri e Sabato?>> 3Newoliki ꞉Yeso ajoki, <<Eitu apake isomsom inia nataasa apa Daudi o lboitieii lenyena payie ear ꞉sumach? 4#Lal 24:9#1Sam 21:1–6Ketijing'a apa nkaji e Nkai, nerrapu mukateni naaitakaki Nkai nenya, neitoki aicho lolo boitieii lenyena. Kore apa tee nkitanapat naa meichiaakino tenenya likae tung'ani mara ake laitainok la lasar aapeny.>> 5Neitoki ajoki, <<Nkerai e ltung'ani nara Laitoriani le Sabato.>>

Ltung'ani oikaolo nkaina

(Matayo 12:9–14; Marko 3:1–6)

6Kore ta nkae parri e Sabato nejing Sinagogi aiteng'enicho. Naa ketii apa inie ltung'ani oikaolo nkaina e tetene. 7Kore laiteng'enak loo nkitanapat o Lparisayo, neing'or ntoki nalo ninye aas tanaa keichiunyie ilo tung'ani ta mparri e Sabato payie etum ntoki nadung'okinyie ninye nkiguana. 8Kake keyielo Yeso mparrunot enche, nejoki ilo oikaolo nkaina, <<Inyuo wou ntacho tene!>> Neinyuototo nelotu aitache. 9Nejoki ꞉Yeso ninche, <<Kaipar ntae ana, amaa kaa naichiaakino tinias ta mparri e Sabato, tinias supat anaa tinias ntorno, tinintejeu nkichui anaa tiniar metua?>> 10Neitamanaa nkonyek aing'or ninche pooki, nejoki ilo tung'ani, <<Intorioi nkaina ino!>> Neitorioo ꞉ninye nkaina neichiu asupatu aitoki. 11Kake kore laiteng'enak loo nkitanapat o Lparisayo negoro oleng, neiguana maate aayiaya mbae naitaas Yeso.

Etegelua Yeso Lkipaareta tomon o oare

(Matayo 10:1–4; Marko 3:13–19)

12Kore apa nenia perot, neipung Yeso alo ldonyuo aomon. Newuon kuarie pooki eomonito Nkai. 13Kore payie eikienyu, neipotu looiteng'eni lenyena, negelu tomon oare taatua ninche neicho nkarna naji Lkipaareta: 14Aa Simon oinyiaka ajo nkarna Petero o Andirea lalache lenye o Yakobo o Yoana o Pilipo o Batolomayo, 15o Matayo o Tomas o Yakobo le Alpayo o Simon oji Silote#6:15 Kore Silote naa keata kipirteni are. Kore nekue naa ltung'ani oibung nkurukoto enye oleng. Kore ne aare naa oyieu nelakuni Isirael te nkitoria ee Rroman. 16o Yuda le Yakobo o Yudas Isikariot otilikoyie Yeso taa lmang'ati lenyena.

Eiteng'enichie Yeso, neichiunyie ltamoyia

(Matayo 4:23–25)

17Nedoyio Yeso tenebo o ninche neitache to ng'oji neiperere. Netii inie lturrur kitok loo looiteng'eni lenyena o siamu kitok ee ltung'ana ooing'uaa Yudea pooki o Yerusalem o nkop e lkerenket le Tiro o Sidon nanyikita nkalo mpaso kitok. 18Naa keotuo ninche aainining Yeso, neichiunyieki moyianitin enche. Kore lolo ootiirrana ꞉lairiruani naa keichiunyieki. 19Nenyok ꞉lturrur pooki ayiaya neiko teneiseyie ninye tankaraki keing'uaa ninye ꞉ngolon, neichiunyie ltung'ana pooki.

Mayian o lkichirai

(Matayo 5:1–12)

20Neapu Yeso nkonyek, neing'or looiteng'eni lenyena nejoki,

<<Imayianana ntae loomena,

amu ninchi nkitoria e Nkai.

21Imayianana ntae oaata sumach taata

amu keitiemuni ntae.

Imayianana ntae ooichir taata,

amu ikuenini kenya.

22 # 1Pet 4:14 Imayianana teneibai ntae ltung'ana,

negelaa ntae, nedek ntae,

neitarruorri nkarn inchi tankaraki Nkerai e ltung'ani.

23 # 2Ng'a 36:16; Asat 7:52 <<Enting'idata inia parri nintiamtiam te ng'ida, amu kore laare inchi, naa keikitok te chumata. Amu nejia eitaasita ꞉loomenye loibonok le Nkai.

24<<Kake oi ntae oaara parakuo,

amu indipa ntae aatum nenia pooki niyieuu.

25Oi ntae oimoto taata,

amu itumtum sumach.

Oi ntae ookueni taata,

amu isinanionio ninchirchir.

26Oi ntae tenerrep ntae ltung'ana pooki,

amu nejia apa eikuna ꞉loominyi loibonok le sapare.

Entacham lmang'ati linchi

(Matayo 5:38–48, 7:12a)

27<<Kake kajoki naa ntae laaning'ito: Entacham lmang'ati linchi, nintaasas supati lolo ooiba ntae. 28Entamayian lolo oodek ntae, niomonokiki lolo ooitam ntae sina. 29Kore tinikioch ltung'ani seder, wuatuwuataki nkae. Naa kore likiworu lkila lino le oriong mimitiki abaki nkila ino e atua. 30Nchoo pooki likiomon, naa kore pooki likiworu ntokitin inono, mimpar ninye mikitirrinyoki. 31#Mat 7:12Entaasa ltung'ana ana niyieuu neitaas ntae!

32<<Amaa tinichamcham lolo oaacham ntae, kaa tipat itumtum ntae te inia? Amu kore abaki laasak loo ng'ok, naa kecham ꞉lolo oaacham ninche. 33Amaa tinintaasas supati lolo oitaas ntae supati, kaa tipat itumtum ntae? Amu keas abaki laasak loo ng'ok nejia. 34Naa amaa sii tininchocho silen ltung'ana lisiliglig aajo kelak, kaa tipat itumtum ntae te inia? Amu kore abaki loata ng'ok naa keicho silen loaata ng'ok, eiken sii ꞉ninche aajo kelaakini pooki. 35Kake entacham lmang'ati linchi, nintaasas ninche supati, ninchocho silen miatata siligi aajo kerrinyokini ntae toki. Naa kore laata inchi keaku kitok, niakuku nkera e Ilo ooisul pooki. Amu kore ninye, naa kera supat too lolo lemeata nache o too lolo torrok. 36Entaa loaata lng'er, ana payie eata Papa linchi lng'er.

Eminguanare lkulie

(Matayo 7:1–5)

37<<Eminguanare, naa meiguanareki ntae. Emidung'oki lkulie nkiguana torno, naa medung'okini ntae. Entapaliki, naa kepalikini ntae. 38Enchooi, naa keichori ntae te risioroto supat, naruja, neitunyo, nedoodoyo, nebukokino nankan inchi. Amu kore risioroto nintirisiokinyienyie lkulikae naa ninye sii eitirisiokinyieki ntae.>>

39 # Mat 15:14 Neitoki aliki ninche ana kitanyanyukoto, <<Amaa, keidim lmodooni atiriko likae modooni? Mara kedoki pukura aare atua udoto? 40#Mat 10:24,25; Yoa 13:16, 15:20Kore loiteng'eni, naa melang laiteng'enani lenye, kake kore pooki ng'ae oidipa laiteng'enani lenye aaichoo nkiteng'ena pooki, nerisierei laiteng'enani lenye. 41Aanyo payie idol somua nati nkong'u e lalache lino, nimidol leng'oti nati nkong'u ino? 42Tanaa, aji inko tinijoki lalache lino, <Lalache lai, ntacho maaitai somua nikiti nkong'u,> nimidol iyie leng'oti nati nkong'u ino? Iyie loitaakino, ntai ang'as inia leng'oti to nkong'u ino, naa te inia kata itumoki atoduaa aitai inia somua nati nkong'u e lalache lino.

Lcheni o lng'anayio lenyena

(Matayo 7:16–20, 12:33–35)

43<<Meatae lcheni supat ojing lng'anayio torrok, anaa lcheni torno ojing lng'anayio supati, 44#Mat 12:33amu keyielouni lcheni pooki taa lng'anayio lenyena, amu meatae lkuku oobosunyieki lng'abolo, nemedeuni lng'anayio lo lmusabibu ta saar loo lkuku. 45#Mat 12:34Kore ltung'ani supat naa keiu supati taatua nchumat supati e ltau lenye, neiu ltung'ani torno ntorrok taatua nchumat torrok enyena. Amu kore nairo nkutuk, ninche naabore ltau lenye.

Lachetak oare

(Matayo 7:24–27)

46<<Aanyo payie kimpotpot aajo, <Laitoriani! Laitoriani!>, nimiasias nana najoki ntae? 47Kaitodol ntae netiu pooki ng'ae olotu natii, nening rereii lainien neas. 48Kore ninye, naa ketiu anaa ltung'ani ochet nkaji, netur nkop metuguto, nepik lkitamanyunoto lenye nkeper e ndadapoi#6:48 Kore apa to nkop e Isirael naa kecham ltung'ana aatechet nkajijik ee soito te nkeper e ndadapoi, metogolo nkitamanyunoto enche.. Kore payie enang'unye nkare nenang inia aji, kake meigusugusie amu ketechetaki aaitogol. 49Kake kore ilo oning nemeas, naa ketuwuana ltung'ani otecheta nkaji te nkeper ee nkulupo meitamanyuno, nenang'unye sere, nenang inia aji neurori ta nkata nabo, nerroyo katukul.>>

Currently Selected:

Luka 6: saq

Highlight

Copy