Luka 5

Eipoto ꞉Yeso looiteng'eni lenyena lekue

(Matayo 4:18–22; Marko 1:16–20)

1 # Mat 13:1,2; Mrk 3:9,10, 4:1 Kore mparri nabo, eiding'akino ꞉lturrur Yeso aainining rerei le Nkai, neitache ninye tabata mpaso e Genesaret,#5:1 Kore mpaso e Genesaret ninye eitokini aajo mpaso e Galilaya. 2nedol melin are etii nkalo mpaso naatung'aitie laibung'ak loo sinkirri. Kore lolo aibung'ak loo sinkirri naa ketung'aitie nenia melin, newueni aaituk lgiitani ooibung'ieki sinkirri. 3Nejing Yeso atua meli e Simon nati atua nenia melin, neomon meturrumoki peneu atua nkare aitalam nkop natoyio. Naa kore etii atua meli, newuon, neng'asu aiteng'en lturrurri. 4Kore payie eidip airoro nejoki Simon, <<Turrumoi mechomo negut, nintodokiki lgiitani linchi loo sinkirri atua nkare aaibung sinkirri.>> 5#Yoa 21:3Newoliki ꞉Simon ajoki, <<Laiteng'enani, ikitonyuaa iyioo aas siaai kuarie pooki kake eitu kitum toki, naa kore tankaraki nitejo iyie nejia kaitodoki naa lgiitani atua nkare.>> 6#Yoa 21:6Kore payie eas ninche nejia, neibung sinkirri kumo oleng ana metang'asu lgiitani aadung'o. 7Neroju lboitieii lenche ootii meli e are meotu aaret. Nepuonu, neiput melin pukura are sinkirri metaa keimis. 8Kore payie edol Simon Petero inia, negil kung tekue Yeso nejoki, <<Chomo tung'ayieki nanu Laitoriani, amu kara nanu ltung'ani loo ng'ok!>> 9Amu keing'asie ninye oleng o lolo pooki ooboitiere tankaraki nkumoin ee sinkirri ooibung'a. 10Neing'asiate abaki oleng Yakobo o Yoana, lolo ayiok le Sebedayo oaara lboitieii le Simon. Nejoki ꞉Yeso Simon, <<Miurieicho, amu kore ang'asu taata iaku laibung'ani loo ltung'ana alang tinimbung sinkirri.>> 11Kore payie eipung'okinyie nenia melin enche nkop natoyio, neing'uaa ntoki pooki neirukurukore ninye.

Eichiunyie ꞉Yeso ltung'ani oata nkeeya ee lbolot

(Matayo 8:1–4; Marko 1:40–45)

12Kore etii Yeso lobo loo lolo kerenketi, netii inie ltung'ani oata nkeeya ee lbolot. Kore payie edol ꞉ninye Yeso nenang nkop to nkomom nesai ajoki, <<Laitoriani tiniyieu, ikindim aichiunyie matusupata.>> 13Neitorioo Yeso nkaina neiseyie ninye nejoki, <<Kayieu naaichiunyie. Tusupata!>> Neichiu ninye inia kata nkeeya ee lbolot. 14#Lal 14:1–32Nejoki ꞉Yeso ninye payie meliki hoo ltung'ani. Nejoki, <<Chomo ntoduai koon ta laitainoni la lasar, nintai lasar ana naitanapichie Musa payie eaku limunoto too ltung'ana pooki.>> 15Nebulaa aitoki lomon le Yeso, nepuonu lturrurri loo ltung'ana aainining, neichiunyieki moyianitin enche. 16Kore chiaake Yeso, naa keing'uaa ninche nelo loliyio aomon.

Eichiunyie ꞉Yeso ltung'ani tardoi

(Matayo 9:1–8; Marko 2:1–12)

17Kore mparri nabo eiteng'enicho Yeso, netii Lparisayo o laiteng'enak loo nkitanapat inie aawueni, ooing'uaa nkang'ite pooki ee Galilaya o Yudea o Yerusalem. Netii ngolon e Laitoriani tenebo o ninye payie etum aichiunyie ltamoyia. 18Naa keatae apa lewa oaanapita ltardoi otigilgile to lchoni, nenyok aajo payie eitijing nkaji aaiteper tekue Yeso. 19Kore tankaraki ketii apa inie lturrur, nelau ninche mpaach naitijing'ie atua. Neiliepie nkeper e nkaji, nebol nkisiapet neitodoyio aaimie inie to lchoni aaitodoki tekue Yeso te nkiji ee ltung'ana. 20Kore payie edol ꞉Yeso nkurukoto enche nejoki, <<Lotung'ani ikitapalikaki ng'ok inono.>> 21Kore laiteng'enak loo nkitanapat o Lparisayo, neng'asu aaipara maate aajo, <<Ng'ae dei ele oiro adek Nkai? Ng'ae oidim atapaliki ng'ok mara Nkai ake apeny?>> 22Naa kore amu keyielo Yeso mparrunot enche newoliki ajoki, <<Aanyo payie iparraa kuna baa taa ltauja linchi? 23Kaa nalelek? Tanajo, <Ikitapalikaki ng'ok inono,> anaa tanajo, <Inyuo, chomo!>? 24Kake kore payie iyielouu aajo keata Nkerai e ltung'ani nkitoria to nkop napalikinyie ng'ok>> - nejoki ilo tung'ani otigilgile - <<Kaajoki iyie, inyuo, tarrapu lchoni lino chomo nkang!>> 25Neinyuototo nabokata aitache tekue ninche, nerrapu lchoni lenye opetita nelo nkang errepita Nkai. 26Neing'asia ninche pooki oleng, neng'asu aarrep Nkai. Neguretu oleng nejo, <<Kore anapar, naa ikitoduaa mbaa e nking'asia.>>

Nkipototo e Lawi

(Matayo 9:9–13; Marko 2:13–17)

27Kore tesiedi ana, neipung Yeso ta nkaji, neing'or laitalakunoni le kodi oji nkarna Lawi ewuon ta nkaji naitalakunyieki kodi nejoki, <<Rukurukoreeki nanu!>> 28Neing'uaa Lawi ntokitin pooki, neinyuototo airukurukore Yeso.

29Neitibiraki Yeso ndaa kitok ta nkang enye. Netii inie siamu kitok ee laitalakunok le kodi o lkulikae oonyeita ndaa tenebo o ninche. 30#Luka 15:1,2Neing'unyung'unyaki Lparisayo o laiteng'enak loo nkitanapat looiteng'eni lenyena aajoki, <<Aanyo payie irrutuchocho, nimatichocho tenebo o laitalakunok le kodi o loaata ng'ok?>> 31Newoliki ꞉Yeso ninche ajoki, <<Mara lolo lememoyiaa ooyieu labaani kake lolo oomoyiaa. 32Eitu alotu aipot loosipat, kake loaata ng'ok ayewuo aipot payie eibelekenya.>>

Nkipara naipirita enata ee nkutukie

(Matayo 9:14–17; Marko 2:18–22)

33Nejoki ꞉lkulie tung'ana, <<Keen chiaake looiteng'eni le Yoana nkutukie neomon Nkai, naa nejia sii eiko looiteng'eni loo Lparisayo, kake kore linono kerrutucho nematicho.>> 34Nejoki ꞉Yeso, <<Amaa sa, indimdim aaiteena nkutukie lolo ooitoomonoki te nkiyema ewuon eboita o loyemicho? 35Kake kebau kenya nkata nayae loyemicho aaitung'aa ninche, naa keen ninche nkutukie inia kata.>> 36Neliki nkitanyanyukoto ajoki, <<Meatae lokiju rache e nkila ng'ejuk neripaki nkila musana. Kore rache e nkila musana naa kekij nkila ng'ejuk, amu mejing'a rache ng'ejuk o inia musana. 37Nemeatae aitoki ltung'ani opik naichuo e lmusabibu ng'ejuk lbenia musan, amu kore naichuo ng'ejuk kedany lbenia musan, neibukori inia aicho nerroyo lolo benia. 38Kake meata ajo mepiki naichuo ng'ejuk e lmusabibu atua lbenia ng'ejuko. 39Naa meatae ltung'ani omat naichuo musana oyieu aitoki naichuo ng'ejuk tankaraki kejo, <Musana supat.> >>

Currently Selected:

Luka 5: saq

Highlight

Copy