Luka 4

Etetemaki Yeso

(Matayo 4:1–11; Marko 1:12–13)

1Nerrinyunyie Yeso eing'uaa sere e Yordan ebore Ltau Sinyati. Nerik ꞉Ltau Sinyati lkees, 2metetema ꞉Chitani tee mperot 40. Neitu enya toki tee nenia perot 40, naa kore payie eichunye nenia perot, near ꞉sumach. 3Nejoki Chitani, <<Tanaa ira iyie Nkerai e Nkai, tiaaki ele soit metaa mukate.>> 4#Nkit 8:3Newoliki ꞉Yeso ajoki, <<Keigeroki aajo, kore ltung'ani naa mara mukate apeny eichiwue.>>

5Nerik ꞉Chitani nkeper e ng'oji neodo, neitodol nkitoria pooki e nkop te nkini kata. 6Nejoki ꞉Chitani, <<Kaaicho iyie ana kitoo o murdaicho enye pooki, amu nanu eichooki naa kaicho pooki ng'ae layieu. 7Tanaa naa ikigilaki kung asai nanu, neaku kuna pooki ninono.>> 8#Nkit 6:13Newoliki ꞉Yeso ajoki, <<Keigeroki aajo, <Tasayia Laitoriani Nkai ino apeny, naa ninye apeny siaayia.> >> 9Nerik ꞉Chitani ninye Yerusalem, neitacheyie to ng'oji neodo aisul pooki ta nkaji e Nkai nejoki, <<Kore tanaa ira iyie Nkerai e Nkai, tusulai koon 10#SNk 91:11,12amu keigeroki aajo,

<Ikirewaki ꞉Nkai lmalaikani lenyena,

mikitirripo> 11naa

<Iking'amaa taa nkaik enche,

payie mikinkub hooyia soit ndap ino.> >>

12 # Nkit 6:16 Newoliki ꞉Yeso ajoki, <<Ketejoki, <Mitem Laitoriani Nkai ino.> >> 13Kore payie eidip Chitani atetema tee ntemat pooki, nelo aing'uaa ana metabau nkata nairirikino.

Ng'asunoto e nkiteng'ena e Yeso ta Galilaya

(Matayo 4:12–17; Marko 1:14–15)

14Nerrinyo Yeso alo Galilaya to ngolon e Ltau Sinyati, neibulaa lomon lenyena lubot pooki naanyikita inie. 15Neiteng'enicho tee Sinagogini#4:15 Kore Sinagogi naa nkaji naomonie ꞉Lyiaudi Nkai. enche, nerrep ninye ꞉ltung'ana pooki.

Etanyaki Yeso ta Nasaret

(Matayo 13:53–58; Marko 6:1–6)

16Nelo Yeso lkerenket le Nasaret, inie netubulunyie. Kore mparri e Sabato#4:16 Kore Sabato naa mparri e sapa e uki too Lyiaudi. Kore ana parri naa ne Nkai. Naa keyeng'iyeng'e apa Nkai tana parri, eidipa aitibira ntoki pooki. Naa inia payie eyiere neyeng'iyeng'a ltung'ana lenyena neitoki asai ninye. Ng'as 2:2–3. nejing atua Sinagogi ana chiaake neas. Kore payie einyuototo aisom Lkigerot Sinyat, 17neichori mbuku e loiboni le Nkai oji Isaya, nebol, netum ng'oji neigero ajo,

18 # Isa 61:1,2 <<Kore Ltau Sinyati la Laitoriani, naa ketii tenebo o nanu,

amu kaategelua Laitoriani

paaliki laisinak Lomon Supati.

Kaaterewa matiliki looena lakunoto enche,

naliki lmodook metodolicho,

nalaku mechomo lolo ooironyitae,

19nalikoo lari oitodolu Laitoriani omom enye.>>

20Neiken mbuku, nerrinyoki laisiaayiani newuon. Neing'or ninye ꞉ltung'ana pooki ootii inia Sinagogi, 21neng'asu airorie ninche ajoki, <<Kore anapar etabaitie kulo kigerot tee nkiyiaa inchi.>> 22Kore lolo pooki, nerrep ninye. Neing'asia too lomon le munyani ooimunyie nkutuk enye neipara aajo, <<Mara dei layieni le Yosep ele?>> 23Nejoki ꞉Yeso ninche, <<Meatae ajo mikijokiki ana dung'et e rache, <Labaani, tabaa koon. Kore pooki nikitining'o aajo itaasa te Kapernaum taasa abaki tene to nkop ino.> >> 24#Yoa 4:44Neitoki ajoki, <<Kedede kajoki ntae, meatae loiboni le Nkai oyanyiti taatua nkop enye. 25#1Lki 17:1Kake kesipa kajoki ntae, keatae apa nkoilia kumo to nkop e Isirael ng'amata e Elija payie eikeni chumata larin okuni o lapatin ile. Kore inia kata, neibulaa lameii kitok nkop pooki. 26#1Lki 17:8–16Kore apa Elija, eitu erewakini nabo taatua nana, mara ake netii nkoiliai nabo e Sarepata to nkop e Sidon#4:26 Kore Sidon naa lkerenket lemetii atua nkop e Isirael.. 27#2Lki 5:1–14Kore te Isirael ta ng'amata e loiboni le Nkai oji Elicha, neatae lkumo oaata nkeeya ee lbolot#4:27 Kore nkeeya ee lbolot naa moyian e lchoni., nemeatae looichiunyieki mara Naaman, ltung'ani oing'uaa Siria.>> 28Kore lolo pooki ootii atua Sinagogi, neiputakino ngoro ening'ito inia. 29Neinyuototo ninche nemiraa te lkerenket, neya nkeper e lmaawue le ilo owua otechetieki lkerenket lenche, payie etum aatuumai. 30Kake neim ninye terichet ninche, nelo aing'uaa ninche.

Etaarayie ꞉Yeso lairiruai

(Marko 1:21–28)

31Nedoyio Yeso alo Kapernaum lkerenket otii Galilaya, neiteng'en ninche tee mperot e Sabato. 32#Mat 7:28,29Neing'asiae oleng te nkiteng'enare enye, amu keiro te rereii oata nkitoria. 33Kore taatua Sinagogi netii ltung'ani oiputa lairirua, nebuak to ltoilo sapuk 34ajo, <<Ooi! Nyo iyieunyie iyioo Yeso le Nasaret? Iyewuo aar iyioo? Kayielo ajo ng'ae ira, Sinyati le Nkai.>> 35Nebuaaki ꞉Yeso aing'ode ajoki, <<Tigirai, mpung'u tung'ai ninye!>> Nerrek ninye ꞉ilo airirua taatua ltung'ana neipung aing'uaa meatae lbae otipika. 36Neing'asia ninche pooki, neing'amng'am aajo, <<Kaa bae ana, eji kore te nkitoria o ngolon, kearaa lairiruani meeipung'o?>> 37Kore lomon ooipirita ninye, nebulaa too lubot pooki e inia kop.

Eichiunyie ꞉Yeso ltung'ana kumo

(Matayo 8:14–17; Marko 1:29–34)

38Neipung'u Yeso te Sinagogi, nelo nkaji e Simon.#4:38 Kore Simon naa kera apa lkipaaret obo le Yeso, neji nkae arna enye Simon Petero. Naa kore nkautani e Simon keibung'uta nkirewua oleng, neomoni ninye metereto. 39Neitache Yeso airrigokino ninye, nebuaaki nkirewua metung'ai, neing'uaa ninye ꞉nkirewua. Neinyuototo nkautani e Simon inia kata aisiaai ninche.

40Kore edooyo ndama, neyau ꞉lolo pooki oaata ltamoyia oaata moyianitin ee mpukunot naapaapaacha netii ninye, neichiunyie pooki ng'ae omuai eiteleki nkaik enyena. 41Neipung'u lairiruani aaing'uaa ltung'ana kumo eichir aajo, <<Ira iyie Nkerai e Nkai.>> Nebuaaki ꞉Yeso ninche aing'ode nemitiki eiro, amu kore lairiruani naa keyielo aajo kera ninye Kristo.#4:41 Kore Kristo Keidimi aatejo Mesia.

Etilikoyie Yeso taatua Sinagogini

(Marko 1:35–39)

42Kore naikenyunyie, neipung alo ng'oji neliyio. Neing'oru ninye ꞉lturrur kitok, nebaya netii nesaan aaibooyo payie meing'uaa ninche. 43Nejoki ninche, <<Keiririkino payie aliki aitoki Lomon Supati le nkitoria e Nkai lkulie kerenketi, amu tankaraki inia payie aaterewuaki.>> 44Nelo kue eiteng'enicho tee Sinagogini e Yudea.#4:44 KoreYudea naa nkop ee Lyiaudi, neji too lkulie kigerot Galilaya.

Currently Selected:

Luka 4: saq

Highlight

Copy