Luka 24

Mpiunoto e Yeso

(Matayo 28:1–10; Marko 16:1–8; Yoana 20:1–10)

1Kore ta mparri ekue e sapa, payie eng'asu aisuruanu, nepuo nana tomonok nkurarei enapita ntokitin naarropil naaitibirita. 2Neiniapu ilo soit eibeleleng'oyieki aaitalam nkurarei. 3Kake kore pejing ninche, neitu etum sesen la Laitoriani Yeso. 4Kore ake ewuon eing'aing'ai ninche tankaraki inia bae, nedol ake inia kata ltung'ana oare ooitachoo tabata ninche ooichopito nankan naaitintil. 5Kore eiputukunyuto, eirrigoki nkomomi enche nkop nejoki ꞉lolo tung'ana, <<Aanyo payie iyiayaya loichu taatua lootuata? 6#Mat 16:21, 17:22,23, 20:18,19; Mrk 8:31, 9:31, 10:33,34; Luka 9:22, 18:31–33Metii ninye ene, kake etipiwua! Entaparru netiaka ntae ewuon etii Galilaya 7ejo, <Kore Nkerai e ltung'ani, naa meatae ajo pee mepiki nkaik ee lolo tung'ana oaata ng'ok, nechei to lmusalaba, nepiu ta mparri e uni.> >> 8Neparru ꞉ninche lolo omon apa ootejo. 9Kore payie echukunye ninche te nkurarei, neliki loochi ooiteng'eni tomon o obo o lolo kulikae, nana baa pooki. 10-11Kore kuna tomonok naa Maria Magadalena o Njoana o Maria ng'otonye Yakobo o nkulie tomonok naaboitiere ninche. Neliki ꞉ninche lkipaareta kuna baa, kake kore too lkipaareta, ketuwuana kulo omon ana meitoki, neitu eiruk ninche. 12Neinyuototo Petero, nekuet abaki nkurarei. Neirrigo airumrum atua, nedol lolo kijat laa nankan naapuyiapui aapeny naairinieki sesen, nerrinyo ang eing'asie te inia nataase.

Echomo lkipaareta oare Emaus

(Marko 16:12–13)

13Kore apa inia parri, epuoito looiteng'eni oare le Yeso lkerenket kini oji Emaus, oara matejo kilomitani 11 te Yerusalem, 14keirorita ninche maate, aaimaki mbaa pooki naataasate. 15Kore ewuon eirorita maate aaimaki kuna baa, nenyikaki ꞉Yeso, neiriamari tenebo o ninche. 16Kake keikenoki nkonyek enche payie meyielou ninye. 17Nejoki ꞉Yeso ninche, <<Akua omon kulo liroritata ipuoitoto?>> Neitachoo ninche, eisinanio. 18Kore lobo lenche oji nkarna Kileopas, newoliki ajoki, <<Amaa, iyie ake apeny lomoni taatua Yerusalem, eji paa miyielo mbaa naataasate teinie to kuna perot?>> 19Neipar ajoki, <<Akua baa?>> Nejoki ꞉ninche, <<Mbaa naaipirita Yeso le Nasaret, aa kore apa ninye naa kera loiboni le Nkai, naa laidimani taa asat o tee rerei tekue Nkai o ltung'ana pooki. 20Kore lkutuaa laa laitainok la lasar o lkutuaa lang, neichooyo ninye meiguanareki, neri metua, nechei to lmusalaba. 21Kake ikiata apa iyioo siligi aajo ninye olaku Isirael. Ee, kake kore etiu nejia, anapar mparri e uni etaasate kuna baa. 22Naa kore aitoki, keing'asia iyioo nkulie tomonok taatua iyioo naachomo nkurarei duo te siran, 23neitu etum sesen lenye. Nechukunyie nejoki iyioo, eji keipung'okita ninche ꞉lmalaikani ootiakita keichu. 24Naa kore sii lkulikae ootii tenebo o iyioo, kechomo nkurarei netum ana natilimutua nenia tomonok, kake eitu edol ninye.>> 25Nejoki ninche, <<Lotung'ana kulo oaamada, iatata ltauja oogol nimirukuruk nenia pooki naatejo loibonok le Nkai! 26Amaa, mara meatae ajo meitami Kristo#24:26 Kore Kristo naa keidimi aatejo Mesia. sina, nejing atua nkitoo enye?>> 27Neng'asunyie Musa o loibonok pooki, eibalakinyie ninche lomon ooipirita ninye koon taatua Lkigerot Sinyat pooki.

28Kore payie enyikaki inia ang duo napuoito, neitaakino ninye keikonyi atuwuana kelo aituruk. 29Neitirrichaki aaibok ejoki, <<Toboitiere iyioo amu kemuto, netaa kuarie.>> Nejing nkaji aboitiere ninche. 30Kore etowuana ninye te misa aanya ndaa tenebo o ninche, nerrapu mukate, nemayian, negil, neicho ninche. 31Neboli nkonyek enche neyielou ninye, neimis ninye taatua ninche metaa merokure edolita. 32Nejokino, <<Amaa, mara keinuaate duo ltauja lang inia kata eirorie iyioo to nkoitiei, ebolokita iyioo Lkigerot Sinyat?>> 33Neinyuototo ake ninche inia kata, nerrinyo Yerusalem, neiniapu lkipaareta tomon o obo le Yeso eiturrurro o lolo ooboitiere 34ejo, <<Kedede ketipiwua Laitoriani. Naa keipung'oka Simon.>> 35Kore laaduo ooiteng'eni oare, neliki ninche lomon ootupukutua to nkoitiei o neikuna payie eyielou ninye inia kata payie egil mukate.

Eipung'oka ꞉Yeso looiteng'eni lenyena

(Matayo 28:16–20; Marko 16:14–18; Yoana 20:19–23; Asat 1:6–8)

36Kore ewuon eirorita ninche, neitache Yeso te nkiji enche nejoki, <<Metaa seriani tenebo o ntae.>> 37Neiputukuny ninche, neguretu ejo milika etoduaa. 38Nejoki ninche, <<Aanyo payie inyamalulu, naa aanyo payie einyuo lng'ach taatua ltauja linchi? 39Eng'ura nkaik o nkejek ainien, amu nanu dei koon ele! Eraprapaaki nanu niking'orng'or, amu kore milika naa meata sesen o loik ana nidolitata ajo kaata nanu.>> 40Kore payie eidip atejo nejia, neitodol ninche nkaik o nkejek enyena. 41Kore tankaraki ewuon ake eitu eiruk ꞉ninche tankaraki ng'ida, neing'asiate nejoki ꞉Yeso, <<Iatata ndaa tene?>> 42Neicho ninye orati e sinkir opejo, 43nerrapu, nenya tekue ninche.

44Nejoki ninche, <<Kulo naa lomon lainien latilika ntae ewuon apa ati tenebo o ntae, nchere kore mbaa pooki /naaigeroki naaipirita nanu taatua nkitanapat e Musa, o Lkigerot Sinyat loo loibonok le Nkai o mbuku ee Sinkolio le Nkai, naa meata ajo mebaya.>> 45Kore ake inia kata, nebol ninche nkuechi meteyielou Lkigerot Sinyat. 46Nejoki ninche, <<Nchi apa eigeroki aajo: Kore Kristo naa keitami sina, nepiu taatua lootuata ta mparri e uni. 47Naa kelikori ta nkarna enye nkibelekenyata nayau mpalikinoto ee ng'ok too lochon pooki, ang'asu te Yerusalem. 48Naa ntae lasipak o lalikorok loo kuna baa! 49#Asat 1:4Kore naa, karewaki nanu ntae lekutuk oitayia ꞉Papa lai, kake entewueni te lkerenket ana meichori ntae nkidimata naaing'uaa keper.>>

Eiliepieki Yeso aaya chumata

(Marko 16:19–20; Asat 1:9–11)

50 # Asat 1:9–11 Nerikoo ꞉Yeso ninche aitung'aa ilo kerenket ana metabaki ng'oji neji Betania. Neapaa nkaik enyena, nemayian ninche. 51Naa kore emayianita ninche, neorere, neiliepieki aaya chumata. 52Nesai ꞉ninche ninye, nerrinyo Yerusalem te ng'ida kitok, 53Newueni ta nkaji e Nkai nkata pooki errepita Nkai.

Currently Selected:

Luka 24: saq

Highlight

Copy