Yoana Mbaa naaituruku
Mbaa naaituruku
Kore kulo Omon Supati naa Lkipaaret oji Yoana oigero etii lkerenket oji Epeso matejo, terichet lari le 90 o 96 eidipaki aatiuu Yeso Kristo. Kore mbaa naaigero naa keigero era lobo otoduaa asipu nenia baa.
Kore ana netejo ninye koon to motua e tikitam, lkereri le osom o obo, naa keigeroki kuna baa payie itumtum aairuko aajo kore Yeso naa ilo Aitejeunoni apa oaanyutae oji Kristo, nera Nkerai e Nkai. Naa kore ta nkarna enye, niatata nkichon nemeiting tinirukuruk inia. Ketamawuaki ta ng'asunoto e ana buku aajo kore Yeso naa Rerei otii apake tenebo o Nkai ewuon eitu eitaini nkop, nera Nkai, ilo oyewuo nkop era ltung'ani, nenyauni sii aajo Yeso eing'uaa nkichui e nkop pooki. Neitoki Yoana aidikidiku alimu asat e nking'asia naataasa ꞉Yeso naaitodolu nkitoo enye o neikuna tenetumore airorie larikok loo Lyiaudi lemeiruk aajo Yeso ilo Aitejeunoni apa oaanyutae, nera Nkai koon. Kore motua e tomon o okuni metabaki ne tomon o sapa, neibalunyie netiu sotua oata ꞉Yeso o looiteng'eni lenyena o neikuna payie eilejlej ninche te inia kuarie apa naibung'ieki ninye.
Kore eata Matayo kipirte naitodolu ajo kedede kore Yeso naa Mesia, neitodolu Marko o Luka aajo kedede kera Laisiaayiani le Nkai nera ltung'ani, kore Yoana, neitodolu ajo kera Yeso Nkai koon te ndedei, nelimu nkichon o nkisiaayiare enye te inia duata ee mbaa. Kore nkata kitok, nelimu Yeso koon ejo kera ntokitin ake naadoli te nkichon e ltung'ani mperot pooki. Kore nenia tokitin naa wong'an o mukate o nkare o ltim o lchekut o lmusabibu o ndedei o nkulie kumo. Ketejo sii kera nkoitiei o ndedei o nkichon. Keyieu apa Yoana nerub mbaa e tipat naaigeroki too kunda bukuii nkulie ee Lomon Supati, inia payie eigero mbaa kumo nemeigero tee nenia kulie bukuii. Kore sii aitoki, eitu eigil ninye oleng alimu mbaa naatilimutua lolo kulie. Kore Yoana motua e uni lkereri le tomon o ile naa ninye ltau loo Lomon Supati, tankaraki kelimu ilo kereri ajo aanyo payie eirriwua ꞉Nkai Yeso Kristo Nkerai enye nkop, neitodolu inia ajo aanyo payie eipotuni ltung'ana metaa looiteng'eni le Yeso.
Currently Selected:
Yoana Mbaa naaituruku: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy