Yoana 1

Neaku Rerei sesen

1Kore apa ta ng'asunoto naa ketii apake Rerei, netii ilo Rerei tenebo o Nkai naa Nkai ilo Rerei. 2Ketii apa ninye tenebo o Nkai ta ng'asunoto. 3Naa te ninye eitibiraki ntokitin pooki, nemeatae ntoki naitibiraki taatua ntokitin naaitibiraki metii ninye. 4Naa ketii atua ninye nkichui, naa kore inia kichui naa ninye wong'an ee ltung'ana. 5Neong'u wong'an taatua naimin, neitu emir ꞉naimin inia wong'an.

6 # Mat 3:1; Mrk 1:4; Luka 3:1,2 Keatae apa ltung'ani oirruayie Nkai oji Yoana. 7Keyewuo apa ninye payie eaku limunoto, aliki ltung'ana sipata naipirita naduo wong'an, payie etum ninche pooki aairuko te ninye.#1:7 Todua Yoana 20:31. 8Kore apa ninye naa mara inia wong'an, kake keyewuo alikoo sipata naipirita wong'an, 9inia wong'an nadede nalotuta apa nkop, naa ninye naicho pooki ng'ae wong'an.

10Kore apa ilo Rerei naa ketii apake nkop, neitibiraki nkop aaimunyie ninye, kake eitu eyielou nkop ninye. 11Naa keyewuo apa ninye nkop ee ltung'ana lenche, kake eitu eng'amaa ꞉ninche ninye. 12Kake kore pooki oang'amaa neiruk ninye, neicho metaa nkera e Nkai. 13Ketiiwuaki ninche metaa nkera e Nkai, kake mara te ichoi e ltung'ani. Namara sii te yieunoto ee ltung'ana etiiwuaki ninche tanaa sii ne lee, kake Nkai makoon natiiwua ninche.

14Neaku ilo Rerei ltung'ani nemany atua iyioo. Nikidol nkitoo enye, inia kitoo natum ake ꞉nkerai nabo inoti ta Papa lenye. Naa kebore ninye munyani o ndedei. 15Naa ketilika ꞉Yoana ltung'ana sipata naipirita ninye ebuak ejo, <<Ele taa apa alimuta payie ajo, <Ketii kenya lolotu tesiedi nanu laaisul, amu ketii apake ewuon maatae nanu.> >>

16Naa kore amu kebore ninye munyani o ndedei, ikitang'amaitie sii munyani ejing mpaach e nkae munyani te inia kuputakinoto enye. 17Amu kore Nkitanapat naa keichorua Nkai aimunyie Musa, kake kore munyani o ndedei neimunyie Yeso Kristo. 18Nemeatae hoo obo otodua Nkai aikata, mara ake inia kerai enye nabo inoti.#1:18 Kore inia kerai enye nabo inoti naa keji too lkulie kigerot inia kerai enye nabo inoti oara ninye makoon Nkai. Netii tenebo o Papa lenye, naa ꞉ninye apa /oibalunyie.

Limunoto e Yoana Laipatisani

(Matayo 3:1–12; Marko 1:1–8; Luka 3:1–18)

19Ana taa limunoto e Yoana, payie erewaki apa ꞉larikok loo Lyiaudi ootii Yerusalem laitainok la lasar o laretok lenche ta nkaji e Nkai, meipara ninye aajoki, <<Ng'ae ira iyie?>> 20Neliki ꞉Yoana ninche sipata eitu emiki ajoki kore sipata naa ana, <<Mara nanu ilo Aitejeunoni oanyutae.>> 21#Mal 4:5, Nkit 18:15,18Neipar ninye aajoki, <<Naaku ng'ae ira iyie? Ira Elija?>> Nejoki, <<Mara.>> <<Ira ilo oiboni le Nkai oaanyutae?>> Newoliki ajo, <<Mara.>> 22Neitoki aajoki, <<Naaku ng'ae ira iyie? Towoliki iyioo nikijoki lolo ooirriutua iyioo. Ng'ae dei ijo iyie ira?>> 23#Isa 40:3Newoliki ajoki,

<<Kara <ltoilo le ilo obuakita to lkees,

Entibira aaipidaki nkoitiei naimu Laitoriani tenelotu!> ana natejo apa loiboni le Nkai Isaya.>>

24Kore lolo ooterewuaki, naa Lparisayo eing'uaa. 25Neipar Yoana aajoki, <<Amaa tanaa mira iyie Mesia, nimira Elija anaa ilo Oiboni le Nkai oaanyutae, aanyo payie impatisicho?>> 26Nejoki ꞉Yoana, <<Kaipatis nanu ta nkare, kake ketii atua ntae lobo limiyielolo aajo ng'ae. 27Naa ninye olotu tesiedi nanu, naa maaichiaakino payie alaku nkeenita ee namuka enyena.>> 28Naa ketaasate apa kuna baa pooki te Betania natii mbata e nkiliepunoto e ndama, e lkokun le sere e Yordan, inie neipatisichere Yoana.

Lkuo leker le Nkai

29Kore mparri naijipita inia, nedol ꞉Yoana Yeso elotuta aipidakino ninye nejo, <<Leilo Lkuo leker le Nkai, oworu nkop ng'ok pooki! 30Naa ninye taa apa aimakita payie ajo, <Ketii kenya lolotu tesiedi nanu laaisul amu ketii apake ewuon maatae nanu.> 31Neitu apa ayielou ajo ng'ae ninye, kake kayewuo aipatisicho ta nkare payie eibalunyieki ninye too ltung'ana le Isirael.>> 32Nelimu Yoana sipata enye ajo, <<Katoduaa Ltau Sinyati edou eing'uaa chumata te nkitanyanyukoto e nkutukurruk, newuenie ninye. 33Naa eitu ayielou nanu ninye, kake kore ilo laaterewua maipatisicho ta nkare, naajoki, <Kore ilo lidol edoki Ltau Sinyati awuenie, naa ninye olotu aipatisicho ta Ltau Sinyati.> 34Kore ana, naa Katoduaa, nalikoo sipata nchere kera ninye Nkerai e Nkai.>>

Looiteng'eni lekue le Yeso

35Kore ta mparri naijipu inia, neitache aitoki Yoana teinie o looiteng'eni lenyena oare. 36Kore eimita Yeso inie neing'or ꞉Yoana nejo, <<Looldo Lkuo leker le Nkai!>> 37Kore payie ening ꞉lolo ooiteng'eni lenyena oare inia, nepuo aairukurukore Yeso. 38Nenang Yeso silig, neing'or eirukurukore nejoki, <<Nyo iyieitata?>> Nejoki, <<Rrabi, kaji ewuenie?>> Kore apa <<Rrabi>> to kutuk enche naa Laiteng'enani. 39Newoliki ajoki, <<Wootu entodol.>> Nepuo ninche aadol inie newuenie ꞉ninye. Kore inia kata naa kenyikaa aaku saai oong'uan e siran, naa ketowuana tenebo o ninye inia parri. 40Kore lobo loo lolo ootining'o apa lomon le Yoana, neirukurukore Yeso, naa Andirea lalache Simon Petero. 41Kore ntoki ekue nataasa Andirea naa keing'orua lalache lenye Simon, nejoki, <<Kitumo ilo Aitejeunoni oanyutae.>> Kore to nkutuk ee Lgirriki naa keji ilo Aitejeunoni Kristo. 42Nerikoki ilo alache lenye Yeso. Neing'or ꞉Yeso ninye nejoki, <<Iyie Simon, layieni le Yoana. Ikiji kenya Kepa.>> Kore Kepa ta nkae kutuk naa Petero.

Eipoto ꞉Yeso Pilipo o Nataniel

43Kore ta mparri naijipu inia, keyieu apa Yeso neing'uaa inie, alo Galilaya. Netum Pilipo, nejoki, <<Wou rukurukoreeki!>> 44Naa kemanya apa Pilipo lkerenket oji Betesaida, omanya sii Andirea o Petero. 45Netum ꞉Pilipo Nataniel, nejoki, <<Kitumo ilo oigero apa ꞉Musa too Nkitanapat, neigero sii Loibonok le Nkai aajo kelotu. Naa ninye taa Yeso le Nasaret, layieni le Yosep.>> 46Neipar ꞉Nataniel ajoki, <<Nasaret! Keatae sa ntoki supat napuku te inie?>> Nejoki ꞉Pilipo, <<Wou toduaa!>> 47Nedol ꞉Yeso Nataniel elotuta, nejo kulo omon oipirita ninye, <<Lele ltung'ani odede le Isirael, lemetii sapare atua ninye!>> 48Nejoki ꞉Nataniel Yeso, <<Aji inko tinikiyielo?>> Newoliki ꞉Yeso ajoki, <<Kaatoduaa ewuon iwuenita taabori lng'aboli, eitu kimpot ꞉Pilipo.>> 49Nejoki ꞉Nataniel, <<Laiteng'enani, Ira iyie Nkerai e Nkai, nira Lkinkii lo locho le Isirael!>> 50Nejoki ꞉Yeso, <<Amaa, iruk dei iyie tankaraki inia naatiaka kaatoduaa iwuon taabori lng'aboli? Ewuon idol kenya mbaa kutuaa e nking'asia, naalang kuna!>> 51#Ng'as 28:12Neitoki Yeso ajoki, <<Kedede, kedede kajoki ntae, idoldol kenya chumata ebolo o lmalaikani le Nkai eiliep, nedoki Nkerai e Ltung'ani.>>

Currently Selected:

Yoana 1: saq

Highlight

Copy