Luka 23

Ewaki Yeso tekue Pilato

(Matayo 27:1–2,11–14; Marko 15:1–5; Yoana 18:28–38)

1Neitache ilo turrur pooki, neya Yeso neti Pilato. 2Neng'asu aaiteeniki ninye aajo, <<Kore ele tung'ani, naa ikitumo eitopong'oo locho lang. Nejoki ltung'ana payie melaaki Kaisari kodi, nejo sii kera ninye koon Kristo, nera lkinkii.>> 3Neipar ꞉Pilato ninye ajoki, <<Iyie dei lkinkii loo Lyiaudi?>>

Newoliki ajoki, <<Iyie ojoito.>> 4Nejoki ꞉Pilato lkutuaa laa laitainok la lasar o lolo turrurri, <<Madol nanu mbae torno te ele tung'ani.>> 5Kake neitirrichaki ꞉ninche aajoki, <<Kore to nkop pooki e Yudea, ang'asunyie Galilaya metabaki ene, naa keing'olng'ola ꞉ninye locho te nkiteng'ena enye.>>

Ewaki Yeso tekue Erode

6Kore payie ening ꞉Pilato ana, neiparu tanaa le Galilaya ilo tung'ani. 7Neyielou ajo ketii Yeso taabori nkitoria e Erode, nereu meiliepa alo neti Erode, tankaraki ketii ninye Yerusalem nana perot. 8Kore payie edol ꞉Erode Yeso, neng'ida oleng tankaraki keteyiewua ta nkata naado apake payie edol ninye, amu ketining'o lomon lenyena, neata siligi ajo kedol nkitodolunoto naje e nking'asia naas ninye. 9Neipar lomon kumo, kake eitu hoo ewoliki ꞉Yeso ninye toki. 10Neitachoo ꞉lkutuaa laa laitainok la lasar o laiteng'enak loo nkitanapat, eiteeniki ninye oleng nelimu mbaa naatoduaa eas o naatining'o ejo. 11Nemen, neikordodoo ꞉Erode o sikarini lenyena Yeso. Neichopoki ꞉ninye nankan supati naitintil, nerriny meiliepa alo neti Pilato. 12Kore inia parri netumo Erode o Pilato neaku lchoreta, amu kore apa tekue, keata ninche lamang'ate.

Etudung'okaki Yeso nkiguana naarieki metua

(Matayo 27:15–26; Marko 15:6–15; Yoana 18:39—19:16)

13Neipotu ꞉Pilato lkutuaa laa laitainok la lasar o larikok o ltung'ana 14nejoki, <<Iyeutua ele tung'ani nati ana ꞉ilo oyeu ng'olng'ol locho. Kake kore naa, atetema ninye tekue ntae, kore ele tung'ani, eitu hooyia adol ntorno too lomon linteenikita. 15Netala sii Erode mbae te ninye, amu ketirrinyua nikitii, nemeatae hoo mbae torno nataasa naichiaakino payie eri metua. 16Naaku naa, kaidong te liche#23:16 Kore apa inia liche naa keinikino loik oopi nkuechi, naa ltung'ana ootudung'okaki lkiye eidong'ieki. nalaku.#23:16 Kore lkulie kigerot naa keponiki lkereri le 17, Amu keichiaakino nelaku ltung'ani obo ta nkata e ilo atim. >>

18Kake nebuak ninche pooki to ltoilo obo aajo, <<Ewata ele tung'ani, nilaakiki iyioo Barabas!>> 19Kore Barabas naa ltung'ani oteenaki te jila, tankaraki ng'olng'ol nabo naipung'ua te lkerenket o arichoi natara ltung'ani metua. 20Neitoki Pilato airorie ninche, tankaraki keyieu apa nelaku Yeso. 21Kake nebuak aajo, <<Techo, techo ninye to lmusalaba!>> 22Neitoki naa aipar ninche, nkata e uni, <<Aanyo, kaa torno dei etaasa ninye? Eitu adol nanu ntoki naarie ninye metua. Kore naa, kaichooyo meeidong'i, nalaaya.>> 23Nereki ninche aabuak too ltoilochi kutuaa, eyieu payie echei ninye to lmusalaba. Nepuo kue aabuaaya. 24Nedung Pilato aimie metaasai nayieu ninche. 25Nelaku ilo oteenaki te jila, tankaraki ng'olng'ol o arichoi natara ltung'ani metua, ilo taa otoomonutua ꞉ninche. Neichooyo Yeso, meitaasi ana nayieu ninche.

Etechoki Yeso to lmusalaba

(Matayo 27:32–44; Marko 15:21–32; Yoana 19:17–27)

26Kore erikito Yeso, neibung ꞉sikarini ltung'ani obo oji Simon le Kirene oing'uaa nkang'ite e oriong e Yerusalem, neiteleki lmusalaba metanapa eirukurukore Yeso. 27Neirukurukore ꞉lturrur kitok loo ltung'ana etii ntomonok naisinanio, neichirita tankaraki ninye. 28Neiwuatuwuatakino ꞉Yeso ninche nejoki, <<Natomonok kuna e Yerusalem, emikinchiraki nanu kake enchira ate o nkera inchi! 29Amu kore naa, kepuonu mperot naa keji, <Kemayiana nkolipiono o nkochuaa nemeicho o lki leitu eitanakicho!> 30#Osea 10:8; Mbo 6:16Naa kore inia kata, keng'asu ltung'ana aajoki lowuan, <Entuurokinoto iyioo!> nejoki ndonyuo, <Esiapai iyioo!> 31Amu tanaa keitaas ꞉ninche kuna baa lcheni ochal, nyo eitaas lotoyio?>>

32Neriki lkulie aitarruok oare, aapuo aar metuata o Yeso. 33Kore payie ebaki ng'oji neji Mborbor e Nkue, nechei Yeso to lmusalaba teinie o lolo aitarruok. Naa kore lobo, ketii mbata e tetene, netii likae mbata e kidienye. 34#SNk 22:18Nejo Yeso, <<Papa, tapaliki ninche amu meyielo neasita.>> Nenuk ninche nkuko, aaor nankan enyena. 35#SNk 22:7Neitachoo ltung'ana aaing'or. Kore abaki laiguanak ootii inie, neikordodoo ninye aajo, <<Keitejewua lkulie, nchoo naa meitejeu koon tanaa ninye Kristo le Nkai, ogeluno!>> 36#SNk 69:21Neikordodoo sii ꞉sikarini ninye, epuonu aayaki naichuo naisiicho, 37nejo, <<Kore tanaa iyie Lkinkii loo Lyiaudi, ntejeu koon!>> 38Naa kore te keper ninye netii lkigerot oojo <<lele lkinkii loo lyiaudi.>>

39Kore lobo loo laaduo aitarruok ootechoki, nedek Yeso ajoki, <<Mira dei iyie Mesia? Ntejeu naa koon o iyioo!>> 40Kake kore ilo likae aitarruoni, newoliki ekusakan ajoki, <<Miurie iyie Nkai, nikitudung'okaki sii iyie lkiye otudung'okaki iyioo? 41Kore iyioo, naa keichiaakino ana, amu ikitumuto laata nairirikino asat ang. Kake kore ele tung'ani, meatae ntoki torno nataasa.>> 42Nejo ninye, <<Yeso! Taparruaaki, tinijing atua nkitoria ino!>> 43Nejoki ninye, <<Kedede kaajoki iyie, kore anapar ikiboitiere nanu to nkop e ng'ida.>>

Lkiye le Yeso

(Matayo 27:45–56; Marko 15:33–41; Yoana 19:28–30)

44-45 # Nai 26:31–33 Kore inia kata, naa matejo saai ile e mparkiji, nejing naimin nkop pooki ana metabaki saai saal etua ndama. Kore nochi anka naor Ng'oji sinyati naaisul pooki o Ng'oji Sinyati ta nkaji e Nkai, nekija te nkiji. 46#SNk 31:5Nebuak Yeso to ltoilo sapuk ajo, <<Papa, nkaik inono apik nkichui ai!>> Kore payie eidip atejo nejia, nedung'o tau. 47Kore payie edol lkitok loo sikarini oobaya ip nabo inia bae nataase, nerrep Nkai ejo, <<Kedede ltung'ani loosipat ele tung'ani.>> 48Kore lturrurri pooki loo ltung'ana ootutumote aaing'or inia bae e nking'asia nataase, kore payie edol, nechuko aapuo nkang'ite enche, eochito lgoitie lenche eisinanio. 49#Luka 8:2,3Neitachoo lolo pooki ooyielo ninye, o nana tomonok naairukurukore ninye ta Galilaya te nalakua, eing'orita kuna baa.

Nukaroto e Yeso

(Matayo 27:57–61; Marko 15:42–47; Yoana 19:38–42)

50-51Keatae apa ltung'ani obo oji nkarna Yosep, oing'uaa lkerenket loo Lyiaudi oji Arimataya. Kera lobo loo lkiama, naa supat nera loosipat. Neitu echamaa inia apa nayieu ꞉ninche o asata enche. Naa keanyuta nkitoria e Nkai. 52Nelo neti Pilato, neomonu sesen le Yeso. 53Neitodou to lmusalaba, neirinaki nanka supat napuyiapui, neiteper to nkurarei nateguetuaki to soit, neitu aikata eiteperieki ltung'ani. 54Kore inia parri, naa mparri e napa#23:54 Kore mparri e napa naa mparri naitibir Lyiaudi ndaa o nkulie tokitin tankaraki Sabato, amu meyiere apa neas ninche siaai ta mparri e Sabato. etaa kebau Sabato. 55Neijipaa ꞉ntomonok naaotuo tenebo o Yeso eing'uaa Galilaya, nedol inia kurarei o neikunaki payie eiteperi sesen lenye. 56#Nai 20:10; Nkit 5:14Nechuko aaitibir ntokitin naarropil o lata naelieki. Kore mparri e Sabato, neyeng'iyeng'a ninche ana nejo nkitanapat.

Currently Selected:

Luka 23: saq

Highlight

Copy