Luka 16

Nkitanyanyukoto e laramatani jartan

1Neitoki Yeso ajoki looiteng'eni lenyena, <<Keti apa ltung'ani parakuoni oata laramatani, neitari ilo aramatani kusaka tankaraki keichirkalie ntokitin e lkitok lenye. 2Neipot ninye nejoki, <Kaa bae ana naning'ito nikimpirita iyie? Nchooki siana ee ntokitin niramatita amu mintoki ara laramatani loo ntokitin ainien.> 3Nejo ilo aramatani ta ltau lenye, <Nyo aas nanu taata? Amu, kaaworu nanu lkitok lai ramat ee ntokitin enyena namaata ngolon naturuchere, naa kore sii tanasaicho, naanya anyit. 4Kayielo nalo aas payie aaitoomon ꞉ltung'ana taa nkajijik enche nkata naaitaini tana ramat.> 5Neipotu lolo oaata silen e lkitok lenye ma obo obo nejoki lekue, <Amaa, kewuaa sile niata e lkitok lai?> 6Nejo, <Ltoii ip nabo#16:6 Kerepaa apa ltoii ip nabo litaii oobaki nkalupuni uni. le lata.> Nejoki, <Nko mpalai naigerore sile ino, towuana, tesioki, ngero onom.> 7Neitoki ajoki likae, <Oo iyie, kewuaa sile niata?> Nejoki, <Lbenia ip nabo sapuki oobore le nkano#16:7 Kore Lyiaudi naa measichere lbenia, kake keasichere motioo kutuaa, aa kore nabo keya lbenia oalang oare sapuki le nkano..> Nejoki ninye, <Nko mpalai naigerore sile ino, ngero ntomoni isiet.> 8Kore ilo kitok, nerrep ilo aramatani oitamaaicho tankaraki njartano enye. Amu kore ltung'ana le nkop, naa keijartani too ltung'ana le mpukunoto enche aalang nkera e wong'an. 9Naa kajoki naa ntae, entaki ate sotuatin ta parakuoicho e nkop, paa tenelai, neitoomoni ntae taa manyichon naabik ntarasi.

10<<Kore loisiligai te nkini naa keisiligai abaki te nkitok. Kore lemeisiligai te nkini naa meisiligai abaki te nkitok. 11Neaku naa, teneitu iakuku ntae looisiligai ta parakuoicho e nkop, ng'ae oisiligie ntae parakuoicho nadede? 12Naa teneitu iakuku looisiligai too ntokitin ee lkulie, ng'ae naa oicho ntae nenia naara nkuninchi? 13#Mat 6:24Meatae laisiaayiani oidim aisiaayia lkutuaa oare. Amu keibai likae nechamu likae, tanaa eibung'are likae nemenu likae. Mindimdim naa aaisiaayia Nkai o parakuoicho e nkop!>> 14Kore einining'ito ꞉Lparisayo pooki oaacham ropiyiani kuna, neikordod Yeso. 15Nejoki ꞉Yeso, <<Ntae naa ake ooitoduaaya ate aaitaakino loosipat tekue ltung'ana, kake keyielo Nkai ltauja linchi, amu kore nailiepie ltung'ana naa ntaboi tekue nkonyek e Nkai.

Mbaa naipirita nkitanapat o nkiyema

16 # Mat 11:12,13 <<Kore nkitanapat o loibonok le Nkai naa ketii apake metabaki Yoana Laipatisani. Naa kore ang'asu inia ng'amata, nelikori Lomon Supati le nkitoria e Nkai. Kore inia kitoria e Nkai, naa kenyok pooki ng'ae ajing to ngolon. 17#Mat 5:18Kelelek payie eich loing'ang'e o nkop alang ltipoti obo loo nkitanapat.

18 # Mat 5:32; 1Lkor 7:10,11 <<Kore pooki ng'ae oar nkauti e mparratut enye neyem nkae, naa keas loloito, naa kore ilo oyem mparratut natara ꞉likae nkauti, naa ketaasa loloito.

Lparakuoni o Lasaro

19<<Keatae apa ltung'ani obo parakuoni oichop nankan naagol nkinyang'a, mugie o naibor, neng'ida mperot pooki enya rraa e nkop. 20Neiteperoki to nkutuk e nkaji enye laisinani obo oji nkarna Lasaro, oata ng'oldonyot kumo te sesen. 21Neng'uar ninye eyieu nenya lpisia oodoyio te nkeper e misa e ilo parakuoni. Naa kepuonu abaki ldein aamej ng'oldonyot enyena. 22Kore tesiedi neye ilo aisinani, neya ꞉lmalaikani aailiepie metowuana to lgoo le Abraam. Neitoki sii ele parakuoni aye, nenukari. 23Kore etii nemeneng'a eata mion e lkiye, neapaa nkonyek enyena, nedol Abraam elakua ewuon Lasaro to lgoo lenye. 24Nebuak ajo, <Ooi! Papa lai Abraam, ng'erruaaki, tereu Lasaro meitodoki nkue e lkumojino lenye nkare naaitong'oki maairopijie lng'ejep lai! Amu kore taatua ele ng'ejep le nkima naa kaanyeita ꞉mion oleng.> 25Kake nejoki ꞉Abraam ninye, <Nkerai ai, taparru tejo itumo apa iyie ntokitin supati te nkichon ino. Kake ketumo Lasaro sinaitin, naa keitigiritae ninye taata tene, niata iyie mion. 26Kore aitoki, ketipikaki terichet iyioo o ntae ng'erem naado, metaa kore lolo ooyieu nelang'u nitii ntae, nemetumoki. Nemelang'u sii lolo ootii nitii, nikitii iyioo.> 27Nejoki ilo parakuoni ninye, <Papa lai, kore tankaraki kaata lalachera imiet, kaasai terewa Lasaro nkang e papa lai, 28metiliki ninche meibelekenyata, payie mepuonu aadoki ene ng'oji e mion.> 29Nejoki ꞉Abraam, <Keata ꞉ninche Musa o loibonok le Nkai, nchoo metining'o ninche.> 30Nejo, <Papa lai Abraam, mara nejia, kake kore tenelo ltung'ani oing'uaa nemeneng'a neti ninche, naa keirriidu.> 31Nejoki, <Tenemening Musa o loibonok le Nkai, meiruk abaki tenepiu ltung'ani eing'uaa nemeneng'a.> >>

Currently Selected:

Luka 16: saq

Highlight

Copy