Rooma 3

Lekka ɗa giimi ma ɗayaŋ

1A Yawudince ka tirta pa, ay maa gu taharriyee ɗa taharro ta zii ka. Goŋŋa pa, ga ay ini me pe maa gu Yawudigee lekka maa gu ƴelewɗiy giimi ku maani? Samanti taharriti appe ay me? 2Ay tirta appe gu Yawudigee pa lekka gaari maani ku samaane pay pay maa gu ƴelewɗiy giimi ku maani. Ka omma pa, ay ga Mella kappiyoogu beneyyiŋgeetee. 3Guu daare soopa poociɗe jobbiti beneyti. Ma kaaka pa, ke beneyya pe kee me? Ma poocico ta jobbiti beneyti taata pa, ga Mella melaa aɗɗe kanti? 4Gata melaa ɗa ta kaw! Innasoopa aŋka ke ibiniyya keeke: Mella, gata beneyya seene ka o giimi soopa paracco guta ay boroolee. Keeke pa, ay aleŋ maa gi Kitamniti Mellayi beneyye gee: «Kii Mella, ki ibinenta ɗayaŋ ma beneyyiŋgeecam o wikinne maa guu loomoyyam, ga kii pa nosorre#3.4 Elloŋ Soom 51.6..» 5Ay tirta appe gu gaartine ku ɗayaŋ ɗa gaariyoo car̰aŋ oko giimo kadar ga Mella ɗayaŋ. Ma kaaka pa, ke beneyya pe kee me? Oko mooyico giimo ka, ga Mella ɗayaŋ ɗa maa ga gaarinneega bogorti oko gaartine kooko ma ɗayaŋ ɗa. 6A innasoopa ga ay tirta ɗa ta kaw ga Mella alɗo ɗa ɗayaŋ. Ay Mella ma caɗaayo parlane oko giimi ku dunuuniti. Gaa ɗayaŋ ɗa pa, ga caɗaayo pe gaa me parlane?

7Gimu ma melewki beneyyi keeke pa gederra ga beneyyiɗo gaa: «Gaa ay ma boroltu gi seeniti Mellayi okomɗo ƴiila purta maa gi gaaricca darjanti, ga ayme payya ga naata alɗo gemmenta parlanti ma giimi ma leewa zunubgee?» 8A guta pa giimi daare ma koppiyaw ma gaari goo na beneyya naa: «Leene ka miɗɗa ku maa ga ka samaane oomiɗo purta.» Giimi kotti pa ga ay tirta appe gi parlane bammiɗiy.

9A kee Yawudigee pa, ga Mella leewikinee aɗɗe gaa ke ƴiilay giimi ku maani? Kaw! Keeke pa na gaaritoŋga paaɗe: Yawudigee o giimi ma ay Yawudigee ɗa paracco gu zunubgee gederriyo. 10Keeke pa ay aleŋ maa gi Kitamniti Mellayi beneyye gee:

«Lekka ɗa gimu ma ɗayaŋ unti Mellayi,

lekka ɗa ya kaƴi.

11Lekka ɗa gimu ma ibinya ka samaane,

o ga lekka ɗa gimu ma dekerra ga ibiniyya Mella.

12Paracco gu rebelliyee kupo oko Mellayi,

guu deeɗe pe liyaw gonek ka.

Lekka ɗa ya kaƴi ma leewa ka samaane#3.10-12 Elloŋ Soom 14.1-3 o Soom 53.2-4..

13Korkorrenigeeco ay aleŋ moone ta iyyenta,

ma beneeco gu daɓalla giimi ka,

letticco lekka sammane ka koykokko#3.13 Elloŋ Soom 5.10 o Soom 140.4..

14Beneeco onokke ma beneyyiŋgee ku booliti

o ku miɗɗa ta kaw ma raɗakka#3.14 Elloŋ Soom 10.7..

15Haŋka aɗe gu gaɗakka ma asinco diyaawi giimo.

16Kulla were aɗe maa guu ƴiileero gu ɗemekkaa,

guu mirɗo zorontiyo oko giimo.

17Botol ka aapiyati saa gu ibinya ɗa#3.17 Elloŋ Esaya 59.7-8..

18Guta ɓayakka ɗa ta kaw Mella#3.18 Elloŋ Soom 36.2..»

19Ampane kee pa ke ibina kadar gu hukumnigee ma aaye aattí Kitamniti Mellayi beneyyiyoo oko giimi maa ga Mella berewwiyoogu paaɗe. Ay goŋŋa appe, ga alɗo lekka ɗa ya gimu ma gederra ga iyyiyya biiti weƴƴek. Keeke pa garaa kadar gu giimi paracco ku dunuuniti galenta unti Mellayi. 20Ay ɗakko appe ga alɗo lekka ɗa gimu maa ga Mella garaa ɗayaŋ unti ma jobbico hukumnigeyyo, asan ga lekka ɗa gimu ma jobokkay. A guta pa, hukumnigee gayay giimi maa gu ibinɗiy zunubgeeco ka maa gu leewa.

Gaaro ta ɗayaŋ unti Mellayi ma amanno

21Haŋka soopa ga Mella gaarine baŋ ga garay gaa me giimi ɗayaŋ unti. Ay ma botol ka hukumnigeetee Muusa ɗa. A gita pa Kitamniti Muusa saa o kutubgeeco nabiinigeyyo garawwiya keeke. 22Mella garay giimi ɗayaŋ unti ma botol ka amanniti oko Iisa Masi. Giimi pa maa ga Mella garay ɗayaŋ unti, ay guta paracco ma dowwiy galbigeeco oko Iisa Masi. Lekka ɗa apiro beenannico Yawudigee o ma ay Yawudigee ɗa. 23Paracco gu leewe zunubgee o paracco gu caaɗenta min darjanti Mellayi. 24Mella soopa ma gidaanuwti garay malan̰ ɗayaŋ unti. Ay ma Iisa Masi, gata ma cemekkay min zunubgeyyo. 25Mella pa birya saɗikane ku maa ga ma baartee ga ooliyyooga ta beceket bogorti oko ma dowwiy galbigeeco oko gata. Ma goŋŋakite pa ga Mella gaare kadar ga gata diiman ɗayaŋ. Tippa ga Mella ebenne kadar gu giimi leewe zunubgee, innasoopa ga diigiyiy ɗa pe, 26asan ga gederra ucaw ta gaaro. Haŋka soopa ma saɗikane taata, gu giimi ella kadar ga Mella ɗayaŋ, o ga leewa ka ɗayaŋ asan ga garay ɗayaŋ unti giimi ma dowwiy galbigeeco oko Iisa.

27A mileŋ ga ay goŋŋa pa, ga lekka aɗɗe latta maa gu giimi koolipiɗo? Lekka ɗa ta kaw. A guta pa giimi deewa ɗayaŋ unti Mellayi ma jobbico hukumnigeyyo ɗa, innasoo gi ay ma amanno oko Iisa Masi kayti ka. 28A gata pa, ke ella pe kadar ga ma seene ga gimu deewa gaarenta ɗayaŋ unti Mellayi ma amanniti oko Iisa Masi. Ay ma jobbico gaari ɗa maa ga Mella enee hukumnigeyyo. 29A gata soo Mella, ay Mella ka Yawudigeyyo ka e? Gata ay Mella ɗa aɗe kulla oko giimi ma ay Yawudigee ɗa e? Ay tirta saa pe ga ay Mella kulla oko giimi ma ay Yawudigee ɗa, 30asan ga kaƴi ka, gata ma garay giimi paracco ɗayaŋ unti ma amanno oko Iisa Masi, Yawudigee, guta ma taharrenta, o giimi ma ay Yawudigee ɗa, guta ma taharrenta ɗa. 31Mileŋ gu giimi deewa gaarenta ɗayaŋ unti Mellayi ma amanno, ke mesellaa aɗɗe samanco hukumnigeyyo? Ke mesellaa ɗa ta kaw, innasoo ke garaayooga.

Currently Selected:

Rooma 3: mmy

Highlight

Copy