Rooma 2

Parlanti Mellayi

1A gata pa, kii ma loomoyyay giccam, caŋ ki dee wee, ki gederra ɗa ki cimmicca kayaacum, asan ga kiita saa kulla leeway gaarco kotti. Ma liyawcum keeke pa, ga ay kiita saa pe ma onokka sippu ur̰uucum. 2Ke lekka kabarre kadar ga Mella caɗaayo parlane ma butultí oko giimi ma leewa gaari kooko. 3Kiita pa loomoyyay giimi oko gaarco kotti maa gu leewa. Gaa kiita pa lewɗiy gaarco kotti maa ki loomoyɗiy. Gaa ma keeke, oko mooyicum, ki pakaa aɗɗe min parlanti Mellayi? 4Mella pa gata gidaani ta kaw, o ga gederra ucaw ta gaaro, o gi saburti maani. A gaa kiita pa lewɗikiko liyaw gonek ka gaari kooko. Ki lekka ɗa aɗe kabarre kadar gi daanati Mellayi teete asawkum ki meeliɗiy gaarcam ku miɗɗa e? 5Kii nowoɗɗe ma kaya ta talta o gaarcam ku miɗɗa ma aaye galbancum ki aŋka ɗa meelico. Ay ɗakko appe ki eterɗo bogor suura kayaacum oko meene maa ga Mella asiyya gaara bogorti purta. Oko meene taata gi parlane ta ɗayaŋ tee ta Mellayi deewa gaarenta oko giimo, 6o ga Mella akkeega bira oko kulla kaƴi aɗe kanti ka gaartee maa ga leelo#2.6 Elloŋ Soom 62.13.. 7Giimi ma ay baatiynigee liyaawi oko ka samaane o gu deyekka ku maa gu gassicca darjane o karaamane o hayaatane ma gakamma ɗa ta kaw pa, ga Mella beraayooca hayaatane taata. 8A giimi soopa ma aŋkiya ɗa ka Mellayi, guu aŋkiɗo kanco ka, o gu jobokkaa ɗa botol ka seeniti, guu joboɗɗo pe ma ɗayaŋ ɗa ka, ga Mella akkiyooga zilla bogorti o boŋsiti. 9Diigane o garrarri ma seƴay giimi pa akkiyoo asa oko giimi paracco ma leewa miɗɗa, oko Yawudigee ƴa omma, o oko giimi ma ay Yawudigee ɗa kulla. 10A Mella soopa gata akkiyooca bira darjane o karaamane o aapiya oko giimi paracco ma leewa samaane, oko Yawudigee ƴa omma, o oko giimi ma ay Yawudigee ɗa kulla. 11A gata soopa, aparra ɗa giimi.

12Giimi paracco ma ay Yawudigee ɗa ma leewa zunubgee bala ibino tee ta hukumnigeetee Muusa, guta kotti ga Mella akkiyoo caaɗa parlane o gu akkiya gassa muutu bala butulco gaarco hukumnigeyyo. A innasoo gu Yawudigee, guta ma ibiniy hukumnigeetee Muusa, guu lewɗo zunubgee, ga Mella akkiyoo caaɗa parlane ma butulco gaari ma kitipiyenta aacco hukumnigeyyo. 13A gata pa, ay giimi ɗa ma geeway ka hukumnigeetee Muusa ma deewa ɗayaŋ unti Mellayi, innasoo gu giimi ma jobokkay hukumnigee kotti, ay guta maa ga Mella garay ɗayaŋ unti. 14A gata pa, guu giimi ma ay Yawudigee ɗa ma ibiniy ɗa hukumnigeetee Muusa, guu lewɗiy gaarco maa gu enee, gu guta kotti ay aleŋ kuu guta saa ibinya ka samaane o ka miɗɗa. 15Ma keeke pa gu garaa kadar gu gaarco hukumnigee maa gu enee, aleŋ kuu gu kitipiyenta saa galbigeeco. Mooyico ma passalla ka samaane o ka miɗɗa garaa keeke, asan guu leewa ka miɗɗa, gi mooyico loomoyyay, a guu leewa ka samaane pa, gi mooyico tarakkay. 16Keeke pa ke akkiya ella purta meene ta parlanti. Aattí kabarre ta daana maa na tasaa pa, na beneyya kadar gi meene taata ga Mella akkeeca kappa parlane oko Iisa Masi ku maa ga asiyyooca caɗaa parlane oko gaari maa gu giimi kelewwiy galbigeeco.

Yawudigee o hukumnigeetee Muusa

17A gata soo, na lekka beneyyiŋgee oko kii gata paaɗe ma beneyya kii ki ay Yawudince, kii ma dowwica galbancum oko hukumnigeetee Muusa, o ki kooloppe oko kappicum ma Mella, kii lewɗe kii ki tatta ƴiila min giimi daare. 18Ki ibinya maa ga Mella aŋka ki leeɗiya, kii maa gu hukumnigeetee Muusa gaariyam ki apirɗo ka samaane ka. 19Ki amanne ta tirta teete kadar ga ay kii ma ɗan̰akkay giimi ma ella ɗa o ki ay deyyanco oko giimi ma aaye namtuwwi. 20Kii ay garkaayaco giimi maa gi ibinco ta gaaro paalta, o ki ay ɓeleedaco tee ta gaaro oko giimi ma ibina ɗa maatiki aleŋ miici. Keeke pa paratti ay asan ki moyaa kadar gu hukumnigeetee Muusa gaaramca ibino ta seene parattí. 21Ellu ƴa! Kii appe ma garaayo beneyyi oko giimo, gaa ayme ki alɗiya garaa ɗa beneyyi kaaka oko kiita? Kii beneyyayo oko giimo kii gu addo masaa ɗa, a kii pa masaa ɗa aɗe e? 22Ki beneyyayo oko miɗaayo kii gu addo on̰aa ɗa oko daacco gicco o oko daato kii gu addo esekka ɗa miɗicco gicco. A kii pa on̰aa ɗa aɗe oko daacco miɗaayo e? Kii ɗakattiy zorri. A kii pa min gerraco maa gu aabaɗɗiy ki masaa ɗa aɗe lawco e? 23Ki kooloppe maa ki lekkiɗiy hukumnigeetee Muusa, innasoopa ki yokaaca karmiyo maa gu giimi lekke oko Mellayi, mileŋ ki kaawiya ka hukumnigeyyo. 24Keeke pa ay aleŋ maa gi Kitamniti Mellayi beneyye gee: «Ay saanantoŋ appe gu giimi ma ay Yawudigee ɗa n̰eleɗɗiya Mella#2.24 Elloŋ Esaya 52.5..»

25Ay tirta appe, kii leewaa maa gu hukumnigee enee, gi taharro ay latta samaane ma garaa kadar ki ay min gimtee Mellayi. A innasoo kii kaawiya ka hukumnigeyyo, ga caŋ ki taharre kulla, ki ay aleŋ gimu ma taharrenta ɗa. 26A gata soo gimu ma ay Yawudince ɗa o ga taharre ɗa, gaa joboɗɗiya ka ɗayaŋ maa gu hukumnigee enee, ga Mella lewki ɗa aɗe aleŋ gimu ma taharre e? 27Gimu ma taharrenta ɗa, innasoopa ga tattapiy gaarco hukumnigeyyo, ga gata kaaka akkam caaɗa parlane oko kii Yawudince ma kaawiy gaarco hukumnigeyyo. Ampane kee pa ki lekkiy hukumnigee ku kitipiyenta o ki taharrenta. 28-29Yawudince ka tirta ki addo ella ɗa iɗiitee ka, innasoopa ki ellu ka galbanti. Taharro ta tirta pa ay reepo ɗa ta nussane rootta ka zii, gita ay apilo ta galbanti ma garaa kadar ga gimu kaaka ay ka Mellayi. Ruuhanti Mellayi pa, ay gita ma leewica taharro taata galbanti gimi. Ay hukumnigeetee Muusa ku kitipiyenta kotti ɗa ma leewica. Gimu ma lekkica taharro ta Ruuhanti Mellayi pa, gasakka ɗa logaw min oko giimo, illa min oko Mellayi saa.

Currently Selected:

Rooma 2: mmy

Highlight

Copy