Rooma 1

Salammiti Pol oko giimi ku geegar ka Rooma

1Maktup teete, ay naa Pol lawwiti Iisa Masi ma ketepeyyatoŋca. Naata pa, ga Mella kollinnoo na deeɗo n̰amaakati o ga apirnoo ku maa na taasicca kabarre ta daana ma asaa min oko gata. 2Kabarre ta daana teete pa, ay gita maa ga Mella beneyyikiti ma ka taasití min tippa ma nabiinigeetee aattí Kitamniti. 3Gita pa beneyya ma gaartee Runti, maa gu weyya min oko balti sultan kee Dawud aleŋ ta giimo teete aɗe. 4Gaa Mella gaariɗe kadar ga ay Runti o ga lekka gudirane, wikinne maa gi Ruuhanti Mellayi naɗiyya min aacco giimi ku mattenta. Runti pa, ay Miltine kee Iisa Masi. 5Naata pa, ay ma gata appe ga Mella ma gidaanuwti oyyiyaw na deeɗe n̰amaakati Iisa Masi. Gata pa ay ku maa na asikko giimi koo ku ballee paracco gu duwɗiy galbigeeco oko gata, guu jobbiyya ku maa gu semeetee deeɗo un̰n̰enta. 6A kunta pa kulla, ay min oko giimi ku ballee kotti, maa ga Mella kolle ku deeɗe kuntee Iisa Masi.

7Maktup teete pa, na ketepeyyatoŋca oko kuŋ parattoŋ ma nowotte geegar ka Rooma, kuŋ maa ga Mella ƴekka o maa ga kolle ku deeɗe gimtee oko gata ka. Ga Mella Tattine o Miltine kee Iisa Masi leetoŋ gidaanuwe o gu biraatoŋ aapiya.

Pol aŋka ellico seneeta ku geegar ka Rooma

8Maa na aŋka, ay na leeɗe ƴa omma barkinti oko Mella Miltu ma semeetee Iisa Masi, ma gaartoŋ oko kuŋ parattoŋ, asan gu giimi paracco ku dunuuniti beneykiti amannitoŋ. 9A gata pa, Mella maa na lobokkee ma galbantu paratti oko taasití kabarre ta daana tee ta Runti, ellano o ga geewano kadar na moyaatoŋ diiman maa naa enaa. 10Wikinne paratti maa naa enaa na lollokkaa, maa ga oyyiyaw pe tee ta ketteŋ haŋka na deeɗitoŋ ella, 11asan na aŋakke ta tirta teete ellitoŋ ku maa na deeɗitoŋ gaaya ma barkaŋgeeti Ruuhanti Mellayi ku maa gi amannitoŋ deeɗo talta. 12Maa na aŋakke ta tirta pa, ay ga parattine sawa ke gassiɗo gudirane galbigeetine, naata ƴa kulla ma amannitoŋ, a kunta pa kulla ma amannitu. 13Naata pa seneeta aŋka ku leeɗo kabarre kadar na caaɗe diiman wikinne maa na kaatiɗo wikirtoŋ, gaa ya haŋka ga Mella alɗiyaw eyaa ɗa missa botol ku maa na kaatittoŋ. Ampane kee pa, na aŋakke ga lubbitu weeɗitoŋ gaari ku samaane aleŋ maa ga weeɗiyoo kulla aacco giimi ma ay Yawudigee ɗa ma aaye kiɗaayee daare. 14A gata pa lubbi maa ga Mella damakkiyaw ay na deeɗica tasaa kabarre ta daana oko giimi paracco, maa gu kayyeeco iyyenta o maa gu kayyeeco agisenta, oko giimi ma ibina gaari o oko giimi ma ibina ɗa. 15Ay ɗakko appe na aŋkiɗo ta tirta teete kaato na deeɗitoŋca taasa kabarre ta daana oko kuŋ kulla ma nowotte geegar ka Rooma.

Gudirantí kabarre ta daana

16Naata pa gi jalawwiyaw ɗa na tasawɗica kabarre ta daana asan gi ay gudiranti Mellayi, maa ga ma gita ga najjayɗiya kulla gimu aɗe ma dowwica galbanti oko Iisa Masi. Gita soopa gu ay Yawudigee ƴa omma ma giyyicca, guu giimi ma ay Yawudigee ɗa kulla giyyicca ka pe. 17A gata pa, aattí kabarre ta daana, ga Mella garee kadar ga ɗayaŋ ma botol maa ga garawɗiy paaɗe giimi ɗayaŋ unti. Botol maa gu giimi deeɗo ɗayaŋ unti pa, ay ma amanno kayti ka min diiliti ya dessiti. Keeke pa ay aleŋ maa gi Kitamniti Mellayi beneyye gee: «Gimu ma ɗayaŋ unti Mellayi ma amanniti gasakkaca hayaatane ta tirta#1.17 Elloŋ Abakuuk 2.4..»

Giimi paracco leewa miɗɗa

18A gata pa, Mella min uwwa samaani garawwiya appe bogorti oko giimo asan gu bakammikiki ɗa kanti o gu leewa ɗa ka ɗayaŋ. Ma liyawco ta gaari ma ɗayaŋ ɗa pa, gu giimi toɗokkiti oko seeniti gi oomiɗo purta. 19A gata pa, maa gu giimi gederra gu ibinɗo ma gaartee Mellayi paracco gaarenta purta oko giimo, asan ga ay Mella saa ma gaariyoogu. 20A gita pa, gudiranti ma gakamma ɗa ta kaw o nuntiti maa ga alɗo Mella gu giimi gederra ɗa gu elliɗiy. Innasoopa, min maa ga Mella kilgiyicca dunuune, guu moyaa aɗe goŋŋa samaane oko lubaakitee maa ga leelo dunuuniti, gu gederra gu elliɗiy aacco lubaakitee kotti. Oko keeke pa, gu giimi lekka ɗa payya botol ku maa gu cimmiɗiy kayyeeco, 21asan gu ibinya Mella kadar ga aaye guu alɗiya loga ɗa, gata maa gi logaw ay tanti ampane kee, o gu leyyee ɗa barkinti. Innasoopa, gi mooyico deero pe liyaw gonek ka, o galbigeeco ma lekka ɗa ibino issiy namtuwwi. 22Guta pa leewe zeneeco goo gu ibina gaari, innasoopa gu deero giimi maa gu kayyeeco ecekkayo ɗa gaari. 23Guta pa magica darjanti Mellayi, gata ma mataa ɗa ta kaw, ma lawwi ku panenta ma saabayye giimi ma matakka e baŋ pa ma ɗiiɗi, daare pa ma gaaruwi maa gu asinco pooɗi e baŋ pa ma lawwi ma dapaa kiɗaati.

24Ay ɗakko appe ga Mella uttiyyoo gu lewɗo pe gaari maa gu galbigeeco aŋka ka. Ay goŋŋa appe gu negeɗɗiy zeneeco ma gaari ma negekkay unti Mellayi. 25Seeniti Mellayi gu magica ma borooli. Guu aabaɗɗo o gu lobokkayo oko lawwi maa ga Mella kilgiye min maa gu aabidiya gata ma kelgeyyiy. Ay tirta appe, gi logaw ay oko gata diiman diiman! Amin.

26Ay oko keeke pe ga Mella uttiyyoo gu lewɗo maa gu aŋka ka o ma esekkay jaaliti, aleŋ daati ma poocica ooƴo ma miɗi, guu oƴowɗo ma gicco ka. 27A miɗi pa kulla poocica ooƴo ma daati, guu deyeɗɗo ta karta karta teete ooƴo ma gicco ka. Ay goŋŋakite pe ma liyaawiŋgeeco ma wagee ɗa ta kaw kooko gu gasaɗɗica haggane tee ta gaarco ku miɗɗa kooko ma mesellay.

28Mileŋ gu pooceero gu ibiniyya Mella, ga gata pa kulla uttiyoo ma mooyico ta miɗɗa taata ma aaye kayyeeco gu lewɗo pe gaari ma ay koo ku liyaawi ɗa. 29Galbigeeco onokke ma gaari paracco ma ɗayaŋ ɗa. Guta leewa ka miɗɗa o gu lekka kaarito ta lawwo o gu gidaani ɗa. Galbigeeco onokke kulla ma aŋko ta lawco gicco o aŋko ta diyaawo o kalaatane o daɓaali o durruwe. Guta kopokkayo oko gicco ma gaari 30o gu ban̰ay. Guta pa aŋkiya ɗa ka Mellayi. Beneeco balatta o gu koolaapigee o gu taaturigee. Guta cemekkay min kayyeeco gaari ku marawta maa gu lewɗo miɗɗa, o kee ka gayyeeco gu jobokka ɗa. 31Kayyeeco ibina ɗa ya maatiki, o maa gu guta beneyya gu leewaa ɗa. Galbigeeco talta o gu kawayya ɗa oko gicco. 32Parlanti Mellayi soopa, maa gee gu giimi ma leewa gaari aleŋ kooko ga kanco ay muutu ka, gu ibinca tam. Gaa ma keeke aɗe gu alɗe duwa ɗa liyaw ta gaari aleŋ kooko. Ma ƴiila payya pa, gi daanayo guu gicco leewa goŋŋa.

Currently Selected:

Rooma 1: mmy

Highlight

Copy