Mark 9

1Gaa Iisa beneyyiyoo payya gaa: «Na beneyyatoŋca seene, min oko kuŋ keeke ma aaye iŋee, gu daare matakka ɗa namma gu asicca ella mulunniti Mellayi ma asaa ma gudirane.»

Magawti ziiti Iisa kayaati dambi

(Elloŋ Matiye 17.1-13, Lik 9.28-36)

2Gaa maa gu leeɗe meeni bizgiƴi, gaa Iisa kaatikkiko ini Piyer o Zak o Yaaya. Guu deeɗe kalpa kayco ka dambu kaƴi aɗe siƴƴa. Gaa Iisa magiɗe unco, 3guu kaɗiŋgeetee ɓeeliɗe ma kaawo gu deeɗe purta tal, purtuwe maa ga gimu iŋee dunuuniti gederra ɗa ga leeɗiya kaɗiyyu purta tal aleŋ kaaka. 4Gaa kaytiŋ ka gu jobookeetee ku subba guta elliɗiy ini nabiinice Eliyas ma giiti Muusa guu beneyya ma Iisa.

5Gaa Piyer beneyyiyyee oko Iisa gaa: «Garaawatini, daana ke nuntinne iŋee. Ni panakka zubiŋgee subba. Kaƴi oko kii o kaƴi oko Muusa o kaƴi oko Eliyas.» 6Piyer pa ibine ɗa beneyyi maa ga beneyyiɗo asan ga ɓayaw galiyoo maani ma gittee. 7Gii n̰irɗe asiɗe gi asiyyoo tagga. Gii ur̰e kaƴi beneyɗo min aatti n̰irɗiti gee: «Gata keeke ay Runtu, na ƴekkaa ta kaw. Geewoŋga beneyti.» 8Gaa kaytiŋ ka gu elliɗe gaa Iisa kayti ka pe marakke ma guta. 9Maa ga Iisa ma Piyer o Zak o Yaaya berewɗo min dambi, gaa Iisa sartiyiyyoo gaa gu aɗiy gemma ɗa oko giimo gaari kooko maa gu elle, namma ya wikinne maa gaa Runti Gimi asiɗo naɗa min muuti. 10Guu oyyiyya beneyti kaaka. Guu enewɗo soopa aacco ma gaari ku ‘naɗaawi min muuti’.

11Guu jobookeetee ku subba koo inniyya goo: «A ayme gu aalimnigee ku Kitamniti Muusa beneyɗo goo ga nabiinice Eliyas ƴa omma ma asaa#9.11 Elloŋ Malasi 3.23-24.?» 12-13Gaa Iisa tiiliyyoo gaa: «Ay seene appe, ga nabiinice Eliyas asiɗo ƴa omma ga asiɗiy pana gaari paracco ma bottolco omma min asawti Masi. Na beneyyatoŋ kadar ga Eliyas aseero appe, guu giimi leeɗeega ka miɗɗa paratti maa gu aŋka ka aleŋ maa gi Kitamniti Mellayi beneyye ma gaartee#9.12-13 Jobookeetee Iisa lekka kabarre kadar ga beneyti Iisa keeke ma gaartee nabiinice Eliyas, ga beneyya ma gaartee Yaaya ma batasayya giimi. Elloŋ Matiye 17.11-13.. Mooyoŋ ƴa kulla, ayme gi Kitamniti Mellayi beneyɗo gee ga Runti Gimi akka diigiya maani, guu giimi asiyya ɗakita#9.12-13 Elloŋ Esaya 53.3 o Soom 22.1-18..»

Iisa o miica maa ga aarinne deegeyye

(Elloŋ Matiye 17.14-21, Lik 9.37-43a)

14Gaa Iisa ma jobookeetee ku subba koo beeriɗe min dambi. Maa gu garribiyyo oko gicco ma marakke koo, guu elliɗe giimi maani ma kadarriy maa gu melewɗo ma aalimnigee ku Kitamniti Muusa. 15Maa gu giimi elliyya Iisa guu ajjibiɗe, guu ɗiimiɗe dirsiŋgil gaɓirati, joobiti gu salamɗiya. 16Gaa Iisa inniɗiy jobookeetee gaa: «Kuŋ ecekke ini me meelata ma guta?» 17Gaa min oko giimi ku maani kotti, ga kaƴi tiiliyyee gaa: «Garaawa, na eterramga runtu. Gata pa lekka aarinne. Gaa aarinniti kaaka pa toɗoɗɗiyee beneyyi. 18Kulla were aɗe maa gaa waciyyee, ga bagaa kiɗaati o bor̰kom okomma min biiti, gaa ayamɗiy pe gonek ka saantee o ga ziiti aƴaa. Gaa maa na asikkiki na asiyyo beneyya oko jobookeecam naa gu pitteega maaƴi aarinniti keeke, guu alɗe gederra ɗa.»

19Gaa Iisa beneyyiyyoo oko jobookeetee gaa: «Kuŋ giimi ka haŋka keeke, ku duwiy ɗa galbigeetoŋ oko naa. Na nowotta pe ya minke ma kuŋ ku maa ku duwɗiy galbigeetoŋ oko naa? Na deeɗitoŋ soɓorro pe ya minke? Itirnawga miica.» 20Guu itiriyyeega miica. Gaa maa ga aarinne kaaka ma deegeyyiya miica elliyya Iisa, gaa yaagiyya saa pe miica ma raɗɗa namma ga baagiyya bup kiɗaati. Gaa miica tapalpalɗo kiɗaati o bor̰kom okomma min biiti. 21Gaa Iisa inniyya tatti miici gaa: «Min minke ga aarinne deegeyɗiya?» Gaa tatti miici tiiliyyee gaa: «Ay min rummuwti saa. 22Meeni maani gaa waciyyee ga bagakka okkati, o were daare pa ammo asan ga aŋka diyawti. Haŋka pa ki ellu saamuwti, ki gaayinni, kii gederra.» 23Gaa Iisa tiiliyyee gaa: «Kii naa gederra! Lekka ɗa maatiki ma raɗɗee oko gimu ma dowwica galbanti oko naa.» 24Gaa tatti miici beneyyiɗe saa koɗokka gaa: «Na dowwica galbantu oko kii, innasoopa ki gaayino asan gi raɗɗaw na duwicca.»

25Maa ga Iisa elliɗe kadar gu giimi maani asaa, ga makkiyee oko aarinne ma deegeyyiya miica kaaka gaa: «Kii aarinne keeke ma toɗokkayo giyyo o beneyyi oko giimo, na beneyyam naa: Oomu min oko miica keeke o ki aɗe yooka ɗa payya ta kaw ki asiyee un̰n̰a!» 26Gaa aarinne kawwikiɗe gaa yaagiyya miica ma raɗɗa, gaa oomiɗe. Gaa miica owoɗɗe pe gonek ka, gaa taariɗe san̰ aleŋ maatenta namma gu giimi beneyɗo goo walaŋ ga maate paaɗe. 27Gaa Iisa baamiyya min pitti ga cipiliyya uwwa ga warriɗe.

28Gaa maa ga Iisa yookiɗe ger maa gu sobowɗe, guu jobookeetee inniyya goo: «A nii soo ayme ni alɗe gederra ɗa ni pittiyya aarinne keeke?» 29Gaa Iisa tiiliyyoo gaa: «A gata pa, aarinne aleŋ keeke okomma illa ma inno oko Mellayi.»

Iisa tasaa payya mutti o naɗawti

(Elloŋ Matiye 17.22-23, Lik 9.43b-45)

30Gaa Iisa ma jobookeetee waciɗe min iŋaa gu tappicca kiɗa ta Galilee. Gaa Iisa alɗo aŋka ɗa gu giimi ibiniyya were maa ga alɗo, 31asan ga garkayyay jobookeetee. Gaa beneyɗiyo gaa: «Runti Gimi gu akkiya bira picco giimo guu deeɗiya. Gaa oko meene ma daa ta subba ga asiɗo naɗa min muuti.» 32Guta pa ibinya ɗa beneyti keeke, guu ɓayaɗɗo inniti.

Ka tatta ƴiila ay we?

(Elloŋ Matiye 18.1-5, Lik 9.46-48)

33Gaa Iisa ma jobookeetee sarɗe geegar ka Kaparnawom. Gaa maa gu sarɗe ger maa gu sobowɗe ga inniɗiy jobookeetee gaa: «Maa ke asawɗo soo butuuli ku ecekke meela ma gaari ku mayi?» 34Guu alɗiyee tiila ɗa asan ga butuuli gu ecekke meela goo ga ka tatta ƴiila ay we. 35Gaa Iisa nuntiɗe kiɗaati, gaa kolliɗiy jobookeetee ku orro o seera koo, gaa beneyyiyyoo gaa: «Gaa gimu aŋka ga deeɗo ka omma ƴiila, ga oyyu ga deeɗo ka rootta unco giimi paracco, o gaa dee lubaakaco.» 36Gaa baamiɗe miica rootta ga wirriyya ɗaɗɗakkico. Gaa googiyya gaa beneyyiyyoo gaa: 37«Maa gaa joobe miica aleŋ keeke saanantu, jobowwino saa naa ma kayaatu. A ma joobino pa joobe ɗa naa ka, innasoopa ga jobowwiya gata ma n̰akamminoo.»

Ma ɗakattine ɗa ay kantine

(Elloŋ Lik 9.49-50)

38Yaaya beneyyiyee oko Iisa gaa: «Garaawatini, ni elle gimu kaƴi aɗe ma petekka awaaradgee ma semeecam, nii aŋkiɗo ni toɗɗiyyee asan ga aaye ɗa ma keeta.» 39Gaa Iisa tiiliyee gaa: «Anne toɗɗa ɗa asan ga lekka ɗa gimu ma gederra ga leeɗo gaari ku ajjibiti ma semeetaw, gaa paalta ka ga ribilɗo ga beneyyiɗo miɗɗa ma gaartaw. 40Elloŋ ƴa, gimu ma pocowwine ɗa ay kantine aɗe. 41Na beneyyatoŋca seene, kulla gimu aɗe ma beraatoŋ kuraaka ta ammo mileŋ ku ay kuntee oko Masi, akkica gassa hagganti min oko Mellayi.»

Warroŋ maaƴi

(Elloŋ Matiye 18.6-9, Lik 17.1-2)

42Gaa Iisa beneyɗe payya gaa: «Gimu soopa ma esekka zunubgeyyo kaƴi ka kulla min oko giimi ma ay aleŋ miici ku rootta kooko ma dowwiy galbigeeco oko naa, gi parlane yaata ocokka. Samaane ƴiila oko gata kaaka gu onniyyee ur̰uuti dambu tatta, guu uwwiya baharriti ga maatiɗo. 43-44A gaa piccum esekkam zunubgeyyo, ki reepiya, asan gi samaane ƴiila ki gassiɗo hayaatane ma gakamma ɗa ta kaw saripti Mellayi ma piccum kaƴi ka min maa ki kaatiɗo ma piccam seera aatti were ka okko ma batakka ɗa ta kaw. 45-46A gaa asincum esekkam zunubgeyyo, ki reepiya saa, asan gi samaane ƴiila ki gassiɗo hayaatane ma gakamma ɗa ta kaw saripti Mellayi ma asincum kaƴi ka min maa ki kaatiɗo ma asincam seera aattí okko ma batakka ɗa ta kaw. 47A gii iɗiicum pa kulla esekkam zunubgeyyo, ki cimmica saa asan gi samaane ƴiila ki un̰n̰iɗo mulunniti Mellayi ma iɗiicum kaƴi ka min maa gu iɗiicam serco alɗo guu uwwiɗum aattí okko ma batakka ɗa ta kaw. 48Kitamniti Mellayi beneyye gee ga iŋaa were kaaka gu diiri ma ayamma zii matakka ɗa o okko kulla batakka ɗa ta kaw#9.48 Elloŋ Esaya 66.24..»

49Gaa Iisa beneyɗe gaa: «Mella panakkay giimi paracco ma diigaŋgee aleŋ giimi ma panakkaca saɗikane ma deeme. 50Deeme pa ay maatiki ka daana. A gaa deeme appe soo ga belbeluwti oole ku leewa pe kuu me ga deeɗo payya belbel? Kuŋ kulla deyyoŋ belbel, kuu nuntiɗo ma daana beenannitoŋ.»

Currently Selected:

Mark 9: mmy

Highlight

Copy