Mark 10

Iisa beneyya ma gaari ku cappiti daato

(Elloŋ Matiye 19.1-12, Lik 16.18)

1Gaa Iisa waciɗe min iŋaa, gaa kaatiɗe kiɗa ta Yudee ma aaye ta nussanti katik oko ƴiiro ta Yurden ma sorotta diiman. Guu giimi maani asiyyee payya. Gaa garawɗiyo beneyti Mellayi aleŋ maa ga leewa kee aɗe. 2Guu lekkiɗe Pariziyennigee daare ma asiyee saripti ku maa gu cokkiyya. Guu inniyya goo: «Hukumnigeetine oyowwiyee aɗe ga gimu cappitti oko daatti?» 3Gaa Iisa inniɗiy gaa: «Muusa birtoŋ hukumne ŋawwa?» 4Guu tiiliyyee goo: «Muusa oyowwiyee oko gimi ga kitipiyitti katkat ta cappiti, gaa cappitti#10.4 Elloŋ Ɗillico Hukumnigeyyo 24.1..» 5Gaa Iisa beneyyiyyoo gaa: «Muusa kitipiytoŋca hukumne teete asan gu kayyeetoŋ talta. 6A min diilití dunuuniti soopa, maa ga Mella kilgiyicca dunuune: “Ga kilgiyiy giimi, miiɗi o daate#10.6 Elloŋ Diilo ta Lawwi Paracco 1.27, 5.2..” 7“Ay ɗakko appe ga miiɗi asiɗo ooma min girco tatti ma yaati, gaa deeɗo nunta ma daatti. 8Gaa serco appe gu deeɗo pe zii kaƴi ka#10.8 Elloŋ Diilo ta Lawwi Paracco 2.24..” Ay goŋŋa appe gu alɗo ɗa payya seera, guta deero pe zii kaƴi ka. 9Ga gimu pa ayya ipira ɗa maa ga Mella onokke.» 10Gaa maa gu asiɗe giiri, guu jobookeetee enewɗiya ma gaari guta ka, 11gaa gata pa tiiliyyoo gaa: «Gaa miiɗi cappiti oko daatti gaa icciɗe kaƴi, ga niŋgiti oko ta omma ma un̰n̰iti ta daatti. 12A gii daate kulla uttiyee oko mittí gii deeɗe icca miiɗi kaƴi gi niŋgiyee oko miiɗi ka omma ma issití ta miɗi.»

Iisa o miici ku rootta

(Elloŋ Matiye 19.13-15, Lik 18.15-17)

13Guu giimi eterɗe miici goo ga gagayoogu pittee zeneeco. Guu jobookeetee soopa makaɗɗiyo oko giimo. 14Maa ga Iisa elliya liyawco jobookeyyo kaaka, gii alɗiyee dee ɗa daanee. Gaa beneyyiyyoo gaa: «Duwaaniyo oko miico gu asiyyaw! Aɗaaniyo toɗɗa ɗa, asan gi mulunniti Mellayi ay oko giimi ma ay aleŋ guta. 15Na beneyyatoŋca seene: Gimu ma oyaaca ɗa mulunniti Mellayi aleŋ miica ka rootta, akka un̰n̰a ɗa ta kaw mulunniti Mellayi.» 16Gaa gogowɗiy miici guta o ga baarakkay ma gagaw ta pittee kayyeeco.

Iisa o ayaawa

(Elloŋ Matiye 19.16-30, Lik 18.18-30)

17Gaa maa ga Iisa katawɗo, gaa lekkiɗo gimu kaƴi aɗe ma gaɗɗe ga asiɗe darsa unti Iisa. Gaa inniyya gaa: «Garaawa ka gidaani, na lee pe naa me ku maa na gassicca hayaatane ma gakamma ɗa ta kaw?» 18Gaa Iisa tiiliyyee gaa: «Ayme ki kolowɗino kii na gidaani? Lekka ɗa gimu ka gidaani, illa ay Mella kayti ka. 19Ki ibiniy paaɗe hukumnigee maa goo: “Addo dee ɗa gimu ma aaniyo. Ga miiɗi addo un̰n̰a ɗa oko daatti giiti o daate pa kulla gi addo issa ɗa mittí gattí. Addo maasa ɗa. Aɗiki arɗa ɗa giicum ma borooli. Ayya daɓalla ɗa giicum ki icciyyeega maatikiti. Cipiliy semeetee taccum o ku yaacum#10.19 Elloŋ Oomiti min Masir 20.12-16..”» 20Gaa ayaawa gata pa tiiliyyee gaa: «Garaawa, beneyyiŋgee kooko na jobokkiy min ɗibiluwtu.» 21Gaa Iisa elliyya ma galbane ta ƴekkiti. Gaa beneyyiyyee gaa: «Koyowwiyam missa maatiki kaƴi. Aɗikiko giɗa lawcam paracco maa ki lekka, kii biriyyooga gurus kaaka oko giimi ku saamo. Goŋŋa ga Mella beram ayaawi samaani. Kii yookiɗo ki asinno jobba.» 22Maa ga ayaawa giyyiyya beneyti Iisa kaaka gaa zorontiyɗe. Gaa yookiɗe ma zorontiyti asan ga ay ayaawa ta tirta.

23Gaa Iisa elliɗiy jobookeetee kotti ma kadarriya, gaa beneyyiyyoo gaa: «Ayaawee gi raɗɗayo ta tirta gu un̰n̰iɗo mulunniti Mellayi!» 24Guu jobookeetee rawruwɗe ta tirta oko beneyti kaaka. Gaa Iisa pa beneyyiyyoo payya gaa: «Rontaw, raɗɗa ta tirta gi un̰n̰o mulunniti Mellayi. 25Oko lukumi gi raɗɗe ga ɗaamiɗo ma buuliti ƴibirri. Oko ayaawayyi soopa gi raɗɗe payya ƴiila ga un̰n̰iɗo mulunniti Mellayi.» 26Guu jobookeetee ajjibiɗe saa pe ta kaw. Guu beneyɗo aacco goo: «A gaa goŋŋa, ga ay we pe ma gederra ga deeɗo najjiyenta?» 27Gaa Iisa elliɗiy gaa beneyyiyyoo gaa: «Giimi gederree ɗa ta kaw oko keeke, oko Mellayi soopa gi raɗɗee ɗa asan gu gaari paracco ga gederrayo.»

28Gaa Piyer beneyyiyyee gaa: «Ni cappiyo oko lawtini paracco nii jobbiɗum.» 29Gaa Iisa beneyyiyyoo oko jobookeetee gaa: «Na beneyyatoŋca seene: Gaa gimu cappiyee oko girti o oko seneetee ku miɗitta o ku daatta o oko yaati o oko tatti o oko kiɗaati o oko rontee, saanantu o saanantí kabarre ta daana, 30ga gasakka oko dunuune ta haŋka teete orooruwee orratiŋ gerra o seneeta ku miɗitta o ku daatta o gayyee o miici o kiɗa, o giimi kulla akkiya diigiya. Gaa oko dunuune ma akka asa pa ga asiɗo gassa hayaatane ma gakamma ɗa ta kaw. 31Maani min oko giimi ku haŋka kooko ma ay ku omma akka dee ku sulaayi, o ku sulaayi akka dee ku omma.»

Iisa tasaa payya mutti o naɗawti min muuti

(Elloŋ Matiye 20.17-19, Lik 18.31-34)

32Gaa Iisa ma jobookeetee icciyya botol gu poŋoɗɗo geegar ka Zerizalem. Iisa pa omokkiyo. Guu jobookeetee ku orro o seera o giimi daare ma jobokkaa ɓayɗe. Gaa Iisa tirriyɗiy jobookeetee ku orro o seera kayco, gaa beneyɗiyo gu gaari ma akkee asa katta. 33Gaa: «Giyyoŋ ƴa! Haŋka ke kataa Zerizalem, iŋaa pa, ga Runti Gimi gu deeɗiya bira picco taattuweeco soƴoowee ku saɗikaŋgeyyo ma gicco aalimnigee ku Kitamniti Muusa gu baamiyya. Guu caaɗiyyee parlane ma ka muuti. Guu biriyyooga oko giimi ma ay Yawudigee ɗa. 34Guta pa deeɗee noƴƴa gaari o gu pesekke olo o gu r̰ocokka, guu deeɗiya. Gaa leelo meeni subba, gaa naɗiɗo min muuti.»

Innico Zak ma giiti Yaaya

(Elloŋ Matiye 20.20-28, Lik 22.25-27)

35Gaa Zak ma sinti kee Yaaya ma ay rontee Zebedee kaatiɗe gu deeɗiya gassa Iisa. Guu inniyya goo: «Garaawatini, ni aŋka ki leeɗini ga maatiki maa ni enaa!» 36Gaa Iisa tiiliyyoo gaa: «Ku aŋka na leeɗitoŋ ini me?» 37Guu guta pa beneyyiyyee goo: «Oyyani, ga kaƴi ƴa ki duwiya tiyaawacum o ka kaƴi pa n̰ugilacum, wikinne maa kii asica gassa darjancum.» 38Gaa Iisa leeɗiyoo gaa: «Ku ibinya ɗa latta maa ku enaa. Ku gederra aɗɗe ku aar̰icca kuraakatu ta diiganti maa na akka aar̰a, o ku gederra aɗɗe ku hamalliyya baatem ka diiganti maa gu asinno diigiya?» 39Guu tiiliyyee goo: «Ni gederra.» Gaa beneyyiyyoo gaa: «Ay seene appe, ku akka diigiya aleŋ maa na asiɗo diigiya o ku akkiya hamalla baatem ka diiganti maa gu asinno diigiya. 40A nunto ta tiyaawatu o ta n̰ugilatu pa, ay naa ɗa ma aparray. Ay Mella ma hassalliyoogu wereeriyee kotti oko giimi daare maa ga aparre.»

41Gaa maa gu gicco ku orro giyyiyya beneyyi kaaka guu boŋsiyyoo oko Zak ma giiti Yaaya. 42Gaa Iisa kolliɗiy paracco gaa beneyyiyyoo gaa: «Ku lekka kabarre kadar ga dunuuniti gu salaataŋgee ku kiɗaayeyyo hekemeyyiy ma ka gazanta gimco, o taattuwee garaaca gudiranco oko gimco maa gu hekemeyye. 43A kuŋ pa gi daatoŋ ɗa goŋŋa. Innasoo, gaa gimu kaƴi min aattoŋ aŋka ga deeɗo ka tatta ƴiila, ga dee lubaakatoŋ. 44A gaa kaƴi min aattoŋ aŋka ga deeɗo ka omma, ga oyyu ga deeɗo lawwico gittee paracco. 45Ay goŋŋa appe ga Runti Gimi saa kulla alɗe asaa ɗa gu giimi asiyyee lubba. Innasoopa ga asee ku maa ga lubbiɗo oko giimo o ga biricca hayaatanti aleŋ haggane oko najjiyco giimi maani.»

Iisa o Bartimee ma ay koor̰

(Elloŋ Matiye 20.29-34, Lik 18.35-43)

46Gaa Iisa ma jobookeetee sarɗe geegar ka Zerikko. Gaa maa ga okomɗo min iŋaa ma giimi maani, ga lekkiɗo koor̰ maa gu semeetee goo Bartimee runti Timee ma nowotte biiti butuuli ga ŋarayɗo. 47Gaa maa ga giyyiɗe kadar ga Iisa ma ay ka geegar ka Nazaret ƴelaa ma iŋaa, gaa kolowɗo gaa: «Iisa Runti Dawud, ellu ɗe saamuwtu!» 48Guu giimi maani makaɗɗe goo ga ƴaapu. Gata pa cayyakka saa pe ma raɗɗa ƴiila gaa: «Kii ma ay Runti Dawud, ellu ɗe saamuwtu!» 49Gaa Iisa warriɗe, gaa beneyyiyyoo oko giimo gaa: «Kollinawga ƴa!» Guu kolliyya koor̰ goo: «Asarrica galbancum ki waciɗo, Iisa kolaam.» 50Gaa maa ga koor̰ giyyiyya beneyyi kaaka, gaa uwwiyya kaɗiyyiti ka ussi. Gaa aaliɗe ga aaniyiyya Iisa. 51Maa ga sariyee, gaa Iisa inniyya gaa: «Ki aŋka na leeɗam ini me?» Gaa gata pa tiiliyyee gaa: «Miltu, iyyino na elelɗo payya aleŋ tee ta heeta tee aɗe!» 52Gaa Iisa beneyyiyyee oko koor̰r̰i gaa: «Addo paaɗe, mileŋ ki dowwica galbancum oko naa, ki rayyide!» Gaa ma haŋka keeke aɗe gu iɗiitee koor̰r̰i iyyiɗe ga elelɗo, gaa jobbiyya Iisa ga kaatiɗe ma gata.

Currently Selected:

Mark 10: mmy

Highlight

Copy