Mark 11

Iisa on̰aa geegar ka Zerizalem

(Elloŋ Matiye 21.1-11, Lik 19.28-40, Yaaya 12.12-16)

1Gaa Iisa ma jobookeetee garribiɗe geegar ka Zerizalem, saripti darre ta Betpazee o ta Beetani katta dambu ka olibiyeyyi. Gaa Iisa n̰aamiɗe seera min oko jobookeetee gu ommiɗo. 2Gaa beneyyiyyoo gaa: «Aɗoŋ oko darre taata ma aaye untine. Wikinne maa kuu sare ka pa, ku gasakka deheesane onnenta maa gu kalappe ɗa kaytiŋ. Kuu ipiriyya, ku itirinnawga iŋee. 3Gaa gimu innitoŋ pa, gaa ga ayme ku eperɗiya, ku tiiline kuu: “Miltine aŋkiya, gaa yookittoŋga haŋka keeke aɗe.”»

4Guu kaatiɗe gu deeɗiya gassa gaa onnenta renta biití burgutti saripti butuuli, guu deeɗiya ipira. 5Guu giimi daare ma aaye iŋaa inniɗiy goo: «Ku leewa me kaaka? Ayme ku eperɗiya deheesane kaaka?» 6Guu tiiliyyoo ma beneyyi maa ga Iisa beneyyiyoo kee. Guu giimi kotti duwiyyoo. 7Guu itiriyyeega deheesane kee oko Iisa. Guu zaggiyyeegu kaɗiŋgeeco ku taatta daare taarti. Gaa Iisa kalpiɗe. 8Guu giimi maani ɗereɗɗiy kaɗiŋgeeco butuuli, daare pa ɗerekka linƴaƴƴi ku ɓayta maa gu ɗemekke min kayni. 9Guu giimi ma tan̰aa unti Iisa o giimi ma jobokka cayyakɗo goo: «“Ozanna#11.9 Ozanna ma beneyco Arameyennigeyyo goo ‘logaw ay oko Mellayi’. Beneyyi ka Arameyennigeyyo pa, gu beneyya wikinniti Iisa Masi., logokkineega Mella! Baarikenta ay gata ma asaa ma semeetee Mella Miltine#11.9 Elloŋ Soom 118.25-26.!” 10Ga Mella baarikica mulunne ma asaa, gita ma ay mulunniti kaakatine kee Dawud. Ozanna, logaw ay oko Mella ma aaye uwwa ta kaw samaani!»

11Maa ga Iisa sarɗe Zerizalem, gaa deeɗe un̰n̰a doorane ta girti Mellayi, gaa elelɗiy paaɗe wereeriyee paracco. A mileŋ gi paato galeero paaɗe pa, ga oomeero gaa kaatiɗe Beetani ma jobookeetee ku orro o seera.

Iisa o boo

(Elloŋ Matiye 21.18-19)

12Gaa ma ta sokkonta ga Iisa ma jobookeetee okomɗo min Beetani. Gii maya dewɗiya. 13Gaa elliɗe min arro boo ma eɗecce. Gaa kaatiɗe ga deeɗica ella gaa walaŋ pe ga gasakka ronti ga aymiɗo. Gaa maa ga kaatiɗe pa ga dee gassa pe tappi ka asan ga wikinniti ɗa missa ka wiyaawi. 14Gaa Iisa beneyyitti oko booti gaa: «Gu giimi addo ayma ɗa payya ta kaw ronte!» Guu jobookeetee kulla giyyiyya saa beneyti kaaka.

Iisa o giimi ma saawagga girti Mellayi

(Elloŋ Matiye 21.12-17, Lik 19.45-48, Yaaya 2.13-16)

15Gaa Iisa ma jobookeetee sarɗe geegar ka Zerizalem. Gaa Iisa deeɗe un̰n̰a doorane ta girti Mellayi. Gaa gassiɗiy iŋaa giimi ma saawagga gaa diiliɗe ga peteɗɗiy. Gaa baggiɗiy taabulnigeeco giimi ma magakka gurus ka kiɗaayee pay pay o lawco maa gu nowoɗɗe gu giimi ma saawagga hamam, 16o ga oyyiyee ɗa oko ya gimu kaƴi ga tan̰awɗo ma lawtee aattí dooranti girti Mellayi. 17Gaa garawɗiyo oko giimi kotti gaa: «Aattí Kitamniti, ga Mella beneyye gaa: “Girtu gu akkiya kolowwo goo ger maa gu giimi ku ballee paracco enewɗino. Gaa kuŋ soopa leeɗiki ger ka marŋo#11.17 Elloŋ Esaya 56.7 o Zeremi 7.11.!”» 18Guu taattuweeco soƴoowee ku saɗikaŋgeyyo o aalimnigee ku Kitamniti Muusa giyyikko gaartee Iisa kooko. Guu deyeɗɗo pe botol ka maa gu deeɗiya. Guu ɓayaɗɗee oko Iisa asan gu giimi ku maani ajjibe ta tirta oko giraaniti taata. 19Gaa ma pootimooko ga Iisa ma jobookeetee oomiɗe min Zerizalem.

Iisa o boo ma aaƴe

(Elloŋ Matiye 21.20-22)

20Gaa ta sokkonta ƴekker ka ga Iisa ma jobookeetee ƴelewɗo, guu ellicca boo tee maa ga bolee gii aƴee parattí namma ya carti. 21Gaa Piyer mooyiɗiy gaari koo ma ƴelee. Gaa beneyyiyyee oko Iisa gaa: «Garaawatini, ellica ƴa boo tee maa ki bolee, ay gita appe teete aaƴe saa parattí.» 22Gaa Iisa tiiliyyoo oko jobookeetee gaa: «Duwoŋgu galbigeetoŋ oko Mellayi! 23Na beneyyatoŋca seene, gaa gimu beneyyiyee kulla oko dambu keeke gaa: “Paru min iŋee, ki deeɗo gala baharriti”, o ga beneyyiya ma galbanti kaƴi ka o ga amanne oko beneyti kaaka, ga beneyti kaaka deewa. 24Ay ɗakko appe na beneyɗitoŋ naa ga paratti maa kuu dahayya o kuu enaa min Mellayi, ku amannoŋ kadar ku gasakkiya appe, gaa Mella birittoŋga. 25Maa kuu waraɗɗe inniti Mellayi, kuu lekkiɗo gaari ma gimu kaƴi, ku aɗoŋ ku deeɗe saamiya ƴa omma. Goŋŋa ga Tattoŋ ma aaye samaani kulla saamayyatoŋgu nigaakitoŋ. 26A kuu saamayyayo ɗa soopa oko giimi ma laatoŋ miɗɗa, ga Tattoŋ ma aaye samaani akkitoŋgu saamiya ɗa ta tuk gaartoŋ ku miɗɗa.»

Gudiranti Iisa asaa min taŋaa?

(Elloŋ Matiye 21.23-27, Lik 20.1-8)

27Gaa min iŋaa ga Iisa ma jobookeetee yookiɗe payya Zerizalem. Gaa Iisa tan̰awɗo doorane ta girti Mellayi. Guu taattuweeco soƴoowee ku saɗikaŋgeyyo o aalimnigee ku Kitamniti Muusa o ajaawaŋgeeco Yawudigeyyo asiyyee. 28Guu inniyya goo: «Ay ma botol ŋawwa, o ga ay we ma oyowwiyam ki lewɗo goŋŋa?» 29Gaa Iisa tiiliyyoo gaa: «Na aŋka ya na innittoŋ inno kaƴi ka. Kuu tiilinaw pa, naa beneyyitoŋ ka pe baŋ ga ma botol ŋawwa na lewɗiya keeke. 30Ay we ma n̰aamiya Yaaya ga batasayɗiy giimi? Ay Mella e, e gu giimi? Beneyyinaw ƴa!» 31Guu waciɗe gu beneyɗo aacco goo: «Kee tiile ɗe kee ga ay Mella ma n̰akammiya, ga enaane payya gaa: “A ayme ku alɗe amanna ɗa oko beneyti Yaaya?” 32A kee tiilee pa kee: “Ay giimi ma n̰akammiya”, ke gederra ɗa.» Guta pa beneyye aacco goŋŋa asan gu ɓayeero giimi. A guta pa, giimi paracco bakammiki Yaaya ma batasayya giimi goo ga ay nabiinice ma tirta. 33Ay ɗakko appe gu tiiliyyee oko Iisa goo: «Baana, ni ibina ɗa.» Gaa gata pa beneyyiyyoo gaa: «A naa kulla beneyyatoŋ ɗa baŋ ga ay we ma biryaw botol ku maa na lewɗiya liyaw keeke.»

Currently Selected:

Mark 11: mmy

Highlight

Copy