Mark 8

Iisa beraa tiyaw oko alpaŋgee pooɗi gimu

(Elloŋ Matiye 15.32-39)

1Gaa oko meeni kotti gu giimi maani timmiyyee payya oko Iisa. Guu alɗo lekka ɗa maatiki ka tiyaawi. Gaa kolliɗiy jobookeetee, gaa beneyyiyyoo gaa: 2«Na elle saamuwco oko giimi ku maani kooko asan gu lekka paaɗe meeni subba maa gu alɗo ma naa, guu alɗo lekka ɗa maatiki ka tiyaawi. 3Naa leyyo naa gu addo pa o gu teewe ɗa gu daare kelbenna butuuli asan gu lekka ma asee min arro.» 4Guu jobookeetee pa tiiliyyee goo: «A iŋee appe kayni gonek ka ke gasakka ŋa pe tiyaw ma ayay giimi kooko?» 5Gaa Iisa inniɗiy gaa: «Ku lekka mappa minaw?» Guu guta pa tiiliyyee goo: «Ni lekka mappa paysara.»

6Gaa Iisa beneyyiyyoo oko giimi ku maani kotti gaa gu nuntu kiɗaati. Gaa maa gu nuntiɗe ga icciyya mappa ka paysara gaa leeɗiyee barkinti oko Mellayi. Gaa erriyya, gaa biriyyooga oko jobookeetee, gaa gu ɗeddayooga oko giimo. Guu leeɗiya, 7o gu lekka kulla buusi minnaw ku rootta. Kotti kulla ga Iisa icciy, gaa leeɗiyee barkinti oko Mellayi, gaa biriyyoogu oko jobookeetee gu ɗeddiyoogu oko giimo. 8Guu giimi teeɗe gu ayyiɗe. Guu ma kollee ma mare, gu jobookeetee Iisa onniɗe laŋgee paysara. 9Guta pa ma teero kotti ay alpaŋgee pooɗi gimu. Gaa Iisa leeɗiyoo gaa gu tacilu appe. 10Gaa Iisa kalpiɗe koɗok markabati ma jobookeetee. Guu kaatiɗe kiɗa kaƴi aɗe maa gu kolaa goo Dalmanuta.

Iisa o Pariziyennigee

(Elloŋ Matiye 16.1-4)

11Guu Pariziyennigee asiyya gassa Iisa, guu icciɗe meela. Mileŋ gu aŋka cokkiti pa, gu inniyya goo ga leyyo latta ka ajjibiti ma garaa kadar ga Mella n̰akammiya. 12Gaa Iisa naasiɗe raɗɗa, gaa beneyyiɗe gaa: «Ayme gu giimi ku haŋka kooko enewɗo garaawi ku ajjibiti? Na beneyyatoŋca seene: Na leewa ɗa ya maatiki kaƴi ka ajjibiti oko giimi aleŋ kuŋ.» 13Gaa waciɗe ga uttiyyoo. Gaa deeɗe kalpa markaba ga tappiɗe ma ta nussantí baharriti katik.

Muɗigico Pariziyennigeyyo o ka Erod

(Elloŋ Matiye 16.5-12)

14Guta pa jobookeetee Iisa rawte gu alɗe icca ɗa mappa. Guu lekkiɗo pe kaƴi ka aattí markabati. 15Gaa Iisa sartiyiyyoo gaa: «Warroŋ maaƴi min oko muɗigico Pariziyennigeyyo o ka Erod Antipas!» 16Guu jobookeetee beneyɗo aacco goo: «Ay asan ga ay maa ke alɗine lekka ɗa soo mappa ga beneyɗine goŋŋa e?» 17Gaa Iisa leeɗiyee kabarre oko beneyco kaaka. Gaa beneyyiyyoo gaa: «Ayme ku melewɗo kuu ga ay maa ku alɗo lekka ɗa ka mappa na beneyɗo goŋŋa? Gaari kooko ku ebenniy ɗa missa e? On̰owwitoŋ ɗa e? Kayyeetoŋ eyee ɗa missa e? 18Ku lekka iɗi, kuu alɗo ella ɗa o ku lekka deyya, kuu alɗo geewa ɗa#8.18 Elloŋ Ezekiyel 12.2 o Zeremi 5.21.. Ku moyaa ɗa e? 19Wikinne maa na erriyya mappa ka beeƴa oko miɗi ku alpaŋgee beeƴa, gu kollee ma mare une laŋgee minaw?» Guu tiiliyyee goo: «Orro o seera.» 20«A maa na erriyya mappa ka paysara oko giimi ku alpaŋgee pooɗi gu kollee ma mare une laŋgee minaw?» Guu tiiliyyee goo: «Paysara.» 21Gaa Iisa beneyyiyyoo gaa: «Ma keeke aɗe kulla, kuu alɗiy ebenna ɗa gaari kooko.»

Iisa rayyadda koor̰

22Gaa Iisa ma jobookeetee sarɗe Betsayda. Guu giimi itiriyyee koor̰. Guu malmiliyya goo ga eesiya. 23Gaa Iisa baamiyya koor̰ kaaka min pitti. Gaa cimmiyya renta min hellanti. Gaa leeɗiyee olo iɗiitee. Gaa gagiyeegu pittee, gaa inniyya gaa: «Ki ella aɗe maatiki?» 24Gaa koor̰ iyyiɗiy iɗiitee, gaa beneyyiɗe gaa: «Na ella giimi aleŋ ettee goŋŋa guu tan̰awɗo.» 25Gaa Iisa gagiyyeegu payya pittee iɗiitee oko koor̰r̰i. Gaa koor̰ elliɗe saa pe. Gaa rayyidiɗe ga elelɗo ta car̰aŋ. 26Gaa Iisa leeɗiyee gaa ga addo girti, innasoopa ga addo un̰n̰a ɗa ma aattí darre ta Betsayda.

Piyer beneyya kadar ga Iisa ay Masi

(Elloŋ Matiye 16.13-20, Lik 9.18-21)

27Gaa Iisa ma jobookeetee kaatiɗe diyargee ma aaye katta geegar ka Sezaree ta Pilip#8.27 Sezaree ta Pilip ay geegar ma aaye balti dambu ka Hermon. Aatti geegar kaaka pa lekka giimi maani ma ay Yawudigee ɗa. Gata pa sawa ɗa ma geegar ka Sezaree ma aaye baltí baharre ta yaata.. Gaa butuuli ga inniɗiy jobookeetee gaa: «Oko beneyco giimo ka goo na ay we?» 28Guu guta pa tiiliyyee goo: «Giimi daare ƴa goo ki ay Yaaya ma batasayya giimi, o daare pa goo ki ay nabiinice Eliyas, o daare pa goo ki ay kaƴi aɗe min oko nabiinigeyyo.» 29Gaa inniɗiy gaa: «A kuŋ pa oko kantoŋ ka kuu na ay we?» Gaa Piyer tiiliyyee gaa: «Kii ay Masi gata appe maa ga Mella aparre.» 30Gaa uwwiyyoo atarre gaa gu addo beneyya ɗa ya oko gimu kaƴi kulla ma gaartee kotti.

Iisa tasaa mutti o naɗawti

(Elloŋ Matiye 16.21-28, Lik 9.22-27)

31Gaa Iisa diiliɗe ga garawɗiyo gaa ga aŋka ga Runti Gimi diigiyɗo maani. Guu ajaawaŋgeeco Yawudigeyyo o taattuweeco soƴoowee ku saɗikaŋgeyyo, o aalimnigee ku Kitamniti Muusa asiyya pooca, guu asiyya dee. Gaa oko meene ma daa ta subba pa, ga naɗiɗo min muuti. 32Gaa beneyti keeke ga beneyɗiyooga purta. Gaa Piyer tirriyiyya paalta jeres gaa makaɗɗee. 33Gaa Iisa jigirɗiy jobookeetee, gaa makkiyyee oko Piyer gaa: «Yooku ta taartu, Seetanne! Kii gi mooyicum ta gaaro ay ta Mellayi ɗa, innasoo gi ay ta giimo ka.»

34Gaa kolliɗiy jobookeetee ma giimi ku maani. Gaa beneyyiyyoo gaa: «Gaa gimu aŋka ga jobbinno, ga meelica mooyo ta gaari ku kayaati ka, o ga icciya kuruwati#8.34 Icco ta kuruwayi pa ay oyyo ta diiganti o ta muuti aleŋ ta Iisa., gaa joboɗɗino. 35A gata pa, gimu ma aŋka ga najjiyicca hayaatanti mesellaca. A gimu soopa ma mesellaca saanantu oko naa o ta kabarre ta daana akkica najjiya. 36Gaa gimu gassiyya ayaawi paratti ka dunuuniti, gii hayaatanti pa masilɗo, gi gayee pe ini me? 37Gaa gimu misilca hayaatanti ga gederra ɗa ga birɗo ya maatiki maa ga gassica payya. 38Gaa gimu gi jalawwiyee ga jobbinno o ga beneyɗiy beneyyiŋgeetaw unco giimi ku haŋka kooko ma jobokka ɗa ka Mellayi o gu leewa zunubgee, ga Runti Gimi kulla akkeeca jaala maa ga ase asa ma darjanti Mella Tatti o ma malaykatnigeetee Mellayi.»

Currently Selected:

Mark 8: mmy

Highlight

Copy