Mark 15

Iisa unti guberner kee Pilat

(Elloŋ Matiye 27.1-2,11-14, Lik 23.1-5, Yaaya 18.28-38a)

1Gaa ta sokkonta ma sossoko ka, gu taattuweeco soƴoowee ku saɗikaŋgeyyo timmiɗe ma ajaawaŋgeeco Yawudigeyyo o aalimnigee ku Kitamniti Muusa o taattuwee ku parlanti paracco gu waaciɗiy kayyeeco. Guu onniyya Iisa, guu itiriyyeega oko Pilat. Pilat pa, ay guberner maa gi hakuuma ta Rooma n̰akamme hikimiyti iŋaa kiɗa ta Yudee. 2Gaa Pilat inniyya Iisa gaa: «Kii ay sultanco Yawudigeyyo e?» Gaa Iisa tiiliyyee gaa: «Ay kii saa ma beneyyiya keeke.» 3Guu taattuweeco soƴoowee ku saɗikaŋgeyyo bowoɗɗe pe ma gaari maani gonek ka oko Iisa. 4Gaa Pilat inniyya payya gaa: «Giyyica ƴa bowwico giimo ta maani maani teete maa gu bowoɗɗam. Ki telaayo ɗa e?» 5Gaa Iisa ƴapawɗe kanti ga alɗo telaa ɗa. Gaa Pilat ga latta kaaka kaawiyyeeca kayaati.

Guberner kee Pilat beraa Iisa paapiti

(Elloŋ Matiye 27.15-26, Lik 23.13-25, Yaaya 18.38b–19.16)

6Kulla laalane aɗe pa ta Pakti, ga Pilat capakkee oko gimu kaƴi ka baamenta daŋayi. Gimu maa ga capakkee kaaka pa, ay maa gu giimi enaa. 7Gaa lekkiɗo gimu kaƴi aɗe maa gu semeetee goo Barabas maa gu bakamme daŋayi. Gata pa ay min oko sawranigee ma deewe gimu wikinne maa gu giimi cepelɗe hawwane. 8Guu giimi kaatiɗe wikirti Pilat gu deeɗiya inna ma gaari ku cappiti gimu kaƴi min daŋayi aleŋ maa gu leewa kee aɗe min heeta. 9Gaa Pilat tiiliyyoo gaa: «Ku aŋka na cappiyyee oko sultanco Yawudigeyyo e?» 10Gata pa leelo paaɗe kabarre kadar gu taattuweeco soƴoowee ku saɗikaŋgeyyo isseeca ta namta oko Iisa. Ay ɗakko appe gu itiriyyeega. 11Guu taattuweeco soƴoowee ku saɗikaŋgeyyo eseɗɗiyooca oko giimo, guu inniya Pilat ga cappiyee marra oko Barabas. 12Gaa Pilat inniɗiy payya giimi gaa: «A ku aŋka pe na leeɗiya naa me gimu maa ku kolaa kuu sultanco Yawudigeyyo?» 13Guu tiiliyyee payya ma cayyiko goo: «Paapiya kuruwayi!» 14Gaa Pilat inniɗiy gaa: «A ka miɗɗa maa ga leelo pa, ay ini me?» Guu cayyikiɗe payya ma raɗɗa ƴiila goo: «Paapiya kuruwayi.» 15Pilat pa, mileŋ ga aŋka gi deeɗiyo daanayo oko giimo, ga cimmiyooga Barabas min daŋayi. Gaa biriyyooga Iisa oko asaakargee ku Rooma gu r̰occiyya, guu deeɗiya paapa kuruwayi.

Asaakargee ku Rooma o Iisa

(Elloŋ Matiye 27.27-31, Yaaya 19.2-3)

16Guu asaakargee ku Rooma issiyya Iisa aattí dooranti were maa ga guberner hekemeyɗe. Guu kollicca dazze parattí ta asaakargee ku Rooma. 17Guu issiyyee kaɗiyyu ka binta aleŋ ka sultanni. Guu paariɗe jiɗimo ma mataari ma lekka ejjemmi, guu issiyyeeca kayaati. 18Guu salamɗiya goo: «Iŋŋe sultanco Yawudigeyyo!»

19Guu tamanɗiya kayaati ma torom o gu pesekkee olo. Guu darasɗo unti gu dalaɗɗo raɗɗa aleŋ kuu gu karmayya. 20Gaa maa gu noƴƴiyyee paaɗe pa gaari, guu cimmiyya kaɗiyyu ka binta kee maa gu issiyyee. Guu issiyyeegu kaɗiŋgeetee ku omma koo. Guu kaatikkiki renta min geegarri ku maa gu deeɗiya paapa kuruwayi.

Iisa gu papaa kuruwayi

(Elloŋ Matiye 27.32-44, Lik 23.26-43, Yaaya 19.17-24)

21Gaa lekkiɗo miiɗi kaƴi maa gu semeetee goo Simo ma ay tacco Alekzandir ma giiti Rupuus. Gata pa ay ka geegar ka Siren. Gaa maa ga asawɗo min maaƴi, gu waagiɗe ma asaakargee ma soogoyyiya Iisa. Guu asarriyya ku maa ga goyyiyya kuruwati Iisa. 22Guu kaatikkiki Iisa were maa gu kolaa goo Golgota. Golgota pa goo ‘were ka gugur̰u ka kayaati’. 23Guu aŋkiɗo gu biriyyee mirmi#15.23 Mirmi kooko gu leeway ma ronco ettee ma saabayye mormoroskee maa goo rezen. maa gu amasse ma maatiki maa goo mir ma olaaca raɗɗo ta zii. Gaa gata soopa alɗe aar̰a ɗa.

24Guu paapiyya kuruwayi. Guu kaɗiŋgeetee gu eddiɗiy ma liyaw ta jollo jolloti ku maa gu ibiniyya ma galee oko kulla kaƴi aɗe#15.24 Elloŋ Soom 22.19.. 25Maa gu paapiyya kaaka pa, gi ay dahaane appe. 26Guu gagiyyee ettu sacenta ɓeterter maa gu ketepeyɗica er̰n̰e ta diyawti goo Sultanco Yawudigeyyo. 27Guu paapiɗe kulla marŋi seera saripti Iisa. Kaƴi ƴa ma kuruwati nussane ka tiyaawati o kaƴi ma kuruwati ma nussane ka n̰ugilati. 28Ay goŋŋa appe ga beneyti Kitamniti Mellayi asiɗe butulti. Gita pa beneyye gee: «Guu giimi leeɗiya aleŋ gimu ma leewa miɗɗa#15.28 Elloŋ Esaya 53.12..»

29Guu giimi ma ƴelaa ma iŋaa pa torowɗiy kayyeeco o gu n̰elekkaa Iisa goo: «Keeke ay kii maa kii ki ɗemekka girti Mellayi kii geewiyya ma meeni subba ka#15.29 Elloŋ Soom 22.8 o Yaaya 2.19.. 30Maa ki najjiyu paaɗe ziicum, kii beeriɗo min kuruwayi!» 31Guu taattuweeco soƴoowee ku saɗikaŋgeyyo o aalimnigee ku Kitamniti Muusa kulla noƴoɗɗe gaari goo: «Gata najjiye giimi daare, gaa alɗo gederra ɗa haŋka pa ga najjiyɗo ziiti. 32Gata ma ay Masi gimu maa ga Mella aparre, sultanco ka Isirayel, ga beeru paaɗe min kuruwayi. Kee elliya pa kee duwɗiy ka pe galbigeetine oko gata.» Guu giimi maa gu papee ma gata kotti kulla n̰eleɗɗiya.

Muutti Iisa

(Elloŋ Matiye 27.45-56, Lik 23.44-49, Yaaya 19.28-30)

33Gaa ma gaayile, ga namtuwe taggicca kiɗa parattí tee ta Isirayel namma ya saha subba tee ta ooriti. 34Gii ma saha subba taata ga Iisa kolliɗe ma raɗɗa gaa: «Eloyi, Eloyi, lema sabaktani#15.34 Beneyyi keeke pa ay ka Arameyennigeyyo. Elloŋ Soom 22.2.?» Beneyyi keeke pa gaa ‘Mella Miltu, Mella Miltu, ayme ki poocinoo?’ 35Guu giimi daare ma aaye iŋaa giyyiyya maa ga kolowɗo. Guu beneyyiɗe goo: «Giyyoŋga ƴa, gata kolaa nabiinice Eliyas.» 36Gaa kaƴi min oko giimi kotti gaɗɗiɗe ga deeɗe icca latta kaƴi aɗe ma lamatta aleŋ n̰iriye, gaa luƴƴiyya aacco mirmi ku saɗamta, gaa isiriyya oko ettu kaƴi aɗe, gaa n̰aamiyyee oko Iisa ga miƴirɗo#15.36 Elloŋ Soom 69.22.. Gaa beneyyiyyoo oko gittee gaa: «Warroŋ ƴa ke elliyya baŋ ga Eliyas akkiya beera aɗe min itti.» 37Gaa Iisa kawwikiɗe ma raɗɗa gaa jootiɗe.

38Gii kaɗiyye ta yaata ma caɗawwiya girti Mellayi#15.38 Elloŋ Oomiti min Masir 26.31-33. peetiɗe durgee seera min uwwa ya kiɗaati. 39Gaa tattuwco asaakargee ku Rooma ma waraɗɗe unti Iisa elliyya baŋ ga joote gaa me, gaa beneyyiɗe gaa: «Ay ma tirta pe ga gimu keeke ay Runti Mellayi!» 40Guu lekkiɗo kulla daati ma waraɗɗe arro ka gu elelɗo. Min aacco daati kotti pa gu ini Mariyam ta geegar ka Magdala, o Saloome, o Mariyam ta kaƴi kulla aaye. Mariyam ta kaƴi taata pa, ay yaaco Zak ka rootta ma giiti Yosee. 41Daati kotti pa jobokkiya Iisa o gu lobokkee maa ga alɗo kiɗa ta Galilee. Guu lekkiɗo kulla daatti daare maani ma marre ma gata namma ya geegar ka Zerizalem.

Iisa gu esekkaa mooniti

(Elloŋ Matiye 27.57-61, Lik 23.50-56, Yaaya 19.38-42)

42Gaa pootimooko asiɗe. Meene taata pa ay tee ta hassiltí laalanti, o gi ay leelantí meene ta nambiti. 43Gaa Yuusup ka geegar ka Arimatee asiɗe. Gata pa kulla ay kaƴi aɗe min oko taattuwee ku parlanti o gu semeetee cipilenta. Gata pa kulla ocokkica mulunniti Mellayi. Gaa asarricca galbanti ga kaatiɗe wikirti Pilat ga deeɗiya inna ziiti Iisa. 44Gaa Pilat ajjibiɗe ta tirta maa ga giyyiɗe kadar ga Iisa maate paaɗe. Gaa kolliyya askar kaƴi ma ay Roomennice. Gaa inniya gaa ga maa ga Iisa maatiɗe ga domokke appe e? 45Gaa maa ga askar tiiliyyee ma ka mutti, gaa oyyiyyee oko Yuusup gaa ga ayya beera ziiti Iisa. 46Gaa Yuusup deeɗe giɗa kapanne. Gaa asiyya beera ziiti Iisa min kuruwayi. Gaa kappiniyya, gaa deeɗiya issa moone kaƴi aɗe maa gu caree kolkilenta were ma ay dambee. Gaa ɗeeɗe tepelpila gur̰bu ga asiyya uba biiti. 47Mariyam ta geegar ka Magdala ma gattí Mariyam yaati Yosee pa elliya were maa gu deeɗiya issa.

Currently Selected:

Mark 15: mmy

Highlight

Copy