Mark 16

Naɗawti Iisa

(Elloŋ Matiye 28.1-8, Lik 24.1-12, Yaaya 20.1-10)

1Maa gi meene ta nambiti ƴiiliɗe, gii Mariyam ta Magdala, o Saloome, o Mariyam yaati Zak, giɗiɗe sewen ka amsenta ma itir, ku maa gu deeɗe susiya oko ziiti Iisa. 2Guu arimɗe ka ma meene ta ahatti ma sossoko uwwití paatti gu kaatiɗe mooniti. 3Gaa butuuli maa gu katawɗo gu beneyɗo goo: «A ay we pe ma gederra ga tepelpilinneega gur̰bu ma obokkica moone?» 4Gata pa gur̰bu kaaka tatta. Gaa maa gu sarɗe pa, guu elliya gur̰bu kee gaa tepelpilenta min biiti mooniti. 5Guu un̰n̰iɗe aattí mooniti. Guu deeɗe gassa ɗibilu ma kaɗiyyiti purta tal gaa nowotte ma gidaane ka tiyaawa. Gaa ɓayaw icciyyooca. 6Gaa ɗibilu gata kaaka beneyyiyyoo gaa: «Aɗoŋ ɓaya ɗa! Ku deyekka Iisa kee ka geegar ka Nazaret maa gu paape kee kuruwayi. Gata naɗe min muuti o ga aaye ɗa payya iŋeekite. Elloŋga! Keeke aɗe ay wikirti maa gu ɗerewɗiya. 7Haŋka pa ku aɗoŋ ku deeɗiyo taasa oko jobookeetee o oko Piyer kulla kuu gaa ga omokkatoŋ kiɗa ta Galilee. Ay iŋaa appe ku deeɗiya ella aleŋ maa ga beneyyitoŋ.» 8Guu oomiɗe gu gaɗɗiɗe arro min mooniti. Guu ɓayɗe ta tirta namma gu azarɗo. Guu alɗe gederra ɗa gu beneyyiɗe ya oko gimu kaƴi kulla asan gu kellemco oome.

Iisa okommati oko Mariyam ta Magdala

(Elloŋ Matiye 28.9-10, Yaaya 20.11-18)

9Maa ga Iisa maatiɗe, gaa naɗiɗe appe, ga oomiti ƴa omma oko Mariyam ta Magdala meene ta ahatti ma sossoko. Mariyam ta Magdala taata pa ay gita appe diɗɗiŋ ma lekka awaaradgee paysara kayaati gaa pittittiigu. 10Gita pa deyyooga beneyya keeke oko gittee koo ma aaye ma gata min omma. Guta pa zorontiyenta o gu erecca. 11Gaa maa gu giyyiyya beneyti maa gee: «Iisa geewa o na elliya!», gu guta pa alɗiya amanna ɗa beneyti.

Iisa okommayo oko jobookeetee ku seera

(Elloŋ Lik 24.12-35)

12Gaa min oko kaaka, gu seera min oko jobookeetee eceɗɗe botol gu katawɗo ta kayni. Gaa Iisa oomiyyoo magenta, gu alɗiya ibina ɗa. 13Gaa sulaayi maa gu ibiniyya, gu yookiɗe geegar ka Zerizalem gu asiyoo taasa oko gicco daare. Guu gicco pa alɗe amanna ɗa kulla.

Iisa okommayo oko jobookeetee ku orro o kaƴi

(Elloŋ Matiye 28.16-20, Lik 24.36-49, Yaaya 20.19-23, Lubaakico 1.6-8)

14Deesiti pa, gaa Iisa oomiyyoo saa pe oko jobookeetee ku orro o kaƴi maa gu tewɗo. Gaa makkiyyoo ma gaari maa gu alɗo amanna ɗa o maa gu kayyeeco alɗo talta amanniti oko beneyco giimi ma elliya kadar ga naɗe. 15Gaa beneyyiyyoo gaa: «Aɗoŋ dunuune parattí ku deeɗica taasa kabarre ta daana oko giimi paracco#16.15 Elloŋ Lubaakico N̰amaakeetee Iisa Masi 1.8.. 16Ma akkica duwa galbanti oko naa o gu akkiya batisiya deewa najjiyenta. Ma duwca ɗa soopa gi parlanti Mellayi akkiy baaga. 17Na beneyyatoŋ kadar gu giimi ma dowwiy galbigeeco oko naa akka lee garaawi ku ajjibiti. Guta akka petekko awaaradgee ma semeetaw, o gu akka beneyya beneyyiŋgee ma ay kunco ɗa, 18o gu akka bamakka barwee ma picco o gu akka ar̰awwo seherre o gu leewayo ɗa maatiki, o picco gu deeɗiy gagakko kayyeeco oko giimi ma parayya gu rayyaɗɗo.»

Mella cipiliya Iisa samaani

(Elloŋ Lik 24.50-53, Lubaakico 1.9-11)

19Maa ga Miltine kee Iisa beneyyiyyooga beneyti keeke, gaa Mella cipiliyya samaani. Gaa Iisa deeɗe nunta tiyaawati#16.19 Elloŋ Lubaakico N̰amaakeetee Iisa Masi 1.9-11.. 20Guu jobookeetee tacilɗe were paratti gu tasawɗica kabarre ta daana ta Mellayi. Gaa Miltine kee Iisa gayawɗiy oko lubaakico, o ga gayay gu lewɗo garaawi ku ajjibiti ma garaa kadar ga beneyco ay seene.

Currently Selected:

Mark 16: mmy

Highlight

Copy