Mark 1

Beneyti Yaaya ma batasayya giimi

(Elloŋ Matiye 3.1-12, Lik 3.1-18, Yaaya 1.19-28)

1Teete ay diilití kabarre ta daana ta gaartee Iisa Masi ma ay Runti Mellayi. 2Oko kitamniti nabiinice Esaya, ga Mella beneyye gaa:

«Omma min oko kii, na n̰akammaa palaynicitu,

ga deeɗamga pana butulcum.

3Gata pa ayyatta kayni gaa:

“Panoŋga botol oko Miltine.

Leeneegu bottolli gu deeɗo cur#1.3 Elloŋ Malasi 3.1 o Esaya 40.3.!”»

4Gaa gimu kaƴi maa gu kolaa goo Yaaya alɗo kayni, gaa batasayɗiy giimi o ga tasaayo gaa: «Meeloŋgu gaartoŋ ku miɗɗa, naa batisiyittoŋ ku maa ga Mella saamiyittoŋgu zunubgeetoŋ.» 5Guu giimi maani ku wereeriyee paracco ku kiɗa ta Yudee o ku geegar ka Zerizalem asawɗee oko Yaaya. Guu beneyɗiy zunubgeeco unco giimo, hatta gaa Yaaya batisiyɗiy ƴiiro ma sorotta diiman tee ta Yurden.

6Yaaya pa, esekke kaɗiyyu maa gu paree ma lawtee lukumi o abuuti ga onokkica ma haguune ka tukki#1.6 Elloŋ 2 Salaataŋgee 1.8.. Tiyawti pa ay baggi o ƴimbe. 7Gaa beneyɗiyo oko giimo gaa: «Lekka gimu kaƴi aɗe ma akka asa taartu. Gata kaaka pa tatta ƴiila min oko naa, na arakke ɗa kulla na darsiɗo gu seppee ku n̰urtee na ipiriyyeegu min asintee. 8Naata ɗe batasayyatoŋ ammo, gata pa akkitoŋ batisiya ma Ruuhanti Mellayi.»

Yaaya batasayyaa Iisa

(Elloŋ Matiye 3.13–4.11, Lik 3.21-22, 4.1-13)

9Gaa oko meeni kotti, ga Iisa waciɗe min geegar ka Nazaret ma aaye kiɗa ta Galilee gaa kaatiɗe wikirti Yaaya. Gaa Yaaya deeɗiya batisiya ƴiiro tee ta Yurden. 10Gaa maa ga Iisa okomɗo min ammo, ga elliya samaane maa ga iyyiɗe, gii Ruuhanti Mellayi beeriyyee aleŋ hamam. 11Gii ur̰e beneyyiɗe min samaani gee: «Kii ay Runtu. Na ƴekkam ta kaw o parhantu parattí aaye oko kii#1.11 Elloŋ Soom 2.7 o Esaya 42.1..»

12Gaa oko wikinne kaaka saa gi Ruuhanti Mellayi cimmiyya Iisa kayni. 13Gaa kaatiɗe ga deeɗe nunta meeni orooruwee pooɗi. Iŋaakite pa ga Seetanne asiya sekelkila. Gaa Iisa nowoɗɗe pe ma gaaruwi ku kayni ka, malaykatnigee soopa asiya lee samaane.

Kollico ɗebeekee ku pooɗi

(Elloŋ Matiye 4.12-22, Lik 4.14-15, 5.1-11)

14Guu giimi baamiyya Yaaya daŋayi#1.14 Ƴila kaƴi o nussane ƴiile min oko wikinne ka batisiyti Iisa o baamiti Yaaya daŋayi.. Gaa Iisa pa yookiɗe kiɗa ta Galilee. Gaa tasawɗica kabarre ta daana ma asaa min Mellayi gaa: 15«Wikinne ka caaɗenta aseero paaɗe butulti asan gi mulunniti Mellayi aseero katta. Meeloŋgu gaartoŋ ku miɗɗa o ku amannoŋ oko kabarre ta daana.»

16Gaa meene kaƴi maa ga Iisa ƴelewɗo ma biití baharre ta yaata tee ta Galilee, ga elliɗe ɗebeekee seera ku buuso ma dawakkaca sippaco baharriti. Guta pa ay ini Simo ma sinti kee Andire. 17Gaa Iisa beneyyiyoo gaa: «Jobbino, naa leeɗitoŋ ku deeɗo ɗebeekee ku giimo.» 18Gaa koɗokka saa gu uttiyyoo oko sippanigeeco guu jobbiyya.

19Maa ga Iisa ƴiiliɗe omma paalta, gaa elliyya Zak runti Zebedee ma sinti kee Yaaya, guu nowotte markabaco gu panaɗɗiy sippanigeeco. 20Gaa koɗokka, ga Iisa kolliɗiy. Guu waciɗe gu miriyya tacco kee Zebedee aattí markabati ma lubaakeetee, guu kaatiɗe ma Iisa.

Gimu maa ga aarinne deegeyye

(Elloŋ Lik 4.31-37)

21Gaa Iisa ma jobookeetee kaatiɗe geegar ka Kaparnawom. Gaa ma meene ta nambiti, ga Iisa deeɗe un̰n̰a girco Yawudigeyyo ka giraaniti gaa garkayɗiy. 22Guu giimi kotti ma giyye ajjibiɗe ta tirta oko giraaniti taata, asan gi sawa ɗa ma ta aalimnigee ku Kitamniti Muusa, gata garkayyay ma beneyyiŋgee ma galaa. 23Gaa iŋaa ger ka giraaniti kaaka ga lekkiɗo gimu maa ga aarinne deegeyye. Gaa waciɗe ga cayyakɗo gaa: 24«Kii Iisa ka Nazaret, ki aŋkini ini me? Ki asee ɗa ka ɗeɗe bittitini? Na lekka kabarre tak kadar ga kiita ay gata maa ga Mella n̰akamme!» 25Gaa Iisa makkiyyee oko aarinne kaaka gaa: «Ƴaapu gonek! Oomu min oko gimu keeke!» 26Gaa aarinne yaagiyya raɗɗa gimu maa ga deegeyye kaaka, gaa oomiɗe min oko gimu kaaka o ga kerliciya ma raɗɗa. 27Guu giimi kotti paracco ajjibiɗe ta kaw namma gu enewɗo zeneeco goo: «Keeke ay ini me pe keeke? Teete ay giraane ta marawta maa ga gaarine ma beneyyiŋgee ma galaa. Ya awaaradgee kulla ga makakkayo guu gewɗiya kanti.» 28Guu giimi giyyikkiti kabarriti Iisa ma haŋka keeke aɗe kiɗa ta Galilee parattí.

Iisa o paraayee

(Elloŋ Matiye 8.14-17, Lik 4.38-41)

29Gaa Iisa ma jobookeetee oomiɗe min girco Yawudigeyyo ka giraaniti. Gaa ma haŋka keeke aɗe ga Iisa o Zak o Yaaya kaatiɗe girco Simo o Andire. 30Gii yaatí daatti Simo ga ziití koɗosɗe gi oƴowɗe daŋgilo. Maa ga Iisa sarɗe guu giimi deeɗiyee beneyya koɗok ma ka parayti. 31Gaa kaatiti ga deeɗica baama min pittí, gaa cipilicca. Gaa oko wikinne kaaka saa gi rayyidiɗe min ziití ma koɗosse. Gii waciɗe gi joobiɗiy samaane.

32Gaa maa gi paato galɗe gu giimi itiriyyeegu gimco paracco ma parayya o maa gu awaaradgee deegeyye. 33Guu giimi paracco ku geegarri asiɗe timma biití burgo ta ger kaaka. 34Gaa Iisa rayyaɗɗiy giimi maani ma deegeyye ma paraayiŋgee pay pay, o ga pitte kulla awaaradgee maani min oko giimo. A ga toɗokkayo beneyyi oko awaaradgeyyo asan gu ibinya baŋ ga ay we.

Iisa amalla kiɗa ta Galilee

(Elloŋ Lik 4.42-44)

35Gaa ƴekker ka ta sokkonta maa ga were alɗo missa namta, ga Iisa waciɗe, gaa oomiɗe min giiri. Gaa kaatiɗe renta min geegarri kayni were ma lekka ɗa ya gimu. Iŋaa pa ga deyya inna Mella. 36Gaa Simo ma gittee koo maa gu marawɗe kaatiɗe diyyiti Iisa. 37Gaa maa gu deeɗiya gassa, guu beneyyiyee goo: «Giimi paracco deyekkam.» 38Gaa gata pa tiiliyyoo gaa: «Anne oko diyargee daare ku renta na deeɗica taasa kulla gonek kabarre ta daana, asan ga ma asawkino ay keeke appe.»

39Gaa Iisa tan̰awɗo paaɗe oko wereeriyee paracco ku kiɗa ta Galilee, ga tasawɗiyooca kabarre ta daana oko giimo aɗicco gerraco Yawudigeyyo ku giraaniti koo ku kiɗa taata o ga petekkay awaaradgee ma deegeyyiy daare.

Iisa o majaddimnice

(Elloŋ Matiye 8.1-4, Lik 5.12-16)

40Gaa lekkiɗo majaddimnice kaƴi ma asiyee oko Iisa. Gaa darsiɗe, ga wakkiyya gaa: «Ban̰n̰u! Kii aŋka, ki gederra ki rayyiddinno na deeɗo samaane unti Mellayi!» 41Gaa Iisa elliɗe saamuwti, gaa n̰aamiyya pitti ga eesiyya, gaa beneyyiyyee gaa: «Haa, na aŋka, dee samaane unti Mellayi!» 42Gaa ma haŋka keeke aɗe saa ga judaamti cappiyee. Gaa rayyidiɗe, ga deeɗe samaane unti Mellayi. 43Gaa Iisa makkiyyee ta ɓaruk ɓaruk, gaa ga addo paaɗe. 44Ga beneyyiyee gaa: «Warru maaƴi! Addo beneyya ɗa ya oko gimu kaƴi! Addo soopa ki deeɗeega gaara ziicum oko soƴoowa ka saɗikaŋgeyyo. Kii itirɗo saɗikane aleŋ maa ga Muusa beneyye Kitamniti. Ay goŋŋa appe ki gaariyyo oko giimo kadar ki rayyide ki deeɗe samaane unti Mellayi#1.44 Elloŋ Soƴoowee ku Saɗikaŋgeyyo 14.2-32..» 45Maa ga gimu kaaka soopa kaatiɗe, ga deyyoogu ɓerɓira saa pe oko giimo gaari kooko paracco ma asiyee. Ay kaaka appe ga Iisa alɗo gederra ɗa ga on̰owɗo gawaagargeyyo aacco giimo. Innasoopa ga nowotta pe terli ka kayni. Guu giimi soopa asawɗe min wereeriyee paracco.

Currently Selected:

Mark 1: mmy

Highlight

Copy