Mark 2

Ruŋguyne ka geegar ka Kaparnawom

(Elloŋ Matiye 9.1-8, Lik 5.17-26)

1Gaa meeni minnaw omma, ga Iisa yookiɗe payya geegar ka Kaparnawom. Guu giimi giyyiki kadar ga aaye oko ger kaƴi aɗe. 2Ay ɗakko appe gu giimi maani ta kaw asiyya una ger kaaka namma ga alɗo lekka ɗa payya ya were renta biití burgutti kulla. Gaa Iisa garawɗiyo beneyti Mellayi. 3Guu lekkiɗo giimi ma itiriyee ruŋguyne oko Iisa. Gaa min aacco giimi kotti pa, gu ku pooɗi ɗeɗewɗiya. 4A mileŋ gu giimi maani pile pa, gu gederre ɗa gu asiyyeega suuba unti Iisa. Ay kaaka appe gu kalpiɗe kayaati daŋayi, gu noomiɗe buule kayaati were maa ga Iisa alɗo, guu beeriyya ruŋguyne ɗeerenta tarmati. 5Maa ga Iisa elliɗiy gu giimi kotti dowwiy galbigeeco oko gata, gaa beneyyiyyee oko ruŋguyni gaa: «Runtu, na saamiyamgu zunubgeecam.»

6Guu lekkiɗo aalimnigee daare ku Kitamniti Muusa ma nowotte kiɗaati iŋaa. Guu moyowɗo galbigeeco ka goo: 7«Ayme ga gimu keeke beneyɗo goŋŋa? Gimu keeke n̰elekkaa Mella! Ay we ma gederra ga saamiyɗo zunubgee? Lekka ɗa. Illa ay Mella kayti ka!» 8Gaa Iisa ibinicca saa koɗok mooyico taata, gaa beneyyiyyoo gaa: «Ayme ku moyowɗo goŋŋa galbigeetoŋ? 9Min oko beneyyiŋgee ku seera kooko maa na beneyyiyyee oko ruŋguyni maa naa: “Na saamiyamgu zunubgeecam”, e baŋ ga maa naa: “Wacu ki iccicca tarmacum, kii tan̰n̰iɗo”, ma raɗɗa ɗa ƴiila ay ŋawwa? 10Naa pa garaatoŋ ku maa ku ibinɗo kadar ga Runti Gimi lekka gudirane kiɗaati ku maa ga saamayɗiyoogu zunubgeeco giimo.» Gaa beneyyiyyee oko ruŋguyni gaa: 11«Na beneyyam: Wacu! Iccica tarmacum kii yookiɗo gircum!»

12Gaa ma haŋka keeke aɗe ga ruŋguyne waciɗe parat unco giimo. Gaa iccicca tarmati, gaa oomiɗe. Guu giimi paracco ajjibiɗe ta tirta, guu logoɗɗiya Mella ma parhane goo: «Kaytiŋ ni elle ɗa gaari aleŋ kooko!»

Leebi ma sokokka miiri

(Elloŋ Matiye 9.9-13, Lik 5.27-32)

13Gaa Iisa yookiɗe payya biití baharre ta yaata tee ta Galilee. Guu giimi maani asawɗe ga garkayɗiy. 14Gaa maa ga ƴelewɗo ga elliyya Leebi runti Alpee gaa nowotte ger maa gu giimi peleɗɗo miiri. Gaa Iisa beneyyiyyee gaa: «Jobbino!» Gaa Leebi waciɗe ga jobbiyya.

15Gaa Iisa deeɗe tee girti Leebi. Guu giimi maani ma ay sokookee ku miiri o daare ma leewa zunubgee teeɗe sawa ma Iisa o ma jobookeetee, asan gu giimi maani ma ay aleŋ giimi kotti ma jobokka Iisa. 16Guu lekkiɗo kulla iŋaa aalimnigee ku Kitamniti Muusa ma ay min Pariziyennigeyyo. Maa gu elliyya Iisa gaa teewa ma giimi kotti, guu beneyyiyyoo oko jobookeetee goo: «Ayme ga garaawatoŋ tewɗo ma sokookee ku miiri o ma giimi daare ma leewa zunubgee?»

17Maa ga Iisa giyyiyya beneyco kaaka pa, gaa tiiliyyoo gaa: «Giimi ma parayya ɗa aŋka ɗa payya daktor. Ay ma parayya soo aŋka. Na asee ɗa na asiɗo kolla giimi ma ɗayaŋ unti Mellayi, innasoopa na asee na asiɗo kolla giimi ma ibina kadar gu leewa zunubgee.»

Iisa o samkiyo

(Elloŋ Matiye 9.14-17, Lik 5.33-39)

18Guu jobookeetee Yaaya ma batasayya giimi o Pariziyennigee samkayɗe. Guu giimi asiyya inna Iisa goo: «Ayme gu jobookeetee Yaaya o ku Pariziyennigeyyo samkayɗo, kuncam pa samkayya ɗa?» 19Gaa Iisa tiiliyyoo gaa: «Lanjigeetee oko gimu maa gu jawwazze samkayya pe goo me, gaa maa gu jawwazze aaye aacco? Kaw! Wikinne maa gaa aaye aacco gu samkayya ɗa. 20Innasoo ga wikinne akka asa maa gu giimi asiyya cimma min aacco maa gu jawwazze. Ay oko wikinne kaaka pe guu asiɗo samkiya.

21«Lekka ɗa gimu ma owokka kaɗiyyiti ka raawenta ma kaɗiyye ta marawta. Goneka kee gi kaɗiyye ta marawta n̰otokka kaɗiyyu ka raawenta ga erriɗo saa pe ta ƴiila. 22Lekka ɗa kulla gimu ma kalaa mirmi ku marawta ma wacakka daaɓanco aɗicco seheŋgee ku raawenta. Goneka kee gu baɗassa, guu mirmi o sehenne serco naŋgiɗo. Aŋka soopa gu mirmi ku marawta ma wacakka ku kalliɗiy oko sehenne ta marawta#2.22 Ma beneyyi keeke pa, ga Iisa aŋka ga gaariyyo oko Pariziyennigeyyo kadar ga asiyee gaara giraane marawta ma maraa ɗa ma aadaŋgeeco..»

Ɗimmo ta ganaadalgeyyo

(Elloŋ Matiye 12.1-8, Lik 6.1-5)

23Gaa ma meene kaƴi ta nambiti ga Iisa ƴelewɗo ma botol ma petay ganna ku gemeyyi. Guu jobookeetee ɗemeɗɗo ganaadalgee ku saripti butuuli gu aymiɗo. 24Guu Pariziyennigee beneyyiyyee goo: «Ellu ƴa! Ayme gu jobookeecam lewɗo latta maa gu hukumnigeetine oko kee Yawudigeyyo toɗokkine ma meene ta nambiti#2.24 Elloŋ Oomiti min Masir 34.21.?» 25Gaa Iisa pa tiiliyyoo gaa: «Ku garkiyya ɗa kaytiŋ aattí Kitamniti Mellayi latta maa ga sultan Dawud leelo e? Meene kaƴi gi maya deyyiy ma gittee. Guta pa lekka ɗa maatiki ka tiyaawi. 26Gaa Dawud un̰n̰iɗe bazzane ta waagiti ma Mella gaa deeɗe ayma mappa ma birenta oko Mellayi. Oko wikinne kaaka pa ga Abiyatar ay tattuwco oko taattuweeco soƴoowee ku saɗikaŋgeyyo. Ampane kee pa, gu hukumnigeetine oyowwiyo oko soƴoowee ku saɗikaŋgeyyo ka gu aymiɗo mappa kaaka, Dawud soopa icce ga aymiɗe, gaa biriyyoo kulla oko gittee maa gu marawɗe#2.26 Elloŋ 1 Samiyel 21.2-7 o Soƴoowee ku Saɗikaŋgeyyo 24.8-9..» 27Gaa Iisa beneyyiyyoo payya gaa: «Mella leeca meene ta nambiti ku maa gi gaayiɗiy gimi, Mella leewiy ɗa giimi ku maa gu karmayɗiy aadaŋgee ku meene ta nambiti. 28Ay kaaka appe ga Runti Gimi kulla alɗo Miltí oko meene ta nambiti.»

Currently Selected:

Mark 2: mmy

Highlight

Copy