Yaaya 15

Iisa ay aleŋ ettu ma weewa miici samaane

1Gaa Iisa beneyyiyyoo payya oko jobookeetee gaa: «Naa ay ettu ka tirta ma weewa miici ku daana aymiti, o Tattu pa ay milti itti. 2Linƴaƴƴitaw paracco ma waa ɗa ga daɗakkay maaƴi, ma weewa soopa ga panakkay, guu deeɗo samaane gu weeɗo payya maani ƴiila. 3Kunta pa deero paaɗe parattoŋ samaane unti Mellayi aleŋ linƴaƴƴi ku panenta ma beneytu maa na beneyyitoŋ. 4Nuntoŋ kappenta oko naata, aleŋ tanni maa na nowoɗɗe kappenta ma kunta. Linƴe gederra ɗa gi weeɗo miici kayti ka gii kappenta ɗa durŋulli. A kuŋ kulla gederra ɗa ku weeɗo miici kaytoŋ ka, kuu nowotte ɗa kappenta oko naa.

5«Naa ay ettu ka seene, kunta pa ay linƴaƴƴi. Gaa gimu nowotta kappenta oko naa, o naa nowotta kappenta oko gata, ga gata kaaka weewa miici ku daana maani, asan ga bala naata ku gederra ɗa ku weeɗo miica ya kaƴi. 6Gaa gimu nowotte ɗa kappenta oko naa, gu owokka maaƴi renta aleŋ linƴaƴƴi maa gu soƴaa renta gu aaƴiɗo. Guu aaƴe pa, gu sokokkay, guu kalliɗiy okkati gu aggiɗo. 7Kuu nowotte kappenta oko naata, o beneyyiŋgeetaw ku nowottikiko, ku innoŋga maa ku aŋka, kuu gassiyya. 8Kuu weewa aɗe goŋŋa miici maani ku on̰aa Tattu o ku deewa jobookeetaw ku seene.

9«Na ƴekkatoŋ aleŋ maa ga Mella Baaba ƴekkinno. Kuŋ kulla nuntoŋ kappenta oko ƴekkitu. 10Kuu jobokkiy hukumnigeetaw, ku nowotta kappenta oko ƴekkitu, aleŋ tanni maa na joboɗɗiy hukumnigeetee Tattu, naa alɗo kappenta oko ƴekkiti. 11Naa pa beneyyitoŋga keeke ku maa gi parhantu deeɗo ma kunta, kuu deeɗo saa pe parhinenta ta kaw.

12«Ƴekkoŋ zeneetoŋ aleŋ maa na ƴekkittoŋ. Ay teete appe ay hukumne maa na beraatoŋ. 13A ƴekko ta yaata ƴiila pa maa ga gimu garaayo oko giimo, ay birawtí hayaatanti oko lanjigeetee. 14Kuu leeca hukumne maa na beneyyitoŋ, ku deewa lanjigeetaw ku seene. 15Na kolaatoŋ ɗa payya ta kaw naa lubaakeetaw, asan ga lubaaka ibiniy lawwi daare ka maa ga tattuwti leewa. Na kolaatoŋ pe naa lanjigeetaw, asan ga latta paratti maa na ɓelde min oko Tattu na gaaritoŋga. 16Ay kunta ɗa ma apirnoo, ay naata ma apirtoŋ, naa birittoŋ lubbi ku maa ku kaatiɗo ku deeɗo wee miici o gu miici ma domokka. Goŋŋa, ga maa ku enaa min oko Mella Baaba ma semeetaw, ga beraatoŋga. 17Ƴekkoŋ beenannitoŋ. Ay teete appe ay hukumne maa na beraatoŋ.»

Giimi ku dunuune teete ɗakattay jobookeetee Iisa

18Gaa Iisa beneyyiyyoo payya gaa: «Guu giimi ku dunuune teete ɗakattitoŋ, ku leyyoŋ kabarre kadar gu ɗakattinoo ƴa omma naa. 19Kuu alɗo giimi ku dunuune teete, gu ƴekekkatoŋ aɗe asan ku deewa kunco. A maa ga naa soopa apirittoŋ min aacco, na jagitoŋ min oko guta, ku ay kunco ɗa payya. Ay ɗakko appe gu ɗakaɗɗitoŋ. 20Mooyoŋga ƴa beneytu maa na beneyyitoŋ kee, maa naa ga lekka ɗa lubaaka ma tatta ƴiila min oko tattuwti. Guu giimi ku dunuune teete diigiyno, ga kuŋ kulla gu deegeyyatoŋ. Daare soopa ma jobbiya beneytu jobokka kulla kantoŋ. 21Ma ɗakattitoŋ kotti pa, ibinya ɗa ma n̰akamminoo. Ay ɗakko appe gu lewɗitoŋ gaari paracco ku miɗɗa oko kuŋ, asan ku ay jobookeetaw. 22Naa alɗo asaw ɗa, o naa alɗiyo beneyya ɗa, gu gaari marakkayo ɗa kayyeeco. A haŋka soopa, maa na asiɗe na asiyyo beneyya, gu lekka ɗa saamiyo ta zunubgeeco. 23Gimu ma ɗakattino ɗakattiya kulla Tattu. 24Naa alɗo liyaw ɗa gaari ku ajjibiti maa ga gimu kaytiŋ leelo ɗa, gu zunubgeeco marakkayo ɗa kayyeeco. A haŋka soopa, gu elliy appe gaari kotti, guu ɗakaɗɗini kanco missa ma Tattu. 25Keeke pa deero ku maa ga beneyti Kitamniti asiɗo butulti. Gita pa beneyye gee: “Guta ɗakitinoo bala botol#15.25 Elloŋ Soom 35.19 o Soom 69.5..”

26«Gita ma gayaatoŋ pa akka asa. Gita taata pa ay Ruuhane ta seeniti ma asaa min oko Mella Baaba. Na n̰akammatoŋca min oko Mella Baaba gi asittoŋ beneyya ma gaartaw, 27o kuŋ kulla deeɗiyo beneyyo oko giimo ma gaartaw asan ku aaye ma naata min diiliti lubbitu.»

Currently Selected:

Yaaya 15: mmy

Highlight

Copy