Yaaya 11

Muutti Lazar

1Lekke miɗi kaƴi aɗe maa gu semeetee goo Lazar ma parayya. Gata pa aaye darre maa gu kolaa goo Beetani. Seneetee ku daatta pa goo Mariyam o Marsa. Guta kulla nowotte Beetani. 2Ay Mariyam taata appe ma akkee kalla itir asintee Miltine kee Iisa, gii asiyyeegu sawwa ma laawa ku kayaatí#11.2 Elloŋ Yaaya 12.3.. Ay Mariyam taata appe maa ga sintí parayya. 3Guu seneetee ku daatta kotti pa, n̰aamiyyee gimu oko Iisa ga deeɗiyee beneyya gaa: «Miltu, lanjincum parayya.»

4Maa ga Iisa giyyiɗe, gaa beneyyiɗe gaa: «Parayti keeke deewaa ɗa, innasoopa ga ay ku maa gu giimi ellicca darjanti Mellayi o maa gu semeetee Runti deeɗo cipilenta.»

5Iisa pa ƴekkay ini Marsa ma suttí o sinco kee Lazar. 6Gaa ma keeke aɗe soopa, ga maa ga Iisa giyyiɗe kadar ga Lazar parayya, ga leelo payya meeni seera wikirti maa ga alɗo kaaka. 7Gaa beneyyiyyoo ka pe oko jobookeetee gaa: «Yookine kiɗa ta Yudee.» 8Guu jobookeetee tiiliyyee goo: «Garaawa, katta keeke ka gu Yawudigee deyekkam gu aŋkiɗo diyawcum ma dawwo ta dambeyyo, gaa haŋka ki aŋkiɗo payya yooko were kaaka?» 9Gaa Iisa beneyyiyyoo gaa: «Ay seene aɗe ga min sossoko ya pootimooko gi bahaarane ta dunuune teete beree. Ay ɗakko appe ga gimu, gaa tan̰aa ma paato ga alɗo baɗakka ɗa, asan ga ella samaane. 10Innasoopa ga gimu, gaa tan̰aa ma aandoŋ ga baɗakka, asan gi bahaarane aaye ɗa payya.»

11Gaa min oko beneyti kaaka, ga gaayiɗe payya gaa: «Lanjintine kee Lazar ooƴe, innasoopa na kataa, na deeɗiya miina.» 12Guu jobookeetee tiiliyyee goo: «Miltini, gaa gasse waani, ga rayyadda.» 13Caŋ gaa beneyti Iisa kaaka ga aŋka ga leeɗiyo gaa ga Lazar maate, guta soopa oko kanco ka gu leewe goo ga beneyyayo ma gaari ku waani ku maani kooko ka. 14Gaa Iisa pa beneyyiyyoo saa pe purta gaa: «Lazar maate. 15Naa parhinenta ma parayti Lazar, maa na alɗo ɗa ma gata. Mella leyya keeke, saanantoŋ ku maa ku dowɗiy galbigeetoŋ oko naata. Wacine anne, ke deeɗineega ella.» 16Gaa Toma, maa gu kolaa kulla goo Maajibu, beneyyiyyoo oko jobookee daare gaa: «Anne ga keeta kulla, ke deeɗine matta ma garaawatine.»

Iisa ma Marsa o Mariyam

17Maa ga Iisa ma jobookeetee yookiɗe were kaaka, guu giyyiɗe kadar ga Lazar gu sayawwiya paaɗe ga lekkiɗo meeni pooɗi. 18Beetani pa aaye kilometir subba min Zerizalem. 19Ay ɗakko appe gu giimi maani ku kiɗa ta Yudee asiɗe daddibico Marsa ma gattí Mariyam oko sinco ma maate.

20Maa gi Marsa giyyiɗe kadar ga Iisa ase paaɗe katta biití hellanti, gi wace, gi kaatiɗe joobiti. Mariyam soopa mare giiri. 21Gii Marsa beneyyiyyee oko Iisa gee: «Miltu, ki alɗo iŋee ampane kee, ga sintu mataa ɗa. 22Innasoopa, ga haŋka kulla na lekka kabarre kadar ga Mella beramga latta paratti maa ki enaa min oko gata.» 23Gaa Iisa beneyyitti gaa: «Sinte naɗakka min muuti.» 24Gii Marsa tiiliyyee gee: «Na lekka kabarre kadar ga akka naɗa ya gaamití dunuune teete, wikinne maa guu giimi paracco ma matakke ase naɗa.»

25Gaa Iisa beneyyitti gaa: «Ay naa appe ma ay naɗaw o ma ay hayaatane. Gimu ma dowwica galbanti oko naata, gaa maate kulla, ga lekkica hayaatane ma gakamma ɗa ta kaw, 26o kulla gimu aɗe ma lekka hayaatane o ga dowwica galbanti oko naa pa, mataa ɗa payya ta kaw. Ka amanne oko keeke e?» 27Gii Marsa tiiliyyee gee: «Haa Miltu, na amanne kadar ki ay Masi, gata maa ga Mella aparre, o ki ay Runti Mellayi maa gu nabiinigee beneyye goo ga akka asa dunuune teete.»

28Maa gi Marsa beneyyiɗe goŋŋa pa, gii kaatiɗe kollití suttí tee Mariyam gi deeɗiti beneyya ma semsimo ka gee: «Garaawa aaye iŋaa, gaa ka asu.» 29Maa gi Mariyam giyyiɗe goŋŋa, gii waciɗe koɗok, gi kaatiyyee oko Iisa. 30Iisa soopa sarakke ɗa missa aattí darriti, aaye were kee ka maa gi Marsa joobiyya. 31Yawudigee koo pa ma asee daddibití Mariyam aaye ka missa. Maa gu ellicca Mariyam gi wace koɗok gi oomiɗe, guu jobbicca, asan gu leewe goo walaŋ pe gi kataa gonek mooniti gi deeɗo erca.

32Gii Mariyam sarɗe were maa ga Iisa alɗo. Maa gi elliyya ka, gi galiyyee asintee, gii beneyyiyyee gee: «Miltu, ki alɗo iŋee ampane kee, ga sintu mataa ɗa.» 33Maa ga Iisa ellicca gi erecca, o Yawudigee ma katee ma gita kulla erecca, gii galbanti naŋgiɗe, gaa zorontiyɗe. 34Gaa inniɗiy gaa: «Ku issiya taŋaa?» Guu tiiliyyee goo: «Miltini, asu ni asiyyamga garaa were.»

35Gaa Iisa erciɗe. 36Guu Yawudigee beneyyiɗe goo: «Elloŋ pe, maa ga ƴekkiya Lazar.» 37Guu daare soo min aacco goo: «Gata ma gederre ga iyyiyyeegu iɗiico koor̰eyyo, gederra ɗa aɗe ampane kee kulla ga toɗɗiyee muutu oko Lazar e?»

Iisa naɗakkaa Lazar min muuti

38Iisa ƴa gi galbanti nagakke missa, gaa kaatiɗe mooniti. Moone taata pa ay gur̰ba ta panenta balti dambi, guu tagaɗɗica ma gur̰bu. 39Gaa Iisa beneyyiɗe gaa: «Saapoŋga maaƴi gur̰bu min biití mooniti.» Gii Marsa sutti oko Lazar gata ma maate beneyyiyyee gee: «Miltu, haŋka kee ga nobokka, asan ga lekka paaɗe meeni pooɗi iŋee.» 40Gaa Iisa tiilitti gaa: «Na beneyyite ɗa aɗe naa kaa dowwica galbante oko naata, ka ellaca darjanti Mellayi e?»

41Guu saapiyya gur̰bu min biití mooniti. Gaa Iisa cukilɗe uwwa samaani, gaa beneyyiɗe gaa: «Baaba, na leewam barkincum, maa ki giyyinnoo. 42Na lekka kabarre kadar ki geewano diiman, innasoopa, na enaam saananco giimi kooko ma kadarrino ku maa gu amanniɗo kadar ga kii ma n̰akamminoo.» 43Maa ga beneyyiyyee oko Mellayi goŋŋa, gaa ayyitiɗe ma raɗɗa gaa: «Lazar, oomu!» 44Gaa Lazar ma maate oomiɗe ma pittee o asintee onnenta o kayaati ɗamalmilenta ma kapanne. Gaa Iisa beneyyiyyoo gaa: «Ipirne, kuu duwinnee ga kaatiɗo.»

Taattuweeco Yawudigeyyo bodaa ma ka diyawti Iisa

(Elloŋ Matiye 26.1-5, Mark 14.1-2, Lik 22.1-2)

45Guu Yawudigee ku maani koo ma katee daddibiti wikirco Mariyam elliɗiy gaari ku ajjibiti maa ga Iisa leelo, guu duwɗiy galbigeeco oko gata. 46Innasoopa, gu daare min aacco kaate gu deeɗiy gassa Pariziyennigee guu deeɗiyoogu jeppa gaartee Iisa maa ga leelo.

47Guu taattuweeco soƴoowee ku saɗikaŋgeyyo o Pariziyennigee tappiɗiy taattuweeco Yawudigeyyo ku parlanti paracco guu waaciɗiy kayyeeco. Maa gu waaciɗiy, guu beneyyiɗe goo: «Ke leewa pe kee me? Gimu keeke leewa garaawi ku ajjibiti maani! 48Kee toɗɗiyee ɗa liyaw ta gaartee kooko, gu giimi paracco akkiy dowwa galbigeeco oko gata. Guu asaakargee ku kiɗa ta Rooma asinne bitta kee Yawudigee parattine, guu ɗiminneega girti Mellayi.»

49Gaa lekkiɗo tattuwe kaƴi aɗe min aacco maa gu semeetee goo Kayip. Gata pa ay tattuwco oko taattuweeco soƴoowee ku saɗikaŋgeyyo ƴila taata. Gata kaaka pa beneyyiyoo oko gittee gaa: «Ku ibina ɗa maatiki! 50Aŋka ku leeɗo kabarre kadar gi samaane ƴiila ga gimu kaƴi ka maatiɗo gaddanco oko Yawudigee paracco min maa gu gimtine paracco battiɗo.»

51Caŋ gaa beneyti maa ga beneyye kaaka pa okomme ɗa min oko mooyo tanti ka. Ay maa ga alɗo tattuwco oko taattuweeco soƴoowee ku saɗikaŋgeyyo ka ƴila taata, ga Mella biryee gudirane maa ga beneyyiɗe saa min omma ma gaari ma akka asa. Ay ɗakko appe ga leeɗe gaa ga Iisa akka maata gaddanco Yawudigee paracco. 52Soopa ay oko guta ɗa ka, gata maata kulla oko rontee Mellayi paracco ma tacalle were paratti, ku maa ga timmiɗiy gu deeɗo kaƴi ka.

53Gaa min oko meene maa ga Kayip beneyyiɗe taata, gu taattuweeco Yawudigeyyo boodiɗe pe ma ka diyawti Iisa. 54Ay ɗakko appe ga Iisa tan̰awɗo pe ma gubbo ka aacco Yawudigeyyo, gaa kaatiɗe ga deeɗe nunta geegar kaƴi maa gu kolaa goo Epirayim ma aaye katta goosigeyyo. Gaa deeɗe nunta ma jobookeetee gonek.

55Maa ga wikinne ka laalanco Yawudigeyyo maa gu kolaa goo Pak garribiɗe, guu giimi maani min diyargee ku renta kaatiɗe Zerizalem. Guta pa kaate omma paalta min oko laalane ta Pakti, asan gu deeɗiy apila zeneeco ku maa gu deeɗo samaane unti Mellayi. 56Giimi ma ase laalanti kotti pa, deyekka Iisa, guu enewɗo zeneeco dooranti girti Mellayi goo: «Ku ga asaa aɗe alka laalanti?» 57Guta pa beneyye aacco goŋŋa, asan gu taattuweeco soƴoowee ku saɗikaŋgeyyo o Pariziyennigee deewiya beneyco goo guu giimi ibinya were maa ga alɗo, gu gaarayooga gu deeɗiya baama.

Currently Selected:

Yaaya 11: mmy

Highlight

Copy